
遍知贝玛嘎波大师教言集PK22དཔལ་འབྲུག་པ་ཐམས་ཅད་མཁྱེན་པ་ཆེན་པོའི་རྣམ་པར་ཐར་པ་རྒྱ་མཚོ་ལྟ་བུའི་འཕྲོས་ཆ་ཤས་ཙམ་བརྗོད་པ་དད་བའི་རྦ་རླབས་ཞེས་བྱ་བ།
4-1
༄༅། །དཔལ་འབྲུག་པ་ཐམས་ཅད་མཁྱེན་པ་ཆེན་པོའི་རྣམ་པར་ཐར་པ་རྒྱ་མཚོ་ལྟ་བུའི་འཕྲོས་ཆ་ཤས་ཙམ་བརྗོད་པ་དད་བའི་རྦ་རླབས་ཞེས་བྱ་བ།
༄༅། །དཔལ་འབྲུག་པ་ཐམས་ཅད་མཁྱེན་པ་ཆེན་པོའི་རྣམ་པར་ཐར་པ་རྒྱ་མཚོ་ལྟ་བུའི་འཕྲོས་ཆ་ཤས་ཙམ་བརྗོད་པ་དད་བའི་རྦ་རླབས་ཞེས་བྱ་བ་བཞུགསོ། ། ༄༅། །རྒྱལ་དབང་ཐམས་ཅད་མཁྱེན་པ་ཆེན་པོའི་རྣམ་པར་ཐར་པའི་འཕྲོས་ལོ་བཅོ་བརྒྱད་འདུག་པ། གདུལ་བྱར་གྱུར་བའི་སྐྱེ་དགུ་མཐའ་དག །སྐྱེས་བུ་ཆེན་པོའི་མཛད་པ་ལ་དད་པ་དང་། མོས་པ་དང་། རྗེས་སུ་ཡི་རང་བས་བསོད་ནམས་སྤེལ་བའི་སླད་དུ་ཡི་གེའི་འཕྲེང་བར་འགོད་པར་རིགས་སོ། །གང་མི་གསལ་བ་རྣམས་གཟིམས་དཔོན་སོགས་སྐུ་འཁོར་སྤྱན་སྔ་བ་དིང་སང་མང་བས། དེ་རྣམས་དང་གླེང་ཞིང་གཏམ་དྲི་བ་ཡང་སྐབས་སུ་བབ་པ་ཉིད་དོ་ཞེས། བླ་མ་དམ་པ་མཆོག་ཟུང་གི་བཀས་གདམས་སོ། །གསུང་ཇི་བཞིན་དུ་བསྒྲུབ་པར་ནི་མོས་ལ། ཤེས་བྱ་དང་མ་འགྲོགས་པས་ཇི་ལྟར་བྱ་སྙམ་ཡིད་རབ་ཏུ་གཡོ་བར་གྱུར་ཏོ། །དེའི་ཚེ་ད་ནི་གསོལ་བ་བཏབ་པར་རིགས་སོ་སྙམ་པས། རྒྱལ་བའི་དབང་པོ་དེ་ཉིད་ཀྱི་སྐུའི་སྣང་བརྙན། མཁྱེན་པའི་ཡེ་ཤེས། བརྩེ་བའི་ཐུགས་རྗེ། མཛད་པའི་འཕྲིན་ལས་རྣམས་རྗེས་སུ་དྲན་པའི་མོད་ལ་ཐལ་མོ་སྤྱི་བོར་སྦྱང་ཏེ། ཐམས་ཅད་མཁྱེན་པ། ཐམས་ཅད་གཟིགས་པ། མི་ཤེས་པའི་མུན་པ་སེལ་བས་ཉིན་མོར་བྱེད་པ། མ་རིག་པའི་དྲི་མ་འཁྲུད་པར་བྱེད་པས་གངྒཱ་ཆེན་པོ། ཐེ་ཚོམ་གྱི་དྲ་བ་མཐའ་དག་གཅོད་པས་འཇམ་མགོན་གྱི་རལ་གྲི། 
4-2
བསམ་བའི་དོན་མ་ལུས་པ་སྟེར་བས་ཡིད་བཞིན་གྱི་ནོར་བུ་མཚུངས་པ་མེད་པ། རྒྱལ་བ་སྐུ་བཞིའི་དབང་ཕྱུག །ཅི་མཛད་ཡེ་ཤེས་ཀྱི་རོལ་པ། གང་འདུལ་དེར་སྟོན་གྱི་སྤྲུལ་སྐུ། སྟོན་པ་གཉིས་པ་ལྟ་བུར་ལྷ་དང་བཅས་པའི་ལུས་ཅན་ཀུན་གྱིས་ཞབས་ཀྱི་པདྨོ་ལ་གཏུགས་ཏེ་སྙན་པའི་བ་དན་སྲིད་རྩེའི་བར་སྒྲེང་བ། མཚན་བརྗོད་པར་དཀའ་ཞིང་འཛམ་བུའི་གླིང་ཀུན་ཏུ་ཁྱབ་པ། མི་ཕམ་པདྨ་དཀར་པོ་ཀུན་མཁྱེན་ཆེན་པོ་འགྲོ་བའི་བླ་མ་དེ་ཉིད་ཀྱི་ཞབས་ལ་ཕྱག་འཚལ་ལོ། །བཀའི་གནང་བ་ཆེན་པོས་བདག་ལ་སྤོབས་པའི་མཆོག་སྩལ་དུ་གསོལ་ཞེས་བགྱིས་སོ། །དེ་ཡང་རྣམ་པར་ཐར་པ་སྔ་མ་བཞིན་དབུ་ཞབས་བར་དུ་སྙན་ངག་རྒྱན་གྱིས་སྤྲས་པ་ཞིག་ན་མཛེས་པར་སྣང་ཡང་། ཁོ་བོ་ལ་དེ་ལྟ་བུའི་རྣམ་དཔྱོད་མི་ལྡན་ཞིང་། སོ་སོ་སྐྱེ་བོས་སྦྱར་བའི་ཚིགས་བཅད་ལ། གདུལ་བྱའི་རྒྱུད་བྱིན་གྱིས་རློབ་པའི་ནུས་པའང་མ་མཆིས་པས། རྗེ་བཙུན་ཐམས་ཅད་མཁྱེན་པ་ཉིད་ཀྱི་གསུང་དུམ་བུ་སྐབས་སུ་བབ་ལ། དེ་དང་དེར་རྩལ་བ་འགའ་ཞིག་བཀོད་ན་ཉན་པར་འདོད་པ་དག་སྤྲོ་བ་བསྐྱེད་ཅིང་བྱིན་རླབས་ཀྱི་མཐུ་མི་ཟད་པ་དང་ལྡན་པར་ཤེས་ནས་ཐོག་མར་གསུང་འདི་ཉིད་བཀོད་དོ། །ཆུ་ཀླུང་ཀུན་ན་ཅིག་ཅར་ཟླ་བརྙན་བཞིན། །འགྲོ་མང་འདུལ་ལ་སྤྲུལ་པའི་སྐུ་དེ་ལྟའི། །
4-3
འཕགས་མཆོག་རྣམས་ཀྱི་ཐུགས་རྗེའི་འཕྲུལ་ཆེན་པོ། །འཇིག་རྟེན་གསུམ་ན་བསྔགས་འོས་སྙིང་པོ་ཡིན། །དིང་སང་ཆེན་པོར་འགྱིད་བ་དག་གི་སྐྱེ་བའི་རབས་ཤིན་ཏུ་ལྐོག་ཏུ་གྱུར་བ་གཞལ་བ་ལ་ལུང་ཚད་མར་གྱུར་པ་ནི། སློབ་དཔོན་ཆེན་པོ་པདྨ་ཀ་རའི་གཏེར་ཆོས་ཁོ་ནར་སྣང་ངོ་། །དེ་ལ་འདིར་གུ་རུ་ཆོས་དབང་གི་གཏེར་ཁ་མཁའ་རིའི་ཞུས་ལན་དུ། ས་རལ་ཞེས་བྱའི་ལུང་གསུམ་མདོར། །ནོར་བུ་འཛིན་པའི་སྤྲུལ་པ་འབྱུང་། ཕ་བོང་ཤོ་འདྲའི་སྟེང་ནས་ཆོས་འཆད་རྩོམ། །ཞེས་གཙང་པ་རྒྱ་རས་སྤྱན་རས་གཟིགས་སུ་ལུང་བསྟན་པ་དང་། རཏྣ་གླིང་པ་དང་པདྨ་གླིང་པ་གཉིས་ཀའི་གཏེར་ཡིག་ཏུ། ནཱ་རོ་པཎ་ཆེན་སྒྱུ་མའི་གར་བསྒྱུར་བ། གཙང་པ་རྒྱ་རས་འབྲུག་དང་ར་ལུང་འབྱོན། །ཞེས་གསུངས་པས། དང་པོའི་དབང་དུ་བྱས་ནས་རིགས་ལྡན་པདྨ་དཀར་པོ་དང་། ཆོས་ཀྱི་རྒྱལ་པོ་སྲོང་བཙན་སྒམ་པོ་དང་། སློབ་དཔོན་ཆེན་པོ་པདྨར་བརྗོད་ལ། ཕྱི་མས་ནཱ་རོ་པ་ཆེན་པོར་གྲུབ། གཞན་ཡང་ཆོས་རྒྱལ་རིན་ཆེན་གླིང་པའི་གཏེར་ཡིག་ཏུ། བོ་དྷི་སཏྭ་ཡིན་པ་དང་། དེ་ཉིད་ལྷོ་ཕྱོགས་ཀྱི་རྒྱལ་རིགས་སུ་འཁྲུང་པར་ལུང་བསྟན་པ་དང་། རྡོ་རྗེ་གླིང་པའི་གཏེར་ཡིག་ལས། གཉལ་ལུང་པ་རྒྱལ་པོ་གཅིག་གི་ལུང་འོག་ཏུ་འཇུག །དེའི་ཚེ་ལུང་པ་དེའི་རྒྱལ་པོར་སྤྱན་རས་གཟིགས་ཀྱི་སྤྲུལ་པའི་སྐུ་ཞིག་འབྱོན་ནོ། །
4-4
ཞེས་ལུང་བསྟན་པ་འཇམ་པའི་དབྱངས་ཆོས་ཀྱི་གྲགས་པ་ལས་གཞན་འོས་མེད་པས་སོ། །སྤྱན་རས་གཟིགས་ཞེས་བྱ་བ་ཡང་རྒྱལ་བ་རྣམས་ཀྱི་ཐུགས་རྗེ་ཆེན་པོ་ལ་བསྙད་པར་འདུག་ལ། འགྲོ་བ་རྣམས་འཁོར་བ་ལས་འདོན་པ་ནི་དེའི་མཐུ་ལས་ཡིན་པས། དེའི་བསྟོད་པར། ཕྱག་སྟོང་འཁོར་ལོ་སྒྱུར་བའི་རྒྱལ་པོ་སྟོང་། །སྤྱན་སྟོང་བསྐལ་པ་བཟང་པོའི་སངས་རྒྱས་སྟོང་། །གང་ལ་གང་འདུལ་དེ་ལ་དེར་སྟོན་པའི། །བཙུན་པ་སྤྱན་རས་གཟིགས་ལ་ཕྱག་འཚལ་ལོ། །ཞེས་འབྱུང་བ་ཡིན་ནོ། །དཀར་རྒྱུད་འདི་ཉིད་ཀྱི་ཏི་པུ་གསང་སྔགས་སྡོང་པོའི་གསུང་རས་ཆུང་པས་དྲངས་པར། སྐལ་ལྡན་ནམཁའི་གོས་ཅན་དང་། །སྙིང་རྗེའི་མེ་ཏོག་ཐོད་ཅན་ལ། །ཞེས་གཙང་པ་རྒྱ་རས་རྒྱལ་བའི་སྙིང་རྗེའི་བདག་པོར་བཤད་པ་དང་། བླ་མ་ཞང་དང་། གྲུབ་ཐོབ་གླིང་རྣམས་ཀྱིས་ནཱ་རོ་པར་ལུང་བསྟན་པ་དང་། པདྨ་སམྦྷ་ཡིན་པས་དྭགས་པོ་ལྷ་རྗེར་གྲུབ་པ་ནི། པདྨ་ང་ནི་གཉལ་སྨད་ལྷ་རྗེར་སྤྲུལ། །སྒམ་པོའི་རི་ལ་དོན་སྒོམ་ཁྱུ་ཅིག་འབྱུང་། །ཞེས་དང་། ཆོས་རྗེ་གཙང་པ་རྒྱ་རས་ཀྱིས། སྐྱེ་བ་གཅིག་གསང་དགོས་པར་གདའ་གསུངས་པ་ཟླ་འོད་གཞོན་ནུ་ཡིན། དེའི་དབང་གི་རྒྱལ་དབང་རྗེས། ཡོངས་རྫོགས་ཀྱི་ནཱ་རོ་པཎ་ཆེན་དང་། །མཁའ་ཁྱབ་ཀྱི་ཟླ་འོད་གཞོན་ནུའི་མཚན། །གཅིག་འདྲེས་ཀྱི་གཙང་པ་རྒྱ་རས་པ། །བདག་རྣལ་འབྱོར་གྱི་སེམས་ཉིད་གཉུག་མ་རྣམས། །
4-5
བཟང་ངན་དང་ཐ་དད་མ་མཆིས་པས། །གཅིག་དང་ཐ་དད་དུ་རྟོག་པ་དེ། །ལོག་རྟོག་གི་མར་འབྱམས་རིང་མོ་ལགས། །ཞེ་འདོད་ཀྱི་སྤྲོས་པ་ཟད་པ་ན། །དུས་གསུམ་སངས་རྒྱས་ངོ་བོ་གཅིག །ཅེས་དང་། དཀར་རྒྱུད་གསེར་འཕྲེང་མང་པོར་བཤད་པ་ཡིན་ནོ། །ད་ནི་དེ་མ་ཐག་ཏུ་དེའི་སྐྱེ་བ་འབྱུང་བ་མི་འཐད་དོ་ཞེ་ན། རྣམ་བཞག་དེ་ནི་ལས་ཉོན་གྱིས་འདུས་བྱས་པའི་སོ་སོ་སྐྱེ་བོ་ཁོ་ན་ལ་ཡིན་གྱི། ཐེག་ཆེན་འཕགས་པ་རྣམས་ལ་ནི་བསམ་གྱིས་མི་ཁྱབ་པའི་འཆི་འཕོ་བཤད། དེའི་དབང་གིས་སེམས་ཅན་མོས་པ་སྣ་ཚོགས་པའི་ངོར་འདུལ་བྱེད་ཀྱི་སྤྲུལ་པ་སྣ་ཚོགས་པ་ཅིག་ཅར་དུ་སྟོན་པ་འདི་ནི་བྱང་ཆུབ་སེམས་དཔའི་ངོ་མཚར་གྱི་འཕྲུལ་ཆེན་པོ། བླུན་པོས་མི་གོ། སྡེ་སྣོད་ལེགས་པར་ཤེས་པ་དག་གིས་ཤེས་ཏེ། དེ་དེ་བཞིན་ནོ་ཞེས་ལན་འདེབས་པར་འགྱུར་བ་ཉིད་དོ། ། ཡང་སྐྱེ་བ་དང་སྤྲུལ་པ་མི་འདྲའོ་སྙམ་ན། དེ་མི་འཐད་པར་ཕྱག་རྡོར་དབང་བསྐུར་གྱི་རྒྱུད་དུ། ཀུན་ཏུ་བཟང་པོ་སྐྱེ་བ་བརྒྱུད་པ་ཕྱག་ན་རྡོ་རྗེར་བཤད་ནས། དེ་གཉིས་ཀ་ཉེ་བའི་སྲས་བརྒྱད་ཀྱི་ནང་དུ་མཉམ་པོར་ཕེབས་པས་འགྲུབ་བོ། །ཞེས་དང་། སྐྱེས་བུ་དམ་ལ་རྣམས་ནི་རང་གི་ཡོན་ཏན་ཇི་ལྟ་བ་གཞན་གྱི་ངོར་མངོན་སུམ་དུ་མི་མཛད། གྱི་ཙམ་གྱིས་གདུལ་བྱ་མགུ་བར་གྱུར་བ་དེ་ཙམ་ཞིག་དེ་དག་ལ་སྟོན་པར་འགྱུར་རོ་ཞེས་གསུང་པའང་ཐོས་སོ། །
4-6
དེ་ལྟ་བས་ན་སྐྱེས་བུ་ཆེན་པོའི་མཛད་པའི་ཕ་མཐའ་སུ་ཡིས་རྟོགས། གདུལ་བྱ་རང་རང་གི་མོས་ངོ་ལྟར་ན། དགུང་ལོ་བཅུ་དགུའི་སྟེང་ནས་འཇམ་པའི་དབྱངས་གཉིས་པར་གྱུར་ཏེ། འཆད་པའི་ཁྲི་ཆེན་པོ་མངོན་པར་གྲུབ། ཉན་པ་པོ་ནི་པདྨའི་མཚོ་ལ་ངང་པ་བཞིན་དུ་འདུས། ཀློག་པ་དང་སྤོང་བ་པའི་སྡེ་གསར་པ་ནི་ཕྱོགས་ཀུན་ཏུ་དར་བར་མཛད། མདོ་རྒྱུད་བསྟན་བཅོས་མཐའ་དག་ནི་བཤད་པས་གཏན་ལ་འབེབས། དོགས་གཅོད་ཀྱི་མཐའ་མ་ལུས་པ་ནི་སེལ། དྭགས་པོ་དཀར་རྒྱུད་ཀྱི་གདམས་ངག་ནི་ཐང་མར་བརྡལ། སྒོམ་ཁྲིད་ཀྱི་ཕྱག་ལེན་འཕྱུག་པ་མེད་པ་ནི་སྟོན། ངོ་སྤྲོད་མཛུབ་ཚུགས་སུ་འདེབས་པ་ལ་ནི་མཁས། འཆད་རྩོད་རྩོམ་པའི་མཛད་པས་ནི་དུས་འདའ། དེ་ལྟ་བས་བོད་འདིར་ཐུབ་པའི་བསྟན་པ་ལ་མཛད་པའི་ཕྱག་རྗེས་འགྲན་ཟླ་མེད་པར་གྱུར་ཏོ། །དེ་ལྟ་བུས་གདུལ་བྱ་འཁོར་སློབ་བསམ་གྱིས་མི་ཁྱབ་པའི་ནང་ནས། བསྟན་འགྲོའི་དཔལ་དུ་གྱུར་པ་ཐུགས་ཀྱི་སྲས་ཐོག་མཐའ་བར་དུ་བྱོན་པ་གྲངས་ཀྱིས་གཞལ་བར་ག་ལ་ནུས། འོན་ཀྱང་དང་པོར་བྱོན་པ་རྣམས་མ་སྨོས། བར་དང་ཕྱིས་འཚར་གྱི་ཚུལ་དུ་བྱོན་པ་རགས་པ་ཙམ་གྱི་སྐུ་ཆེ་བའི་ཡོན་ཏན་མདོར་བསྡུས་རེའང་བརྗོད་པར་རིགས་སོ་སྙམ་མོ། །དེ་ཡང་སྔ་ལོ་དེ་རྣམ་པར་ཐར་པ་ཐུགས་རྗེ་ཆེན་པོའི་ཟློས་གར་ཞེས་བྱ་བ། 
4-7
བྱང་སྟོན་གཞུང་བརྒྱ་སྨྲ་བ་ཆོས་ཀྱི་དཔལ་བཟང་གི་ངོར་གསུངས་སོ། །ཞུ་བ་པོ་འདི་ཉིད་འཁྲུངས་པའི་ཡུལ་ནི་ལ་སྟོད་གཅུང་གི་དཔལ་སྡིངས། སྐུ་གཞོན་ནུ་ནས་རབ་ཏུ་བྱུང་། སྨན་དཔྱད་མཁས་པར་མཁྱེན། གཉན་ཡོད་བྱར་གཤོངས་སུ་མདོ་ཕྱོགས་ཀྱི་གསན་པ་མཐར་ཕྱིན་པ་མཛད། སྟོན་བཟང་གི་གྲགས་པས་ཁྱབ། སྔགས་རྙིང་མའང་དུ་མ་གསན། དེ་ནས་རྒྱལ་བའི་དབང་པོ་ཉིད་ཀྱི་ཞབས་ལ་གཏུགས་། སྤྱན་སྔ་བར་བཞུགས་ནས་གསན་པ་མཐར་བསྐྱལ། གྲུབ་མཐའི་གནས་ཐམས་ཅད་ལ་མཁས་པར་སྦྱངས། མདོ་ཕྱོགས་ཀྱི་བཤད་པའི་བཀའ་བབས་གཏད། མཚན་ཉིད་ཀྱི་འཆད་ཉན་ལོ་བཅུ་དྲུག་བསྐྱངས། གྲྭ་ཚང་འདི་ལ་བཀའ་རབ་འབྱམས་སྨྲ་བ་མང་པོ་དང་། དགེ་འདུན་བཞུགས་གནས་ཁྲ་ཕུང་པ་ཞིག་མ་བྱུང་རིང་ཀུན་སྤངས་མི་བྱེད་ཅེས་ཞལ་གྱིས་བཞེས་པས་ཐམས་ཅད་མཁྱེན་པ་ཆེན་པོ་ལྷག་པར་མཉེས། བསྟན་བཅོས་མང་པོའི་ཞུ་བ་པོའང་ཡིན། གསུང་ཟིན་བྲིས་མང་དུ་མཛད། དགེ་བའི་བཤེས་གཉེན་རགས་ལ་མང་བ་ཐོན། གྲྭ་ཚང་ལ་བཞུགས་གནས་ཇི་སྐད་གསུང་བ་བཞིན་འབྱོར་ནས་ཀུན་སྤངས་མཛད། ཆུ་བར་དང་མཁའ་འགྲོ་རོལ་པ་གླིང་སོགས་སུ་དབེན་པ་བསྟེན། རྟོགས་པ་མངོན་དུ་གྱུར། ཉི་མ་ལ་སྟོད་ཀྱི་ཕྱོགས་སུ། བྱང་པ་ཆོས་རྒྱལ་བཀྲ་ཤིས་སྟོབས་རྒྱས་པ་ཁུ་དབོན་བཙུན་མོ་དང་བཅས་པའི་ཏི་ཤྲཱིར་བཀུར། རི་བོ་ཆེ་ནས་རྗེ་དྲུང་འགྱུར་མེད་བདེ་ཆེན་སོགས་དགེ་བའི་བཤེས་གཉེན་ཆེ་དགུས་གཏུགས། 
4-8
ལྷོ་བྱང་ལྷུན་རྩེ་རྣམས་སུ་འཕྲིན་ལས་བསམ་གྱིས་མི་ཁྱབ་པོ། །དེ་ཡང་དང་པོའི་སངས་རྒྱས་དུས་ཀྱི་འཁོར་ལོ་རྒྱ་གར་འཕགས་པའི་ཡུལ་དུ་ཕེབས་པའི་ཕྱི་ལོ། རབ་བྱུང་གི་ལོ་ནས་བརྩིས་བའི་ལྔ་བརྒྱ་དང་བཞི་བཅུ་རྩ་བརྒྱད་པ། རིགས་ལྡན་རྣམ་གནོན་ཆོས་ཀྱི་ཁྲི་ཆེན་པོ་ལ་འཛེགས་ནས་ལོ་ཞེ་བརྒྱད་ལོན་པ། རྒྱལ་དབང་ཐམས་ཅད་མཁྱེན་པ་ཉིད་དགུང་ལོ་བཞི་བཅུ་རྩ་དགུ་པ། ཤིང་མོ་ཕག་ན་ཚོད་ལྡན་གྱི་ལོ་ལ། རྩིས་ཀྱི་ལག་ལེན་མདོ་ཙམ་བརྗོད་པ་དུས་ཀྱི་འཁོར་ལོ་གསལ་བར་བྱེད་པ་ཞེས་པ་དང་། གཞན་དུ་མཆོག་གི་དང་པོའི་སངས་རྒྱས་རྣམ་པར་ཕྱེ་བ་གསང་བ་ཐམས་ཅད་བཤད་པའི་མཛོད་ཅེས་བྱ་བ་དམར་སྟོན་ལུང་བསྟན་རྡོ་རྗེས་གསོལ་བ་བཏབ་པའི་ངོར་མཛད་སྐབས་རྗེ་བཙུན་མཐུ་སྟོབས་ཞབས་ཡོན་ཏན་ཡེ་ཤེས་ཀྱི་གདུང་ཡིད་བཞིན་གྱི་ནོར་བུ་མ་ཉམས་པར་བཞུགས་པའི་དྲུང་དུ་གསོལ་བ་བཏབ་པས་གང་ལ་ཡང་ཐོགས་པ་མེད་པར་གྱུར་ཏོ་ཞེས་གསུང་ངོ་། །སྒམ་པོ་སྤྱན་སྔ་བཀྲ་ཤིས་རྣམ་རྒྱལ་གྱིས་བསྐུལ་བའི་ངོར། ཕྱག་རྒྱ་ཆེན་པོའི་བཤད་སྦྱར་རྒྱལ་བའི་གན་མཛོད་ཅེས་པའི་བསྟན་བཅོས་ཞག་བཅོ་ལྔའི་ཁོངས་སུ་གྲུབ་པ་མཛད། དེ་ལོ་སེམས་དཔའ་ཆེན་པོ་དུས་འཁོར་བ་རིན་ཆེན་དཔལ་བཟང་དགེ་འདུན་ཅོག་གྲྭ་པ་རྣམས་ཀྱི་བླ་མའི་འོས་སུ་གཟིགས་ཏེ་བཀོད་པ་གནང་། 
4-9
འདི་ཉིད་འཁྲུངས་ཡུལ་གྲྭ་ཕུག་ཏུ་སྲིད་སྒྲུབ་པ་ཆེན་པོའི་རིགས་སུ་འཁྲུངས། གཞོན་ནུ་ནས་དུས་ཀྱི་འཁོར་ལོའི་དབང་རྒྱུད་འགྲེལ་སྤྱིས་ཕྱིན་པ་གསན། དབུས་ཕྱོགས་ཀྱི་ཀར་རྩིས་པ་ཀུན་གྱི་གཏུགས་སར་གྱུར། གཡུལ་ལས་རྣམ་པར་རྒྱལ་བ་ཞིག་གིས་རྐྱེན་བྱས་ཏེ། རྒྱལ་བའི་དབང་པོ་ཐམས་ཅད་མཁྱེན་པ་ཉིད་ཀྱི་ཞབས་ལ་གཏུགས་དབང་ཁྲིད་གདམས་པ་མཐའ་དག་རྫོགས། ཁྱད་པར་རྡོ་རྗེ་གསུམ་གྱི་བསྙེན་བསྒྲུབ་གསན། མུན་ཁང་ལོ་གསུམ་ཕྱོགས་གསུམ་མཐར་ཕྱིན། ཉམས་དང་རྟོགས་པའི་ཡེ་ཤེས་ཁྱད་པར་ཅན་འཁྲུངས། ཕྱིས་བསྙེན་པར་རྫོགས་ནས་གྲྭ་ཚང་གི་ཐུགས་ཁུར་བཞེས། དགེ་འདུན་བརྒྱ་དྲུག་ཅུ་ཙམ་རྟག་པར་འཚོག །སོ་སོ་ཐར་པའི་སྡོམ་པ་འབོགས་པའི་ཆོ་ག་བསྟན་པའི་སྙིང་པོ་ཞེས་བྱ་བའང་འདི་ཉིད་ཀྱི་ངོར་མཛད། བཞུགས་སྒར་དུ་ལས་སློབ་མཛད་པའི་དགེ་སློང་ཤིན་ཏུ་མང་། གྲྭ་སྡིངས་པོ་ཆེར་དོན་གྲུབ་མཐོང་སྨོན་ཞེས་པའི་གཙུག་ལག་ཁང་ཐོག་གཉིས་འདུ་ཁང་ཀ་བ་བཅུ་དྲུག །གཙང་ཁང་། གློ་འབུར་གཡས་གཡོན། སྒོ་ཁང་མདོ་ཁྱམས་དང་བཅས་པ་བཏབ། སྒྲུབ་སྡེ་བཙུགས། ཁྲིད་ཀྱི་འཆད་ཉན་སྨར་བས་སློབ་མ་རྣལ་འབྱོར་གྱི་དབང་ཕྱུག་བས་མཐའ་འགྲིམ་པ་དང་། གཞན་གྱི་བླ་མར་འོས་པ་མང་དུ་འཐོན། རྒྱལ་གླིང་ནས་ཆོས་ཀྱི་རྒྱལ་པོ་བསོད་ནམས་ཆེན་པོའི་བྱིན་དང་ལྡན་པ་སྐུ་འབྲིང་བས་སྦྱིན་བདག་གི་མཐིལ་མཛད། 
4-10
ཆོས་གཞིས་སྦྱར། ཞབས་ཀྱི་པདྨོ་ལ་གཏུགས། དེ་བཞིན་དུ་བྱ་ཆོས་ཀྱི་རྒྱལ་པོ་དམག་དཔོན་པ་དང་། ཤབ་སྒོ་ལྔ་རྩེ་གསུམ་གྱི་ཕྱོགས་སུ་ས་སྐྱོང་དོན་གྲུབ་རྡོ་རྗེ་དཔོན་བློན་རྣམས་ཀྱིས་བླ་མར་ཁུར། བདག་སོགས་སྒར་པའི་འདུས་པ་ཕྱི་མ་ཕལ་ཆེར་གྱིས་ཀྱང་གསུང་གི་བདུད་རྩི་མྱངས་ཏེ་དིང་སང་གི་བར་དུ་འཚོ་ཞིང་གཞེས་ལ། འཕྲིན་ལས་དང་ཕྱག་རྗེས་བཟང་བ་ཞིག་གོ། །ཡང་རྩེར་མགོན་མངས་ཀྱི་དཀྱིལ་ཐང་རབ་གནས་དང་བསྟུན་དབང་ཞུ་བ་འདུན་བཅུ་ཙམ་ལ་མགྲོན་པོ་ལྷ་མངས་ཀྱི་དབང་རྩལ། གཙུག་ལག་ཁང་རྙིང་པར་མགོན་པོ། དཔལ་ལྡན་ལྷ་མོ། དྲང་སྲོང་རྣམས་ལ་གོས་མདོས་རྟེན་གཏོར་སོགས་འཛུགས་པ་གནང་། བསྐང་བ་ཞག་མང་པོའི་རིང་མཛད་དེ་བྱམས་ཆེན་དུ་ཕེབས། དེར་དཔལ་དུས་ཀྱི་འཁོར་ལོའི་རྟེན་བརྟེན་པའི་དཀྱིལ་འཁོར་རས་བྲིས་ལ་བརྟེན་པ་ཞལ་ཕྱེ། སྟ་གོན། དངོས་གཞི་ཐུན་མོང་བྱིས་པ་འཇུག་པའི་དབང་བདུན་ནས། རྡོ་རྗེ་སློབ་དཔོན་བདག་པོ་ཆེན་པོའི་དབང་གི་བར་རྒྱས་པ། གཞན་ཡང་དེར། རྡོ་རྗེ་གདན་བཞི་ལྷ་ལྔ་བཅུ་རྩ་བདུན་པ་དང་། རྡོ་རྗེ་འཇིགས་བྱེད་ལྷ་བཞི་བཅུ་ཞེ་དགུ་པ་སོགས་སྩལ། དེ་དུས་ཀྱི་ཞུ་བ་པོའི་གཙོ་བོ་ནི་རྒྱལ་བྱེད་ཚལ་སྔགས་གྲྭའི་སློབ་དཔོན་པ་འཇམ་དབྱངས་ངག་དབང་བློ་གྲོས་ཉིད་ཡིན། དེ་སྐབས་སྟོན་པའི་དྲིས་སྐུ་སི་ཐང་། 
4-11
ཐུབ་པའི་སྐུ་ཟངས་ཐང་མ། སྣམ་སྦྱར་མངགས་ཐགས་སོགས་གནང་ནས་རྣལ་འབྱོར་ཆེན་པོའི་རྡོ་རྗེ་སློབ་དཔོན་དུ་བསྐོས། རྒྱུད་བཤད་ཀྱི་བཀའ་བབས་གཏད། འདི་ཉིད་རྔོག་པའི་དབོན་མོ་ཞིག་གི་སྲས་སུ་འཁྲུངས། གཞོན་ནུ་ནས་རྒྱུད་དྲུག །དཀྱིལ་འཁོར་བདུན་ལ་སོགས་རྔོག་ཆོས་མཐའ་དག་ལ་སྦྱངས། རྡོ་རྗེ་ཕྲེང་བ་དང་། ལམ་འབྲས་བུ་དང་བཅས་པ་སོགས་གསང་སྔགས་མང་དུ་གསན། རྒྱལ་བའི་དབང་པོ་ལྷོ་བྲག་མཁར་ཆུར་བཞུགས་དུས་ཞབས་ལ་གཏུགས། དབང་། རྒྱུད་བཤད་སོགས་དཀར་རྒྱུད་རིན་པོ་ཆེའི་གདམས་པ་མ་ལུས་པ་བུམ་པ་གང་བྱོའི་ཚུལ་དུ་གསན་པས་རྒྱུད་སྡེ་ཀུན་གྱི་མངའ་བདག་རིག་གནས་མ་ལུས་པའི་འབྱུང་ཁུངས། བཙུན་པ། སྦྱངས་བའི་ཡོན་ཏན་དང་ལྡན་ཞིང་འཆད་ཉན་སྨར་བས་འདི་ཉིད་ཀྱི་ཐོག་ལ་རྒྱུད་སྡེ་ལ་སྦྱངས་པ་ཅན་གྱི་དགེ་བཤེས་རགས་ལ་མང་བ་ཐོན། རྒྱུད་བཤད་ལ་སྦྱངས་པ་སད་པ་ཡིན་ཞེས་ཐམས་ཅད་མཁྱེན་པ་ཉིད་ཀྱིས་ཀྱང་བསྔགས་པ་མཛད་ན་གཞན་ལྟ་ཅི་ཞིག །ཀུན་མཐུན་སྣང་གྲུབ་པའི་འཕྲིན་ལས་བསྐྱངས་སོ། །དེ་ལོ་དཔལ་ལྡན་བླ་མ་དམ་པ་རྡོ་རྗེ་འཛིན་པ་ཆེན་པོ་ཆོས་ཀྱི་མགོན་པོ་སྤྱན་དྲངས། ཐོག་མར་སྐུ་ཚེའི་རྟེན་འབྲེལ་དུ་ཚེ་དབང་བརྒྱ་རྩ་གསན། དེ་ནས་ངག་དབང་ཆོས་ཀྱི་རྒྱལ་པོ་ནས་བརྒྱུད་པའི་སྒྲུབ་ཐབས་རྒྱ་མཚོ། ཕྱག་རྡོར། མགོན་པོའི་སྐོར་སོགས་སྔར་མ་གསན་པ་ཐམས་ཅད་དང་། 
4-12
པོ་ཏི་ལུང་དབང་གསན་པ་རྣམས་ཀྱང་བལྡབས་ནས་གསན། ཏི་པུའི་བཞི་ཆོས་གཞུང་ལྷན་ཐབས་འགྲེལ་པ་སོགས་ཡོངས་རྫོགས། ཞང་གི་བཀའ་རྒྱ་བྱིན་རླབས་ལ་སོགས་ཏེ་ཟབ་པ་དང་རྒྱ་ཆེ་བའི་གདམས་པ་མང་དུ་གསན། གོང་དཀར་ནས་སྡེ་སྲིད་གོང་མ་ཆོས་ཀྱི་རྒྱལ་པོ་ངག་གི་དབང་ཕྱུག་གྲགས་པ་རྣམ་རྒྱལ་དཔལ་བཟང་པོའི་བཀས་བསྐུལ་ནས། ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད་ཅེས་བྱ་བ་མཛད། སྒྲུབ་ཐབས་རྒྱ་མཚོའི་ཆོ་ག་རྗེས་གནང་དང་བཅས་པ་འདོད་དགུའི་དཔལ་སྟེར་ཞེས་པ་སོགས་དེ་ལོ་བསྟན་བཅོས་མང་དུ་མཛད་དོ། །འཛིན་བྱེད་དེ་མེ་ཕོ་བྱི་བ་ཤར་ནས། རྩེ་མོ་རིར་བཞུགས་སྐབས། ལ་སྟོད་བྱང་ནས་གྲུབ་ཆེན་ཐང་སྟོང་པའི་དབོན་བརྒྱུད་ཆོས་རྗེ་ངག་དབང་བློ་གསལ་རྒྱ་མཚོས་གཙོས་པའི་ཆོས་ཞུ་བ་དང་སློབ་གཉེར་བ་མང་དུ་བྱོན། ཁོང་རྣམས་ལ་འཁོར་ལོ་སྡོམ་པ་རྗེ་བཙུན་ནཱ་རོ་ལུགས་ལྷ་བཅུ་གསུམ་གྱི་དཀྱིལ་འཁོར་དུ་དབང་དང་། བསྐྱེད་རིམ་གྱི་བཤད་པ་ལྷ་ཁྲིད་ཟིན་ཐུན་ལྗགས་སྤོད་དུ་སྩལ། སློབ་གཉེར་བ་རིགས་མཐུན་གྲྭ་སྡེབས་སུ་འཁོད་པས་ཕྱིས་བྱང་པ་གྲྭ་ཚང་དུ་ཐོགས། མོག་པ་ལྷ་རྩེར་ཕེབས། སྔགས་གྲྭ་གསར་པ་དཔོན་སློབ་སོགས་དོན་གཉེར་བ་མང་པོ་ལ། བརྟག་གཉིས་ཀྱི་བཤད་པ་རིན་ཆེན་རྒྱན་འདྲའི་སྟེང་ནས་དང་། བཀའ་ཡང་དག་པའི་ཚད་མ། རྡོ་རྗེ་གུར་ལ་སྲོག་ཤིང་གི་སྟེང་ནས་ཞིབ་བཤད་དུ་སྩལ། 
4-13
དེ་དུས་མར་ཡུལ་ནས་རྒྱལ་པོའི་སྲས་བརྒྱུད་དཔོན་ཡོག་འགའ་ཤས་སློབ་གཉེར་དང་གསུང་ཆོས་གསན་པར་བྱོན་སྣང་བ་འབྱོར། ལུགས་གཉིས་ཀྱི་བདག་རྐྱེན་འདོད་ཆོས་ཀྱིས་རེ་བ་བསྐངས། བླ་མ་དྲག་པོ་ཀཱི་ལ་ལའི་སྒྲུབ་ཐབས་མཛད། ཕ་རལ་དུ་རྟེན་འབྲེལ་རབས་བདུན་མ་ངེས་པ་ཅན་གསུངས། དེ་ནས་གསང་སྔགས་ཆོས་གླིང་དུ་བཟོ་རིག་བའི་ཚེད་འཇོག་པ་ཡིན་ཞེས་སྟོན་པའི་སྐུ་བསམ་ཡས་ཀྱི་བྱང་ཆུབ་ཆེན་པོ་དང་ཚད་མཉམ་པ། གཡས་གཡོན་དུ་བྱམས་འཇམ་དབྱངས་དང་བཅས་པ། སྐུའི་ཤ་ཚུགས་ཐམས་ཅད་དང་ལྷག་པར་གཙོ་བོ་དང་འཇམ་དབྱངས་ཕྱག་བཟོ་འདྲེས་མེད་ལྟ་བུ། བྱམས་པ་སྤྲུལ་སྐུ་མཚོ་སྐྱེས་པད་དཀར་གྱིས་བཞེངས། གྲང་གསེར་བརྟུལ་མ་གཏོས་ཆེ་བ་འཐུག་པོར་ཞུས་ཏེ་སྟོན་རྒྱབ་རབ་ཏུ་གནས་པ་རྒྱས་པ་ཞག་མང་པོའི་བར་དུ་གནང་། དེ་དུས་སྐྱེན་ནས་ནང་སོ་ཕྱག་མཛོད་པ་དང་། འོར་ཤོད་དཔོན་རྣམས་ཕྱག་འབུལ་དང་། ཀོང་ཕྱོགས་ལ་ཆིབས་ཁ་བསྒྱུར་དགོས་ཞེས་པའི་སྙན་འདེབས་ལ་བྱོན། ཆོས་དང་ཟང་ཟིང་གིས་ཚིམ་པར་མཛད། རྗེ་དྭགས་པོའི་གསུང་ལམ་གྱི་མཆོག་རིན་པོ་ཆེའི་འཕྲེང་བ་ལ། འགྲེལ་པ་སྐྱེས་བུ་གསུམ་གྱི་ལམ་ཉིན་མོར་བྱེད་པ་ཞེས་བྱ་བ་མཛད། ཆོས་དོན་གཉེར་མང་བ་ཞིག་ལ་མཁའ་འགྲོ་སྙན་རྒྱང་ཟླ་བ་ལྔ་གནང་ངོ་། །བྱང་ནས་བདག་ཆེན་རིན་པོ་ཆེ་སྐུ་མཆེད་ཀྱིས་སྟོད་ཕྱོགས་ལ་ཕེབས་དགོས་ཞེས་རྡོད་ནང་སོ་སྒྲེལ་པོ་རྫོང་གདར་མཛད་པ་འབྱོར། 
4-14
དབང་ཕྱུག་སྟེ་མེ་མོ་གླང་ལོ་ཤར། དེ་ཙ་ན་ཅིག་ཅར་གྱི་རྡོ་འཛིན་པ་ཆེན་པོའི་གོ་སར་ལྕང་གླིང་པ་རོལ་པའི་རྡོ་རྗེ་བཞུགས། འདི་ཉིད་མཁྱེན་རབས་དང་གསན་པ་རྒྱ་ཆེ། ལྷག་པར་ཡི་དམ་གྱི་ལྷ་བསམ་གྱིས་མི་ཁྱབ་པའི་བསྙེན་བསྒྲུབ་མཐར་ཕྱིན་པ་ཞིག་ནའང་ཆབ་མ་འཕྲོད་ནས་ཀུན་སྤངས་མཛད། མཚོ་མཇུག་ནས་བླ་མ་སྐུ་སྐྱེ་བསོད་ནམས་ཚུལ་ཁྲིམས་རྡོར་འཛིན་དུ་བཀོད་པ་གནང་། འདི་ཉིད་འཁྲུངས་ས་ཁམས། སྔོན་གྱི་གནས་རྗེས་སུ་དྲན་ཏེ་ཀོང་པོར་ཕེབས། སྔར་གྱི་གྲྭ་རིགས་ཡོན་བགག་དང་བཅས་པས་ཞབས་ནས་བཏེག །རྗེ་རྒྱལ་བའི་དབང་པོ་དཔལ་རི་རྡོ་རྗེ་གདན་དུ་བཞུགས་སྐབས་ཞབས་ཕྱིར་འབྱོར། དབང་ཁྲིད་གདམས་པ་མཐའ་དག་གསན། སྔོ་འོད་ལྡན་གྱི་བཅུད་ལེན་ལོ་གསུམ་མཛད། ལྕགས་ལ་མདུད་པ་བརྒྱབ། བླ་མ་འདས་ལོག་པ་ཞེས་གྲུབ་ཐོབ་ཏུ་གྲགས་འཕྲིན་ལས་བསམ་གྱིས་མི་ཁྱབ་པས། རྡོར་འཛིན་སྤང་མོར་རྗེ་བླ་མའི་གསེར་སྐུ་ཐོག་ཚད་བཞེངས། མཚོ་མཇུག་དང་། རྨིག་རྡོ་བྱང་ཆུབ་བསམ་གླིང་དུ་སྒྲུབ་སྡེ་བཙུགས་དཀར་རྒྱུད་ཆོས་སྡིངས་སུ་གཙུག་ལག་ཁང་དང་། དྭགས་པོ་རིན་པོ་ཆེའི་གསེར་སྐུ་སོགས་རྟེན་བཞེངས་མང་དུ་མཛད། སྔགས་གྲྭ་བཙུགས། ཆོས་རྗེ་ཐུགས་རྗེ་གྲགས་པ་སློབ་དཔོན་དུ་དགོས་ཞུས་ཏེ་བསྐོས། ཁོང་སྔགས་ལ་སྐུ་ཡོན་ཆེ། ཀ་ལཱ་པ་དང་། དཀར་རྩིས་སོགས་རིག་གནས་མང་དུ་མཁྱེན། 
4-15
དབང་རྒྱུད་བཤད་མན་ངག་དང་བཅས་པ་མཐའ་དག་རྒྱལ་བའི་དབང་པོ་ཉིད་ལས་རྫོགས། འཆད་ཉན་སྨར། རིན་པོ་ཆེ་དེ་ཉིད་སྐུ་ཚེ་མཐར་མ་ཕྱིན། དགོན་མ་ལག་གྲྭ་ཚང་དང་བཅས་པ་སློབ་དཔོན་པས་བསྐྱངས་སོ། །དེ་ལོ་སོས་རྡོ་རྗེ་གླིང་དུ་དབུ་ཆེ་དང་དགེ་འདུན་གཙོ་བོར་གྱུར་པའི་དབང་ཞུ་བ་ལྔ་བརྒྱ་ལྷག་ཙམ་ལ། གྲུབ་པའི་སློབ་དཔོན་ཆེན་པོ་ཨ་བྷ་ཡཱ་ཀ་རའི་དཀྱིལ་ཆོག་རྡོ་རྗེ་འཕྲེང་བ་དཀྱིལ་འཁོར་ཉེར་བརྒྱད་དུ་འདུ་བའི་ལུགས་སུ་གནང་། དེས་དཀྱིལ་འཁོར་ཞེ་ལྔ་མ་དང་། རིགས་འདྲེས་དཀྱིལ་འཁོར་སུམ་བརྒྱ་ཙམ་གྱི་དབང་ཐོབ་པ་ཡིན་ནོ་གསུང་། ཞེ་ལྔ་མའི་ཚེ་རང་ལུགས་རྡོ་རྗེ་བདུད་རྩི་རིགས་གསུམ་སྣོན་པ་ཡིན་ཞེས་སོ། །རྒྱ་གཞུང་རྣལ་འབྱོར་རྫོགས་འཕྲེང་། དཀྱིལ་ཆོག །སྦྱིན་སྲེག་གསུམ་གྱི་ལུང་སྩལ། དགེ་བའི་བཤེས་གཉེན་ལྷ་སྡིངས་རབ་འབྱམས་པ་གངས་ཏི་སེའི་རྡོར་འཛིན་དུ་བཀོད་པ་གནང་། འདི་ཉིད་ཐོག་མར་གསེར་མདོག་ཅན་དུ་མདོ་ཕྱོགས་ཀྱི་གསན་པ་མཐར་ཕྱིན། འཛིན་རམ་ནམ་མཁའ་རྦད་གཅོད་བསྟེན་ནས་བཀའ་འགྱུར་གྱི་ལུང་བཞུགས། དབང་ཁྲིད་གདམས་པ་མཐའ་དག་ཐམས་ཅད་མཁྱེན་པ་ཆེན་པོ་ལ་གསན། རྡོར་འཛིན་གྱི་གོ་སར་ཕེབས་ནས། སྤུ་རངས་རྒྱལ་པོ་སྨོན་ལམ་ལྷུན་གྲུབ་དང་། མོན་རྒྱལ་པོ་རྣམས་ཀྱི་བླ་མར་གྱུར། ཁ་ཆར་གྱི་གཙུག་ལག་ཁང་གི་བདག་མཛད་པས། 
4-16
ལེ་ཆེན་རིན་ཆེན་བཟང་པོའི་ཁྲི་ཐོག་ཏུ་ཐོན། རྡོ་རྗེ་འཛིན་པ་མདོ་སྔགས་རབ་འབྱམས་པར་གྲགས། འཕྲིན་ལས་ཤིན་ཏུ་ཆེ། ཕྱིས་ལི་དཀར་ལས་གྲུབ་པའི་གསང་འདུས་འཇམ་རྡོར་གྱི་སྐུ་སོགས་འབུལ་སྐྱེལ་ཁམ་ཆེ་བའང་འབྱོར། མར་ཡུལ་རྒྱལ་པོ་ཡོན་མཆོད་ཀྱིས། དགོན་གསར་སྔགས་གྲྭ་ཞིག་གི་རྨང་བཏིངས། སློབ་དཔོན་འཆད་ཉན་པ་ཞིག་དགོས་ཚུལ་ཞུ་བར། དགེ་སློང་ཕན་བདེ་རབ་འཕེལ་སྔགས་ལ་སྦྱངས་པ་ཆེ་བས་སློབ་དཔོན་གྱི་འོས་སུ་གཟིགས་ནས་བསྐོ་འཛྭ་དང་བཅས་རྫོང་གདར་གནང་། རྒྱལ་བློན་གྱི་བླ་མཆོད་དུ་གྱུར། སྔགས་ཀྱི་འཆད་ཉན་གྱི་སྲོལ་བཏོད། བསྟན་པ་ལ་ཕན་པ་ཞིག་གོ ། བྱམས་ཆེན་ཆོས་གླིང་དུ་ཚེ་དཔག་མེད་གྲུབ་རྒྱལ་ལྷ་མངས་ཀྱི་དབང་སྐྱ་སེར་གྱི་ཁྲོམ་འདུ་ཁང་དང་སྒོ་ཁང་མདོ་ཁྱམས་ཀྱི་བར་གང་བ་ལ་གནང་བའི་ཚེ་གསང་སྔགས་ལ་བག་ཆགས་འཇོག་པས་ཉེ་འཁོར་ན་མི་འདུག་ཚད་ཆུག་གསུང་། གཞན་མ་མཆིས། མུ་ལྟོ་བ་འགའ་ཞིག་འདུག་ཞུ་བས་དེ་རྣམས་ཀྱང་དབང་གྲལ་ལ་ཐོང་གསུང་། མཆོད་གཡོག་གི་བཙུན་ཆུང་རྣམས་ཀྱིས་སྟ་གོན་གྱི་སྐབས་སུ་ཀུ་ཤ་འདབ་མ་མེད་པ་རྣམས་སྤྲང་པོ་ཚོའི་བྱེད་དོ་ཟེར་བ་ཙམ་ལས། བླ་མ་མི་ཆེན་དྲག་དགུ་དང་ཁྱད་མེད་དུ་སྩལ། བྱར་སྟག་རྩེར་གདན་འདྲེན་བྱུང་བས་ཐེགས། དེ་ནས་དབུ་བཙུགས་ཏེ་གསང་སྔགས་ཀྱི་རྒྱུད་འབུམ་ཡོངས་རྫོགས་བེའུ་ཁའི་གཙུག་ལག་ཁང་ཡན་ལ་རྫོགས་པར་གནང་། 
4-17
དཔལ་ལྡན་ལྷ་མོ་གསང་སྒྲུབ་གྱི་དབང་ཆོག་རྒྱུད་བཞིན་དུ་མཛད། དེ་སྐབས་རིན་སྤུངས་ནས་ས་སྐྱོང་བའི་དབང་པོ་ངག་དབང་འཇིག་རྟེན་དབང་ཕྱུག་གྲགས་པའི་ཞུ་འཕྲིན་རྒྱས་པ་ཞུ་དོན་སྙིང་པོར་དྲིལ་བའི་སྐྱེས་སུ་སྟོན་པ་ཡང་དག་པར་རྫོགས་པའི་སངས་རྒྱས་གྲོང་དུ་བཞུད་པའི་བཀོད་པ་ཛྷཻ་ཀྵིམ་ལས་གྲུབ་པ་ཁྱད་དུ་འཐོན་པ་དང་བཅས་དགེ་བའི་བཤེས་གཉེན་བྲག་དམར་བ་རབ་བརྟན་དཔལ་འབར་འབྱོར། འོ་སྐོལ་སྟོན་པའི་རྗེས་སུ་ཞུགས། བཀའ་བཞིན་དུ་འགྱིད་ན་དེའི་སྣང་བརྙན་ལས་ངོ་ཆེ་བ་གཞན་སུ་ཞིག་དགོངས་ནས། ཞུ་བའི་སྙིང་པོ་དོན་དང་ལྡན་པར་མཛད། རྟེན་དེ་ཅོག་གྲྭ་གསར་པའི་རྩིས་སྤྲོད་རྟེན་གཙོར་གནང་། དགེ་བའི་བཤེས་གཉེན་དེ་ཉིད་གཙོ་བོར་གྱུར་པ་འགའ་ཞིག་ལ་སྒྲུབ་ཐབས་རྒྱ་མ་ཚོ་སྩལ། ཁོང་ལ་སྐུ་ཡོན་གྱི་ཐུགས་མཐོང་ལྷག་པར་ཆེ། ཕྱིས་འབྲས་ཡུལ་སྐྱེད་ཚལ་གྱི་མཁན་པོར་གྱུར་ཏོ། །འབྲུ་མང་པོ་སྟེ་ས་ཕོ་སྟག་ལོ་གསར་མཚམས། ལྷོ་ཕྱོགས་ཆོས་ཀྱི་རྒྱལ་པོ་བྱ་ཁྲི་དཔོན་དུ་བསྐོ་བའི་དུས་དང་ཉེ་བ་ན་ཆོས་རྒྱལ་གླིང་དུ་ཕེབས། སྔོན་གྱི་སྲིད་བཟང་པོ་ཉམས་པ་མེད་པའི་ལས་ཚན་གྱི་བཀོད་པ་བཤམས། ཕོ་བྲང་ཆེན་པོ་ཡང་རྩེའི་འདུ་ཁང་དུ་ཕུན་སུམ་ཚོགས་པ་མ་ལུས་པའི་འབྱོར་པ་དང་རྒྱན་གྱིས་ཀླུབས་པའི་གུང་ལ་མཆོད་ཡོན་གྱི་ཁྲི། 
4-18
བཞུགས་གདན་བཤམས། དུས་ཚེས་དགེ་བ་ལ་ཁྲི་དཔོན་དུ་བསྐོས་པ་དེའི་ཚེ། སྐྱེས་བུ་ཆེན་པོ་ཉིད་འཁོར་ཡོངས་ཀྱི་དགེ་བའི་བཤེས་གཉེན་དང་རིག་སྔགས་འཆང་བ་དུ་མས་བསྐོར་ཏེ། རིན་པོ་ཆེ་དང་བཀྲ་ཤིས་པའི་སྨན་རྒྱུན་འབབ་ཀྱི་བཅུད་ཀྱིས་ཡོངས་སུ་གང་བའི་བུམ་བ་བཟང་པོ། དཔག་བསམ་ཤིང་གིས་ཁ་རྒྱན་པ་ཕྱག་ཏུ་བཞེས་ནས། བཀྲ་ཤིས་ཀྱི་ཚིགས་སུ་བཅད་པས་རྒྱལ་བུ་རྒྱལ་རིགས་སྤྱི་བོ་ནས་དབང་བསྐུར། རྒྱལ་སྲིད་རིན་བོ་ཆེ་སྣ་བདུན་གཏད། མངའ་གསོལ་གྱི་གནང་སྦྱིན་བཟང་པོ་སྩལ། བོད་ལྷོ་ཕྱོགས་མོན་ཁ་ཁྲ་ཚུན་ལ་དབང་བསྒྱུར་བའི་བདེན་ཚིག་གི་ལུང་སྦྱིན། དགའ་སྟོན་ལ་ཉིན་མང་པོ་ལོངས་སྤྱད། དེ་དུས་སྐུ་འཁོར་གྱི་དགེ་བའི་བཤེས་གཉེན་ཆེན་པོ་རྣམས་ཀྱིས་ཚིག་ཕྲད་ལེགས་པ་དང་། བཀྲ་ཤིས་པ་དང་། བྱིན་ཆགས་པ་དང་། བསྟན་པ་ལས་བརྩམས་ཏེ་གླེང་བསླང་གསུང་རབ་དང་འབྲེལ་བའི་གཏམ་བགྱིས་སོ། ། དེ་ནས་བྱམས་ཆེན་ཆོས་གླིང་དུ་ཕེབས། དེའི་དགེ་འདུན་གཙོ་བོ་གྱུར་པའི་ཆོས་ཞུ་བ་སུམ་བརྒྱ་ལྷག་པ་ལ་འདུབ་ལུང་སྡེ་བཞི་ཞག་བཅོ་བརྒྱད་ལ་རྫོགས་པར་གནང་། དེ་སྐབས་ཉིན་གཅིག་ཕྱོགས་ཀྱི་གསེར་ཡིག་པ་མང་བས། སྔ་ཆོས་ཐུན་ཆུང་བས་དགོངས་ཆོས་མུན་སོང་ནས་ཀྱང་གནང་། དེ་དུས་ཆོས་རྗེ་ཡུག་པ་རབ་འབྱམས་པ་ཐེ་ཚོམ་དུ་གྱུར་ཏེ་ལེགས་པར་གཟིགས་ནས་གྲོགས་རྣམས་ལ་ཁྱེད་རྣམས་ཀྱིས་ཡི་གེ་ཆོད་ཀྱི་ཨེ་འདུག་གསུང་། 
4-19
གཞན་འགའ་ཞིག་གིས་བལྟ་ཡི་འདུག་པས་ཡིག་འཕྲེང་ཏལ་ཙམ་ལས་མི་མཐོང་ཟེར། དེ་ནས་ཀྱང་ཤོག་བུ་བཅུ་ཙམ་གནང་བྱུང་། སང་ཉིན་ཁོང་གིས། མདང་ངེད་རྣམས་ལ་གནང་བའི་གསུང་ཆོས་དེ་ཡེ་ཤེས་ཀྱི་སྤྱན་གྱིས་གཟིགས་པར་འདུག །ངོ་མཚར་དང་བྱིན་རླབས་ཆེ་བར་བྱུང་ཞུ་མཛད་ཀྱི་འདུག །དེ་ནས་དམག་སྡེ་གདགས་ཀྱི་ཤུག་གསེབ་དགེའུ་དགོན་པར་ཕེབས། སྔགས་ལ་སྦྱངས་པའི་བཤེས་གཉེན་མང་པོ་ཞབས་ཕྱིར་བཞུགས་པས། དུས་ཀྱི་འཁོར་ལོའི་སྤྱི་དོན་གྱི་སྟེང་ནས་བཤད་པ་དང་། མ་ཧཱ་མ་ཡཱའི་རྒྱུད་འགྲེལ་ཨཱ་ནནྡས་མཛད་པའི་སྟེང་ནས་བཤད་པ་ཞིབ་པར་གནང་། ཀུ་ཀུ་རི་པའི་ཆོས་བདུན་དང་། སྦྱོར་བ་ཡན་ལག་དྲུག་ལ་སོགས་པ་སྩལ། ཟླ་བ་ལྷག་ཙམ་བཞུགས། དེ་དུས་བྱར་ཕུ་མདའི་བུ་གསུམ་བར་པ་རྣམས་འབུལ་བར་ཞུས། ན་མཉམ་བཞི་བཅུ་ལྷག་པ་སྟབས་སུ་བྱུང་། སྐྲ་ཕུད་བཞེས། མིང་རྒྱ་མཚོ་ལ་དྲས་པ་འབའ་ཞིག་གནང་བས་ཕྱིས་རྒྱ་མཚོ་གྲྭ་ཚང་དུ་ཐོགས། བྱམས་ཆེན་དུ་ཕེབས། འགོང་པོའི་བར་ཆད་ཀྱིས་ཆོ་འཕྲུལ་ཆེ་བར་བྱུང་བས་སྐུ་མཚམས་ལ་བཞུགས། བླ་མ་དྲག་པོ་ཀཱི་ལ་ཡའི་བསྒྲུབ་པ་གནང་། དགེ་འདུན་རྣམས་ཀྱིས་སྐུ་རིམ་ལ་འབད། དེ་ཙ་ན་གཉལ་དུ་དུས་འཁྲུག་ཞིག་བྱུང་། དེའི་རྐྱེན་གྱིས་བཀྲ་ཤིས་མཐོང་སྨོན་གྱི་གཙུག་ལག་ཁང་ལ་གནོད་པ་ཆེ་བར་གྱུར། བར་ཆད་ཐམས་ཅད་དེར་བཟློག །
4-20
དེ་མིན་སྐུ་ཚེ་ལ་བར་ཆད་རྩོམ་རྒྱུར་འདུག །སྔ་གོང་སློབ་དཔོན་ཆེན་པོའི་ཕོ་ཉ་བས་ཇི་ལྟར་ཞུས་པ་བཞིན་རྗེས་སུ་མཐུན་པར་བྱུང་། སངས་རྒྱས་དང་བྱང་ཆུབ་སེམས་དཔའ་མ་ལུས་ཤིང་ལུས་པ་མེད་པ་རྣམས་དང་རིག་འཛིན་རྣམས་ཀྱིས། ཇི་ལྟར་བུ་གཅིག་པུ་སྙིང་དུ་སྡུག་པ་ལ་དེའི་མས་བཞིན་དུ་བརྩེ་བའི་སྤྱན་གྱིས་གཟིགས་པ་དང་། ཐུགས་ཀྱིས་གཡེལ་བ་མེད་པར་དགོངས་པར་ངེས་པས། རྡོ་རྗེའི་སློབ་དཔོན་ཆེན་པོའི་བཀའ་བཞིན་དུ་བགྱིས་ཏེ། ཁ་ན་མ་ཐོ་བ་མེད་པས་མཉེས་པར་བྱས་ན། སངས་རྒྱས་བྱང་སེམས་དེ་དག་ལའང་དགྱེས་པའི་མཆོད་སྤྲིན་མ་ལུས་པར་འགྱུར་བས་གྲངས་མེད་གསུམ་དུ་ཚོགས་གསོག་པའི་ངལ་བ་བསྟེན་དགོས་པའང་མ་ཡིན་ཞིང་། དེ་ལས་བཟློག་ན་སྡིག་པ་མི་ཟད་པའི་ལས་ཤིན་ཏུ་ལྕིའོ་སྙམ་མོ། །འོན་ཀྱང་ཐོག་མ་ནས་ཐ་མའི་བར་གྱི་འཁོར་གྱི་ནང་ན་འདི་ནི་དམ་ཚིག་ལ་མི་གནས་པ་ཆེན་པོ་ཞིག་སྟེ། སྤྱན་སྔར་ཕྱིན་དུ་མི་རུང་ངོ་ཞེས་པ་ནི་གཅིག་ཀྱང་མེད་དོ། །འདི་ལྟ་བུ་རྡོ་རྗེའི་སློབ་དཔོན་སེམས་དཔའ་ཆེན་པོའི་ངོ་མཚར་བའི་མཛད་པ་རྨང་དུ་བྱུང་བ་སྟེ་གཞན་གྱིས་ནི་མ་ཡིན་ནོ། ། མྱོས་ལྡན་ཏེ་ས་མོ་ཡོས་ལོ། སྔགས་གྲྭ་གསར་པ་དཔོན་སློབ་ཀོང་ཕྱོགས་སུ་གདུལ་བྱ་འཕྲིན་ལས་ཆེ་བ་ནས་ཞབས་ཕྱིར་འབྱོར། 
4-21
གོས་དར། རྟ་དྲེའུ་ལ་སོགས་ཏེ་ཟང་ཟིང་གི་འབུལ་བ་གཏོས་ཆེ་བར་འདུག །ཕྱག་ན་རྡོ་རྗེ་གསང་བ་མངོན་པར་བསྟན་བའི་རྒྱུད་ཀྱི་རྣམ་བཤད་ཀྱི་ཐོག་ནས་བཤད་པ་རྒྱས་པར་གནང་། གཏུམ་པོ་རིགས་བསྡུས་ལྷ་བཅུ་གསུམ་གྱི་དཀྱིལ་འཁོར་དུ་དབང་བསྐུར། ཕྱག་ན་རྡོ་རྗེ་དབུ་དགུ་ཕྱག་བཅོ་བརྒྱད་པ་ཀླུ་འདུལ་ཟིལ་གནོན་ཆེན་པོའི་སྒྲུབ་ཐབས་ཀྱང་མཛད། ཞབས་འབྲིང་པ་རིན་ཆེན་བསྟན་པ་རྒྱལ་མཚན། པ་སྣམ་བསམ་འགྲུབ་ཆོས་སྡིངས་ཀྱི་བླ་མར་བཀོད་པ་གནང་། འདི་ཉིད་ཞབས་པད་བསྟེན་ཡུན་རིང་། གསུང་དག་ལ་འདྲིས། ཕྱག་ལེན་ལ་ངེས་པའི་དབང་གིས་གསེར་མདོག་ཅན་གྱི་དགེ་བཤེས་མང་པོས་ཞབས་ལ་གཏུགས། ཁྲིད་གདམས་དག་གི་འཕྲིན་ལས་ཆེའོ། །ཤེར་སྙིང་གི་འགྲེལ་པ་འཕགས་པ་ཀླུ་སྒྲུབ་ཀྱི་དགོངས་པ་གསལ་བར་བསྟན་པ་ཞེས་བྱ་བ་དང་། འཕགས་པ་བྱམས་པའི་སྨོན་ལམ་གྱི་འགྲེལ་པ་ཐོགས་མེད་ཀྱི་དགོངས་པ་གསལ་བར་བསྟན་པ་ཞེས་བྱ་བ་མཛད། ཆོས་རྗེ་གསལ་རྗེ་ནས་ཀྱིས་བསྐུལ་བ་པོ་ཞུས། བདུད་རྩི་འཁྱིལ་བ་ཚེའི་ཆོ་ག་འཆི་མེད་ངེས་པར་སྟེར་བ་ཞེས་པ་ཚེ་དཔག་མེད་དཀར་པོའི་སྒྲུབ་ཐབས་མཛད། ཁོང་གིས་དགོན་པ་བསམ་གཏན་ཆོས་གླིང་བཏབ། བཀའ་འབུམ་རིན་པོ་ཆེ་ཚར་གཅིག་བཞེངས། བཀའ་འབུམ་པར་དུ་བསྒྲུབ་པ་རྣམས་ཀྱི་དོ་དམ་མཛད། པར་ཤིང་སྟོང་ཕྲག་ལྔ་ཙམ་གྲུབ། རྒྱགས་ཡོན་ཕལ་ཆེར་དབུ་ཆེ་གྲྭ་རིགས་དང་། 
4-22
སྦྱིན་བདག་གིས་སྦྱར། བྱིན་ཕྱག་མཛོད་ནས་གནང་། སྐྱེན་པ་ཆོས་མཛད་ཀྱིས་ཞུས་ངོར། ལམ་ཟབ་བཤད་སྦྱར་ཟབ་དོན་སྙེ་མ་ཞེས་པ་མཛད་ཞུ་བ་པོས་པར་དུ་བསྒྲུབས། སྔགས་ལ་སྦྱངས་པ་ཅན་དགེ་བའི་བཤེས་གཉེན་གཞུང་པ་དཀོན་མཆོག་བཀྲ་ཤིས་ཀྱིས་གཙོས་པ་འགའ་ཞིག་ལ་དུས་ཀྱི་འཁོར་ལོ་འགྲེལ་ཆེན་དྲི་མེད་འོད་ཀྱི་སྟེང་ནས་དང་། མཚན་བརྗོད་ལ་སློབ་དཔོན་ཉི་མ་དཔལ་གྱི་འགྲེལ་པའི་སྟེང་ནས་བཤད་པ་ཞིབ་གསེད་ཟླ་བ་དྲུག་གི་རིང་གནང་། ཁོང་ཕྱི་ལོ་དེ་གཙང་རྒྱལ་བྱེད་ཚལ་སྔགས་གྲྭའི་འཆད་ཉན་པར་བཀོད་པ་གནང་དུས་ཞལ་གདམས་འདི་གསུངས་སོ། །ཁྱོད་སྙིང་ནས་དམ་པའི་ཆོས་བགྱིད་ན། །རྒྱལ་ཁམས་ཀྱི་ཁ་ཕྱི་མ་འབྲང་བར། །བློ་རྩེ་གཅིག་སངས་རྒྱས་བསྟན་པ་སོམས། །བཀུར་འོས་ཀྱི་རྗེ་ལ་གསོལ་བ་ཐོབ། །བྱ་བྱེད་ལ་རང་དོན་མ་འཁྲིས་ན། །འཕྲལ་སྡིག་ཀྱང་ཕུགས་ན་དགེ་བ་ཆེ། །ཚེ་འདིར་སྐྱིད་དང་ལེན་མི་བྱ་ཞིང་། །རྐྱེན་སྡུག་པ་སྤང་བློ་མ་བྱུང་ན། །ལས་དགེ་བ་མི་འཛད་སྡིག་པ་འབྱང་། །མ་ཚོར་བའི་ངང་ནས་བསམ་པ་འགྲུབ། །ཁོང་འཕགས་པའི་ས་ལ་ཡུད་ཀྱིས་སླེབ། །ཕ་དཀར་རྒྱུད་བླ་མའི་བྱིན་རླབས་འཇུག །ཚེ་གཅིག་ལ་སངས་རྒྱས་ཐེ་མི་ཚོམ། །དཔའ་བོ་སྟེ་ལྕགས་ཕོ་འབྲུག་ལོ། །རྡོ་རྗེ་གླིང་དུ་བཞུགས་སྐབས། །ལ་སྟོད་བྱང་ནས་བདག་ཆེན་ཆོས་ཀྱི་རྒྱལ་པོ་བཀྲ་ཤིས་སྟོབས་རྒྱས་ཞེས་མཁྱེན་རབ་དང་རྣམ་དཔྱོད་ཕུལ་དུ་བྱུང་བ་དེ་ཉིད་སྔ་གོང་ནས། 
4-23
རྒྱལ་བའི་དབང་པོ་ཉིད་ཀྱི་སྙན་པ་གསན་པས། ཞལ་གྱི་དཀྱིལ་འཁོར་མཇལ་བ་དང་ཞབས་ལ་ཕྱག་བགྱིད་པར་རིངས་པ། དཔེར་ན་སྐོམ་པ་ཆུར་དུངས་པ་ལྟ་བུར་གྱུར་པས་ཆེད་གཉེར་གྱིས་ཕེབས། ཤེལ་ཐམ་སོགས་འགང་ཆེན་གྱི་འབུལ་བ་དཔངས་བསྟོད་འདུག །མཇལ་ཕྲད་ཐོག་མའི་སྐབས། གདན་བཟོས་གསུམ་སྟན་གོས་མཉེ་དང་། ཁྲི་ཁ་ནས་ཕྱག་ལན་ཡོད་ཙམ་གནང་གི་འདུག །དེ་ཉིན་རང་ནས་ལམ་ཟབ་ཀྱི་དབང་། ཕྱག་ཆེན། ཆོས་དྲུག་གི་དམིགས་རིམ། འཇམ་དཀར་གྱི་རྗེས་གནང་། མགོན་པོ་ཕྱག་བཞི་པ་དང་། དཔལ་ལྡན་ལྷ་མོའི་རྗེས་གནང་སོགས་སྩལ། དོགས་གཅོད་ཞུ་བ་དང་ལན་སྩལ་བ་སོགས་ཀྱིས་གསུང་གླེང་སྨར་བས་མཚན་ཡལ་འདས། སང་ཉིན་ཆིབས། རྟ་ཡན་དྲེའུ་སོགས་ཉེར་མཁོའི་གནང་སྐྱེས་བཟང་པོ་སྩལ། འདི་ཉིད་ཀྱི་ཞུས་ངོར་པདྨ་སམྦྷ་བ་ལ་སྙན་ངག་གི་སྒོ་ནས་བསྟོད་པ་དྲི་ཟའི་རྒྱུད་མངས་ཞེས་བྱ་བ་མཛད་དོ། །དེ་ལོ་གཙང་རྒྱལ་བྱེད་ཚལ་མདོ་གྲྭའི་སློབ་དཔོན་དུ་དགེ་བའི་བཤེས་གཉེན་ཆེན་པོ་འཇམ་དཔལ་གྲགས་པ་བཀོད་པ་གནང་། གཞི་གསུམ་གྱི་ཆོ་ག་ཕན་བདེའི་གཉེན་ཞེས་པའང་འདི་ཉིད་ཀྱི་དོན་དུ་མཛད་ནས་ཞལ་གདམས་འདི་གསུངས་སོ། །རྟག་ཏུ་འཆར་ལ་ནུབ་པ་མི་སྲིད་པ། །རྒྱལ་བ་ཀུན་གྱི་ཐུགས་རྗེའི་ཉི་མའོ། །དེ་དང་དེ་ཡི་རེག་བྱས་ཡིད་སིམ་པས། །ཐམས་ཅད་རྣམ་པ་ཀུན་གྱི་ཕྱག་གི་འོས། །
4-24
སྙིགས་དུས་ཕྱོགས་རིས་ཟུག་རྔུ་ཆེས་པ་དང་། །སྔོན་ལས་ཀྱིས་འཕངས་སྨྲ་མཆུ་མང་ན་ཡང་། །རང་སྤྱོད་རྒྱལ་བའི་བསྟན་ལས་མ་གཡོས་ན། །བྱས་ཚད་འཚེངས་པ་ཡིན་ནོ་རིགས་ཀྱི་བུ། ། ངོས་སུ་ཚུལ་ལེགས་ལྐོག་ཏུ་བག་འཁྱལ་བའི། །དགེ་སྦྱོང་འཇིག་རྟེན་མིག་ངོར་མཛེས་ན་ཡང་། །གང་བྱས་རྣམ་སྨིན་རང་ལ་འོང་འདིས་སུ། །མཛུབ་མོས་བཀུག་ལ་རང་རྒྱུད་རེངས་མ་འཇུག །བླ་ཆེན་རྣམས་ནས་གྲྭ་རྐྱང་སྙོམས་ཆུང་བར། །ཟང་ཟིང་ནོར་ཕྱུགས་ངོམ་ཞིང་གཞན་དགའ་ཡང་། །དེ་འདྲ་འདུལ་བར་དམད་པའི་ལས་ཡིན་གྱི། །གང་ལའང་དྲོད་རིག་འདོད་ཆུང་ཆོག་ཤེས་གྱིས། །བག་ཆགས་ངན་པ་འགྲོག་ཡུན་རིང་འདིས་སུ། །གར་སླེབ་ངེས་པ་མེད་པས་སྒོ་གསུམ་སྤྱོད། །ཅི་བྱེད་སྔོན་དུ་ལེགས་པ་བརྟགས་ནས་སུ། །ཆོས་མཐུན་གང་ཡིན་གྱིས་ལ་གཞན་མ་བཤོལ། །སྦྱིན་པས་བོས་ལ་སྙན་པའི་གཏམ་སྨྲ་ཞིང་། །དོན་སྤྱོད་བག་ཕེབས་གྱུར་ནས་དོན་མཐུན་བར། །གཏན་གྱི་དོན་ཆེན་སྒྲུབ་ལ་སྦྱར་ནུས་ན། །འགྲོ་ཕན་ཆེན་པོ་འོང་གི་ཐེ་མ་ཚོམ། ། སྙིགས་དུས་ལོག་སྒྲུབ་དར་བའི་འཁོར་གྱི་ཁྲོད། །བཟོད་པ་ཁོང་བདེན་འཇམ་ལ་ཐབས་མཁས་པས། །རྣལ་མར་སྒྲུབ་པའི་ཆོ་ག་སྦྱར་ཤེས་ན། །ཐམས་ཅད་འདུན་པ་ལག་པའི་རྩེ་ལ་འོང་། །གལ་ཏེ་བྱས་ཀྱང་ཚབས་སུ་མི་འགྲོ་ན། །སྔོན་ལས་ཡིན་གྱི་དེ་རྒྱུ་སྡིག་པ་སྦྱོངས། །དཀོན་མཆོག་གསུམ་ལ་ར་མདའ་ཞུ་བ་ལས། །
4-25
གཞན་པའི་ཐབས་གཞན་མི་དགོས་དེ་ཡིས་ཆོག །ཐ་སྙད་ཀྱོག་པོའི་འཐེན་འཁྱེར་ཆོས་ཀྱི་དགྲ། །དེ་བསྐྱུར་བཀའ་དང་དགོངས་འགྲེལ་གཞུང་ཀུན་དང་། །ཚིག་དོན་ཞུ་དག་ཐུབ་པའི་ཐོས་པ་ལ། །བསམ་གཞིགས་བཏང་ན་བསྟན་པ་གཟུང་བ་ཡང་། །ལན་རེས་གོ་བ་དཀའ་ཡང་ཡང་དང་ཡང་། །འཇལ་དང་ངེས་རྟོག་དགོས་ཀྱིས་དེ་དང་དེར། །ཀློག་པའི་མོད་ལ་ཡིད་སུན་མི་སྐྱེ་བར། །ཚིག་དོན་གར་སོང་བདོས་དང་ཀུན་ཤེས་འབྱུང་། ། ཤིན་ཏུ་ཟབ་མོའི་གནས་ལ་ཐེ་ཚོམ་ན། །དད་པའི་སྟོབས་ལས་གཞན་གྱིས་རྙེད་དཀའ་བས། །མཚན་ལྡན་བླ་མ་དམ་པར་བློ་བཀལ་ནས། །རྩེ་གཅིག་གསོལ་བ་ཐོབ་དང་འདོད་དོན་འགྲུབ། །མདོར་ན་རང་མཐོང་སྐྱོན་ཡིན་དམན་ས་གཟུང་། །གཞན་དོན་མི་འགྲོ་དགེ་ཡང་ཅམ་གྱིས་ཞོག །ཕན་འགྱུར་སྲོག་ལ་མི་བལྟ་བསྒྲུབས་པས་ཐུས། །དེ་སྐད་པདྨ་དཀར་པོའི་ལེགས་བཤད་བསུང་། །མྱངས་ན་ཞིམ་པ་གང་ལ་བསྲིངས་འདིས་སུ། །བློ་གསལ་བུང་བའི་ལྡེ་རྣམས་ཡིད་དགའ་བའི། །ཟློས་གར་ཆེན་པོས་ས་འདི་ཁྱབ་གྱུར་ཅིག །འདི་ཉིད་འཁྲུངས་ཡུལ་ལོ་གྲོ་དོལ། གཞོན་ནུ་ནས་རབ་ཏུ་བྱུང་། རྒྱལ་བའི་དབང་པོ་བཀྲ་ཤིས་མཐོང་སྨོན་གྱི་གཙུག་ལག་ཁང་ཆེན་པོར་བཞུགས་དུས་ཞབས་ཕྱིར་བྱོན། རིན་པོ་ཆེ་གཞུང་བརྒྱ་པ་བྱང་སྟོན་ཆོས་ཀྱི་དཔལ་བཟང་བསྟེན་ནས་མདོ་ཕྱོགས་ཀྱི་གསན་པ་མཐར་ཕྱིན། དབང་ཁྲིད་རྒྱུད་བཤད་མ་ལུས་པ་ཐམས་ཅད་མཁྱེན་པ་ཉིད་ལ་རྫོགས་པར་གསན། 
4-26
མདོ་གྲྭ་གཉིས་སུ་འཆད་ཉན་ལེགས་པར་མཛད། བཤེས་གཉེན་མང་དུ་ཐོན། ཀུན་སྤངས་མཛད་ནས། བཞུགས་སྒར་དུ་བསྙེན་རྫོགས་སྒྲུབ་པ་མང་པོའི་ལས་སློབ་དང་། ཁྲིད་གཉེར་བ་མཐར་གྱི་བར་མཛད། ཁྲིད་གསར་པ་ཕལ་གྱིས་ཞབས་ལ་གཏུགས། ཕྱིས་དབེན་པ་བསྟེན་པར་བཞེད་ནས། རྗེ་བཙུན་རས་ཆུང་ཞབས་ཀྱི་གདན་ས་དཔལ་ཚེ་གོང་། ལྷ་རྩེའི་ཐེག་ཆེན་ཕོ་བྲང་དུ་སྒྲུབ་པ་དང་འགྲོ་ཕན་སྟབས་སུ་མཛད་པ་ཞིག་གོ །བྱམས་ཆེན་ཆོས་གླིང་དུ་ཅོག་གྲྭ་གསར་པ་དཔོན་སློབ་ལ་བསྲེ་འཕོ་གནད་ཀྱི་མཚམས་སྦྱོར་ལས་བསྲེ་བ་འབུམ་ནག་ཏུ་གྲགས་པ་གནང་། གཞན་བཀའ་བཅུ་རབ་འབྱམས་པ་སོགས་ཆོས་ཞུ་བ་བཞི་བཅུ་ཙམ་ལ། ཨོ་རྒྱན་པ་རིན་ཆེན་དཔལ་གྱི་ཁྱད་ཆོས་རྡོ་རྗེ་གསུམ་གྱི་བསྙེན་བསྒྲུབ་སྩལ། ཉིན་ལྟར་གྱི་སྔ་ཆོས་དགོས་ཆོས་འཆག་མེད་དང་། བསྙེན་སྒྲུབ་ཀྱི་འཁྲུལ་འཁོར་སྟོན་པ་ལ་སྐུ་དངོས་ཕེབས་ཀྱི་ཡོད་པས་ཉིན་གཅིག་གཟིམས་སྤྱིལ་དུ་འཁྲུལ་འཁོར་ལ་ཕེབས། དེ་གྲུབ་ནས་གསོལ་ཇ་ཞིག་ཀྱང་བྱུང་། བཀའ་ལས། ཁྱེད་རྣམས་ཀྱི་ཁྲིད་ལ་དོ་གལ་ཆེན་པོ་བྱས་སམ་གོ་བ་ཇི་འདྲ་བྱུང་གསུང་། དེ་ཙ་ན་དྲུང་རམ་པ་བསྟན་འཛིན་ཆོས་གྲགས་གྲྭ་རྐྱང་དུ་བཞུགས་པས། ཁོང་གིས། ལགས་ངེད་རང་རྣམས་ཀྱིས་དམིགས་རིམ་དང་གཞུང་འཛིན་པ་བཤད་པ་ལ་ཆེད་གཉེར་གྱི་དོ་གལ་ཆེ་བ། ལྷག་པར་རླུང་རྩོལ་འཁྲུལ་འཁོར་སྦྱང་བའི་ལུགས་སུ་བྱས་ནའང་ཆོས་འདི་སྒྲོམས་ཆེ་བ་དང་རྒྱུད་ཀྱི་ཁོང་སྙིང་ལྟ་བུར་སོང་བས་མཐིལ་ཕྱིན་གོ་བར་དཀའ་ལགས་ཞུ་བས། 
4-27
ཆོས་ལ་དོ་གལ་བྱེད་པ་དེ་ཨ་ལ་ལ། སྦས་དོན་མཐའ་དག་འཕྲལ་དུ་གོ་བའང་དཀའ། ལར་ངེད་ཀྱི་སྐྱེ་བ་དང་ཚེ་རབས་ཐམས་ཅད་དུ་སྨོན་ལམ་བཏབ་པས། ངོས་ལ་ཐོབ་པ་གཅིག་པུས་ཆོག་གསུང་པས། ཁོང་གིས་ཕྱག་ཐལ་མོ་སྦྱར་ནས་བཀའ་དྲིན་བསྐྱངས་བཀའ་དྲིན་བསྐྱངས་དེ་རང་དགའ་བ་བྱུང་ལགས་ཞུས། གཞན་རྣམས་ནི་མཆི་མ་འཁྲུག་པ་དང་བ་སྤུ་གཡོ་བ་ལས་ཅང་ཞུ་མ་ནུས་སོ། ། དེ་ལྟ་བུ་ནི་རྒྱལ་བ་རྒོད་ཚང་པས་ཀྱང་འཁོར་རྣམས་ལ་གསུངས་པ། དཀའ་ལས་ཐམས་ཅད་དཀར་རྒྱུད་ཀྱི་བླ་མ་གོང་མ་རྣམས་ཀྱིས་མཛད་ཚར་བ་ཡིན། ད་ལྟ་གསོལ་བ་འདེབས་ནུས་ན་སངས་རྒྱས་ཟན་དྲོན་ལ་ཀྱུ་བྱེད་པ་བས་ཀྱང་བླ། ཁོ་བོ་ལ་སྔོན་འགྲོ་བཞི་སྦྱོར་བསྐྱངས་པ་ཡན་ཆད་དག་པའི་འཁོར་ཡིན་གསུང་པ་དང་མཐུན་ནོ། །དེ་ལོ་དགེ་བའི་བཤེས་གཉེན་རབ་འབྱམས་སྨྲ་བ་མང་ཐོས་པད་དཀར། རྡོ་རྗེ་གླིང་གི་གདན་སར་བསྐོ་བ་གནང་། འདིས་ཕྱིས་ཐུགས་རྩོམ་གྲྭ་ཚང་གི་སློབ་དཔོན་ཀྱང་མཛད་དོ། །ཁྱུ་མཆོག་སྟེ་ལྕགས་མོ་སྦྲུལ་ལོ། གསང་སྔགས་ཆོས་གླིང་གི་འདུ་ཁང་གི་ལྡེབས་རིས་ལ། རྒྱལ་བའི་དབང་པོ་ཉིད་ཀྱི་གསུང་དག་ལས་བྱུང་བ་དུས་འཁོར། བདེ་དགྱེས། གསང་འདུས་སོགས་ཡི་དམ་གྱི་བྲིས་སྐུ་བསམ་གྱིས་མི་ཁྱབ་པ་སྤྲུལ་སྐུ་མཚོ་སྐྱེས་པད་དཀར་གྱིས་ལེགས་པར་གྲུབ། 
4-28
རྒྱལ་བྱེད་ཚལ་སྔགས་གྲྭ་ནས་བསྲེ་འཕོ་འགྲེལ་ཆེན་དང་རྒྱུད་འགྲེལ་སོགས་ཀྱི་རྒྱུགས་འབུལ་བར་དགེ་བཤེས་ཉི་ཤུ་རྩ་གཉིས་བྱོན། ཁོང་རྣམས་ཀྱིས་གསུང་ཆོག་ཕྱག་ཕྱི་ཞུས། འཁོར་ལོ་སྡོམ་པའི་རྡུལ་ཚོན་གྱི་དཀྱིལ་འཁོར་ཞལ་ཕྱེ་སྟེ་རབ་ཏུ་གནས་པ་རྒྱས་པར་མཛད། དེ་པའི་ཁྲོད་ནས་བསླབ་པ་བགྲེས་ཤིང་སྐུ་ཡོན་གྱིས་བརྒྱན་པ་དགེ་བའི་བཤེས་གཉེན་མི་ཕམ་དཀོན་མཆོག་རིན་ཆེན། གཉལ་ཆོས་ལུང་དཀར་པོ་དཔལ་རི་རྡོ་རྗེ་གདན་གྱི་ཆེན་པོ་པར་ཕྱི་ལོ་དེ་བསྐོ་འཇྭ་གནང་། གྲྭ་རིགས་ཡོན་བདག་ཐམས་ཅད་གུས་པ་ཞིག་གོ །ཕོ་བྲང་ཡང་རྩེའི་གཙུག་ལག་ཁང་རྙིང་པ་ཞིག་གསོས་རན་ནས་ལོ་འགའ་སོང་ནའང་། དྲང་སྲོང་གཉན་པས་གཞན་རྣམས་གྱིས་བྱེད་པར་མ་ནུས་པ། དྲང་སྲོང་ལ་བཀའ་བསྒོ་དམ་བཞག་མཛད། ཐོག་བཤུ་འབིགས་རྩིག་པ་ཡོ་སྲོང་བ་སོགས་དབྱར་ཐོག་ལ་བར་ཆད་མེད་པར་ལེགས་པར་གྲུབ། གསུང་ཆོས་ཀྱང་ཤིན་ཏུ་སྨར། བྱམས་པ་ཆོས་གླིང་དུ་ཕེབས་ནས། དགེ་བའི་བཤེས་གཉེན་རབ་འབྱམས་སྨྲ་བ་བསྟན་འཛིན་ཆོས་གྲགས་པ། པད་དཀར་གྲྭ་ཚང་གི་སློབ་དཔོན་དུ་བཀོད་པ་གནང་། འདི་ཉིད་ཐོག་མར་གྲྭ་ས་དེ་ཉིད་དུ་མདོ་ཕྱོགས་ཀྱི་གསན་པ་མཐར་ཕྱིན། མདོ་རྒྱུད་ཀྱི་བཤད་པ་དབང་གདམས་ངག་ཐམས་ཅད་རྒྱལ་བའི་དབང་པོ་ཉིད་ལས་ཐོབ། སློབ་དཔོན་གྱི་གོ་སར་ཕེབས་ནས་ཆོས་སྡེ་གྲྭ་ཚང་གཉིས་ཀ་བསྐྱངས། 
4-29
འཆད་ཉན་སྨར་ཞིང་སྡེ་དར་རྒྱས་ལྷག་པར་ཆེ། དགེ་བཤེས་མང་དུ་ཐོན། ཐམས་ཅད་མཁྱེན་པ་ཆེན་པོ་ཡབ་སྲས་ཀྱི་རྟེན་བཞེངས་རྒྱས་པ་མཛད། བསྟན་པ་ལ་ཕན་ཞིང་མཛད་པ་ཕྱག་རྗེས་བཟང་བ་ཞིག་བྱུང་ངོ་། །སྟོན་རྒྱབ་དེ་ནས་དགུན་གང་གསང་སྔགས་ཆོས་གླིང་དུ་སྐུ་མཚམས་ཀྱི་ངེས་པ་ལ་བཞུགས། བཅད་རྒྱ་ལྷག་པར་དམ་པས་གསོལ་ཇ་དང་གསོལ་འོ་བུག་སྒོ་ལ་ཕུལ། དེ་དུས་འཁོར་ལོ་སྡོམ་པའི་རིག་པ་ཆེན་པོ་འབུམ་ཕྲག་བཞིར་བསྙེན་པར་མཛད་པས། མཚན་སྣང་འོད་གསལ་གྱི་མདངས་ལ་སྐུ་མདུན་གྱི་བར་སྣང་ལ་བྱང་ཆུབ་ཆེན་པོའི་མཆོད་རྟེན་བཟོ་དང་ཐིག་རྩ་བསྔགས་པར་འོས་པ་ཁ་དོག་སྡོ་དངས་དུད་སྤྲིན་ལྟ་བུ་ཐོག་ཚད་ཙམ་ཆོས་འཁོར་ནས་རྨང་དགེ་བཅུ་ཡན་ལ་དམ་པའི་ཆོས་སྡུད་པ་རིན་པོ་ཆེ། ཡི་གེ་དབུ་ཆེན་འབུར་དུ་དོད་པ་དབུ་ཞབས་ཀྱི་བར་རྫོགས་པ་ཞིག་ཡུན་རིང་དུ་སྣང་བ་དང་། དངོས་གྲུབ་འབྱུང་བའི་དཀྱིལ་འཁོར་མགོན་པོ་ལྷ་མངས་གཙོ་བོ་ནས། རྒྱལ་ཆེན་བཞིའི་བར་གྱི་ཐུགས་གསུང་གི་ལྷ་ཚོགས་ཐམས་ཅད་མེ་ལོང་ནང་གི་གཟུགས་བརྙན་ལྟ་བུ་གསལ་ལ་དངས་པ་སྒྲིབ་པ་མེད་པར་གཟིགས། སྐུ་དཀྱིལ་གྱི་མགོན་པོ་འཁོར་དང་བཅས་པ་དམ་ལ་ཐོགས། སྲོག་གི་སྙིང་པོ་འབུལ་བ་བྱུང་། དཀྱིལ་འཁོར་ཆེན་པོ་འདི་ལྟ་བུ་ཕྱིས་ཞལ་གཟིགས་ཡིན་བྱས་པས་ཆོག་པར་ཡོད་དོ་ཞེས་ཆེད་གཉེར་གྱིས་གསུང་ངོ་། །
4-30
རྣམ་པ་ཀུན་ཏུ་ཡེ་ཤེས་ཀྱི་རོལ་པ་དག་པ་རབ་འབྱམས་ལས་གཡེལ་བ་མི་མངའ་ནའང་ནང་གི་རྟེན་འབྲེལ་ཕྱིར་ཤར་བའི་ཚུལ་གྱིས་ངོ་མཚར་བའི་སྣང་བརྙན་འདི་ལྟ་བུ་མ་འོངས་པའི་གདུལ་བྱ་རྣམས་སྤྲོ་བ་བསྐྱེད་པ་དང་། དཀྱིལ་འཁོར་ཆེན་པོ་དེའང་གཞན་ལས་ཆེད་གཏད་ཀྱིས་བརྒྱུད་དགོས་པ་མ་ཡིན་ཞིང་། འགྲུབ་ཐག་ཉེ་བ་དང་། དངོས་གྲུབ་མྱུར་བ་དང་། བྱིན་རླབས་དང་མཐུ་ཆེ་བ་ལ་དགོངས་ནས་སྤྲུལ་པའི་ལྷ་ཚོགས་དེ་དག་བྱོན་པར་ངེས་སོ། །སྣ་ཚོགས་ཏེ་ཆུ་ཕོ་རྟ་ལོ། ལུས་མེད་མཁའ་འགྲོའི་སྒྲུབ་ཐབས་ཆ་ལག་ལམ་སྐོར་དགུ་དང་བཅས་པའི་རྣམ་བཤད་ཆོས་ཀྱི་ཉིང་ཁུ་ཞེས་པ། གྲུབ་པའི་དབང་ཕྱུག་འཕན་པོ་རབ་འབྱམས་པ་ཆོས་གྲུབ་དཔལ་བཟང་གིས་ཞུས་ངོར་མཛད། འདི་ཉིད་ཐོག་མར་གསེར་མདོག་ཅན་དུ་མདོ་ཕྱོགས་ཀྱི་གསན་པ་མཐར་ཕྱིན། རྒྱལ་བའི་དབང་པོ་རྒྱལ་བྱེད་ཚལ་དུ་ཆོས་ཀྱི་འཁོར་ལོ་བསྐོར་བའི་དུས་ཞབས་ཕྱིར་ཕེབས། དབང་ཁྲིད་གདམས་པ་མང་དུ་ནོད་དེ། རྩ་རིར་སྒྲུབ་པ་ལོ་གསུམ་མཛད། སླར་ཞབས་དྲུང་དུ་གདམས་པ་ལྷག་མ་མ་ལུས་པར་གསན། སེན་མོ་དོར་ལོ་བཅུ་བཞི་སྒྲུབ་པ་མཛད། ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། དེ་སྐབས་རླུང་ཟས་ལོ་གཅིག་མཛད་པས་ནམཁའི་རླུང་ཟིན་པའི་རྟགས་བར་སྣང་ལ་སྐྱིལ་ཀྲུང་བཅའ་ནུས་པ་བྱུང་གསུང་། གྲུབ་ཐོབ་ཀྱི་སྙན་པས་ཕྱོགས་ཀུན་ཏུ་ཁྱབ། 
4-31
རྒྱ་མ་ཁྲི་དཔོན་སོགས་མི་ཆེན་མང་པོས་ཞབས་ལ་གཏུགས། རྟོགས་ལྡན་གྱི་རྣལ་འབྱོར་པ་རྒྱུན་ཏུ་ཚོགས། འཕྲིན་ལས་བསམ་གྱིས་མི་ཁྱབ། སྒྲུབ་ཚུགས་འཛིན་ལུགས་འདི་ལྟ་བུ་དཀོན་ཞེས་རྒྱལ་བའི་དབང་པོ་ཉིད་ལྷག་པར་དགྱེས་པའི་གཤིས་ཀྱིས་འདི་ཉིད་ལ་གནང་བའི་ཞལ་གདམས་ཀྱང་མང་ངོ་། །དེ་ལོ་ལྗང་ཡུལ་ནས་བླ་མ་འོད་ཟེར་པ་དཔོན་སློབ་བྱོན། རྒྱ་ཟོག་གི་འབུལ་བ་གཏོས་ཆེ་བ་སླེབ། བྱང་ནས་རྗེ་བཙུན་ཀུན་དགའ་དཔལ་སྒྲོན་བཀའ་འབུམ་རིན་པོ་ཆེ་བཞེད་པར་མོས་ནས། རྒྱུ་ཡོན་ཕྱག་མཛོད་དུ་ཕུལ། དཔོན་ཡིག་གོང་བསམ་མགོ་བྱས་ཀྱིས་བྱམས་པ་ཆོས་གླིང་དུ་དགུན་ཤོག་བུའི་བྱ་བ་རམས་ཚོས་སོགས་བགྱིས། སོས་ནས་ཡིག་གྲྭ་བཙུགས། གསེར་དངུལ་སྤེལ་མ་པོ་ཏི་བཅུ། ལོ་ཁོངས་ཚུན་ལ་གྲུབ། མཆོད་དཔོན་པ་དགེ་སློང་ཀརྨ་རྣལ་འབྱོར་བླ་མའི་འོས་སུ་གཟིགས་ནས་རྒྱ་མཚོ་གྲྭ་ཚང་དུ་བསྐོ་གཞག་གནང་སྦྱིན་སྤྱི་རྫས་སོགས་རྒྱས་པར་སྩལ། ཡོན་བདག་གྲྭ་རིགས་ཐམས་ཅད་མོས་ཤིང་འདུན་པ་དང་། གྲྭ་ཚོགས་ཆེ་བ་སོགས་བསྟན་པ་ལ་ཕན་པ་ཞིག་བྱུང་ངོ་། ། ཀོང་ཕྱོགས་ཀྱི་གྲྭ་རིགས་ཡོན་བདག་རྣམས་ཀྱིས་སྔ་གོང་ནས་གདན་འདྲེན་རིམ་པ་བྱུང་བས་ཕེབས་པར་ཞལ་གྱིས་བཞེས། སྐུ་འཁོར་དུ་ལྕོག་གྲྭ་རྙིང་པ་དཔོན་སློབ། སྔགས་གྲྭ་གསར་པ། བྱང་པ་གྲྭ་ཚང་སོགས་དགེ་འདུན། གཞུང་གི་ལས་ཚན་དང་བཅས་ཕོགས་ལེན་ལྔ་བརྒྱ་དང་ལྷན་ཅིག་ཏུ་བཞུགས་སྒར་བཏེག །
4-32
དཀྱུས་ཕུར་བཞུགས་ཞག་མཛད། དེ་སྐབས་དབུས་སུ་རྗེ་རྡོ་རྗེ་འཛིན་པ་མཐུ་ཆེན་དཔའ་བོ་དགོངས་པ་ཆོས་དབྱིངས་སུ་ཐིམ་པའི་ཐུགས་དམ་འདོགས་ཆས་འབྱོར་བའི་ཞུ་ལན་དུ། དེ་བཞིན་ནན་ལྟར་མ་ལེགས། འོན་ཀྱང་སྐུ་ན་མཐར་སོན། དགོངས་པ་གང་གཏད་འགྲུབ་པས་འགྱོད་པ་མེད། གདུང་ཞུགས་སྦྱངས་དང་། ཚོགས་དབུ་ལ་ར་ལུངས་ཞབས་དྲུང་གདན་དྲོངས། འབུལ་བ་དང་ཞབས་ཏོག་དེར་སྤུངས། དེད་པ་བྱིན་རླབས་རྟེན་དུ་ཕྱག་འཕྲེང་ཞིག་དང་། ལྕགས་ཕུར་དེ་ཁྱེར་ཤོག །ད་ལམ་སྐུ་གདུང་རིན་པོ་ཆེར་སྙན་དར་ཙམ་ལས་མཛེས་ལམ་གྱི་གདུང་འབུལ་མེད། རྟེན་བཞེངས་ངེད་ཀྱིས་ཁུར་ལེན། ཁྱེད་རང་རྣམས་ཀོང་པོར་ཤོག་ཅེས་སྩལ། དེ་ནས་ཀོང་པོ་སྐྱེན་དུ་ཕེབས་ཏེ་སྤེན་མཚོ་ཡན་ལ་དགུན་བཞུགས་མཛད། སྒོ་ཞོ་བཞི་རེ་འབུལ་བའི་སྲོལ་ཚུགས། གསུང་ཆོས་ཤིན་ཏུ་སྨར་བས་བླ་མ་བྱ་ཁྱུང་བ་དང་། སྙིང་ཕུ་བ་སོགས་སངས་རྒྱས་གླིང་པའི་རྒྱུད་འཛིན་ཐམས་ཅད་ཀྱིས་འབུལ་བ་བཟང་པོ་དང་བཅས་ཞབས་ལ་གཏུགས་སོ། །ཉི་མ་སྟེ་ཆུ་མོ་ལུག་ལོ་གསར་ནས། འོར་ཞོད་རྒྱལ་སྦྲིག་སྒོར་མོར་ཕེབས། འོར་ཞོད་དཔོན་རྣམས་ཀྱིས་གུས་པར་བྱས། སྤྱི་ཆོས་སུ་དཔལ་ཕག་མོ་གྲུ་པའི་བཀའ་འབུམ་དང་། སྦྱོར་བ་ཡན་ལག་དྲུག་གི་ཁྲིད་སྩལ། སྤྱོད་འཇུག་གི་འབྲུ་འགྲེལ་དབུ་མའི་ལམ་གྱི་སྒྲོན་མ་ཞེས་པ་མཛད། དེ་ཙ་ན། བླ་མ་རིན་པོ་ཆེ་རྡོ་རྗེ་འཛིན་པའི་གྲྭ་རིགས་རྣམས་འབྱོར། 
4-33
ཧོར་ཆོལ། ཧོར་སྦུག །རྒྱ་དྲིལ་སོགས་ཁྱད་ནོར། གཡུ། བྱི་རུ། སྤོས་ཤེལ་གོས་དར་རྟ་དྲེའུ་སོགས་འབུལ་བ་གཏོས་ཆེ་བ། རྟེན་བཞེངས་ཀྱི་རྒྱུ་གསེར་ཞོ་བརྒྱ་ཉི་ཤུ། ཟངས་ཁལ་བཞི་བཅུ་དང་བཅས་པ། སྒར་གྲྭ་ཚང་རྣམས་ལ་མང་ཇ་སྤྱི་འགྱེད། སློབ་དཔོན་སོ་སོར་འབུལ་བ་རྣམ་གཞག་དང་བཅས་པ་འདུག །རྡོ་རྗེ་འཆང་གི་སྐུ་ཕྱག་མཐོ་བཅུ་བདུན་པ་ཕལ་ཐོག་ལྷག་པ། རིག་བྱེད་པ་བལ་པོ་པུརྞ་པཱ་ལས་མགོ་བྱས་ཀྱིས་བགྱིས། བཞུགས་སྒར་གྱི་ཞབས་ཕྱི་ཁོ་ནར་འབྲེངས་བས་ལོ་ཙམ་འགོར། འོན་ཀྱང་དེ་དང་མཉམ་དུ་མེ་རག་མདོའི་སྤྱི་བླ་གཉིས་ཀྱི་ནང་རྟེན། རྗེ་བཙུན་ཏིལླི་ནཱ་རོའི་སྐུ་མི་ཚད་རེ་བཞེངས་བའང་བཟོ་བོ་འདིས་བྱས། ཞལ་བཀོང་འཕྲལ་འཕྲལ་གནང་། རྟ་སྡིངས་ཀྱི་གདན་ས་པ་ཆོས་རྗེ་དཀོན་མཆོག་ཐུགས་རྗེའི་སྐྱབས་ཀྱིས་སྤྱན་དྲངས། རྟ་སྡིངས་སུ་ཕེབས། དེ་ནི་རྒྱབ་རི་བྲག་དཀར་ཞི་མཐོ་ལ་དབྱིབས་ལེགས་པ། དཔེར་ན་ཡུལ་བཀོད་མཁས་པས་བྲིས་པ་ལྟ་བུ། མཐའ་ནགས་ཤིང་དྲི་ཞིམ་པོས་ཀུན་ནས་བསྐོར་བ། དབུས་སྤང་གཤོངས་མརྒཏ་ཀྱི་མདངས་འཛིན་པར། གཙུག་ལག་ཁང་གླིང་དང་བཅས་པ་ཉམས་དགའ་བ། བག་ཕེབས་པ་ལོངས་སྤྱོད་དད་ལྡན་པར་སྣང་ངོ་། ། དེར་ཟླ་བ་ཙམ་བཞུགས། རྗེ་བཙུན་བཞད་པ་རྡོ་རྗེའི་བཀའ་འབུམ། མགོན་པོ་ཕྱག་བཞི་པའི་དབང་བཞི་རྫོགས་གནང་། མོན་གནས་པ་སོགས་དོན་གཉེར་བ་མང་པོ་འདུས། 
4-34
ཚེ་དཔག་མེད་ལྷ་དགུའི་དབང་དང་། ཚེ་རིང་མཆེད་ལྔའི་རྗེས་གནང་། གཏུམ་མོ་ཞག་གསུམ་མ་མེ་དབང་དང་བཅས་པ་སྩལ། གླིང་ལ་ཕྱོགས་པའི་བཞུགས་ཁྲི་དང་། དཀྱིལ་འཁོར་གྱི་སྟེགས་དུ་གསར་དུ་བཅས། ཚེ་དཔག་མེད་གྲུབ་རྒྱལ་ལྷ་མང་གི་དཀྱིལ་འཁོར་ཞལ་ཕྱེ། འདུས་པ་རྒྱ་མཚོ་ལྟ་བུ་ལ་དབང་བཞི་ཡོངས་སུ་རྫོགས་པ་གནང་སྟེ། སྤྲིན་ཐོག་མྱུ་གུ་ཚལ་དུ་ཕེབས། ཚེ་དཔག་མེད་གསང་སྒྲུབ་ཀྱི་དབང་སྩལ། དེ་དུས་གསང་ནེའུ་ཐོག་གི་དུས་མཆོད་ར་བ་སྨད་པ་ལ་ཡོད་འདུག་པས་ཁད་འགྱངས་པས་སློང་མོ་བ་མ་བྱོན་ཀྱང་། རྟ་ཕོ་བཟང་པོ་གཅིག་དང་། ཇ་སྤོབ་རྩེས་གཙོས་པའི་ཟླ་ཐེས་རྫོང་གདར་མཛད། ཁམས་སྨན་གྱི་དགོན་ནས་གཞུང་བརྒྱ་སྨྲ་བ་མཆོག་གྲོང་པས་འབུལ་བ་ཞུ་འཕྲིན་དང་བཅས་འབྱོར་པའི་ལན་དུ། གཞུང་བརྒྱའི་ཚིག་ལ་ལྷ་ཡི་བླ་མ་བཞིན། །དོན་འབྱེད་ཀཽ་དི་ནྱ་ལྟར་གྱུར་པས། །ལུང་རིགས་སྨྲ་ལ་སྤོབས་པ་དགེ་བ་ཅན། །གང་གི་ཞུ་འཕྲིན་ཟླ་བའི་བཞིན་རས་ནི། །ཚིག་རྒྱན་མེ་ཏོག་འཕྲེང་བས་སྤུད་པ་དང་། །སྐྱེས་ལྔའི་མཛའ་བ་དང་འགྲོགས་བོད་ཡུལ་ཤར། །ཅོག་སྒར་རྒྱུ་སྐར་རྒྱུ་འདྲའི་གསེབ་སོན་པས། །སྔར་གྱི་ཡིད་གཅུགས་སྲིད་ལ་མངོན་སུམ་བཞིན། །ཕྱོགས་དེར་སློབ་འདོད་རྣམས་ཀྱི་རེ་སྐོང་དུ། །གང་གིས་ཤེས་པའི་དཔག་བསམ་བཀོད་གྱུར་ལ། །འཆད་རྩོད་རྩོམ་པའི་དྲི་བཟང་འགྱེད་པའི་ཚུལ། །
4-35
ཐོས་པའི་ལམ་ཞུགས་གྲགས་པའི་ཕོ་ཉ་བས། །སྙིང་ལ་སིམ་པ་བྱེད་དུ་ངལ་བ་བྱས། །བདག་ཀྱང་འདུས་བྱས་ཆོས་ཀྱི་གནས་ཚུལ་ལས། །བདེན་གཉིས་རྣམ་པར་དབྱེ་བའི་ཚུལ་རྟོགས་པས། །ནམཁའ་སྤྲིན་བཅས་སྤྲིན་ནི་གོ་འབྱེད་པ། །ཇི་བཞིན་བྱ་བ་ཐམས་ཅད་ལམ་དུ་ཁྱེར། །རེས་འགའ་མཁས་པའི་ལས་བསམ་གཞུང་ལུགས་འབྱེད། །རེས་འགའ་གྲུབ་པའི་བཤུལ་འཛིན་སྒོམ་བཟླས་བྱས། །ཕལ་ཆེར་སྐྱེ་བོའི་ངོ་བཞིན་འགྱིང་བག་ནི། །དབང་ཕྱུག་ཆེན་བོའི་འདུན་ས་དྲུང་སླེབ་ཙམ། །ཐུབ་པས་འདུལ་བའི་ལུང་ལས་རབ་ཞིར་བསྔགས། །རང་ངོར་དེ་ཉིད་ཁོ་ན་སྙིང་པོར་བྱས། །ལྔ་བརྒྱ་པ་རྣམས་འདོད་ཆེན་མཐོན་པོར་འཛིན། །དེ་ཕྱིར་ཆེན་བོའི་སྲོལ་ཀྱང་མ་བསྣུབས་གཟུང་། །བདག་སྤྱོད་འདི་ལྟར་ཁྱོད་ཀྱིས་ཤེས་གྱུར་ན། །སྲིད་ཞི་མཉམ་པ་མཁའ་དང་ལག་མཐིལ་བཞིན། །བདེ་སྡུག་རོ་གཅིག་ཙན་དན་སྟེའུ་སྟེ། །བཟང་དན་མ་མཆིས་གསེར་དང་བོང་བའི་དཔེ། །འདི་དག་ཀུན་རྫོབ་ཡོད་མ་མྱོང་བས་དང་། །དོན་དམ་མེད་མ་མྱོང་བས་མ་གྲུབ་སྐད། །ཕྱོགས་བྲལ་དབུ་མའི་ལུགས་སུ་ཞུགས་གྱུར་ན། །འཁོར་གསུམ་དག་པའི་ཉམས་ལེན་ལག་རྩེར་ལོན། །ཕྱག་རྒྱ་ཆེན་པོ་བྱས་ཀྱང་དེ་ཀ་དང་། །བྱས་ཚད་དམ་པའི་ཆོས་ལས་གཞན་པ་མིན། །གདུལ་བྱ་འདུལ་བའི་འཕྲིན་ལས་རྒྱ་ཆེན་དེ། །མཁས་པ་ཁྱོད་ཀྱི་རྟགས་ཀྱི་རི་མོར་འོས། །ཅུང་ཟད་བསྙད་འདིའི་རྟེན་དུ་བྱིན་བརླབས་པའི། །
4-36
བདུད་རྩིའི་རིལ་བུ་ནུས་པ་མི་བསླུ་བ། །ཀཱ་ལ་ཀུ་ཊའི་ནད་འཇོམས་སྨན་ཐུམས་དང་། །ཕྱག་རྒྱ་ཆེན་པོའི་བཤད་སྦྱར་ངུར་སྨྲིག་གི །མདངས་འཛིན་ཐེར་མ་ཟུང་ལ་རྟགས་བཀོད་དེ། །སྤྲིན་ཐོག་ཆོས་ཀྱི་ཕོ་བྲང་ཆེན་པོ་ནས། །བཤོལ་ལྡན་གསུམ་པའི་ཚེས་བཅུར་བརྫངས་པ་ཡིན། །ཞེས་སྩལ། མཚལ་བར་དུ་ཕེབས། ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད་དང་དབྱིབས་རྣལ་འབྱོར་གསུམ་གྱི་གདམས་པ་སྤྱི་ཆོས་སུ་གསུངས། བརྟུལ་དུ་ཕེབས་ཇོ་གེ་སར་ཕ་བུས་བཤགས་པ་ཕུལ། མགོན་པོའི་རྗེས་གནང་སྩལ། འདུས་པ་བྱིན་ལ་སྤྱོད་འཇུག་གི་འགྲེལ་པ་དང་། ལམ་ཟབ་རྣམ་བཤད། ལམ་ཟབ་ཐུན་མོང་མ་ཡིན་པའི་ཁྲིད་སོགས་གནང་། གཟིངས་པོ་ཅོལ་དུ་བཞུགས་སྒར་ཕབ། དབོན་གོང་འོག་ཐམས་ཅད་ལྷག་པར་གུས། ཚེ་དཔག་མེད་དཀར་པོའི་དབང་དང་། སྤྱི་ཆོས་སུ་སྟོན་པའི་སྐྱེས་རབས་དཔག་བསམ་འཁྲི་ཤིང་གསུངས། བླ་མ་ཆུ་བཟང་པ་དང་། ཤྲཱི་རབ་འབྱམས་པ་སོགས་ཁྲིད་པ་མང་བ་ཞིག་ལ་མཁའ་འགྲོ་སྙན་རྒྱུད་གནང་བའི་དབུ་ཚུགས། དབུ་མཛད་བཟང་པོ་རྒྱལ་མཚན་འབར་ར་དགོན་པའི་བླ་མར་བཀོད་པ་གནང་། ཁང་གསར་དུ་ཕེབས། དེ་དུས་སྨན་པ་སློབ་གསར་པ་བཅུ་གཉིས་ཙམ་ལ་རྒྱུད་བཞིའི་འགྲེལ་པའི་སྟེང་ནས་བཤད་ལུང་དང་། སྤྱི་ཆོས་སུ་སྒྲུབ་ཐབས་རྒྱ་མཚོའི་རྒྱ་གཞུང་། མ་ཧཱ་མ་ཡཱའི་དབང་རྡུལ་ཚོན་གྱི་དཀྱིལ་འཁོར་ལ་བརྟེན་པ། 
4-37
བཟང་སྤྱོད་ཀྱི་འགྲེལ་པ་ལོ་ཙ་བ་ཡེ་ཤེས་སྡེས་མཛད་པ་སོགས་གསུང་ཆོས་ལྷག་པར་སྨར། དེ་དུས་མངོན་པ་མཛོད་ཀྱི་བཤད་པ་འགྲེལ་པ་ལུགས་ཞེས་པའི་བསྟན་བཅོས་ཆེན་པོ་ཞིག་མཛད་དོ། །སུམ་མཁར་དུ་ཕེབས། ཁྲིད་པ་འགའ་ཞིག་ལ་རྡོ་རྗེ་གསུམ་གྱི་བསྙེན་སྒྲུབ་གནང་བའི་དབུ་ཚུགས། ཤལ་སྒྲུབ་སྡེར་བླ་མ་འོད་ཟེར་དབང་ཕྱུག་བསྐོ་གཞག་གནང་། ཀླུ་སྟོད་དུ་བཞུགས་སྒར་ཕབ། ཆོས་རྗེ་ཀླུ་ཕུ་བ་སོགས་ཞབས་ཕྱིར་འབྱོར་ཤིན་ཏུ་དད་པར་གྱུར། བདེ་མཆོག་དྲུག་ཅུ་རྩ་གཉིས་ཀྱི་དབང་གནང་། དེ་དུས་སྤྱི་ཆོས་སུ་མངོན་པ་མཛོད་ཀྱི་བཤད་པ་སྩལ། ལྟོ་ཁ་གྲུ་སོ་བརྒྱུད་ཕྲག་ཡུལ་བྱེ་མ་གླིང་ནགས་ཡུལ་སྤང་དུ་བཞུགས་སྒར་ཕབ། ཨ་མི་གྲོང་ནས་དུང་མདོ་ཡན་གྱི་སྒོ་ཤོ་དེར་འདུས། དེ་དུས་ཤེས་རབ་ཀྱི་ཕ་རོལ་ཏུ་ཕྱིན་པ་བཀའ་བརྒྱད་སྟོང་པ་དང་། ཇོ་བོའི་ཆོས་ཆུང་བརྒྱ་རྩ་ལ་སོགས་ཏེ་ཆོས་ཀྱི་འཁོར་ལོ་རྒྱུན་མི་འཆད་དུ་བསྐོར་བར་མཛད། དེ་སྐབས་རིག་འཛིན་ཆེན་པོ་སངས་རྒྱས་གླིང་པའི་གཏེར་ཆོས་དུ་མའི་བདག་པོ། སྔགས་འཆང་མཁྱེན་པའི་མངའ་བདག་བླ་མ་བྱ་ཁྱུང་པ་དང་། སྐྱེས་བུ་ཆེན་པོ་ཉིད་ལ་དད་ཅིང་མོས་པའི་མཐུ་མི་ཟད་པ་དང་ལྡན་པས་ལོངས་སྤྱོད་ཀྱི་འབྱོར་པ་འཕངས་པ་མེད་པར་གཏོང་བ་ལ་དགའ་བ་དཔའ་ཞིང་རྟུལ་ཕོད་པ་གཟིང་པོ་པ་ཇོ་ཚེ་དབང་བཀྲ་ཤིས་ཀྱིས་གསོལ་བ་བཏབ་པའི་ངོར་སྙན་ངག་མེ་ལོང་ཡོངས་རྫོགས་ལ་འགྲེལ་པ་མཛད། 
4-38
དེ་ཐོག་ནས་བཤད་པའང་གནང་། རྒྱལ་བྱེད་ཚལ་སྔགས་གྲྭ་བ་རྣམས་ཞབས་ཕྱིར་འབྱོར། ཉིན་བཞིན་མང་ཇའི་ཐོག་མདོ་སྔགས་ཀྱི་བཤེས་གཉེན་རྣམས་ཀྱིས་བཤད་པ་གཏར་ཆགས་སུ་མཛད། དེ་དུས་དགེ་འདུན་ཅོག་བུ་པ་ནམཁའི་སྐར་ཚོགས་ས་ལ་འཕོས་པ་ལྟ་བུའོ་ཞེས་ཀུན་གྱིས་གླེང་ངོ་། །དེར་ནེའུ་རིང་གྲུབ་ཆེན་ཆོས་སྐྱོང་བདེ་ལེགས་པ་གསེར་ལ་སོགས་པའི་འབུལ་བ་གཏོས་ཆེ་བ་དང་བཅས་བྱོན། འདི་ཉིད་འཁྲུངས་ཡུལ་སེང་གེ་དོལ་པའི་སྤྲེ་པ། རྒྱལ་བའི་དབང་པོ་རྒྱལ་བྱེད་ཚལ་དུ་བཞུགས་དུས་ཞབས་ལ་གཏུགས། གདམས་པ་ཟབ་ཆོས་མཐའ་དག་གསན། ལ་སྟོད་བྱང་། ནེ་རིང་སོགས་ཀྱི་རི་ཁྲོད་རྣམས་སུ་སྒྲུབ་པ་མཐར་ཕྱིན། ཐམས་ཅད་དུ་གྲུབ་ཐོབ་ཆེན་པོར་གྲགས། གཞན་ཚོགས་གསོག་པའི་ཕྱིར་དུ་གསེར་དངུལ་ནས། ཁབ་སྐུད་ཡན་བྱུང་ཚད་ཐུབ་དབང་པདྨ་དཀར་པོའི་ཕྱག་རྫས་ཡིན་གསུང་གསོག །སྐབས་བསྟུན་གྱིས་འབུལ་དུ་འབྱོན། འཇིག་རྟེན་ཆོས་བརྒྱད་ལས་གྲོལ། སྣང་བ་ཟག་གཏད་མེད་པར་ཤར་བས། འགའ་ཞིག་གིས་སྨྱོན་པ་ལྟ་བུར་མཐོང་། མོས་གུས་ཁོ་ན་ལ་རྩལ་སྦྱངས་པ། མ་ནམ་བཞི་སྐོར་ལ་ཐུགས་དམ་གྱི་རྩ་བར་མཛད་བཞིག་འདུག །ཁོང་གིས་འགྲོ་དོན་ཇི་ལྟར་བྱེད་ཞུ་བའི་ལན་དུ་འདི་སྐད་གསུངས། བླ་མའི་བྱིན་རླབས་སྙིང་ལ་ཞུགས་པའི་དུས། །ཆོས་ཉིད་གཉུག་མའི་མ་དང་མངོན་སུམ་མཇལ། །སྣང་གྲགས་རིག་གསུམ་དེ་ཡི་རང་མདངས་ཕྱིར། །
4-39
གང་ཤར་ཆོས་སྐུར་སོང་བས་ལྟ་བ་ཟབ། །དེ་ལ་ལྷུག་པར་གནས་པས་སྒོམ་པ་བདེ། །སྟོང་ཉིད་རྒྱུ་འབྲས་ཤར་བས་སྤྱོད་པ་ཞིབ། །འབྲས་བུ་ལྷུན་གྲུབ་ཚིག་ཙམ་མིན་པར་ལོན། །སུ་འབྲེལ་བྱིན་གྱིས་རློབ་པས་བརྒྱུད་པ་ཟིན། །རྟེན་འབྲེལ་ཐབས་ལ་མཁས་བས་ཐུག་ཚད་འཚེངས། །ཕ་རྗེས་བུས་སྙོགས་འགྲོ་བའི་འདྲེན་པར་སོང་། །ཨ་ལ་ལ་འོ་སྒྲུབ་པའི་ལག་རྗེས་ཡིན། །ཞེས་གསུང་ངོ་། །དེ་ནས་མཚོ་འཇུག་དགོན་པ་གསར་པར་ཕེབས་དེར་རྗེ་བཙུན་མར་ལུགས་ཀྱི་གསང་བ་འདུས་པ་ལྷ་སུམ་ཅུ་རྩ་གཉིས་ཀྱི་དཀྱིལ་འཁོར་རྡུལ་ཚོན་ལ་བརྟེན་ནས་དབང་དང་། རྒྱན་བདུན་གྱི་བཤད་པ་ཉིད་ཀྱི་སྤྱི་དོན་སྟེང་ནས་སྩལ། རྒྱལ་བ་རྒོད་ཚང་པའི་བཀའ་འབུམ་ཁྲིད་ཆེན་བརྒྱད། རྗེ་ཡང་དགོན་པའི་རི་ཆོས་སྐོར་གསུམ་སོགས་གསུངས། འཚེལ་ཟ་ཡུལ་དུ་བཞུགས་སྒར་ཕབ། དེ་ཙ་ན་རབ་ཏུ་བྱུང་བ་དང་། བསྙེན་པར་རྫོགས་པ་དོན་དུ་གཉེར་བ་མང་པོ་ཕྱོགས་མཐའ་དག་ནས་འདུས། དོན་གྱི་སླད་དུ་མཚན་ནས་སྨོས་ན། མཁན་པོ་བརྟན་མཁས་ཀྱི་ཡོན་ཏན་དང་ལྡན་པ། གནས་བརྟན་འདུལ་བ་འཛིན་པ་ཆེན་པོ་དགྲ་བཅོམ་པ་ཟག་པ་ཟད་པ། སེམས་ཤིན་ཏུ་རྣམ་པར་གྲོལ་བ་མི་ཕམ་པདྨ་དཀར་པོ་ཉིད་སྟན་བཤམས་པ་ལ་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲངས་ན་བཟའ་སྣམ་སྦྱར་རྒྱུ་དང་བཟོ་ཕུན་སུམ་ཚོགས་པ་བལྟ་བས་ངོམས་པ་མེད་པ་ནི་མནབས། 
4-40
རྟེན་གནྡྷོ་ལའི་དྲུང་དུ་མཆོད་པའི་ཡོ་བྱད་མཚར་དུ་དངར་བ་ནི་བཤམས། ལས་བྱེད་པའི་སློབ་དཔོན་དང་། གསང་སྟེ་སྟོན་པའི་སློབ་དཔོན། དུས་ཀྱི་བརྡ་སྤྲོད་པ་པོ་ལ་སོགས་པའི་གནས་བརྟན་དགེ་སློང་རྣམས་ཀྱིས་བསྐོར་བའི་དབུས་སུ། དོན་དུ་གཉེར་བ་པོ་རྣམས་ཀྱི་དོན་མཐུན་པ་དང་དོན་སྤྱོད་པའི་སླད་དུ་ཉིན་ཞག་མང་པོ་འདས་སོ། །འདུས་པ་དེ་རྣམས་ཀྱི་བསམ་པ་ལ། སྟོན་པའི་རྒྱལ་ཚབ་ཆེན་པོ་འོད་སྲུངས་ཀྱང་འདི་ཉིད་དོ། །བདག་ཅག་གིས་བྱ་བ་ལེགས་པར་བྱས་སོ། །དོན་གྲུབ་བོ་སྙམ་སེམ་མོ། །དེ་དུས་བྷ་ག་ཚལ་པ་དང་། ཆོས་འབྱུང་དགོན་པ་བ་རྣམས་ཀྱིས་གདན་འདྲེན་བྱུང་། དེའི་ཕུ་རྩ་ནང་ཞེས་པ་ན་སློབ་དཔོན་པདྨས་བཞེངས་པའི་མཆོད་རྟེན་དཀར་མོ་འགུལ་ཤེས་བྱ་བ་བཞུགས་ཟེར་བ་མཇལ་བ་དང་བསྟུན་ནས་ཕེབས་ཁོང་རྣམས་ཀྱིས་ཞབས་ཏོག་འབུལ་བ་སོགས་རྒྱས་པར་འདུག །རྩ་ནང་དུ་མཆོད་རྟེན་མཇལ་བར་ཐོག་མར། ངེད་སྒར་པ་མཆེད་གྲོགས་ཤིན་ཏུ་མང་བས་བསྐོར་བ་དང་འཛབ་བྲོ་ཇི་ཙམ་བྱས་ཀྱང་མ་འགུལ་བས་མི་བདེན་པ་འདྲ་སྙམ་བློས་བོར་བ་དང་། ཐམས་ཅད་མཁྱེན་པ་ཆེན་པོ་ཕེབས། ཆིབས་བཤོལ་བ་ཙམ་ལ་ས་གཡོ་བ་ཆེན་པོ་ལྟར་ཡོམ་ཡོམ་འགུལ་ཞིང་འདུག །ཞབས་བསྐོར་རྒྱུན་རིང་དུ་གནང་། དེ་བར་ཡང་གཡོ་བ་རྒྱུན་མི་འཆད། ངོ་མཚར་ཅན་ཞིག་འདུག་ཅེས་གསུང་། 
4-41
སླར་བཞུགས་སྒར་དུ་ཕེབས། གྱང་མཐོའི་བླ་མ་གཉིས་ཞབས་ཕྱིར་འབྱོར། བཅོམ་ལྡན་འདས་མི་འཁྲུགས་པ་ལྷ་མོ་འདུན་མའི་དབང་། རྡོ་རྗེ་རྣམ་པར་འཇོམས་པ་ལྷ་བཅོ་ལྔའི་དབང་སོགས་སྩལ། དེ་དུས་རྒྱལ་བྱེད་ཚལ་དང་། བྱ་ཡུལ་གྱི་སྔགས་གྲྭའི་ཁྲོད་ནས་ཤེས་རབ་ཆེ་བ་འཛིན་ཡངས་པ་མང་དུ་བསྡུས་ནས། དྭགས་པོ་ལོ་ཙ་བ་དགེ་སློང་དབང་ཕྱུག་སློབ་དཔོན་དུ་བཀོད་པ་གནང་། ཁོང་ཐུགས་བསྐྱེད་བཟང་བ་དང་སློབ་མ་འཁྲིད་མཁས་པས། སྒྲ་ཀ་ཙན་གཉིས་ཀའི་གཞུང་། བཤད་པ་རི་མོ་སོགས་མཐར་ཕྱིན་གཞན་གྱི་སློབ་དཔོན་འོས་པ་བདུན། གཞན་ཀ་ལཱ་པ་རང་མཁྱེན་པ་མང་དུ་ཐོན། ལར་དེ་དུས་བཞུགས་སྒར་ན་རེག་གནས་ཀྱང་ཤིན་ཏུ་དར་རོ། །གྲ་ཕུ་སྐུ་སྐྱེ་དང་། སྟེང་རྩ་བླ་མ་དྭགས་པོ་དགེ་སློང་སོགས་དོན་གཉེར་མང་པོ་ལ་ཕྱག་རྒྱ་ཆེན་པོའི་བཤད་སྦྱར་རྒྱལ་བའི་གན་མཛོད་ཀྱི་སྟེང་ནས་བཤད་པ་གནང་། ཆོས་རྗེ་ཀོང་རམ་པས་བཤད་སྐྱོར་བ་མཛད་ཀྱི་འདུག །འདི་ཉིད་ལ་སྐུ་ཡོན་གྱི་ཐུགས་མཐོང་ཤིན་ཏུ་ཆེའོ། །ཤོ་ཁ་ཆོས་སྡེ་བ་དཔོན་སློབ་འཇལ་དུ་བྱོན་པར་མང་འགྱེད་དང་ཆོས་འབྲེལ་སྩལ། དེ་སྐབས་ཤིག་བྱ་རྒོད་གཤོངས་ཀྱི་སློབ་དཔོན། ཕྱིས་ངམ་རིང་མཁན་ཁོར་ཕེབས་པ་མང་ཐོས་ཀླུ་སྒྲུབ་རྒྱ་མཚོ་ཞེས་པས། དྲི་རྩོད་ཀྱི་ཡི་གེ་ཞིག་ཕུལ་འདུག་སྐུ་འཁོར་གྱི་བཤེས་གཉེན་རྣམས་ཀྱིས། 
4-42
འདི་ལ་ལན་ཞིག་གནང་བ་རིགས་དེ་མིན་དྲི་བའི་ལན་རྩལ་བར་མ་ནུས་སོ་སྙམ་སྐྱེ་སྲིད་ཞུ་བས། ལན་རྣལ་མར་བཏབ་ན་མཉན་ཡོད་བྱར་གཤོངས་པ་རྣམས་ངེད་རང་ལ་གུས་པ་དེ་ཕྱིར་འཕུལ་དུ་འགྲོ། མཛེས་ལམ་གྱི་ལན་ལ་དགོས་པ་མེད་ཅེས་དྲི་བ་དེའི་མགོར། ཤོག་བྱང་ཁྲོན་པ་འདིའི་གཏིང་ཡང་། །དཔོག་པའི་རྣམ་དཔྱོད་མི་ལྡན་པར། །ཆོས་ཚུལ་རྒྱ་མཚོའི་གློང་འཇལ་བའི། །རེ་བ་བྱེད་པ་ཨེ་མ་མཚར། །ཞེས་པའི་ཚིགས་བཅད་ཙམ་ལས་གཞན་མ་གནང་ངོ་། །ཉི་སྒྲོལ་བྱེད་དེ་ཤིང་པོ་སྤྲེའུ་ལོ་གསར་ནས། བུ་ཆུ་འབྲུག་ཆོས་སྡིངས་སུ་ཕེབས། བདེ་ཆེན་སྟེང་པ་རྣམས་ཀྱིས་སྤྱན་འདྲེན་ཞུས། དགོན་པ་ཞབས་ཀྱིས་བཅགས། དེ་དུས་ཀྱི་འཁོར་འདུས་པ་ཕལ་ཆེར་ནི་ཐེག་པ་ཆེན་པོའི་རིགས་ཅན། ཐེག་པ་ཆེན་པོ་ལ་ཡང་དག་པར་མོས་པ། ཐེག་པ་ཆེན་པོ་ལ་འཇུག་པར་འདོད་པ་རྣམས་ཀྱི་ངོར། འཕགས་པ་ཐོགས་མེད་ཀྱི་ལུགས་བྱང་ཆུབ་ཏུ་སེམས་བསྐྱེད་པའི་ཆོ་ག་རྒྱས་པ་ལ་བརྟེན་ནས་མཛད། དེའི་ཚེ་མཆོད་པའི་བྱེ་བྲག་དང་བཀོད་པའི་ཁྱད་པར་ནི་སུམ་ཅུ་རྩ་གསུམ་གྱི་གཙོ་བོ་རྣམས་ལ་འགྲན་པ་བཞིན་དུ་བཤམས། སྐྱེས་བུ་ཆེན་པོ་སྐྱེས་བུ་ཁྱུ་མཆོགས་ཆེན་པོ་ལ་རབ་ཏུ་བཞུགས་པ་བྱང་ཆུབ་སེམས་དཔའ་སེམས་དཔའ་ཆེནཔོ་མི་ཕམ་པདྨ་དཀར་པོ་ཉིད། ཁྲི་མཐོན་པོ་ལ་བཞུགས་ཏེ་བྱ་ངུར་པའི་འདབ་མ་ལྟ་བུའི་ན་བཟའ་བླ་གོས་ཟླུམ་པོར་མཛད། 
4-43
སྐྱིལ་མོ་ཀྲུང་བཅས་ཕྱག་ཆོས་ཀྱི་འཁོར་ལོའི་ཕྱག་རྒྱ་བཅིངས་ཏེ། གསུང་ཚངས་པའི་དབྱངས་ལྟ་བུར་སྙན་ལ། སྒྲ་མི་གསལ་པ་མེད་པས་གོ་བར་བླ་བ་ལན་གསུམ་གྱི་བར་དུ་ཟློས་པས་དེ་དག་གི་རྒྱུད་ལ་སྨོན་པ་དང་འཇུག་པའི་སེམས་སྐྱེས་སོ། །དེ་ནས་མཁྱེན་པར་གསོལ་ཅིང་། སྟན་ལས་བཞེངས་ནས་ཕྱག་ཐལ་མོ་སྦྱར་ཏེ། བྱང་ཆུབ་སེམས་དཔའ་མིང་འདི་ཞེས་བྱ་བ་རྣམས་ཉོན་ཅིག་ནས། འདི་ལྟ་བུའི་ཆོ་འཕྲུལ་འབྱུང་བར་འགྱུར་ཏེ། ཞེས་པའི་བར་གསུངས་མ་ཐག་ལྷ་རྣམས་ཀྱིས་མེ་ཏོག་གི་ཆར་ཕབ། དྲི་བཟང་པོས་ཁྱབ་པས་འཁོར་རྣམས་དགའ་ཞིང་མགུ་ལ་ཡི་རང་བ་ནི་དཔེར་ན་ས་དང་པོ་ཐོབ་པ་ལྟ་བུར་གྱུར་ཏོ། །རབ་འབྱམས་པ་དོན་ཡོད་པད་དཀར་ལ་ཁྱེད་རང་བུ་ཆུ་རྫོང་དཀར་དུ་སྒྲུབ་པ་དང་བླ་མའི་བྱ་བ་སྟབས་སུ་གྱིས་གསུང་ནས་བསྐོས། དགེ་འདུན་བྱིན་དེར་བཞུགས། དཔོན་སློབ་རགས་རིམ་སྒྲུབ་སྟེ་མེ་རག་མདོར་ཕེབས། དེར་སྐུ་མཚམས་ཀྱི་བཅད་རྒྱ་ལ་བཞུགས། གྲོལ་ནས་འབྲུག་ཆོས་སྡིངས་སུ། རྟེན་གཉིས་ཀྱི་གཟུངས་སྡོམས་རབ་གནས་རྒྱས་པར་སྩལ། མེ་རག་མདོ་ན་གཞི་བདག་ཆོས་ལ་དཀར་བའི་ལྷ་ཞིག་དང་། རྗེ་མཐུ་སྟོབས་དཔའ་བོའི་དགེ་བསྙེན་ཡིན་ཟེར་བའི་བཙན་ཞིག་འདུག །དགེ་སྦྱོར་ཤིན་ཏུ་འཕེལ་གསུང་། དེ་དུས་གྱང་མཐོ་སྤྲུལ་སྐུ་བདེ་ཆེན་རོལ་པ་ལ་གསུངས་པ། 
4-44
རྒྱལ་བས་གསུངས་པ་དམ་པའི་ཆོས། །ཁ་སྐད་ཉིད་དུ་མ་ལུས་པར། །ཐུགས་རྒྱུད་རྣལ་མར་འབྱོར་པའི་ཕྱིར། །དཀར་རྒྱུད་བླ་མ་ཕྱག་བྱའི་འོས། །བཅོས་མིན་སེམས་ཀྱི་ངོ་བོ་རིག །སྒྲོ་འདོགས་སྐུར་འདེབས་དེ་ཀར་ཞིག །བཤད་པ་ཀུན་གྱི་ཐོག་ཏུ་འབབ། །ལྟ་བ་ཡིན་ཞེས་བླ་མ་གསུང་། །རིག་པ་རང་ངོ་ཤེས་ཙ་ན། །བྱིང་རྒོད་ཐམས་ཅད་རྒྱུ་མེད་ཞི། །སེམས་འཛིན་ཀུན་གྱི་དགོས་པ་གྲུབ། །སྒོམ་པ་ཡིན་ཞེས་བླ་མ་གསུང་། །ཅི་ཤར་པ་ལ་ཡང་དག་ལྟ། །དམིགས་བྱ་དམིགས་བྱེད་འབྱུང་ཁུངས་སྟོངས། །ཨ་ཝ་དྷཱུ་ཏཱིའི་རོལ་པར་སོང་། །སྤྱོད་པ་ཡིན་ཞེས་བླ་མ་གསུང་། །གནས་པ་བཙན་ས་ཟིན་ཙ་ན། །ཡིད་ལ་བྱེད་པ་གྲོགས་སུ་ཁུགས། །ཏིང་ངེ་འཛིན་ལ་རྩལ་སྤྱོད་ཐུབ། །རྩེ་གཅིག་ཡིན་ཞེས་བླ་མ་གསུང་། །ཡིན་ལུགས་རང་གི་ཞལ་བསྟན་པས། །ཇི་སྙེད་འཁྲུལ་པའི་རྫུན་ཕུགས་རྡིབ། །གཞན་མི་སྣང་བས་ཉེ་བར་ཞི། །སྤྲོས་བྲལ་ཡིན་ཞེས་བླ་མ་གསུང་། །ཆོས་རྣམས་སེམས་ཉིད་ངང་དུ་འདུས། །དད་དེ་རྣམ་པ་ཀུན་ཏུ་སོང་། །བརྟགས་པས་ནམཁའ་ནམཁར་སྦྱར། །རོ་གཅིག་ཡིན་ཞེས་བླ་མ་གསུང་། །འཁོར་བ་ཟད་པས་སྟོང་པ་ཉིད། །སྐུ་གསུམ་སྙིང་རྗེའི་ནུས་པས་སྦྱར། །རྣམ་དབྱེར་མེད་པའི་རྣམ་དབྱེ་ཅན། སྒོམ་མེད་ཡིན་ཞེས་བླ་མ་གསུང་། །དེ་སྐད་ལྷ་བབ་རི་བོ་པའི། །དགོན་པའི་ཁྱུ་རྒྱན་དེ་ལ་ནི། །ངེས་དོན་སྨྲ་ལ་སྤོབས་པ་ཅན། །
4-45
པད་འཛིན་དེ་ཡིས་གདམས་པའོ། །ཞེས་སྩལ། དེ་སྐབས་མེ་རག་མདོ་པ་དཔོན་སློབ་རྣམས་ཀྱིས་ཇ་གོས་དར་རྟ་དྲེའུ་སོགས་ཀྱི་བརྒྱ་འབུལ་ཆེན་པོ་འདུག །དགོན་མ་ལག་ཐམས་ཅད་ནས་བླ་མ་དབུ་མཛད། གང་ཟག་སོ་སོས་ཀྱང་རང་རང་གི་བསོད་ནམས་ལས་ཇི་ལྟར་གྲུབ་པའི་བདོག་པ་ཐམས་ཅད་ཕངས་པ་མེད་པར་ཕྱག་ཏུ་ཕུལ། དེ་དུས་ལམ་ཟབ་མོ་བླ་མ་སྒྲུབ་པའི་ཁྲིད་ཞལ་གདམས་ལུང་བཤད་པ་དང་བཅས་པ་མ་ལུས་པར་སྩལ། བྱིན་རླབས་དམུས་ལོང་མིག་འབྱེད་ཀྱི་སྐབས། ཞུ་བ་པོས་ཚོགས་གུར་ཆེན་མོ་མེར་གང་། ཕལ་ཆེར་ནི་དགེ་བའི་བཤེས་གཉེན་རབ་ཏུ་བྱུང་བ་འབའ་ཞིག །མཐར་ཉ་མའང་མང་བར་སྣང་། ཕ་བྱིན་རླབས་ཀྱི་སྡོང་པོ་ཐུགས་རྗེའི་མངའ་བདག་མཆོག་གི་རྗེ་བཙུན་བླ་མ་དམ་པ་ཉིད། ཁྲི་ཆེན་པོ་ལ་བཞུགས། མཆོད་པས་མདུན་བདར་ཏེ། བུ་བླ་མ་བསྟན་པའི་གཙོ་བོར་མོས་པ་གྱིས་ཞེས་བཀའ་སྩལ་བ་ན་འགའ་ཞིག་ལ་དེར་སྣང་བ་བྱུང་ཟེར། བླ་མ་དཔལ་རྟ་མགྲིན་ཡིན་ནོ་ཁྱེད་རང་རྣམས་ཀྱང་དེ་ལྟ་བུར་མོས་པ་གྱིས་ལ། ཁམས་གསུམ་དབང་དུ་བསྡུ་བའི་ཕྱིར་རྟ་སྐད་དྲག་པོ་ཐེངས་གསུམ་སྒྲོགས་ཤིག་གསུང་པ་ན། ཅོག་གྲྭ་རིན་པོ་ཆེ་རིན་ཆེན་དཔལ་བཟང་གིས་རྟ་སྐད་དྲག་པོར་བཞད། དེ་ནས་འཁོར་རྣམས་ལ་ཆེར་གཟིགས་ཏེ། ཀྱེ་ཁྱེད་འདིར་འདུས་པ་རྣམས་སུ་ཞིག་ཅེས་གསུང་པ་ན། 
4-46
རྟེན་འབྲེལ་ཁ་ལྟ་ལ་བཟབ་དགོས་སྙམ་བདག་ནི་གྲུབ་ཐོབ་ཅིག་ལགས་སོ་ཞུས། གཞན་རྣམས་ནི་ཀུན་རྟོག་རགས་པ་འགགས་ཏེ་སྣང་བ་ཐམས་ཅད་བུན་ནེ་ལོང་ངེར་སོང་ནས་ཅང་མི་སྨྲ་ཞིང་མིག་མི་འཛུམ་པར་བལྟའོ། །དེ་ལྟ་བུའི་ལྟད་མོ་ཆེན་པོ་མཐོང་། བྱིན་རླབས་ཆེན་པོ་བྱུང་ངོ་། །དེ་སྐབས། གདན་ས་རིན་པོ་ཆེ་མེ་ཏོག་མདངས་འཕྲོག་གཉིས་པ་དཔའ་ར་ལུང་ཐེལ་ནས། དབོན་རིན་བོ་ཆེ་མི་ཕམ་བསྟན་པའི་ཉི་མ་དཔོན་སློབ། ཐམས་ཅད་མཁྱེན་པ་ཆེན་པོའི་ཞབས་ལ་ཕྱག་བགྱི་བ་དང་གསུང་གི་བདུད་རྩི་མྱང་བར་སྤྲོའོ་ཞེས་པའི་ཞུ་འཕྲིན་གྱི་ཕོ་ཉ་བ་འབྱོར། དུས་མི་འགྱང་བ་ཉེ་བར་ཕེབས་པའི་ཚེ། ཁྱེད་གྲྭ་ཚང་རྣམས་ཀྱིས་སྤྱན་འདྲེན་སེར་སྦྲེང་གྱིས་ཞེས་བའི་བཀའ་སྩལ། གྲྭ་ཚང་སོ་སོ་ནས་གདུགས། བ་དན། རྒྱལ་མཚན། རོལ་མོའི་བྱེ་བྲག་བསམ་གྱིས་མི་ཁྱབ་པ་དང་བཅས། དགེ་འདུན་ཐམས་ཅད་སྣམ་སྦྱར་དང་བླ་གོས་གསར་པ་འབའ་ཞིག་ནི་ཟླུམ་པོར་བགོས། རྒྱ་རྟགས་ཀྱི་སྒོམ་ཞྭ་ནི་ཅོད་པན་དུ་བཅིངས། དྲན་པ་དང་ཤེས་བཞིན་དུ་ལྡན་པས་སྤྲེང་བཞིན་དུ་གནས་ཏེ་ཉེ་ཁར་གཤིབས་པ་རྒྱང་གྲགས་གཅིག་ཙམ་མོ། །གུང་ལ་རྒྱལ་བའི་དབང་པོ་ཉིད་ཀྱི་བཞུགས་ཁྲི། གཡས་སུ་རྟེན་གསུམ། གཡོན་དུ་དབོན་རིན་པོ་ཆེའི་བཞུགས་གདན་བཤམས། སྔ་གསོལ་གའུ་ལེར་ཆེ་འདོན་མ་གྲུབ་རིང་ཕྱག་ལན་མི་མཛད་ནའང་། 
4-47
ངེད་རང་སྒར་པའི་ཆེ་འདོན་ད་ལམ་གྱི་འདི་ཀས་ཐུས་པ་བྱེད་གསུང་ཁྲི་ཐོག་ནས་ཕྱག་ལན་གནང་། དེ་ནས་གཟུང་སྟེ་འབྲུག་ལུགས་ཀྱི་དབང་ཁྲིད་ཞལ་གདམས། བཤད་པ་ཕྱག་ལེན་མཐའ་དག་རྫོགས་པར་སྩལ། སྐུ་འཁོར་དུ་གདན་ས་ཅོག་གྲྭ་བ་དཔོན་སློབ་བྱོན། ཁོང་རྣམས་ཁམས་ཕྱོགས་སུ་གདུལ་བྱ་འཕྲིན་ལས་རྒྱ་ཆེ་བའི་སྟབས་ཀྱིས་ཇ་གོས་དར། རྟ་དྲེའུ་སོགས་ཀྱི་རྒྱ་འབུལ་འདུག ། དགེ་འདུན་རྣམས་རབ་ཏུ་བྱུང་བ་དང་། བསྙེན་པར་རྫོགས་པར་འོས་པ་ཐམས་ཅད་བསྒྲུབས། །གདམས་པ་དང་རྗེས་སུ་བསྟན་པ་བསམ་གྱིས་མི་ཁྱབ་པ་གནང་། དེ་དུས་ཞབས་འབྲིང་དགེ་འདུན་ཕོགས་བཞེས་ཕྱེད་དང་ཉིས་སྟོང་ཙམ། གཞན་ཆོས་དོན་དུ་གཉེར་བའི་བན་བཙུན་རང་བརྒྱགས་པ་སོགས་ཀྱིས་ལུང་པ་དེ་གང་བ་བྱུང་། དེ་སྐབས། ཞྭ་དམར་ཅོད་པན་འཛིན་པ་ལྔ་པ་དགོངས་པ་ཆོས་དབྱིངས་སུ་ཐིམ་པའི་དགོངས་རྫོགས་སྐུ་སྐལ་གྱི་འབུལ་བ། སྤྱི་སོར་མང་འགྱེད་དང་བཅས་མི་སྣ་འབྱོར། བུ་ཆུ་གཏེར་གྱི་ལྷ་ཁང་དུ་དབུ་མ་ལུགས་ཀྱི་སེམས་བསྐྱེད། གཞན་དགྱེས་རྡོར་གྱི་དབང་མོ་ཆེ་སོགས་དབང་ཁྲིད་བཤད་པ་རྒྱུན་མི་འཆད། དེ་ནས་ཟླ་བ་ཐང་དུ་བཞུགས་སྒར་ཕབ་དེར་ཟླ་བ་ཕྱེད་གཉིས་ཙམ་སྟན་ཆགས། ཇོ་བོ་ནཱ་རོ་པའི་ཁྱད་ཆོས་བསྲེ་འཕོ་གནད་ཀྱི་མཚམས་སྦྱོར་དང་། གཞན་ཡང་གསུང་ངག་རིན་པོ་ཆེ་རོ་སྙོམས་ཆེན་མོ། 
4-48
བླ་སྒྲུབ། རྟེན་འབྲེལ། ཕྱག་ཆེན། ཆོས་དྲུག །ཐུགས་དམ་དགེ་སྦྱོར་བདུན་པ་སོགས་ཀྱི་སྔ་ཆོས་དགོངས་ཆོས་འཆག་མེད་དུ་སྩལ། འདུས་པའི་འཁོར་རྣམས་ནི་དེ་དག་གི་དམིགས་པ་འཛིན་པ་དང་། བཤད་པ་བསྐྱར་བ་དང་། འཁྲུལ་འཁོར་སྦྱང་བ་དང་། གསོལ་བ་འདེབས་པ་དང་། ཟིན་བྲིས་སུ་བགྱིས་པའི་བྱ་བ་ལས་གཞན་ཡེངས་པའི་སྐབས་མ་མཆིས་སོ། །དེ་དུས་ཀྱི་ཞུ་བ་པོའི་གཙོ་བོ་ནི་ཞབས་དྲུང་དཔོན་རིན་པོ་ཆེ་ཉིད་དེ། །རྡོ་རྗེ་འཆང་གི་སྐུ་ལེགས་པར་གྲུབ། རབ་གནས་མདོར་བསྡུས་ཤིག་མཛད། སྐུ་གསེར་བཙོ་སྦྱངས་གྲུབ་པ་ཞོ་བརྒྱ་དང་བཅུ་སོང་། འཛུགས་སྟོན། བར་སྟོན། གསེར་སྟོན་སོགས་དང་ཡོན་གསེར་རྐྱང་ཞོ་བརྒྱད་ཅུ། དེ་ལྷག་གོང་རྒྱབ་དང་བཅས་པ་ཕྱག་མཛོད་ནས་གནང་། སླད་ནས་རབ་སྟོན་གྱི་རྒྱུ་དང་བཅས་ཏེ་བླ་མ་རིན་པོ་ཆེའི་གྲྭ་རིགས་རྣམས་དབུས་ཕྱོགས་ལ་རྫོང་དར་མཛད། རྟེན་དེ་གྲྭའི་སྒྲུབ་སྡེ་དོན་གྲུབ་མཐོང་སྨོན་གྱི་རྟེན་གཙོར་བཞུགས་སོ། །ཉང་ཁ་ཚུན་ཕེབས་ཏེ་འབུལ་བ་དང་སྒོ་ཞོ་བཞེས། དེར་དགེ་འདུན་རགས་རིམ་ལ་འཇིགས་བྱེད་ཀྱི་དབང་དང་། ར་ལུགས་ཀྱི་ཡིག་ཆ་ཚད་མའི་ལུང་སྩལ། བྱིན་ལ་རིན་ཆེན་རྒྱན་འདྲའི་སྟེང་ནས་རྒྱུད་བཤད། གཞན་རྗེས་གནང་ཉེར་གཉིས་པ་སོགས་ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་བསམ་ལས་འདས་པ་བསྐོར། བྲག་བྱར་ཕེབས་དེར་སྒོ་ཞོ་དུས་འབྱངས། 
4-49
གཉེར་པ་རྣམས་དགེ་འདུན་སྐྱོང་བའི་ཡོ་བྱད་ཀྱིས་དབེན་པ་ན། གྱང་མཐོ་དམན་མོ་སོགས་ཡུལ་དེའི་གཞི་བདག་མི་མ་ཡིན་རྣམས་ལ། དགེ་འདུན་ཉེ་བར་འཚོ་བའི་རྒྱུ། དེ་རིང་རང་དང་སང་ཚུན་འགྲུབ་པར་མཛོད། ཅེས་གསུངས་པ་ན། དེ་རྣམས་ཀྱིས་བསྐུལ་ཏེ། ཚོད་དཔོན་བཀྲ་ཤིས་ཞེས་པས་དེ་ཉིན་རང་ལ་ནས་ཞོ་བརྒྱ་ཕུལ། གཞན་ཡང་ནས་འབུལ་བ་མང་དུ་བྱུང་། དེ་སྐབས་རྒྱལ་བྱེད་ཚལ་སྔགས་གྲྭའི་དགེ་འདུན་གྱི་དབུས་སུ། དགེ་བའི་བཤེས་གཉེན་ལྷ་དབང་བློ་གྲོས་རྒྱུད་ལ་སྦྱངས་པ་ཆེ་བས་འོས་སུ་མཁྱེན་ཏེ། རྡོ་རྗེ་ཐེག་པའི་སློབ་དཔོན་གྱི་བྱ་བ་གྱིས་ཞེས་ཕྱག་ནས་གཏོར། འདི་ཉིད་གྲ་ས་དེ་ཉིད་དུ་གསང་སྔགས་བླ་མེད་ཀྱི་རྒྱུད་མཐའ་དག་ལ་སྦྱངས། ཁྱད་པར་དུས་ཀྱི་འཁོར་ལོ་ལ་འགྲན་ཟླ་མེད་པར་རྩི། སྒྲ་སྙན་ངག་སོགས་རིག་གནས་པ་ཆེན་པོར་གྱུར། དབང་རྒྱུད་བཤད་གདམས་པ་མཐའ་དག་རྒྱལ་བའི་དབང་པོ་ཉིད་ལས་རྫོགས། འདིའི་ཐོག་ལ་དགེ་འདུན་བརྒྱ་བཞི་བཅུ་ལྷག་པ་རྟག་པར་འདུ། ཐམས་ཅད་མཁྱེན་པ་ཆེན་པོའི་གསུང་གི་གསང་བ་ལས་བྱུང་བའི་དུས་འཁོར། བདེ་མཆོག །དགྱེས་རྡོར། གསང་བ་འདུས་པ་སོགས་དཀྱིལ་ཆོག་མང་དུ་བཙུགས། དཔལ་འཁོར་ལོ་སྡོམ་པ་ལྷ་བཅུ་གསུམ་གྱི་བློས་བསླངས་བཞེངས། ཕྱིས་སྐུ་མཆོད་ཆེན་མོའི་དུས་དང་བསྟུན་ནས་དཀྱིལ་འཁོར་དེ་དག་ཞལ་དབྱེ་བ་དང་སྒྲུབ་ཅིང་མཆོད་པའི་སྲོལ་བཏོད་པ་སོགས་བསྟན་པ་ལ་ཕན་ཞིང་མཛད་པའི་ཕྱག་རྗེས་བཟང་བ་ཞིག་བྱུང་ངོ་། །
4-50
དེ་ནས་སྲིབ་མོ་གཉའ་ཁྲིར་ཕེབས། སྔགས་གྲྭ་སློབ་དཔོན་རིག་སྔགས་འཆང་བ་ངག་དབང་ཀུན་དགའ་སྙིང་པོ་རྡོ་རྗེ་འཛིན་པའི་འོས་སུ་གཟིགས་ནས་བསྐོ་བཞག་གནང་། བདག་གི་ཉམས་ལེན་ཇི་ལྟ་བུ་བགྱིད་ཞུ་བར། མཚན་གྲགས་པ་ཆེ་འོ་ར་ལུང་པ། །དཔལ་ངག་དབང་ཆོས་ཀྱི་རྒྱལ་པོ་ལ། །བདག་གུས་པའི་གསོལ་འདེབས་བགྱིད་ལགས་ཀྱི། ཕ་ཐུགས་རྗེའི་སྤྱན་གྱིས་གཟིགས་པར་འཚལ། །ལས་མི་དགེ་བཅུ་པོ་རྒྱང་བསྲིངས་ཏེ། །དུས་གཏན་དུ་དགེ་བ་བསྒྲུབ་ནུས་ན། །ཚེ་འདི་ན་བདེ་ལ་ཕྱི་མར་སྐྱིད། །གནས་ལྷ་མིར་སྐྱེ་བས་ཐར་པའི་སྣོད། །ཁོང་འཁོར་བར་འཁྱམས་པའི་ཉེས་པ་མཐོང་། །རང་ཞི་བ་མྱ་ངན་འདས་འདོད་ནས། །ཐབས་བསླབ་པ་གསུམ་ལ་སློབ་པ་ཡང་། །ཆོས་སྤྱོད་པ་ཡིན་ཀྱང་དམན་པའི་ལམ། །མ་ཁམས་གསུམ་འགྲོ་ལ་བྱམས་སྙིང་རྗེས། །མཆོག་བླ་མེད་བྱང་ཆུབ་སེམས་བསྐྱེད་ནས། །དུས་སྐད་ཅིག་རང་དོན་མ་འཁྲིས་པར། །ལམ་ཕར་ཕྱིན་དྲུག་ལ་སྤྱོད་པ་འདི། །ཁོང་དུས་གསུམ་རྒྱལ་བའི་གཞུང་ལམ་ཡིན། །སེམས་བཅོ་བསླད་མེད་པ་རང་རིག་ན། གདངས་ལྷ་སྔགས་ཏིང་འཛིན་རོལ་མོ་ཡིས། །མཆོག་ཐུན་མོང་དངོས་གྲུབ་སྒྲུབ་པ་འདི། །དཔལ་རྡོ་རྗེ་འཆང་གི་གསེབ་ལམ་ཡིན། །ལུས་དངོས་པོར་གནས་པའི་རྩ་རླུང་གཅུན། །སེམས་སྟོང་པ་ཉིད་ལ་སྦར་ཟིན་བྱས། །དོན་གནས་ལུགས་མངོན་གྱུར་སངས་རྒྱས་པ། །རང་སེམས་ལས་རྙེད་པ་ངོ་མཚར་ཆེ། །
4-51
ཞེས་གསུང་ངོ་། །འདི་ཉིད་འཁྲུངས་ཡུལ་ཡར་སྟོད་ཤར་གཡའ་བཟང་ཁྲི་དཔོན་གྱི་སྐུ་ཚ། དགུང་ལོ་བརྒྱད་ནས་ཐམས་ཅད་མཁྱེན་པ་ཆེན་པོའི་ཞབས་པད་བསྟེན། དཀར་རྒྱུད་ཀྱི་གདམས་པ་མཐའ་དག་དང་། ཁྱད་པར་བཀའ་འབུམ་རིན་པོ་ཆེའི་དབང་ལུང་གི་རྒྱུན་ཡོངས་སུ་རྫོགས་པ་གསན། སྐུ་བསྲུངས་པ་ཆེན་པོ་ཚེ་བདག་བཀྲ་ཤིས་པར། རྒྱལ་བའི་དབང་པོ་ཉིད་དང་དཔོན་སློབ་ལྷན་དུ་བསྒྲུབ་འཕྲིན་མཐའ་དག་ཕྱག་ལེན་དང་བཅས་པ་སྤྱིས་ཕྱིན་པ་དང་། རྗེ་བཙུན་མཐུ་ཆེན་དཔའ་བོ་ལ་གཏུགས་ཏེ། བསྟན་བསྲུང་ཆོས་སྐྱོང་གི་བསྐོར་མ་ལུས་པར་སྤྱད། བཀའ་བབས་སུ་མངའ་གསོལ། བསྙེན་བསྒྲུབ་མཐར་ཕྱིན། དྲག་སྔགས་ཀྱི་བདག་པོར་གྱུར་ཏེ། རྗེ་མཐུ་ཆེན་གཉིས་ཀྱི་གདན་ས་གཟུང་། དེ་དུས་ནས་སྔགས་འཆང་སྐུ་རིམ་པ་ཀུན་གྱི་ཏོག་ཏུ་ཐོན། ལྷོ་རྒྱུད་ཀྱི་སྔགས་གྲྭ་རྒྱུན་རིང་དུ་བསྐྱང་བར་མཛད། སློབ་མ་གཞན་གྱི་བླ་མར་འོས་པ་མང་དུ་བྱུང་། གནས་ཆེན་ཙ་རི་ཏྲའི་རྡོ་རྗེ་འཛིན་པ་ཆེན་པོའི་གདན་སེང་གེའི་ཁྲི་ལ་ཕེབས། སྒྲུབ་སྡེ་པདྨ་དཀར་པོ་སོགས་བསྐྱངས། ལྷོ་ཕྱོགས་ཆོས་ཀྱི་རྒྱལ་པོ་བྱ་པ་གོང་མ་སྐུ་མཆེད་སྲས་བཙུན་མོ་དང་བཅས་པའི་བླ་མར་གྱུར། བདག་སོགས་སྒར་པ་གཞོན་རིམ་ཕལ་གྱིས་ཞབས་ལ་གཏུགས། དིང་སང་གི་བར་དུ་འཚོ་ཞིང་གཞེས་ལ་འཕྲིན་ལས་མཁའ་ཁྱབ་པ་ཞིགོ་ལྟ་བ་གཡུ་དྲུང་འཛིན་དུ་ཕེབས། 
4-52
བརྟག་གཉིས་རྒྱུད་རྒྱང་གི་སྟེང་ནས་བཤད་པ་འབྲུ་གནོན་གནང་། དེ་དུས་སོག་ཡུལ་ནས་ཐམས་ཅད་མཁྱེན་པ་བསོད་ནམས་རྒྱ་མཚོའི་ཞུ་འཕྲིན་ཁྱད་གོས་ཀྱི་རྟེན་དང་བཅས་འབྱོར། རྒྱལ་ཁང་ལྷུན་བྲག་ཏུ་ཕེབས། དེ་སྐབས་ཁམས་རྒྱ་སྟོན་ནས་ཞུ་འཕྲིན། དིང་སང་གི་དུས་ན་འབྲུག་པ་ཐམས་ཅད་མཁྱེན་པ་ཆེན་པོ་ཉིད་ཀྱི་སྙན་པས་ཕྱོགས་ཀུན་ཏུ་ཁྱབ་ཅིང་། སྐུ་འཁོར་ན་དགེ་བའི་བཤེས་གཉེན་རགས་ལ་མང་ངོ་ཞེས་ཐོས་པས། འདིར་སློབ་དཔོན་སྔགས་ལ་སྐུ་ཡོན་ཆེ་བ་ཞིག་གནང་དགོས་ཞེས་ཞུ་བར། ལྷ་ལྔ་ཆོས་མཛད་སྔགས་ལ་སྦྱངས་པ་ཆེ། ཁྱད་པར་གསུང་ངག་རིན་པོ་ཆེ་བསྲེ་འཕོ་སོགས་ཁྲིད་ཆེན་ལ་ངེས། བཙུན་པའི་དཔེར་འོས། རིག་གནས་ཀྱིས་ཀྱང་བརྒྱན་པས་འོས་སུ་དགོངས་ནས་བསྐོ་འཇྭ་དང་བཅས་རྫོང་དར་གནང་། རྒྱ་སྟོན་ཞལ་ངོའི་བླ་མར་ཁུར། བསྟན་པ་དང་སེམས་ཅན་ལ་ཕན་ཞིང་འཕྲིན་ལས་རྒྱ་ཆེ་བ་ཞིག་བྱུང་ངོ་། །དེར་སྒོ་ཞོ་སོགས་བཞེས་དབང་མོ་ཆེ་གནང་། དེ་ལྟར་ཡུལ་གྲུ་གང་དུ་ཕེབས་པ་ཐམས་ཅད་དུ་རང་རང་གི་འདོད་པ་བཞིན་དབང་རྗེས་གནང་དང་ཁྱད་པར་ཁྲོམ་དབང་རེ་སྩལ། ལོངས་སྤྱོད་ཀྱི་འབྱོར་པ་དོན་དང་ལྡན་པ་རྣམས་བྱང་ཆུབ་ཀྱི་བར་དུ་མ་ཉམས་ཤིང་གོང་ནས་གོང་དུ་འཕེལ་བ་དང་ཡངས་པའི་ཕྱིར་ཡོངས་སུ་བསྡོ་བས་རྒྱས་འདེབས་པར་མཛད་དོ། །གང་ཡང་ཐེག་པ་ཆེན་པོ་ལ་རབ་ཏུ་ཞུགས་པའི་བྱང་ཆུབ་སེམས་དཔའ་ཆེན་པོ་ཟབ་མོ་སྔགས་ཀྱི་སྒོར་སྤྱད་པ་སྤྱོད་པ་དག་ནི། 
4-53
ཐོག་མར་ཀུན་ཏུ་བཟང་པོའི་སྤྱོད་པ་ནང་དུ་ཡང་དག་པར་འཇོག་ཅིང་། ཐུན་མོང་ཀུན་གྱི་སྣང་ངོར་གཙུག་ལག་ཁང་གི་ལས་དང་། མཆོད་རྟེན་བགྱི་བ་དང་། དགེ་འདུན་བསྡུ་བའི་བྱ་དང་། བཀའི་དོན་རྣམ་པར་འགྲེལ་བའི་བསྟན་བཅོས་ཆེན་པོ་རྩོམ་པ་ལྷུར་བླངས་ཏེ། ཀུན་ནས་དགེ་བ་བཟང་པོ་ལ་རང་ཉིད་སྤྱོད་ཅིང་། གཞན་སྦྱོང་བས་ཀུན་བཟང་གི་སྤྱོད་པ་ཞེས་བྱའོ། །དེ་ནས་དེ་དག་ཏུ་མི་དང་མི་མ་ཡིན་གྱིས་བར་དུ་གཅོད་པ་དང་། མཐོ་མཚམས་པ་ཐམས་ཅད་ཏིང་ངེ་འཛིན་གྱི་ལམ་དུ་བྱ་བ་ལས། ཕྱིར་གཞན་གྱིས་མི་མངོན་པས་ན་གསང་བའི་སྤྱོད་པ་ཞེས་བྱའོ། །དེ་གཉིས་སྔོན་དུ་སོང་ནས། ད་ནི་རྒྱལ་ཚབ་ཆེན་བོའི་བརྟུལ་ཞུགས་ཀྱི་སྤྱོད་པའམ་ཚོགས་ཀྱི་སྤྱོད་པ་ཞེས་བྱ་བ་དེ་བརྩམ་པར་རིགས་སོ་དགོངས་ནས། དེ་ལ་གནས་ཤིག་གང་དུ་བཅའ་བར་འོས་ཞེས། འཕགས་པ་འཇིག་རྟེན་དབང་ཕྱུག་གི་ཕོ་བྲང་། བུ་ཆུ་གཏེར་གྱི་ལྷ་ཁང་དུ་ནུབ་ཅིག་མནལ་བར་གྱུར་ཏོ། །དེའི་ཚེ་འཕགས་པའི་ཞལ་ནས། རིགས་ཀྱི་བུ་དེ་ལྟ་བུའི་ཚུལ་བགྱིས་ན། དམག་གི་གཏེར་ཆེན་པོ་འབྱུང་ཞིང་ཀུན་གྱི་བློར་ཤོང་བར་དཀའོ། ། འོན་ཀྱང་གནས་ཆུ་བོ་ཆེན་པོ་ལུ་ཧི་ཏའི་འགྲམ། གནས་དཀར་ལྡིང་གསུམ་གྱི་དབུས། ཀླུའི་རྒྱལ་པོ་སྦྲུལ་མགོ་བདུན་པའི་ཕོ་བྲང་གི་སྟེང་དུ་བྱ་བར་འོས་སོ་ཞེས་བྱུང་ངོ་། །
4-54
དེ་ལོ་ས་དྲ་བ་ཙམ་མཛད། ས་སྐྱོང་སྟེ་ཤིང་མོ་བྱ་ལོ་རྨང་བཏིངས། གཙུག་ལག་ཁང་ཆེན་པོ་འདུ་ཁང་ཀ་ཆེན་བཅུ་དྲུག །གཙང་ཁང་ཀ་གཉིས། གློ་འབུར་གཉིས་སྒོ་ཁང་དང་བཅས་པ་ཉིས་ཐོག་བཀོད་པས་ཁྱད་པར་དུ་འཕགས་པ། མགོན་ཁང་བྲིས་འབུར་སོགས་ཤིན་ཏུ་མྱུར་བ། ལོ་ཕྱེད་དང་གཉིས་ན་གྲུབ། སྙན་རྒྱུད་ཀྱི་ཡིག་ཆ་གསར་རྙིང་མཐའ་དག་འདྲིལ་མི་འཆུག་པར་བྱ་བའི་ཕྱིར་དཀར་ཆག་གི་རྒྱས་བཏབ། དེ་སྐབས་མཚན་སྒྲོག་འཕགས་པ་དཔོན་སློབ་མཇལ་དུ་བྱུང་། མཁན་པོའི་ངོར་ཞལ་གདམས་འདི་གསུངས་སོ། །དུས་སྙིགས་མར་གྱུར་པའི་གནས་སྐབས་འདི། །ཆགས་སྡང་གི་གློང་ན་བན་བཙུན་འཁྱམས། ། མི་གཞན་མའི་ཕུན་ཚོགས་མི་བཟོད་འཁྲུགས། །འདི་བསམས་ཀྱིན་གྲོང་ཡུལ་གྱི་ཕྱོགས་ལ་བྱོལ། །ཟང་ཟིང་གི་འདུ་ལོང་དུག་གི་ཟས། །འབགས་ཆེས་ཀྱིན་ཐར་པའི་སྲོག་ལ་གཟན། །དེ་བས་ཆགས་མེད་ཀྱི་བྱ་བཏང་ལ། །ཆོས་འདུལ་བའི་སྙིང་པོར་བསམས་ནས་ཞུགས། །རྒྱུད་ཆོས་བརྒྱད་ཅིག་དང་མ་བྲལ་རིང་། །ཡེངས་མེད་ཀྱི་ཞི་གནས་གསེར་ལས་དཀོན། །དེས་ན་ཞེན་ཡུལ་གྱི་སྟེང་འདི་རུ། །ལུང་རིགས་ཀྱི་རལ་གྲི་ཅིས་མི་བསྣུན། །གར་གཏང་ལ་ལྷོད་དེ་སྡོད་ཚུགས་ན། །རྣམ་རྟོག་གི་གཡོ་རྒྱུ་དེ་ཀར་འཇིག །ཉམས་བདེ་གསལ་བའི་གློང་ནས་རིག་པ་ཤར། །བདེན་འཛིན་ལ་འཇོམས་བྱེད་དཔའ་བོར་སོང་། །ཉོན་མོངས་པའི་རང་མཚང་དེ་ནས་རིག །
4-55
སྤང་རྒྱུ་ཞིག་མེད་པ་ལག་ཏུ་ལོན། །ཐོབ་མེད་ཀྱི་འབྲས་བུ་ཐོབ་པ་ལ། །དཀའ་ཚེགས་མེད་སྙམ་ངེས་ཤེས་སྐྱེ། ཞེས་སྩལ། ཆོས་འཁོར་རིམ་པ་གསུམ་གྱི་དོགས་གཅོད་ཅེས་བའི་བསྟན་བཅོས་རྩ་འགྲེལ་མཛད། དེ་སྐབས་ཆར་པ་ཤིན་ཏུ་དཀོན་པས་ཁྱིམ་བདག་རྣམས་ཀྱིས་གསོལ་བ་བཏབ་བའི་ཚེ། ཐུགས་རྗེས་གཡོས་པའི་སྤྲིན་སྔོན་འབབ་ཆུ་ཅན། །དུས་ལས་མི་གཡེལ་ཡངས་བའི་མཁའ་ཁྱབ་སྟེ། །ཕུན་ཚོགས་འབྱུང་བ་དཔལ་གྱི་དགའ་ཆར་གྱིས། །འཇིག་རྟེན་ཕན་བདེའི་ལོ་ཏོག་རྒྱས་གྱུར་ཅིག །ཅེས་གསུངས་པས། དེ་ནས་གཟུང་ཆར་གྱི་རྒྱུན་ཆེན་པོ་བབས་སོ། །མི་ཟད་པ་སྟེ་མེ་ཕོ་ཁྱི་ལོ། ད་ནི་འོ་སྐོལ་གྱི་སྟོན་པས་ཀྱང་མ་ག་དྷ་རྡོ་རྗེའི་གདན་བྱང་ཆུབ་ཀྱི་སྙིང་པོར་བདུད་ཀྱི་གཡུལ་ལས་རྒྱལ་བའི་ཆོ་འཕྲུལ་ཆེན་པོ་བསྟན་པ་དེ་བཞིན་དུ་བགྱིའོ་ཞེས་དགོངས་ཏེ། གཙུག་ལག་ཁང་དེ་ལའང་རྡོ་རྗེ་གདན་ཅེས་མིང་མཐུན་པར་མཛད་དོ། །དེ་ནས་དེར་སའི་ལྟེ་བར་རྡོ་རྗེའི་སློབ་དཔོན་གདན་བཤམ་པ་ལ་སྐྱིལ་མོ་ཀྲུང་བཅས་ཏེ། འདུད་ཀྱི་གཡུལ་ལས་རབ་ཏུ་རྒྱལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་བཞུགས་སོ། །སྙོམས་པར་ཞུགས་མ་ཐག་ཏུ། བདུད་ཀྱི་ཡུལ་རྣམས་སུ་ལྟས་ཆེན་པོ་བཅོ་བརྒྱད་ཀྱིས་འགུལ་འགུལ་ཤིག་ཤིག་པ་གྱུར་ཏོ། ། དེ་ནས་རྡོ་རྗེའི་སློབ་མ་བཞིས། པུས་མོ་གཡས་པའི་ལྷ་ངས་ལ་བཙུགས་ཏེ་ཕྱོགས་བཞི་ནས། 
4-56
ཀྱེེ་རྡོ་རྗེའི་སློབ་དཔོན་བདག་པོ་ཆེན་པོ། བདུད་ཀྱི་གཡུལ་ལས་རབ་ཏུ་རྒྱལ་བ། དངོས་གྲུབ་འབྱུང་བའི་དཀྱིལ་འཁོར་ཆེན་པོ་བསྟན་དུ་གསོལ་ཞེས་གསོལ་བ་བཏབ་པས། དཔལ་འཁོར་ལོ་སྡོམ་པ་རབ་ཏུ་ཁྲོས་པ་རྡོ་རྗེ་ནག་པོ་བྱ་རོག་གི་མིང་ཅན། བདུད་དང་བདུད་ཀྱི་ཕྱོགས་ལ་དྲག་ཤུལ་ཆེན་པོར་ཁྲོས་པ། ཟ་བྱེད་སྲིན་པོའི་གཟུགས་ཕྱག་བཞི་པ། རྣམ་པར་ཐར་པ་མཚོན་པའི་ཡུམ་གསུམ། ཉིང་སྤྲུལ་གྱི་མ་བཞི། ཕྱག་ན་རྡོ་རྗེ་དང་། སྤྱན་རས་གཟིགས་དང་། འཇམ་པའི་དབྱངས་རྣམས། ཧཱུཾ་མཛད། མྱུར་མཛད། གསང་བའི་མགོན་པོ་ཞེས། དེ་དག་གི་ཡུམ་དང་བཅས་པ་ཐུགས་ཀ་ནས་སྲིན་པོའི་གཟུགས་ལ་བྱ་རོག་གི་མཆུ་ཅན། རྡོ་རྗེའི་གཤོག་པ་གདེངས་པ། རང་འདྲའི་སྤྲུལ་པ་གསུམ་དང་བཅས་པ་ཡབ་ཡུམ་སྐུ་ལས་ལེགས་ལྡན་ཆེན་པོ་ཡབ་ཡུམ་བརྒྱད། རྣམ་པར་ཤེས་པ་ཚོགས་བརྒྱད་ལས་དུར་ཁྲོད་ཀྱི་མ་མོ་མགོ་བརྙན་ཅན་བརྒྱད། བ་སྤུའི་བུ་ག་ནས་རྡོ་རྗེ་ཕོ་ཉ་མོ་དྲུག་ཅུ་རྩ་བཞི། ཞིང་སྐྱོང་ཆེན་པོ་སུམ་ཅུ་རྩ་གཉིས། རང་བྱུང་གི་ལྷ་མོ་ཟ་བྱེད་ཀྱི་མགོན་པོ་དང་བཅས་པ། གངས་ལ་གནས་པའི་ལྷ་མོ་ཚེའི་གཡུ་དྲུང་བརྟན་མ་ཚོགས་ཀྱི་བདག་པོ་དང་ལྷན་ཅིག་པ། བོད་ཡུལ་ལྷན་ཅིག་སྐྱེས་མ་དམག་དང་ཟོར་གྱི་བདག་མོ་དཔའ་བོ་རྟ་ནག་ཆེན་པོ་ལ་དགའ་བ། 
4-57
སོ་ས་གླིང་གི་ཞིང་སྐྱོང་མ་རང་འདྲའི་ཡབ་དང་བཅས་པ་མངོན་པར་སྤྲུལ་ཏེ། དབང་ཕྱུག་མ་ཧཱ་དེ་ཝ། ལྷ་ཆེན་པོ་བརྒྱད། འཁོར་གཟུགས་ཁམས་ཀྱི་ལྷ་དང་། འདོད་ལྷ་དང་། གྲུབ་པ་དང་རིག་པ་འཛིན་པ་དང་བཅས་པ། བདུད་རྒྱལ་མགོན་པོ་སེང་གདོང་ཡབ་ཡུམ། འཁོར་བདུད་ཀྱི་སྡེ་དཔོན་བརྒྱད། ཟ་བྱད་བམ་རོ་ཤ་ཟའི་ཚོགས་དང་བཅས་པ། གཤིན་རྗེ་ཆོས་ཀྱི་རྒྱལ་པོ་ཡབ་ཡུམ་གཤིན་རྗེའི་སྡེ་དཔོན་ཆེན་པོ་བརྒྱད་དང་བཅས་པ། སྲིན་པོ་ཁྱབ་འཇུག་རཱ་ཧུ་ལ། འཁོར་གདོང་མོ་བཞི་གཟའ་ཆེན་བརྒྱད། ལྷ་མ་སྲིན་གཏུམ་པོ་དང་ལངྐའི་བདག་པོ་ལ་སོགས་ཏེ་སྲིན་པོའི་ཚོགས་དང་བཅས་པ། ཀླུ་བདུད་ནཱ་ག་རཀྵ་ཡབ་ཡུམ། འཁོར་ཀླུ་ཆེན་བརྒྱད། ས་བདག་ལ་སོགས་ཏེ་ལྟོ་འཕྱེའི་ཚོགས་དང་བཅས་པ། བཙན་མགོན་ཕག་གདོང་ལྕམ་དྲལ། འཁོར་གྲི་ཐོགས་ཀྱི་གིང་བརྒྱད། སྲོག་གཅོད་ཀྱི་གཤན་པ་ཉི་ཤུ་རྩ་གཅིག་དང་བཅས་པ། གནོད་སྦྱིན་ནག་པོ་ཁྲག་གི་རལ་པ་ཅན་ཡབ་ཡུམ་འཁོར་གནོད་སྦྱིན་ཆེན་པོ་བརྒྱད་ལ་སོགས་ཏེ་གནོད་སྦྱིན་གཏུམ་པོའི་ཚོགས་དང་བཅས་པ། གིང་པེ་ཧ་ར་ཡབ་ཡུམ། འཁོར་རུ་འདྲེན་སྡེ་བཞི་ལ་སོགས་ཏེ་སྐྱེས་བུ་གིང་གི་ཚོགས་དང་བཅས་པ། གཞན་ཡང་བརྒྱ་བྱིན། མེ་ལྷ། གཤིན་རྗེ། སྲིན་པོ། ཆུ་བདག །རླུང་ལྷ། གནོད་སྦྱིན། དབང་ལྡན། ཚངས་པ། ལྷ་མོ་བརྟན་མ། 
4-58
རྒྱལ་པོ་ཆེན་པོ་སྡེ་བཞི། སྔགས་བདག་དྲེགས་པ་བཅོ་བརྒྱད། སྡེ་དཔོན་སུམ་ཅུ། ཕྱི་ནང་གསང་པ་སྦས་པ་སྔགས་བསྟན་པ་སྐྱོང་བ། ལས་བྱེད་བཏགས་ཆགས་ཀྱི་ལྷ་མ་སྲིན་སྡེ་བརྒྱད་ཐམས་ཅད་འཁོར་དུ་བསྡུས་ཏེ། ཀླད་ཁྲག་ཞག་གི་རྒྱ་མཚོ་ཆེན་པོའི་དབུས། ཐུགས་གསུང་སྐུའི་དཀྱིལ་འཁོར་གྱི་འཁོར་ལོ་ཆེན་པོར་བཀོད་ཅིང་མངོན་པར་བསྟན་ནོ། ། དེའི་ཚེ་རྡོ་རྗེ་རྒྱལ་འཐེབ་དང་། རྡོ་རྗེ་ལས་པ་དེ་དག་གིས། ཀྱེ་གྲོགས་པོ་དག །ཤེས་པར་གྱིས་ཤིག །གསང་བ་དངོས་གྲུབ་འབྱུང་བའི་ཀྱིལ་འཁོར་ཆེན་པོ་འདི་ལྟ་བུ་ཕྱོགས་འདིར་སྔོན་ལྷ་དང་མིར་གྱུར་པ་སུས་ཀྱང་བསྟན་པར་མ་ནུས་ཤིང་མ་སྤྲུལ་པ་མཇལ་བར་དཀའ་བ་འདིར་རྡོ་རྗེའི་སློབ་དཔོན་ཆེན་པོས་མི་མ་ཡིན་པའི་འགྲོ་བ་པ་དག་ཀྱང་འཇུག་པར་མཛད་ན། གང་སུ་དག་ས་ཕྱོགས་འཛམ་བུའི་གླིང་ལས་ཀྱི་ས་པར་གཏོགས་པས་མིར་གྱུར་བ་སུ་ཞིག་མི་འཇུག་ཅེས་དྲིལ་བསྒྲགས་སོ། །དེའི་ཚེ་དེའི་དུས་ན་འཁོར་གྱི་གཙོ་བོར་གྱུར་པ་འགའ་ཞིག་སྟན་ལས་ལངས་ཏེ་རྡོ་རྗེ་སློབ་དཔོན་ཆེན་པོའི་མདུན་དུ་ཕྱག་བགྱི་བ་སྔོན་དུ་འགྲོ་བས་བག་ཡོད་པས་གནས་ཏེ། ཐལ་མོ་སྦྱར་ནས་འདི་སྐད་ཅེས་གསོལ་ཏོ། །བཀའ་གསང་བ་པས་ཀྱང་ཆེས་གསང་བའི་དཀྱིལ་འཁོར་ཆེན་པོ་འདིར། ཐོག་མར་རབ་ཏུ་བྱུང་བ་རྣམས་འཇུག་ཅིང་དབང་བསྐུར་བར་རིགས་སོ། །
4-59
དེ་ནས་རྒྱལ་རིགས་དང་། བྲམ་ཟེ་སྔགས་རིགས་དང་། ཡོན་གྱི་བདག་པོ་རྗེའུ་རིགས་འགའ་ཞིག་འཇུག་ཅིང་དབང་བསྐུར་བར་མཛད་པ་ནི་རིགས་ཀྱི། དམངས་རིགས་དང་གདོལ་པ་རྣམས་ལ་ནི་དབང་བསྐུར་བ་ལྟ་ཅི། དཀྱིལ་འཁོར་ཆེན་པོ་འདིར་འཇུག་པ་ཙམ་ཡང་གནང་བར་མི་འཚལ། ཞེས་གསོལ་བས། རྗེ་ཉིད་ནི་དི་ལྟར་སྔོན་རྒྱལ་པོ་གྲགས་པས་དུས་ཀྱི་འཁོར་ལོ་ལ་བཞིན་བགྱིས་ན། ཡུལ་མི་འདི་ཐམས་ཅད་ཐེག་པ་ཆེན་པོའི་རིགས་སད་དེ། གསང་སྔགསཀྱི་རྣལ་འབྱོར་པོ་མོ་དམ་ཚིག་གཅིག་གིས་བསྡུས་པ་ཞིག་འོང་རྒྱུ་ལ། ཅུང་ཟད་རྟེན་འབྲེལ་འཆུགས་སོ་དགོངས་ནས་མི་དགྱེས་བཞིན་དུ། ཞུ་པ་པོའི་ངོར་ཞལ་གྱིས་བཞེས་ཏེ། ཉིན་དང་པོ་ལ་སྟ་གོན། གཉིས་པ་ལ་རྡོ་རྗེ་སློབ་དཔོན་འཁོར་ལོས་སྒྱུར་བའི་ཆས་སུ་ཞུགས་ཏེ་ཐོག་མར་རབ་ཏུ་བྱུང་བ་དང་། རྒྱལ་རིགས་སོགས་འགའ་ཞིག་ལ་དབང་ཡོངས་སུ་རྫོགས་པར་སྩལ། དམངས་དང་གདོལ་པ་རྣམས་ལ་དཀྱིལ་འཁོར་ཆེན་པོའི་ཁ་དོག་མཐོང་བ་ཙམ་གྱི་སྒོ་ནས་འབྲེལ་པ་བཞག་སྟེ་དཀྱིལ་འཁོར་གྱི་བྱ་བ་མཐར་ཕྱིན་ནོ། །དེའི་ཚེ་ནམཁའི་ལྷ་ཕྲན་མན་ཆད་ནས། ས་འོག་ལྟོ་འཕྱེ་ཡན་ཆད་ཀྱིས་འཇིགས་འཇིགས་ལྟ་བུའི་ཆོ་འཕྲུལ་བསམ་གྱིས་མི་ཁྱབ་སྟེ། དཔེར་ན་སྟོན་པ་ལ་བྱང་ཆུབ་ཤིང་གི་དྲུང་དུ་དང་། རྗེ་བཙུན་ཆེན་པོ་ལ་སྨན་ལུང་ཆུ་བར་དུ་བྱུང་བ་བཞིན། 
4-60
མཚན་ལམ་དང་ཉམས་སྣང་ལ་བསྟན་ནོ། །དེའི་ཚེ་སྐྱེས་བུ་ཆེན་པོ་དེ་ཉིད་ཀྱི་བ་སྤུའི་རྩེ་མོ་ཡང་གཡོ་བར་མ་ནུས་པས། འདོད་ཁམས་ཀྱི་བདག་པོ་དེ་རྣམས་ལག་པ་འགྲམ་པ་ལ་བརྟེན་ཏེ་མྱ་ངན་གྱི་ཁང་བུར་ཆུད་པར་གྱུར་པ་ལ་དེ་དག་གི་དགའ་མ་རྣམས་ཀྱིས། ཀྱེ་གྲོགས་དག་ཅིས་ཉེས་ཞེས་བརྗོད་པ་ན། དེ་དག་གི་སྨྲས་པ། སྔོན་རྒྱལ་པོ་ཟས་གཙང་གི་སྲས་དང་། རྣལ་འབྱོར་གྱི་དབང་ཕྱུག་བཞད་པ་རྡོ་རྗེ། ད་ལྟ་འདི་ཉིད་གསུམ་ལས་འཇོམས་པར་དཀའ་བ་གཞན་སུ་ཡང་མ་མཆིས། དེའི་ཕྱིར་ཡིད་མི་དགའོ་ཞེས་སོ། །ཐབས་བྱ་བར་རིགས་ཀྱི་མྱ་ངན་མ་བྱེད་ཅིག་ཅེས་དབུགས་ཕྱུང་ནས། གཡོན་ཅན་མ་དེ་དག་གིས། དྲེགས་པར་བྱེད་བ་དང་། རྨོངས་པར་བྱེད་པ་དང་། ཀུན་ནས་རྨོངས་པར་བྱེད་པ་དང་། བརྒྱལ་བར་བྱེད་པ་དང་། སེམས་མེད་པར་བྱེད་པ་ཞེས་བྱ་བའི་མདའ་ལྔ་ཐོགས་ཏེ། ཕྱོགས་དེའི་ཧ་ཅང་ཡང་མི་རིིང་ཞིང་ཉེ་བ་མ་ཡིན་པ་སྐྱེ་བོ་བྱིས་པའི་བློ་ཅན་སྐྱ་སེར་མང་པོ་ལ་འཕོག་པར་འཕངས་སོ། ། གང་འཕོག་པ་དེ་དག་རྒྱལ་བ་དང་། སེམས་མེད་པར་གྱུར་པ་ན། འདོད་པའི་བདག་པོ་འཁོར་དང་བཅས་པ་མི་དེ་རྣམས་ཀྱི་ལུས་ལ་ཞུགས་ཏེ། སྐད་ཅིག་ཉིད་ལ་རྟ་པ་དང་། རྐང་ཐང་གི་དམག་ཉིས་སྟོང་བརྒྱད་བརྒྱ། སྲ་བའི་གོ་གྱོན། 
4-61
རྣོ་བའི་མཚོན་ཐོགས། འཇིགས་པའི་གད་མོ་དང་བཅས་ཏེ། རྡོ་རྗེ་གདན་ག་ལ་བ་དེའི་ཕྱོགས་ཉེ་བར་ལྷགས་ནས་དེར་གནས་བཅས་སོ། །དེ་ཙ་ན་སྐྱེས་བུ་ཆེན་པོ་ཉིད་ཀྱིས་གནས་ཀྱི་ཤར་གཟའ་རཱ་ཧུ་ལ། ལྷོ་ལས་ཀྱི་གཤིན་རྗེ། ནུབ་བེ་ཧ་ར། བྱང་སྲོག་བདག མོན་པ་དམར་པོ་རྣམས་ལ་གཏད་དེ། གནས་དང་འཁོར་སྲུངས་ཤིག་ཅེས་བཀའ་བསྒོས་ཏེ། ཉིད་སྒྱུ་མ་ལྟ་བུ་དང་། དཔའ་བར་འགྲོ་བ་དང་། རྡོ་རྗེ་ལྟ་བུའི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་སོ། །དེར་འདུས་པའི་འཁོར་བྱང་ཆུབ་སེམས་དཔའ་དེ་དག་ལ་ལ་ནི་བསམ་གཏན་ལ་གནས། ལ་ལ་ནི་ཐོས་བསམ་གྱི་བྱ་བ་ལྷུར་ལེན། ཕལ་ཆེར་དང་། སྐྱེ་བོའི་ཚུལ་གཟུང་བ་ཕོ་ཉ་དང་མངག་གཞུག་རྣམས་ནི་རང་རང་དང་གནས་བསྲུང་བའི་བྱ་བ་ལ་བརྩོན་བར་བྱེད། འཁོར་གྱི་ནང་ན་རྒྱལ་དབང་བསྟན་འཛིན་ལ་སོགས་བ་ཁ་ཅིག །སྲོད་དང་ཐོ་རངས་མི་ཉལ་བར་འཆག་པ་དང་འགྲེང་བས་ཡང་དང་ཡང་དུ་བསྐོར་བ་བྱེད་པ་དག་ལ་སྡིག་པ་མི་ཟད་པ་དྲུངས་ནས་འབྱིན་པའི་རྟགས་རྨིའོ་ཞེས་དགའ་བ་དང་ཡིད་རབ་ཏུ་དང་བས་བརྩོན་པར་བྱེད་དོ། །ཕ་རོལ་པོ་དེ་དག་གི་ནང་ནས་ཁ་ཅིག་གི་བསམ་པ་ལ། ཅི་འདི་ལྟ་བུའི་སྐྱེས་བུ་དམ་པ་ལ་བཀུར་སྟི་བྱ་བར་རིགས་ཀྱི། 
4-62
གནོད་པར་བྱ་བའི་ཡུལ་མ་ཡིན་ནོ་སྙམ་སེམ་པ་དང་། ཡང་དེ་མ་ཐག་ལོག་པའི་རླུང་གིས་ཡིད་འཁྲུགས་ཏེ་སྨྱོན་པ་ལྟ་བུར་འདུ་ཤེས་ཕྱིན་ཅི་ལོག་གིས། སྐྱེས་བུ་ཆེན་པོ་དེ་ལ་དགྲ་མི་ཤ་བོའི་སྣང་བ་ཤར་ནས། མདའ་དང་མདའ་བོ་ཆེ་དང་། རྡོ་ཆར་ཕབ། མེ་དང་རྡོ་བའི་འཕྲུལ་འཁོར་བཅུ་གཉིས་བཤམས་ནས་ཉིན་མཚན་མེད་པར་འཕངས། གནས་དེ་སྲེག་པར་འདོད་ནས། མེའི་ལས་བགྱིས་ཏེ། དེ་དང་ཉེ་བའི་རྩ་དང་ཤིང་གེལ་པ་དང་རྙིང་པ་ཐམས་ཅད་བསྲེགས་པས་མེ་ཆེན་པོ་རབ་ཏུ་འབར་ཀུན་ཏུ་འབར་བར་གྱུར་པ་ན། སྐྱེས་བུ་ཆེན་པོའི་བདེན་པའི་ཚིག་གིས་མེ་ཕར་ལོག་སྟེ་ཁོ་རང་ཚོའི་གནས་སྲེག་པ་ལ་ཉེའོ། །དེ་ལྟ་བུའི་ཆོ་འཕྲུལ་གཡུལ་ངོ་ཆེན་པོ་ཟླ་བ་ལྔ་ཙམ་བཤམས་ཀྱང་ཕ་རོལ་གྱིས་གནོད་པའི་སྐབས་མ་ཕྱེད་ནས། འཁོར་རྣམས་ལུས་ངལ་ཞིང་དུབ་ཡིད་མོག་མོག་པོར་གྱུར། གཙོ་བོ་དག་སེམས་ཁོང་དུ་ཆུད་དེ། ལག་པ་ཨོག་འཁར་དུ་བཅུག་ནས་ཐབས་ཅི་མཆི་ཞེས་སོ། །དེའི་ནང་ནས་འགའ་ཞིག་ན་རེ། འདི་ནི་སྔོན་གྱི་དུས་ན་གང་ཡང་སེམས་ཅན་ལ་ཕན་པ་དེ་དག་ནི་ང་ལ་ཕན་པའི་མཆོག་གོ །གང་ཞིག་སེམས་ཅན་ལ་གནོད་པ་དེ་ནི་ང་ལ་གནོད་བའི་མཆོག་གོ་ཞེས་སྨྲ་བ་ཞིག་ན། འདི་ལ་གནོད་པའི་སླད་དུད་འགྲོ་རྣམས་ལའང་གནོད་པར་རིགས་སོ། །
4-63
ཞེས་གྱང་མཐོའི་རྒྱབ་རི་ལ་མེ་བརྒྱབ། བྱ་རི་དྭགས་འབུ་སྲིན་ཐམས་ཅད་བསྲེགས། མཚོ་ལ་དུག་སྦྱར་མ་བུམ་པ་གྲངས་སུ་མ་བཅད་པ་མང་པོ་བླུགས་ནས་ཆུར་གནས་ཀྱི་སྲོག་ཆགས་ཕྲ་མོ་ཐམས་ཅད་ལུས་ཤིང་ལྟར་རེངས་ཏེ་ཆུའི་སྟེང་དུ་ལྡིང་བས་ཞོ་ལ་དཀྲིས་མ་ཆགས་པ་ལྟར་གྱུར་པ། དེའི་ཚེ་ཞབས་འབྲིང་ཉེ་བར་གནས་པ་དག་གིས་སྤྱོད་ལམ་མཛེས་པར་ལྡན་པས་པུས་མོ་ས་ལ་བཙུགས་ཏེ་ཐལ་མོ་སྦྱར་བས་ཕྱི་རོལ་ན་འདི་ལྟ་བུའི་ཚུལ་མ་རངས་པ་བགྱི་བ་མཐོང་ངོ་ཞེས་སྙན་དུ་གསོལ་བ་ན། སྐྱེས་བུ་ཆེན་པོ་ཉིད་ཏིང་ངེ་འཛིན་དེ་ལས་བཞེངས་ནས། རི་དང་ཆུར་གནས་ཀྱི་སེམས་ཅན་ཇི་ཙམ་ཤི་བ་དེ་རྣམས་ཀྱང་ངོས་ལ་བལྟོས་པས་ངན་སོང་དུ་མི་འགྲོ། མ་འོངས་པ་ན་གདུལ་བྱར་འགྱུར་ཞེས་ཅུང་ཟད་དགོངས་པ་ལ་བཞུགས། མཐར་སྨོན་ལམ་རྒྱས་པར་མཛད་དོ། །དེ་ཡང་། སྐྱེ་འགྲོ་སྲིད་པ་མ་ལུས་པ། །འཕགས་པའི་ལམ་ལ་དེ་ཡིས་འཇུག །ཅེས་པས་སོོ། །རྒྱལ་ཚབ་ཆེན་པོའི་བརྟུལ་ཞུགས་ཀྱི་སྤྱོད་པས་ནང་དུ་བདུད་བཞི་བཅོམ། སློབ་པའི་ཟུང་འཇུག་མཐར་ཕྱིན་པ། །དེ་ནས་གཟུང་ནས་རང་ཆེད་བྱ། །བྱ་བ་ནམཁའི་མེ་ཏོག་ཡལ། །ཞེས་སོ། །དེ་ལྟ་བུའི་སྤྱོད་པ་བརྩམས་པའི་དགོས་པ། རང་སྣང་ཞེན་འཁྲིས་མེད་པར་གོ །འགལ་རྐྱེན་རང་གྲོལ་བོགས་འདོན་བྱ། །
4-64
ཞེས་པས་དང་། དེ་ནས་ཕྱོགས་ལས་རྣམ་པར་རྒྱལ་བའི་སྤྱོད་པ་བརྩམ་པ། མོ་གཤམ་བུ་ཡིས་མདའ་བཀང་སྟེ། །ཤར་ཕྱོགས་རི་བོའི་རི་དྭགས་བསད། །གཟུང་འཛིན་གྱི་ཆ་ཕྲ་མོ་དེ་ཡང་། ཉིན་ཞག་དྲུག་གི་མཐར་མ་ལུས་པར་སྤོང་བ། དུས་མཚམས་བྱེད་པ་སྒྲ་བསྒྲགས་ཚེ། །ཀུན་གྱིས་ཆོས་ཉིད་གཏེར་རྙེད་དེ། །ཞེས་སོ། །དེར་སྤང་བྱ་མ་ལུས་པར་སྤངས། རྟོགས་བྱ་མ་ལུས་པ་རྟོགས་པས། ནཱ་རོ་ཆོས་དབྱིངས་ཕོ་བྲང་སྙོགས། །ནམཁའི་དབྱིངས་ནས་བདེ་ཆེན་འཇོ། །ཞེས་རྒྱུད་སྡེ་རིན་པོ་ཆེ་ནས་ཇི་སྐད་བཤད་པའི་སྤྱོད་པ་བཞི་མཐར་ཕྱིན། ཕྱག་རྒྱ་ཆེན་པོ་མཆོག་གི་དངོས་གྲུབ་རྡོ་རྗེ་འཆང་ཆེན་པོའི་གོ་འཕང་མངོན་དུ་མཛད་དོ། །དེ་ཡང་། རྗེ་བཙུན་ཏིལླི་པས། དེ་ལྟར་རྟོགས་པའི་སྐྱེས་བུ་དེ། །མ་བགྲངས་བཅུ་གསུམ་ས་བགྲོད་དེ། །ང་དང་དབྱེར་མེད་རྡོ་རྗེ་འཆང་། ། མཆོག་ཐོབ་སྐྱེས་བུ་གྲངས་ལས་འདས། །ཞེས་སློབ་མ་དང་བཅས་པ་ལུང་བསྟན་ཏོ། །དེའི་ཚེ་འཁོར་གྱི་ནང་ནས་སྟོན་སྒོམ་གཞུང་བརྒྱ་སྨྲ་བ་གྲགས་པ་རིན་ཆེན་ལ་སོགས་པའི་ངོར་འདི་སྐད་ཅེས་བཀའ་སྩལ། སྙིང་པོའི་ལམ་ལ་མཛུབ་བཙུགས་ནས། །དག་པ་རབ་འབྱམས་སར་སྐྱེལ་བ། །འགྲོ་བའི་དེད་དཔོན་འབྲུག་པའི་ཞབས། །བྱང་ཆུབ་ཕྱིན་གྱི་བར་དུ་མཆོད། ། གཞུང་བརྒྱ་སྨྲ་བའི་ཀོང་སྟོན་ཁྱོད། །ལུང་དང་རིགས་པས་རྨོངས་པ་ཅི། །དེ་ལ་ནན་བརྟག་བྱ་མི་འཚལ། །
4-65
ཡང་དག་འཇོག་ཁྱེར་ཅུང་ཟད་བཤད། །ཚིག་གི་བདའ་དེད་མི་མཛད་པར། །དོན་གྱི་དུ་མ་ཅི་འདུག་ལྟོས། །གནས་ལུགས་གཏན་ལ་འབེབས་པ་ལ། །མདོ་སྔགས་གཉིས་ཀ་བློ་རྩེ་གཅིག །འོན་ཀྱང་དངོས་ཟིན་འབེབས་ཁྱེར་ལ། །ཟབ་དང་ཡང་ཟབ་བླ་མ་གསུང་། །ཕར་ཕྱིན་ཐེག་པའི་འཇུག་སྒོ་ལ། །དཔྱད་སྒོམ་འཇོག་སྒོམ་རྣམ་གཉིས་སྣང་། །ཐོས་པས་སྒྲོ་འདོགས་ལེགས་བཅད་ནས། །སྒོམ་ལ་འཇུག་པ་སྔ་མའི་ལུགས། །འདི་ལ་ཐོས་དོན་སེམས་པའི་རིང་། །སྒོམ་སྐད་བཏགས་ཀྱང་བསམ་བྱུང་ཡིན། །རེ་ཞིག་བརྟག་དཔྱད་ཙམ་བཞག་ནས། །རྣམ་པར་མི་རྟོག་གང་སྐྱེ་བྱ། །ཞི་གནས་སེམས་རྙེད་བརྟན་པར་བྱ། །ཇི་ཙམ་གཞག་ལ་གནས་པར་ནུས། །དེ་ཡི་ངོ་བོ་དྲན་པ་ཡིན། ། དྲན་པ་ཡེངས་པ་མེད་ལ་བཏགས། །མ་ཡེངས་པ་ན་འགྱུ་བ་རིག །རིག་པའི་ཆ་དེ་ཤེས་བཞིན་ཡིན། །དེ་གཉིས་དུས་གཅིག་ཉིད་བྱུ་བས། །དྲན་ཤེས་འཇུག་པ་གཅིག་ཏུ་གསུངས། །ཐུན་ལ་འཇུག་དང་ཐུན་རྗེས་སུ། །སྔར་གྱི་ཐོས་དོན་ལ་སེམ་པ། །དངོས་གཞིའི་དུས་སུ་མི་རྟོག་གཞག །སྦྱོར་དུས་བརྟེན་རྒྱུ་ཐ་དད་པས། །དངོས་གཞི་ངོ་བོ་སོ་སོར་འགྱུར། །དེས་ན་ཞི་གནས་ཡིད་བྱེད་ལམ། །བསམ་གཏན་བཞི་པ་དག་ཐོབ་ནས། །མངོན་ཤེས་རྫུ་འཕྲུལ་འབྱུང་བའི་ཕྱིར། །དེ་འདོད་པ་རྣམས་དེ་ལ་འཇུག །འདོད་སེམས་རྩེ་གཅིག་ལ་བརྟེན་ནས། །ལྷག་མཐོང་བགྲོད་པ་རྐྱང་གྲོལ་བཞིན། །ཟག་མེད་ལམ་གྱི་ཁྱད་པར་བྱས། །
4-66
ཉན་ཐོས་པ་བཞིན་འདི་མི་འགྱུར། །ཐོས་པས་སྒྲོ་འདོགས་མ་ཆོད་ཀྱང་། །བླ་མའི་མན་ངག་ཙམ་བརྟེན་ནས། །རྣམ་པར་མི་རྟོག་བསྒོམ་པ་ལ། །འཇོག་སྒོམ་པ་ཞེས་དིང་སང་གྲགས། །གཉིས་ཀར་རྩེ་གཅིག་སེམས་བརྟན་དང་། ། ཤེས་བཞིན་གྱིས་དཔྱོད་སོར་རྟོག་སྟེ། །ལྷག་མཐོང་དངོས་རྒྱུ་འདི་ཡིན་གྱིས། །ལུང་རིགས་དཔྱད་པས་མི་རྟོགས་སྟེ། །དེ་ནི་ཁ་ཕྱིར་ཕྱོགས་པ་དང་། །གནས་ལུགས་ནང་ཕྱོགས་རང་རིག་ལས། །གཟུང་འཛིན་གྱིས་བཏང་གསལ་རག་ཤར། །རང་ངོ་རང་གིས་ཤེས་སྙམ་རྗེས། །རྩེ་གཅིག་སེམས་ལས་འགྱུར་ཙམ་མཐོང་། །འགྱུ་བ་རང་དུས་ལས་མི་གནས། །འགྱུ་མཐོང་ཉིད་དུས་རང་གྲོལ་བ། །ཐག་སྦྲུལ་ཐག་པར་མཐོང་བ་བཞིན། །མཐོང་དང་མཐོང་བྱ་བརྟགས་ན་སྟོང་། །མ་དཔྱད་སྒྱུ་མ་ཙམ་དུ་སྣང་། །གང་ཤར་ངོས་ཟིན་འདི་ལ་ཟེར། །དེས་ནི་དམིགས་པ་ཉོན་མོངས་དང་། །སྤྱོད་པ་ཀུན་ལ་འདི་རིག་པས། །གང་ཞིག་སྤང་རྒྱུ་སུ་ཡིས་སྤོང་། །ཇི་ལྟར་བྱས་སྤོང་མི་དམིགས་པས། །སྤང་བླང་མེད་པའི་ལམ་འདི་ཡིས། །ཆོས་ཀུན་གདོད་ནས་གནས་པར་འབྱོར། །དེ་ཕྱིར་ལྷན་ཅིག་སྐྱེས་སྦྱོར་གསུངས། །ཅུང་ཟད་སྣང་རྒྱུ་དམིགས་རྒྱུ་ཡོད། །དེ་སྲིད་ངོ་ཤེས་རང་གྲོལ་ཡོང་། །རྣམ་རྟོག་ཆོས་སྐུར་འཆར་སྐབས་ཡིན། །ལྷག་མཐོང་མངོན་སུམ་གྱུར་པ་ཟེར། །སྣང་དམིགས་ཐམས་ཅད་དག་པ་ན། །འབྲས་བུ་ཕྱག་རྒྱ་ཆེན་པོར་སོང་། །དེ་ནི་ཀུན་ཁྱབ་ཕྱོགས་ཆ་བྲལ། །བྱིས་པའི་བློ་ཡིས་རྟོགས་པ་མིན། །
4-67
སངས་རྒྱས་ཁོ་ནའི་གཞལ་བྱའོ། །དེས་ན་མཚན་ཉིད་དངོས་ཟིན་ལ། །བརྒྱུད་པས་ཉོན་མོངས་འདུལ་བ་ཡིན། ། ཤར་དུས་གྲོལ་བ་འདིའི་གནད་ཀྱིས། །གསང་སྔགས་པ་རྣམས་དངོས་རྒྱུ་འཇོམས། །ཉོན་མོངས་ཉིད་མཐོང་བྱང་ཆུབ་ཏུ། །ཟབ་མོའི་མདོ་ལས་ཀྱང་གསུངས་པས། །ཕུགས་སུ་མདོ་སྔགས་དགོངས་པ་གཅིག །ཅེས་གསུངས་པས་འཁོར་གྱི་ཉན་པ་པོ་ཐམས་ཅད་དགའ་ཞིང་མགུ་ལ་ཡིད་རབ་ཏུ་དང་པར་གྱུར་ཏོ། །ཕྱི་རོལ་གྱི་རྟེན་འབྲེལ་ནི། འགྲོ་བ་མིར་གྱུར་པ་ཀུན་ལས་མཐུན་པས། ཕ་རོལ་རྣམས་མགུ་བར་བགྱིའོ་ཞེས་གཟིང་པོ་དཔོན་དང་། ཉིད་ཀྱི་སློབ་མའི་གཙོ་བོ་འགའ་ཞིག་གིས་མཚམས་སྦྱོར་བའི་ཚུལ་བགྱིས་ཏེ་གཏམ་མོལ། གཞན་གྱི་གཡོས་གཙུག་ལག་ཁང་མི་འཇིག་པར་ཁས་བླངས་སོ། ། དེ་ལྟ་བུའི་སྔགས་ཀྱི་སྤྱོད་པའི་ཚུལ་དེ་དག་གཞན་གྱི་བློས་དཔག་པར་མི་ནུས་པ་ཡང་། དེ་ལྟར་གྱུར་པ་ཅིག་གོ་ཞེས། ལོག་པའི་ཤེས་པས་སྐྱོན་མ་བརྗོད། དེ་དུས་ལོག་ཤེས་ཀྱི་སྐྱོན་བརྗོད་པ་པོ་ཡོང་ཞེས་ཏིལླི་དུས་གསུམ་མཁྱེན་པས་ལུང་གསལ་པོར་བསྟན་པས་སོ། །སྟོན་པས་ཀྱང་བྱང་ཆུབ་ཀྱི་ཤིང་གི་དྲུང་ཆོས་ཀྱི་གཡེའི་དགོན་པ་དེ་རྩྭ་བཞིན་དུ་དོར་ནས། གང་ན་འདུལ་བ་དང་། རྗེས་སུ་འཛིན་པར་འོས་པ་སུ་ཞིག་མཆིས་པ་དེ་དང་དེར་ཉེ་བ་རྣམས་སུ་ལྗོངས་རྒྱུ་བར་མཛད་དོ་ཞེས་འཁོར་དང་བཅས་པ། ཐམས་ཅད་འདུལ་ཏེ་མེ་མོ་ཕག་ལོ་དཀར་རྒྱུད་ཆོས་སྡིངས་སུ་ཕེབས། 
4-68
ཞག་བདུན་ཕྲག་གཅིག་བཞུགས། དེ་ཙ་ན་གཙུག་ལག་ཁང་ཞུགས་ལ་སྦྱངས་འདུག །དེའི་རྐྱེན་གྱིས་ཕྱོགས་བཞི་བསྲུང་བར་བཀའ་བསྒོས་པའི་ཆོས་སྐྱོང་ཆེན་པོ་དེ་དག་ཆེར་ཁྲོས་ནས། སྐྱེ་བོ་བྱིས་པའི་བློ་ཅན་ཡིད་མ་རུངས་པ་ཞི་བས་འདུལ་བར་མི་ནུས་པའི་གཙོ་བོ་དག །སྨྱོ་འབོག་དང་། འཕོག་འགྱེལ་དང་ཁྲག་ཚ་བ་སྐྱུགས་ཏེ་ཚེའི་དུས་བྱས་སོ། །དེའི་ཚེ་སྐྱེས་བུ་ཆེན་པོའི་ཐུགས་རྗེ་དང་། བརྩེ་བ་མི་བཟོད་པའི་སྟོབས་ཀྱིས། དེ་དག་གི་ལས་ཀྱི་སྒྲིབ་པ་རྒྱུན་བཅད། ཐར་པ་དང་ཐམས་ཅད་མཁྱེན་པའི་ས་ལ་བཀོད་པའི་གཏམ་བསམ་གྱིས་མི་ཁྱབ་སྟེ་ཡི་གེས་འཇིགས་པས་དེ་ཙམ་ཞིག་གོ །དེ་ཡང་རྗེ་བཙུན་ཏིལླིས། རང་རིག་ལྷན་ཅིག་སྐྱེས་རྟོགས་ནས། །དེ་ཉིད་མངོན་སུམ་ང་ཡིན་ཏེ། །རིགས་བརྒྱུད་མ་ཆད་རྡོ་རྗེ་འཆང་། །འདི་ལ་དུས་གསུམ་སངས་རྒྱས་དང་། །སྲོག་འཛིན་སྐུ་གསུམ་མཁའ་འགྲོ་ཡིས། །དབང་བསྐུར་བྱིན་རླབས་དངོས་གྲུབ་ནི། །བརྒྱུད་འཛིན་དེ་ལ་སྨིན་པར་མཛོད། །ཅེས་སོ། །དེ་ལྟར་མཛད་པ་མཐར་ཐོན་གྱི་སྐྱེས་བུ་ཆེན་པོ་རྡོ་རྗེ་འཆང་མིའི་གཟུགས་སུ་བྱོན་པ་དེ་ལྟ་བུ་ལ་ནི་ཆེ་རེག་ཆེར་འཚེངས། ཆུང་རེག་ཆུང་འཚེངས། ཐ་ན་བསམ་སྦྱོར་ནག་པོའི་འབྲེལ་པས་ཀྱང་འཁོར་བ་མཐའ་ཅན་དུ་བྱེད། ནམ་ཞིག་གདུལ་བྱར་འགྱུར་བ། གང་ལ་གནོད་པ་བགྱིས་ཀྱང་བདེར་འབྲེལ་བ། །བདེ་བའི་འབྱུང་གནས་དེ་ལ། 
4-69
ཞེས་ཕན་པ་དང་བདེ་བ་ཀུན་གྱི་འབྱུང་གནས་ཡིན་པས་སོ། །ལམ་བར་གྱི་ཡུལ་གྲུ་སོ་སོའི་ས་ཚིགས་སུ་འཕོག་པ་རྣམས་སུ། ཞལ་གྱི་དཀྱིལ་འཁོར་བལྟ་བ་དང་། གསུང་གི་བདུད་རྩི་མྱང་བའི་སླད་དུ་སྐྱེ་བོ་མང་པོ་འདུས། རང་རང་གི་ལོངས་སྤྱོད་ཀྱི་འབྱོར་པ་རྣམས་ནི་འཕངས་པ་མེད་པར་འབུལ། དེ་དག་བླ་ན་མེད་པའི་བྱང་ཆུབ་བདེ་བ་ཆེན་པོའི་རྒྱུར་བསྔོ་བར་མཛད། རིམ་པས་ཀོང་པོ་རྟ་སྡིངས་དགོན་པར་དེངས། དེར་འདུས་པ་རྣམས་སྨིན་གྲོལ་ལ་བཀོད། ཤར་དྭགས་ལ་སྒམ་པོ་ཤཱནྟི་རྒྱལ་པོའི་ཕོ་བྲང་དུ་ཕེབས་པར་ཕྱོགས། དྭགས་པོ་འབའ་པ་དཀའ་བཅུ་པ་ངག་དབང་བཀྲ་ཤིས་བློ་གྲོས་ཀྱིས་གསོལ་བ་བཏབ་ནས། དེར་འདུས་ལ་གསུང་གི་འབྲེལ་པ་ཆོས་ཀྱི་སྦྱིན་པ་བཀྱེ། ཞོལ་སྟེང་ཨའོ་ཆོས་རྗེ་དཔོན་སློབ་རྟ་པའི་ཚོགས་ཀྱིས་མདུན་བསུས། གླིང་བྱིན་གྱིས་སེར་སྦྲེང་རྒྱས་པ་འདུག །གཙུག་ལག་ཁང་དང་ཉེ་བར་བཞུགས་སྒར་མཛད། སྒོམ་སྡེ་ལ་ཕྱོགས་པའི་ཁྲི་གསར་པ་ཞིག་བཤམས་ཏེ་སྟན་ཆགས་སོ། ། དེ་དུས་སྐུ་འདྲ་རིན་པོ་ཆེར་བྱི་རུའི་རྒྱལ་མོ་ལག་པ་རྐང་གང་པ་ཞིག་དང་། དིང་ཕོན་གྱི་འཕན་གསུམ། བླ་བྲེས་སོགས་མཆོད་རྫས་རྒྱས་པ་དང་། སྡེ་བྱིན་ལ་མང་འགྱེད་གནང་། ཞོལ་སྟེངས་སུ་སྤྱན་པྲས། སྒར་སྟོན་གཟབས་མ་འབུལ་བ་དང་བཅས་པ་འདུག། །ཕར་ཡང་གནང་ཆ་བཟང་དུ་མཛད། 
4-70
སྒམ་པོ་པ་དཔོན་སློབ་ཀྱི་བརྒྱ་འབུལ་བཞེས། དེ་ནས་ཧ་ཅང་མི་རིང་བ་ཀླུ་མཁར་ཞེས་པ་ན་སྤྱན་སྔ་རིན་པོ་ཆེ་བཀྲ་ཤིས་རྣམ་རྒྱལ་བཞུགས་སར་གདན་འདྲེན་བྱུང་། སྐྱེས་བུ་ཆེན་པོ་ཉིད་འཁོར་ཡོངས་ཀྱི་དགེ་བའི་བཤེས་གཉེན་རགས་རིམ་དང་ལྷན་ཅིག་ཏུ་ཕེབས། དེར་བཀོད་པའི་ཚུལ་ནི། བཞུགས་གདན་གུང་གཤིབས། ཕྱག་རྩེ་སྤྲོད་ལ་ཉིད་མཁས་པའི་གྲགས་པས་ཕྱོགས་ཀུན་ཏུ་ཁྱབ་པ་དང་། ཇི་ལྟར་བློ་མཐུན་གྱི་མགྲོན་པོ་ལ་ཆེད་དུ་བྱ་བ་ལྟ་བུའི་ཚུལ་གྱིས། ཁྱད་ཆོས་མཐོ་བ་མཛད་འདུག །དེ་ནས་སྤྱན་སྔ་རིན་པོ་ཆེ་རང་གིས་དང་པོར་ཐོས་བསམ་སྒོམ་སྒྲུབ། བར་དུ་གཙུག་ལག་ཁང་དང་རྟེན་ཆེན་བཞེངས། བཤད་སྒྲུབ་ཀྱི་སྡེ་བཙུགས་ཚུལ་སོགས་རྒྱས་པར་གསུངས་ནས། ད་ཁོ་བོ་ནི་རྒས། ངེད་སྒམ་པོ་པ་ལ་ཤུལ་ན་མི་གྲུལ་བཏུབ་མེད། རྗེ་ཐམས་ཅད་མཁྱེན་པ་ཉིད་ཀྱིས་སྡེ་འདི་ལ་སྤྱན་རྒྱང་གིས་གཟིགས་ཤིང་། ཐུགས་ཀྱིས་གཏད་དགོས་ཞེས་གསོལ། སླར་སྒམ་པོ་སྟེང་དུ་གཞི་བྱེས་ཀྱི་ཆོས་ཞུ་བ་མང་པོ། དཔལ་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་དུ་བཅུག་དབང་བཞི་རྫོགས་པར་སྩལ། མདོ་སྡེ་ཏིང་ངེ་འཛིན་རྒྱལ་པོ་དང་། བསྟན་བཅོས་ཐར་པ་རིན་པོ་ཆེའི་རྒྱན་སྤྱི་ཆོས་སུ་གསུངས། བཅོམ་ལྡན་འདས་མི་འཁྲུགས་པའི་དབང་དང་། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར། ནཱ་རོའི་ཆོས་དྲུག་དགེ་སྦྱོར་བདུན་ལ་སོགས་ཆོས་ཀྱི་འཁོར་ལོ་རྒྱ་ཆེན་པོ་བསྐོར། 
4-71
འཇའ་འོད་ཀྱི་གདུགས་དང་། མེ་ཏོག་གི་ཆར་ཉིན་ལྟར་གྱི་བྱུང་། ཟླ་བ་ཙམ་བཞུགས། ཟངས་ལུང་ཆོས་ཁྲི་ཁར་བླ་མ་ཟིལ་ཆེན་པའི་འབུལ་བ་བཞེས། དྭགས་པོའི་ཆོས་བཞི་གསུངས། དེ་དུས་དགེ་སློང་འཕྲིན་ལས་རྒྱ་མཚོ་དད་པ་དང་ཤེས་རབ་དང་བརྩོན་འགྲུས་ཀྱི་སྟོབས་དང་ལྡན་པ། ཐེག་པ་ཆེན་པོའི་རིགས་སད་པས་བླ་མ་དང་བསྟན་པ་ལ་བསམ་པ་ཞིག་སྣང་བས། བྱང་པ་གྲྭ་ཚང་གི་མགོན་དུ་བཀའ་གནང་། སློབ་དཔོན་གྱི་བྱ་བ་གྱིས་ཤིག་པར་གདམས། བསྐོ་འཇ་དང་སྤྱི་རྫས་སོགས་སྩལ། སྡེ་པ་བརྐུ་རབ་པ་དང་། བང་རིམ་པ། སྒོམ་མདའ་བ་སོགས་ཀྱི་འབུལ་བ་ཇ་ཞུས་སླེབ། དྭགས་པོ་རམས་བྱེ་སྙིང་དུ་ཕེབས། རམས་སྟོད་དུ་བཞུགས་སྒར་ཕབ། བྷྲུཾ་པ་དཔོན་གཡོག་གིས་ཞབས་ཏོག་མཛད་ནས་ཟླ་ཕྱེད་ལྷག་པ་བཞུགས། ཉིན་རེ་བཞིན་ཁྲོམ་ཆེན་པོ་ལ་དབང་ཁྲིད་གདམས་པ་བསམ་གྱིས་མི་ཁྱབ་པ་སྩལ། དེ་དུས་ཆོས་དཔལ་བཟང་པོའི་ངོར་འདི་སྐད་གསུངས་སོ། །སེམས་སྣ་ཚོགས་སུ་འགྱུ་བ་རྦད་བཅད་ནས། །ཐང་ཆད་པ་ངལ་བསོ་ལྟ་བུ་ཡི། །སེམས་རང་གི་མལ་དུ་ལྷོད་གཞག་ན། །སྒོམ་རྣལ་མ་རང་དེ་འབྱུང་བ་ཡིན། །འདི་ཡེངས་མེད་དྲན་ཤེས་ལྡན་གྱུར་ན། །ཅིར་ཤར་ཚད་སྣང་ཙམ་ཉིད་དུ་འགྲོ། །མིང་རྣམ་ཀུན་མཆོག་ལྡན་གྱི་སྟོང་ཉིད་ཟེར། །ཐབས་བྱང་ཆུབ་སེམས་དང་འབྲལ་མི་ཕོད། ། སྟོང་ཉིད་སྙིང་རྗེའི་རང་བཞིན་དེར། །
4-72
ཁོང་གྲུབ་ཐོབ་རྣམས་ཀྱིས་ཕྱག་ཆེན་བཏགས། །གཞུང་བཤད་པ་མཁན་གྱིས་དབུ་མ་ལོ། །ཁོང་རྙིང་མ་བ་རྣམས་རྫོགས་ཆེན་ཟེར། །ཅི་བཤད་ཀྱང་བཏུབ་པ་ཞིག་ཡིན་པ་འདྲ། ། མོས་གུས་ཀྱི་སྟོབས་ལས་མཇལ་ངེས་པས། །ཁྱོད་མ་བསངས་ཆོས་དཔལ་བཟང་པོ་ཡིས། །ཞུས་པའི་ལན་དུ་བགྱིས་པ་ཡིན། །དེ་ནས་རྒྱལ་མེ་ཏོག་ཐང་དུ་ཕེབས། དེ་དུས་དགེ་འདུན་གཡས་གཡོན་ན་བཞུགས་པ་རྣམས་ཀྱང་འཛོམ། འདུས་པ་ཞལ་གྲངས་རགས་ལ་བླ་མ་སློབ་དཔོན་དགེ་བཤེས་སྐུ་ཡོན་ཅན་མང་དུ་འདུག །སེར་སྦྲེང་རྒྱས་པ་དང་བཅས་ཞྭ་སེར་པོ་ཐམས་ཅད་ཞབས་ཀྱི་པདྨོ་བཀོད་པའི་གདན་དུ་བཏིངས། སློབ་དཔོན་འོལ་ཁ་ལྦ་བས་གཙོས་པ་རྣམས་ལ་རྣལ་འབྱོར་ཀྱི་དབང་ཕྱུག་བཞད་པ་རྡོ་རྗེའི་འཕྲང་སྒྲོལ་བཤད་པ་དང་བཅས་པ་སྩལ། དགེ་འདུན་ལ་མང་ཇ། གསེར་འགྱེད་གནང་། འབེལ་གཏམ་གྱིས་ཉིན་མཚན་འདས། ཞག་ལྔ་བཞུགས། ཐམས་ཅད་ཀྱི་གུས་པ་མི་ལྷོད་པས་སྐྱེས་བུ་ཆེན་པོ་ཉིད་ཀྱི་ཞབས་ལ་གཏུགས་སོ། །དཔལ་ལྡན་ལྷ་མོའི་མཚོ་ཞལ་མ་བྱུང་བར་ལོ་ཤས་སོང་ཟེར། དཔོན་སློབ་ཀྱིས་ཕེབས། ཚོགས་གཏོར་ཞིག་འཕུལ་བ་གནང་བས། མཚོ་ཞལ་སྔར་བས་ཀྱང་ཁྱད་པར་དུ་གྱུར་པ། སྒྱུ་མའི་གྲོང་ཁྱེར་ལྟ་བུ་ངོ་མཚར་བ་ཞབས་འབྲིང་བ་ཀུན་གྱིས་ཀྱང་གཟིགས། ཉམས་འཆར་པོ་འདུག་ལྷ་མོ་བཞུགས་པར་ངེས་གསུང་ངོ་། །དེ་ནས་ཤར་འོལ་ཁ་སྟག་རྩེ་ནས་གདན་འདྲེན་པ་སླེབ། 
4-73
ཞག་བཞུགས་ཕན་བདེ་དགོན་པར་གནང་། དེ་སྐབས་སྡེ་སྲིད་རིན་པོ་ཆེ་དཔལ་ཕག་མོ་གྲུ་པ། གོང་མ་དཀར་རྒྱུད་རྣམ་པར་རྒྱལ་བའི་ལྷ་ཞེས་མཁྱེན་རབས་དང་རྣམ་དཔྱོད་མཚུངས་པ་མེད་པ། སྔོན་ནས་དགེ་བའི་བཤེས་གཉེན་དུ་མ་ལ་བྱ་བ་བྱས་པ་ཉིད། ཐེག་པ་ཆེན་པོའི་ཆོས་དོན་དུ་གཉེར་བ་ན། དིང་སང་དཔལ་འབྲུག་པ་ཐམས་ཅད་མཁྱེན་པ་ཆེན་པོས་སྟོན་ནོ་ཞེས་པའི་གཏམ་གསན་པ་ཙམ་གྱིས་མི་ཕྱེད་པའི་དད་པ་འཁྲུངས་ཏེ། ཀྱེ་མ་སྐྱེས་བུ་ཆེན་པོ་དེ་དང་ནམ་མཇལ་བར་འགྱུར་སྙམ་དུ་དགོངས་པ་དང་། དེའི་དུས་ལ་བབ་པ་ན། ཙ་རི་སྒམ་པོའི་གནས་མཇལ་དང་བསྟུན། དཔོན་གཡོག་ཉུང་བསྡུས་གསང་སྟབས་ཀྱིས་ཕེབས། བརྫུས་སྟབས་ཀྱིས་བཀུར་སྟི་སྤྱིས་ཕྱིན་པ་གནང་མ་ཐུབ། ལམ་ཟབ་བླ་མའི་རྣལ་འབྱོར་སྩལ། བར་ཆད་མི་འབྱུང་པའི་ཕྱིར་ཞིང་སྐྱོང་ལ་བཀའ་བསྒོ་དམ་བཞག་མཛད། འོལ་ཁ་སྟག་རྩེར་ཞབས་ཏོག་སྡིག་དང་མ་འདྲེས་པ་མཁོས་སུ་ཕེབས་པ་ནས་ཞག་ལྔ་ཙམ་བཞུགས། དཔོན་ས་ནས་ལ་བཀའ་དབང་སོགས་སྩལ། མི་དམངས་ལ་ཁྲོམ་ཆོས་ཉིན་ལྟར་གྱི་གནང་། རྫིང་སྤྱིར་གདན་འདྲེན་བྱུང་བས་ཕེབས། དགེ་འདུན་ལ་མང་འགྱེད་སོགས་སྩལ། ཐམས་ཅད་ཀྱིས་འབུལ་བ་ཞབས་ཏོག་ཁྱད་པར་འབྲོག་སྡེ་རྣམས་ཀྱིས་ཕུལ་དུ་བྱུང་བ་བསྒྲུབས། དེ་ནས་ངང་སྣའི་གྲུ་ལ་མཛད་དེ་རི་སྒོར་ཕེབས་པའི་ཞག་བཞུགས་འཕོག་པ་ཐམས་ཅད་དུ་ཁྲོམ་ཆེན་པོ་རང་རང་གི་འབྱོར་པ་དང་བསྟུན་པའི་བསོད་ནམས་ཀྱི་ཚོགས་བསགས་པ་དང་ཞལ་གྱི་དཀྱིལ་འཁོར་བལྟ་བ་ལ་ལྷགས་པར་གྱུར་ཏོ། །
4-74
དེར་སྡེ་པ་ཞལ་ངོ་རྣམས་ལ་ཚེ་དབང་རྗེས་གནང་དང་། རྣམ་དཔྱོད་དང་བསོད་ནམས་ཆེན་པོའི་ནོར་གྱིས་ཕྱུག་པ་ས་སྐྱོང་བའི་དབང་པོ་ཁྲིའི་དྲུང་ལ། དྭགས་པོའི་བསྟན་བཅོས་ཐར་པ་རིན་པོ་ཆེའི་རྒྱན་གྱི་བཤད་ལུང་སོགས་དམ་པའི་ཆོས་ཀྱིས་ཚིམ་པར་མཛད། དེ་ཙ་ན་ལྷོ་བརྒྱུད་ནས་སྡེ་པ་དམག་དཔོན་པ་དཔོན་གཡོག་གདན་འདྲེན་ལ་ཕེབས་བྱོན། སྐོར་ཅིག་ཁོ་རང་དཔོན་གཡོག་སྔ་འགྲོས་སུ་རྫོང་དར་མཛད་། མིའི་དབང་པོ་དཀར་རྒྱུད་རྣམ་པར་རྒྱལ་བ་དཔོན་གཡོག་ཙ་རའི་གནས་མཇལ་བར་ཆད་མེད་པར་གྲུབ་ནས་ཕེབས། བཞུགས་སྒར་དུ་བརྫུས་སྟབས་ཀྱིས་ཞག་དྲུག་བཞུགས། འཁོར་ལོ་སྡོམ་པའི་དབང་། ཕྱག་ཆེན་ཆོས་དྲུག་གི་དམིགས་རིམ། མགོན་སེར་འཇམ་པའི་རྡོ་རྗེ་དང་། མགོན་དམར་ཆགས་པའི་རྡོ་རྗེའི་རྗེས་གནང་། སྒྲུབ་ཐབས་སོགས་སྩལ། ཆིབས་ཀྱིས་གཙོས་པའི་ཉེར་མཁོའི་འབུལ་གནང་འོས་རིགས་ཤིག་མཛད། མི་འགྱང་བར་ཡོན་མཆོད་མཇལ་བའི་རྟེན་འབྲེལ་བསྒྲིགས། གཡེ་སྟོང་སྲེད་པ་སོགས་མི་དམངས་ཐམས་ཅད་ཀྱིས་གསེར་དང་ནས་ཀྱི་འབུལ་བ་གཏོས་ཆེ། དེ་དུས་བཀའ་ལས། ངོས་རང་གི་ཡིན་སྙམ་པའི་ཐོད་པ་ཞུགས་ལ་སྦྱངས་པ་ཞིག །ངེད་དང་གིས་མཇལ་ཁ་གཏོང་གིན་འདུག་པ་རྨིས། སྤྱན་སྔ་རིན་པོ་ཆེ་བཀྲ་ཤིས་རྣམ་རྒྱལ་ཞབས་མི་བརྟན་པ་འདྲ་གསུང་། བརྟན་བཞུགས་ཚིགས་སུ་བཅད་པ་དང་བཅས་གནང་ཡང་། དེ་ནས་མི་འགྱང་བར་སྤྱན་སྔ་རིན་པོ་ཆེ་མེ་ཏོག་འཐོར་འདུག །
4-75
དེ་ཉིད་དྭགས་པོ་རིན་པོ་ཆེའི་སྤྲུལ་པར་གྲགས་ལ། ཐུགས་རྒྱུད་གཅིག་པར་ངེས་སོ། །བྱར་བརྒྱུད་ཐོག་མ་གསང་སྔགས་ཆོས་གླིང་དུ་ཕེབས། བྱར་ཕུ་མདའ། རོང་དམག་སྡེ་གདགས་སྲིབས། ལོ་རོ་དོལ་ལྡིང་ཆེན་ཆར་ལྔ་སོགས་ཐམས་ཅད་ཀྱིས་ནས་ཕུད། ཁྱིམ་བདག་འབྱོར་པ་དང་ལྡན་པ་རྣམས་ཀྱིས་ནས་ཀྱི་བརྒྱ་འབུལ་སོགས་བྱས། ཀུན་འཛིན་ཏེ་ས་ཕོ་བྱི་བ་ལོ་ཤར་ནས། ལྷ་རྩེར་མགོན་པོ་ལྷ་མངས་ཀྱི་དབང་དང་། འདུ་ཁང་གསར་བཞེངས་ཀྱི་རབ་གནས་གནང་། བྱང་པ་གྲྭ་ཚང་དཔོན་སློབ་མར་ཡུལ་ལ་རྫོང་དར། འཕྲལ་དགོས་ཉེར་མཁོ་དང་སྤྱི་རྫས་སོགས་སྩལ། བློན་བྱེས་འགོལ་དུ་ཕེབས། དེར་རས་ཆུང་ཕུག་ལ་ཞིག་གསོས་གནང་སྐབས། དེ་ན་རྗེ་བཙུན་རས་ཆུང་པའི་སྐུ་བྱོན་མ་ལེགས་པོ་འཛོག་འཛོག་ཅིག་འདུག །བཀའ་ལས། ཕྱིས་དགོས་མེད་ཀྱི་འཇིམ་པ་ཞིག་ཞུས་པ་འདྲ། འདིའི་འོག་ན་རྗེ་བཙུན་གྱི་སྐུ་ཕྱག་ནས་མ་ངོ་མ་ཡོད་པར་འདུག་གསུང་། འཇིམ་པ་དེ་དག་བཤུས་པའི་འོག་ནས་སྐུ་བལྟ་བས་མི་ངོམས་པ་སྤྲ་རྩི་བཟང་པོས་མནན་པ་ཞིག་བྱུང་། འོ་འདི་ན་གསུང་། སྔ་གོང་དབང་ཅན་གྱི་གདན་དྲངས་དོགས་སྦས་པ་འདྲའོ། །སྤྲུལ་པའི་སྐུ་པད་དཀར་དབང་པོ་དཔོན་སློབ་ཀྱིས་བརྒྱ་འབུལ་ཆེན་མོ་འདུག །སྙན་རྒྱུད་ཚུགས། སྡོམ་གསུམ་སྙིང་པོ་བསྟན་པ་འདི་ཉིད་ཀྱིས་ཞུས་པའི་ངོར་མཛད། ཅོག་གྲྭ་གསར་པ་རྣམས་ལ་གསུང་ངག་རོ་སྙོམས་ཆེན་མོ་སོགས་ཟབ་ཆོས་ཅི་ཡང་ཞིག་སྩལ། 
4-76
ཁོང་དཔོན་སློབ་ལ་ལྷོ་བྲག་མཁར་ཆུའི་གནས་སྒྲུབ་སྡེ། དགེ་འདུན་བརྒྱ་ལྷག་གི་ལོ་ཕོགས་འགྲོ་བའི་མཆོད་གཞིས་རྩིས་སྤྱོད་གནང་། སློབ་དཔོན་པ་འདི་ཉིད་ཐུགས་དམ་རྟོགས་པ་མངོན་དུ་གྱུར། བསྲེ་འཕོ་སོགས་ཁྲིད་ཐམས་ཅད་ལ་ངེས་པའི་དབང་གིས་ལྷོ་བྲག་པ་སྐྱ་སེར་ཀུན་གྱི་ཕྱག་གི་གནས། མཆོད་པའི་ཡུལ་བླ་མ་གཅིག་མ་ལྟ་བུར་གྱུར། ཕྱིས་མཁར་ཆུར་རྟེན་བཞེངས་ཆེན་མོའི་ཁུར་བཞེས་ཚུལ་རྒྱས་པ་འོག་ཏུ་འཆད་དོ། །རྡོ་རྗེ་གླིང་དུ་འཇམ་དཔལ་ཚེ་འདག་གི་དཀྱིལ་འཁོར་ཆེན་པོ་བསྒྲུབ་ཅིང་མཆོད་དེ། སྐྱ་སེར་གྱི་དབང་ཞུ་བ་གཏོས་ཆེ་བ་འདུས། ཞག་བཅུ་ཤས་སྒྲུབ་མཆོད་དང་འབྲེལ་བའི་དབང་གནང་། དེ་དུས་ཀྱི་ཞུ་བ་པོའི་གཙོ་བོ་ནི། སྐྱེས་བུ་ཆེན་པོ་ཐམས་ཅད་གཟིགས་པ་ཉིད་ཀྱི་ཐུགས་རྗེའི་སྤྱན་རས་ཀྱིས་གཞོན་ནུ་ཉིད་ནས་བསྐྱངས་པ། མཁྱེན་རབ་དང་བསོད་ནམས་ཀྱི་བྱིན་མི་ཟད་པ་དང་ལྡན་པ། བྱ་ཆོས་ཀྱི་རྒྱལ་པོ་ཁྲི་དཔོན་མི་ཕམ་ཚེའི་དབང་ཕྱུག་ཉིད་ཡིན་ལ། འདི་ཉིད་སྔོན་གྱི་ཡབ་མེས་རྣམས་ཀྱི་མཛད་སྲོལ་བཟང་པོ་གཙུག་ལག་གཉིས་ཉམས་པ་མེད་པར་བསྐྱང་བའི་སླད་དུ་རྟེན་མཛེས་པའི་ཕྱིར་དབུ་སྐྲ་གཙུག་ཕུད་ཀྱང་དེ་སྐབས་ཕུལ། དེ་ནས་ཕོ་བྲང་ཡང་རྩེར། བླ་མ་གྲགས་པ་ཡང་རྩེའི་ཆེན་པོ་བར་བསྐོ་བ་གནང་། འདི་ཉིད་རྒྱལ་བའི་དབང་པོ་ཉིད་ལ་མི་ཕྱེད་པའི་དད་པ་ཐོབ་པ་གཟིམས་དཔོན་རྒྱུན་རིང་མཛད་པ་ཞིག་ཡིན་ནོ། །
4-77
བཞུགས་སྒར་གྱི་དབུ་མཛད་ཆེན་མོ་དགེ་སློང་དགེ་བའི་བཤེས་གཉེན་རྣམ་རྒྱལ་བཀྲ་ཤིས་པ། སློབ་དཔོན་གྱི་འོས་སུ་གཟིགས་ནས་སྔགས་གྲྭ་གསར་པར་བཀོད་པ་གནང་སྟེ། དགེ་འདུན་བརྒྱ་སྟོང་འདུས་བྱུང་ཡང་ཉེ་རིང་དང་རློམ་ཞེན་མ་བྱེད། བཞི་སྡེ་ཞིག་ལས་མ་བྱུང་ཡང་ཆོས་དང་གང་མཐུན་གྱིས་ལ་སྐྱོངས་ཤིག་གསུངས། འཆད་ཉན་སྨར་བ། དགེ་འདུན་བསླབ་ཁྲིམས་གཙང་ལ། གྲྭ་ཚང་ཟིན་པ་ཞིག་བྱུང་ངོ་། །དེ་ལོ་སྟོན་རྒྱབ་ཙཱ་རི་ལ་ཕེབས་ཞོར། ཏིང་ཏིང་ནས་སྡེ་པ་དོན་གྲུབ་རབ་བརྟན་པ་ཆོས་སྒོར་བཅུག །འབུལ་བ་བཟང་པོ་འདུག །གནས་ཆེན་དུ་ཞག་ཤས་བཞུགས། དེ་དུས་དག་པ་ཤེལ་རི་ལ་བསྟོད་པ་འདི་གསུངས་སོ། །དེ་ཧི་མ་ལ་ཡ་ཞེས་བྱ་བའི་ཡུལ། །ཙཱ་རི་ཏྲ་ཞེས་ངོ་མཚར་གྱིས་གང་བའི། །སློབ་དཔོན་ཆེན་པོ་པདྨ་སཾ་བྷ་བས། །གཟིགས་ནས་འདམས་པ་རང་བྱུང་མཆོད་རྟེན་ནི། །དམ་ཆོས་རྒྱ་འཚོའི་གཏེར་གྱི་ཁ་འཛིན་པས། །ཞིང་སྐྱོང་དབང་པོ་ལ་སོགས་ཀུན་འདུ་བས། །ཡིད་བཞིན་ནོར་བུའི་དཔལ་འཛིན་མཆོད་པའི་གནས། །ཞེས་གསུངས་ནས། ཚུར་ཕེབས། བྱམས་ཆེན་དུ་སྡེ་པ་གྲོན་པའི་སྲས་པོ་ཞིག་དབུ་སྐྲ་བཅད། དེ་དུས་ལྷུན་པོ་རྩེ་ནས་སྤྱན་འདྲེན་གསེར་ཡིག་པ་འབྱོར། ཕེབས་པར་ཞལ་གྱིས་བཞེས། ཆོས་རྒྱལ་གླིང་དུ་ལྕམ་དྲུང་ལ་བཀའ་དབང་སོགས་སྩལ། རྩེ་མོ་རིར་ཞལ་ངོ་རྣམས་ལ་སོ་སོའི་ཐུགས་བཞེད་ལྟར། 
4-78
དབང་རྗེས་གནང་ཁྲིད་ལུང་སོགས་དང་། ཆོས་དང་སྲིད་ཀྱི་སྐྱོང་བྲན་འདི་ལྟར་འོས་ཞེས། མཚན་ལྡན་གྱི་བླ་མ་རིན་པོ་ཆེ། །དད་པ་ཅན་གྱི་གཙུག་རྒྱན་ན། །ཡིད་བཞིན་ནོར་བུ་ཉིད་དུ་མཐོང་། །དགོས་འདོད་ཞུ་ས་བཟང་ལགས་ནས། །མི་ང་ཡི་བློ་གཏད་དེ་ཀ་ཡིན། །དེ་བས་དེ་ཡི་རྗེས་སུ་སླེབས། །ཆོས་བཟང་པོའི་རྩ་བ་བྱང་སེམས་ཡིན། །ཀུན་ལ་ཉེ་རིང་མི་འབྱེད་པར། །རྣམ་གྲོལ་ལམ་ལ་འགོད་པར་འདོད། །མི་ང་ཡི་ཉམས་ལེན་དེ་ཀ་ཡིན། །དེ་བས་འབངས་ལ་བྱམས་བརྩེས་སྐྱོངས། །སྐྱེ་བོ་ཕལ་ཆེར་ཁྲམ་པ་ཅན། །ཁ་ཞུ་གཏིང་ཁྱགས་ཀྱི་དཔེ་རུ་གདའ། །ཞུ་བའི་སྟབས་སུ་མི་བཏང་བར། །འཐད་དང་མི་འཐད་བརྟགས་ནས་བྱེད། །མི་ཁོ་བོའི་སྤྱོད་འགྲོས་དེ་ཀ་ཡིན། །མི་རྒྱལ་ཁྱོད་ཀྱང་དེ་ལྟར་མཛོད། ། ཅེས་གདམས་ནས་ཤེལ་མཁར་དང་བསེ་ཁུན་དུ་ཕེབས། དེར་ལྕགས་རྩེ་གྲི་གུ་ནས་གདན་འདྲེན་སླེབ། གཞིས་ཀ་གོང་དཀར་དང་། འཕྱོང་རྒྱས་སོགས་ཀྱི་མི་སྣ་རྣམས་ཀྱང་འབྱོར། ཐོག་མར་གྲི་གུར་ཕེབས། ཞག་ཤས་བཞུགས། ཞལ་ངོ་སྤྱི་སྒེར་གྱི་གསེར་རྐྱང་གི་བརྒྱ་འབུལ། ཉིད་ཀྱི་ཞལ་སློབ་བླ་མ་དགོན་གསར་བས། གསེར་གོས་དང་སྣམ་བུ་སོགས་ཀྱི་བརྒྱ་འབུལ་དེ་རེས་ཀྱང་འདུག་གཞན་ལན་མང་ངོ་། །ཁྲོམ་དབང་ཆེན་མོ་ཞིག་སྩལ། མི་དམངས་ཀྱིས་འབུལ་བ་གཏོས་ཆེ་བ་བྱུང་། དེ་དུས་སྡེ་པ་སྒོས་དགོས་པར་འདི་སྐད་གསུངས། 
4-79
རིགས་ཀུན་བདག་རྡོ་རྗེ་འཆང་ཆེན་ཡང་། །མཚན་ལྡན་གྱི་བླ་མ་འདི་ཀ་ལགས། །ལོགས་ཤིག་ནས་སྐྱབས་གནས་འཚོལ་མི་དགོས། །ད་ས་སྡེ་བཙུགས་ནས་གསོལ་བ་ཐོབ། །ཐག་ཉེ་རིང་ལ་བལྟོས་པ་མ་མཆིས་པར། །རང་འདོད་པའི་དོན་ཀུན་བདེ་བླག་འཐོབ། །ཡོན་ཏན་ཀུན་སྐྱེ་བའི་ཞིང་ས་དེ། །ཡུལ་ཁྱད་པར་ཅན་ལ་དད་པས་ཡིན། །གང་དད་པ་ལྡན་ན་སྡིག་ལས་བཟློག །དགེ་ཚོགས་ཡང་སྤེལ་ལ་སྒྲོ་བ་ཆེ། །བཟོད་པའི་མཚོན་ཆ་ངང་གིས་རྙེད། །བརྩོན་འགྲུས་ཀྱི་རྟ་ལ་དེ་ཞོན་ནས། །བསམ་གཏན་གྱི་བདེ་བའི་དགའ་སྟན་ཅན། །ཤེས་རབ་ཀྱི་ཁང་བཟངས་སུ་ཡུད་ཀྱིས་འགྲོ། །མ་ཚོར་པར་ཐར་པའི་ས་ལ་སྙོག །བླ་མེད་ཀྱི་གསང་ལམ་དེ་དུས་རྙེད། །ཆོས་བྱས་སོ་སྙམ་མེད་པའི་ངང་ཞིག་ལ། །རྫོགས་པའི་སངས་རྒྱས་སུ་སོང་ལགས་པ། །འདི་དྭགས་པོ་དཀར་རྒྱུད་ཀྱི་ཟབ་ཁྱད་ཡིན། །གླེགས་བམ་གྲལ་བསྒྲིགས་ཚོའི་བརྗོད་དོན་ཡིན། །ཐ་སྙད་མཁན་གྱི་བཤད་པ་ཡིན། །སྒོམ་ཆེན་རི་འཛིན་གྱི་བཅུད་ལེན་ཡིན། །ཁྱིམ་པ་བྱང་སེམས་ཀྱི་རྣམ་ཐར་ཡིན། །ཁྱེད་མི་དབང་དད་ཅན་གྱི་ཆོས་སྐལ་མཛོད། །ཆོས་བཤད་པ་མདོ་རུ་མ་བསྒྲིལ་ན། །ཚིག་རིས་ཀྱི་བཤར་སྦྱང་དགོས་དུས་མེད། །མདོ་དོན་ཉམས་སུ་མ་བླངས་ན། །ཤེས་ཀྱང་ཁྲམ་གཏམ་ཟང་མ་ཡིན། །ཉམས་སུ་མྱོང་བའི་དུས་ཙ་ན། །དེ་ལ་ཡེངས་མེད་ཅིག་གཅེས་པ་ཡིན། །
4-80
ཞེས་སོ། །དེ་ནས་འཕྱོང་རྒྱས་དར་རྒྱས་རབ་བརྟན་དུ་ཕེབས། ས་སྐྱོང་མིའི་དབང་པོ་སྐུ་མཆེད་རྟ་པའི་ཚེགས་དང་བཅས་པས། གྱད་ན་ཁ་ནས་མདུན་བསུས། དགེ་འདུན་ཆོས་སྡེ་ཕན་ཚུན། སྤྱན་གཡས། ཐང་པ་སོགས་དགོན་ཆེ་ཕྲན་ཐམས་ཅད་ཀྱིས་སེར་སྤྲེང་རྒྱས་པར་འདུག །རི་བོ་བདེ་ཆེན་དང་། འཕགས་སྡེའི་མཁན་པོ་ཕྱག་འབུལ་ལ་བྱོན། བདག་རྐྱེན་ཆེན་པོ་མཛད། ཞལ་ངོའི་དྲུང་ལ་ཚེ་དབང་རྗེས་གནང་སོག་སྩལ་སྒེར་གཞུང་གི་འབུལ་བ་ཞབས་ཏོག་བསམ་གྱིས་མི་ཁྱབ་པ་འདུག །རི་བོ་བདེ་ཆེན་སྤྱི་སོ་ནས་གདན་འདྲེན་བྱུང་། གཙུག་ལག་ཁང་དུ་ཕེབས་སྤྱི་གཟིམས་ཁང་གི་འབུལ་བ་བསྙེན་བཀུར་བཟང་ཞིང་། གཞི་བྱེས་འབེལ་གཏམ་འཕེལ་བ་གྱུར། འཕགས་སྡེ་ནས་མཁན་ཆེན་ཀུན་དགའ་བཟང་པོར་གྲུབ་པའི་སློབ་དཔོན་ཆེན་པོ་ཨ་ནུ་པ་མ་རཀྵི་ཏའི་གདམས་པ་སྦྱོར་བ་ཡན་ལག་དྲུག་གི་ཁྲིད་ཞིབ་བཤད་དང་། གཞན་ཡང་འདོད་ཆོས་མང་དུ་སྩལ། ཆོས་སྡེ་ཆེ་ཕྲན་ཐམས་ཅད་ལ་མང་འགྱེད་མཛད། དེ་རེས་སྣེ་གདོང་རྩེར་གདན་འདྲེན་བྱུང་བས་སྐོར་ཅིག་ཕེབས། རྩེ་ཞབས་དྲུང་དང་མཇལ་བའི་ཐོག་མ་ཡིན། ཚེ་དབང་དང་མགོན་པོ་ཕྱག་བཞི་པའི་རྗེས་གནང་སྩལ། ཡར་ལམ་བཀྲ་ཤིས་རྩེར་ཕེབས། ཚོགས་འཁོར་དགའ་སྟོན་གྱི་གྲལ་དུ། གསང་ཆེན་རྡོ་རྗེ་ཐེག་པར་ཞུགས། སྣོད་བཅུད་ལྷ་རུ་ངོ་སྤྲད་པས། །སྣང་བ་ཅི་ཤར་དགག་མ་དགོས། །
4-81
རང་བྱུང་གི་དཀྱིལ་འཁོར་ཉམས་རེ་དགའ། །བརྗོད་པ་སྔགས་སུ་བརྡ་སྤྲད་པས། །གྲེ་འགྱུར་གྱི་རོལ་མོ་མ་ལགས་པའི། །ཅི་བཤད་རྡོ་རྗེའི་གླུ་རུ་འཐེན། །ཆོས་ཟུང་འཇུག་ཏུ་ཤར་བ་དང་རེ་སྤྲོ། །འཆར་སྒོ་ཏིང་འཛིན་གྱི་མྱོང་བ་ལ། །སྤང་གཉེན་གྱི་རས་བོར་མ་དགོས་པར། །གང་བྱུང་ཐུགས་ཕྲད་བསྐྱང་བ་ལས། །བདེ་ཆེན་གྱི་དགའ་སྟོན་ཨེ་མ་ཧོ། །ཞེས་གསུངས། སྡེ་པ་ཀ་ལཱ་པའི་གསན་སྦྱོང་མཛད་པས་སློབ་དཔོན་ཞིག་དགོས་ཞུ་བར། ལོ་ཙ་བ་ཤེས་རབ་དཔལ་བཟང་འཇོག་པ་གནང་། ཟངས་མཚོ་དང་། དང་ལུང་དུ་ཞག་རེ་བཞུགས། སྒྲུབ་སྡེ་དོན་འགྲུབ་མཐོང་སྨོན་དུ་ཕེབས། འདུ་ཁང་ཐོག་འབུབས་གྲུབ་འདུག་པས་ཕྱག་ནས་འཐོར། དབུ་མཛད་བཀྲ་ཤིས་དབང་རྒྱལ་འཆད་ཉན་པར་བཀོད་པ་གནང་། གཞན་ཡང་། མུ་ཏིག་སོགས་འབྲོག་གི་བླ་མ་འགའ་ཞིག་ལ་བསྐོ་འཇྭ་སྩལ། གཙང་གི་གདན་འདྲེན་བསྐྱར་མ་སླེབ། དེ་ནས་ས་སྐྱོང་ཆོས་ཀྱི་རྒྱལ་པོ་ཡར་རྒྱབ་དཔོན་ཆེན་ཁུ་དབོན་གྱིས་གདན་དྲངས། ཕོ་བྲང་རྒྱལ་གླིང་དུ་ཕེབས། ཚོགས་དགེ་འདུན་སྒང་པ་དཔོན་སློབ་ཀྱིས་སེར་སྤྲེང་བཟབས་ནས་འདུག །ཁུ་དབོན་དྲུང་ལ་ཚེ་དབང་། ཚེ་རིང་མཆེད་ལྔའི་རྗེས་གནང་སོགས་སྩལ། དོལ་མདའ། སྐྱིད་གཤོངས། རྣམ་རབ་སོགས་སུ་ཞག་བཅག་མལ་ཙམ་ལས་མ་གནང་། སོ་སོའི་ཚེ་དབང་རྗེས་གནང་སོགས་བཞེད་པ་ལྟར་སྩལ། ལྕང་གསར་བཀྲ་ཤིས་གདོང་དུ་སྡེ་སྲིད་རིན་པོ་ཆེ་མིའི་དབང་པོ་དཔོན་གཡོག་ལས་ཚན་དང་བཅས་ཏེ་ཆིབས་བསུ་ལ་ཕེབས། 
4-82
དེ་ཉིན་གོང་མ་ཆོས་ཀྱི་རྒྱལ་པོ་དཔལ་ཕག་མོ་གྲུ་པ། ངག་གི་དབང་ཕྱུག་གྲགས་པ་རྣམ་རྒྱལ་དཔལ་བཟང་པོ། སྐུ་འཁོར་དུ་རྒྱལ་ཕྲན་ནང་བློན་སོགས་ཀྱིས་བསྐོར་ཏེ། བཀོད་པའི་ཁྱད་པར་དུ་མས་བལྟ་ན་ངོམས་པ་མེད་པས་མཛེས་པར་སྣང་བ། བཀྲ་ཤིས་པའི་དར་དཀར་པོ་འབའ་ཞིག་དང་། སིཧླ་དང་ཨ་ཀ་རུ་ལ་སོགས་ཏེ་བདུག་སྤོས་ཀྱི་འཕྲེང་བ་འཛིན་པའི་དབུས་ན་གཟི་མདངས་མཚུངས་པ་མེད་པས། སྐྱེས་བུ་ཆེན་པོ་དགེ་པའི་བཤེས་གཉེན་ལ་བཀུར་སྟི་བགྱི་བའི་སླད་དུ་གསུམ་སྐས་མགོར་ཕེབས་འདུག །དེའི་ཚེ་སྐྱེས་བུ་ཆེན་པོ་ཐམས་ཅད་གཟིགས་པ་ཉིད་ནི་སྔོན་ནས་གཞན་ལ་བརྙས་པ་དང་སུན་འབྱིན་སྤངས་ཏེ་ཞི་ཞིང་དུལ་བ་ལ་གོམས་པའི་སྟོབས་ཀྱིས་སེང་གེ་ལྟར་ཆེ་འགྱིང་མི་མཛད། འཕྲལ་དུ་ཕྱག་ལན་སྩལ་བ་སོགས་ཀྱིས་མཆོད་ཡོན་འཕྲོད་ལེགས་པར་མཐུན། འགལ་བ་སྟེ་ས་མོ་གླང་ལོ་གསར་མཚམས་ནས་ཟླ་བ་ལྷག་ཙམ་བཞུགས། ལོ་གསར་ཕུར་སྒྲུབ་ཀྱི་རྩ་འཆམས་ནས་བཟུང་། གང་འཆམས་ཀྱི་གཟིགས་མོ་ཉིན་ལྟར་བཞིན་འབུལ་བའི་གཙོ་བོར་སྡེ་སྲིད་མིའི་དབང་པོ་ཉིད་ཕེབས་པ་དང་། ལོ་གསར་ཆེན་མོའི་བཞུགས་གདན་འཚོམ་ཆེན་གྱི་གུང་ལ་མཆོད་ཡོན་ལྷན་དུ་ཕེབས་པ་སོགས་ཆོས་སྲིད་གཉིས་ཀའི་སྒོ་ནས་བཀུར་སྟི་ཕུལ་དུ་བྱུང་བ་མཛད། ཞབས་ཕྱིར་རྡོ་རྗེ་འཛིན་པ་ཆེན་བོ་ཀུན་དགའ་སྙིང་པོ་ཕེབས་འདུག་པ། 
4-83
རྟག་ཏུ་མིག་ནི་ཡ་མཚན་ལྟད་མོས་བྲེལ། དང་། ལྕེ་ལ་རོ་བརྒྱ་ལྡན་པའི་བཟའ་བཏུང་མོད། །གཉིས་ཀ་འགྲུབ་བྱུང་གསུང་། དཔོན་སློབ་ཐམས་ཅད་མཉེས་པའི་ཚུལ་དུ་འདུག །སྡེ་སྲིད་རིན་པོ་ཆེ་ཁུ་དབོན་ལ་ཚེ་དཔག་མེད་གྲུབ་རྒྱལ་ལྷ་མངས་ཀྱི་དབང་བཞི་རྫོགས། ཚེ་ཁྲིད་བཀའ་རྒྱ་མ། སྡོམ་གསུམ་རྒྱན་གྱི་བཤད་འགྲེལ། གསུང་ངག་རོ་སྙོམས་ཆེན་མོ་སོགས་འབུལ་བ་གནང་། ཞལ་ངོ་སྒེར་གཞུང་སོ་སོ་ནས་ཟང་ཟིང་གི་འབུལ་བའང་གཏོས་ཆེ། ཞབས་དྲུང་མིའི་དབང་པོར་ཞལ་གདམས་འདི་ལྟར་སྩལ། ཆོས་བཞིན་ས་སྐྱོང་དཔག་བསམ་ཤིང་བརྟེན་པས། ། སྐྱེ་བོའི་འཁྲི་ཤིང་ཡལ་འདབ་མཐོ་རིས་བསྙེག །བསྟན་འཛིན་འདབ་ཆགས་རྣམས་ཀྱང་གནས་འཆའ་བས། །འཇིག་རྟེན་གསུམ་ན་ཡོངས་འདུའི་གྲགས་པ་ཐོབ། །ཆོས་ཀྱང་མི་དགེ་བཅུ་ལས་ལོག་པ་ཉིད། །དགེ་བ་བཅུ་ཞེས་བཏགས་པ་དེ་ལགས་ཀྱི། །རང་གི་ཉམས་བཞེས་གཞན་ཡང་སློབ་འཇུག་པ། །འདི་ལས་ཕན་བདེར་བྱེད་ཐབས་ག་ལ་ཡོད། །ཤཱཀྱའི་རྒྱལ་པོ་དེ་ལུགས་རྗེས་འབྲེང་བ། །སྲི་ཞུའི་ཡུལ་དུ་འོས་མཁྱེན་དེ་མཆོད་ན། །སྲིད་པའི་འཇིགས་པ་ཐམས་ཅད་ཞི་འགྱུར་བས། །གཏན་གྱི་དཔུང་གཉེན་ཉིད་དུ་མཛད་པ་ཞུ། །གང་ཞིག་ཕ་མར་གྱུར་བའི་སེམས་ཅན་ལ། །འཁོ་བའི་རྒྱ་མཚོ་སྒྲོལ་བའི་དེད་དཔོན་མཆོག །རྫོགས་པའི་སངས་རྒྱས་ཞེས་པ་དེ་ཐོབ་ཕྱིར། །དགེ་སྒྲུབ་ཐམས་ཅད་དེ་ཆེད་འགྲོ་བ་འཚལ། །
4-84
ཞེས་སོ། །དེ་སྐབས་མཐུ་སྟོབས་ཀྱི་དབང་ཕྱུག་དམར་ཌཱ་ཀི་རས་ཆེན་གྱི་ཐུགས་སྲས་ལུང་བསྟན་རྡོ་རྗེ། དཔལ་བཀྲ་ཤིས་མཐོང་སྨོན་དང་དཔལ་རི་རྡོ་རྗེ་གདན་གྱི་ཆེན་པོ། ཆོས་རྗེ་གྲགས་པ་བཤེས་གཉེན་གྱི་གདན་ས་སྤྱི་སླར་བཀོད་པ་གནང་། ཐེག་ཆེན་གན་དྲིལ་དང་། བེར་ལ་སོགས་པའི་གནང་སྦྱིན་བཟང་པོ་མཛད། འདི་ཉིད་ཀྱིས་ཟང་ཟང་གི་ཞབས་ཏོག་སྔ་ཕྱི་བར་གསུམ་དུ་བསྒྲུབས། དགོན་ཆེ་ཕྲན་ལྔ་བཅུ་ཙམ་བསྐྱངས། འཕྲིན་ལས་ཤིན་ཏུ་ཆེ་བ་ཞིག་གོ །དེ་ནས་དཔལ་དེ་བརྒྱུད། སྣ་དཀར་རྩེར་ཕེབས་པ་ཤར། ཡར་འབྲོག་ཁྲི་དཔོན་ཁུ་དབོན་གྱིས་འདམ་ལུང་ནས་བསུས། སྣ་དཀར་རྩེར་ཞག་འགའི་བར་དུ་བཞུགས། ཁུ་དབོན་ལ་ཚེ་དབང་། རྗེས་གནང་སོགས་སྩལ། ཆིབས་ཆིབས་རོལ་གྱིས་གཙོས་པའི་བརྒྱ་འབུལ་མཛད། ལྷག་པར་དད་ཅིང་མོས་པར་གྱུར། བུ་མངས་འབྲོག་སྡེ་རྣམས་ཀྱི་བརྒྱ་འབུལ་ཡང་དེར་སླེབ། གདན་ས་ཆེན་པོ་ར་ལུང་གི་གདན་འདྲེན་པ་རྣམས་འབྱོར། སང་ཉིན་དབོན་རིན་པོ་ཆེ་སྐུ་གཞོན་པ་དཔོན་སློབ་མཁའ་རོ་ལུང་པ་བཟང་བའི་མདོར་ཕེབས། ཆུ་མིག་རིན་ཆེན་གྱི་བཞུགས་ཁྲིའི་ཐང་ནས། དཔལ་འབྲུག་པ་རིན་པོ་ཆེ་མི་ཕམ་ཆོས་ཀྱི་རྒྱལ་པོ་འཁོར་དགེ་འདུན་འདུས་པ་རྒྱ་མཚོས་བསྐོར་ཏེ་གདན་འདྲེན་སེར་སྤྲེང་རྒྱས་པ་དང་བཅས་ཕེབས་འདུག །གདན་ས་མེ་ཏོག་མདངས་འཕྲོག་གཉིས་པར་ཞག་ཤས་བཞུགས། 
4-85
སྤོས་སྐྱར་ངག་དབང་ཆོས་ཀྱི་རྒྱལ་པོའི་སྐུ་གདུང་ཡིད་བཞིན་ནོར་བུ་ལ། ཕྱག་མཛད་པ་དང་མཆོད་པའི་ཡོ་བྱད་མཚར་དུ་དངར་བ་འབུལ་བར་ཐེགས། སློབ་དཔོན་པ་རབ་འབྱམས་ཆོས་འཕེལ་བས་བརྒྱ་འབུལ་བཟང་པོ་མཛད། རྒྱལ་རྩེ་བློན་ཆེན་སྡེ་པ་མི་འགྱུར་བ་དཔོན་གཡོག་ཉིན་ལམ་གྱི་སར་གདན་འདྲེན་ལ་འབྱོར། རྒྱང་གྲགས་སུ་ཞག་བཞུགས་མཛད། བདག་ཆེན་རྣམ་པར་རྒྱལ་བ་ཁུ་དབོན། དགའ་ལྡན་ཆོས་འཕེལ་གྱི་མདུན་ན་གདན་འདྲེན་ཆིབས་བསུ་ལ་ཕེབས། དེ་ནས་གཟུང་སྟེ་ཆོས་སྡེ་དཔལ་འཁོར་བདེ་ཆེན་གྱི་དགེ་འདུན་སྟོང་བུད་ཙམ་གྱིས་སེར་སྦྲེང་། གདུགས་རྒྱལ་མཚན་བ་དན་ཕྱེ་ཕུར་རོལ་མོའི་བྱེ་བྲག་བསམ་གྱིས་མི་ཁྱབ་པ་དང་བཅས་ཏེ་འདུག །ཆོས་སྡེ་ཆེན་པོར་མང་ཇ་ཁལ་འགྱེད་དང་བཅས་པ་གནང་། རྒྱལ་རྩེ་བདེ་ཡངས་སུ་བཞུགས། ཞལ་ངོ་རྣམས་ལ་དབང་རྗེས་གནང་སོགས་སྩལ། དགེ་འདུན་ཞབས་འབྲིང་བ་འདུས་པ་རྒྱ་མཚོ་རྣམས་ཀྱི་ཟླ་བ་གཅིག་གི་འཚོ་བ་སྡེ་པ་མི་འགྱུར་དྲུང་གིས་སྦྱར། འབྱོར་པའི་ནོར་རྫས་དོན་དང་ལྡན་ཅིང་ཚོགས་གཉིས་སྤེལ་བའི་སླད་དུ། རྒྱལ་རྩེ་ནེའུ་ཐང་དུ་བཞུགས་ཁྲི་ཆེན་པོ་ཞིག་གསར་དུ་བརྩིགས། གཉེར་ཚང་པ་རང་གི་ནོར་ལོངས་སྤྱོད་ཅི་མཆིས་པ་ཐམས་ཅད་དེར་སྤུངས་ཏེ། སྤྱན་སྔར་ལྷུན་སྟུག་པར་གྱུར་ཏོ། །དེ་དང་དུས་མཚུངས་རིན་སྡིངས་གྲྭ་ཚང་པ་དཔོན་སློབ་སྤྱི་སྒེར་གྱི་ཇ་སྤོབས་རྩེ་བཅུ་དྲུག །
4-86
ཉང་གྲུམ་སྔོན་པོ་འབའ་ཞིག་ཉི་ཤུ་རྩ་ལྔས་གཙོས་པའི་འབུལ་ཆེན། དཔོན་རིགས་ཐམས་ཅད་ཀྱིས་ཀྱང་རང་རང་གི་འབྱོར་པ་དང་མཚུངས་པའི་འབུལ་བ་གཏོས་ཆེ་བ་ཕུལ། དེའི་ཚེ་སྐྱེས་བུ་ཆེན་པོ་ཡོན་གནས་དམ་བ་ཉིད་ཀྱིས་བླ་ན་མེད་པའི་བྱང་ཆུབ་བདེ་བ་ཆེན་པོའི་རྒྱུར་ཡོངས་སུ་བསྔོ་བར་མཛད་དོ། །དེ་དུས་བླ་མ་དམ་པ་རྡོ་རྗེ་འཛིན་པ་ཆེན་པོ་ཆོས་ཀྱི་མགོན་པོའི་སྤྲུལ་བའི་སྐུ་རྒྱལ་རྩེའི་ཞལ་ངོར་འཁྲུངས་པ་དབུ་སྐྲ་བསིལ། མཚན་མི་ཕམ་ཆོས་ཀྱི་དབང་ཕྱུག་བདུད་འཇོམས་རྡོ་རྗེར་གསོལ། རབ་ཏུ་བྱུང་། བྱང་ཆུབ་ཏུ་ཐུགས་བསྐྱེད། དཔལ་འཁོར་ལོ་སྡོམ་པའི་དཀྱིལ་འཁོར་དུ་དབང་བཞི་རྫོགས་པ་དང་། རྡོ་རྗེ་ནག་པོ་ཕྱག་བཞི་པའི་རྗེས་གནང་སྩལ། རིག་པ་འཛིན་པའི་སྡོམ་པ་གསོས་བཏབ། གཙུག་ལག་གཉིས་ཀྱི་སྒོ་ནས་ཆེ་འདོན་མཛད། དེ་ནས་ནུབ་མཆོས་ལུང་དུ་ཕེབས། རོང་སྟོན་ལྷ་དགའི་གཟིམས་ཕུག་ཏུ་བཞུགས་གནས་བཅས། ཟླ་བ་གཅིག་གི་གསོལ་ཕོགས་སྤྲུལ་པའི་སྐུ་པད་དཀར་དབང་པོ་དཔོན་སློབ་ཀྱི་མཆོད་གཞིས་ནས་ཕུལ། དགེ་བའི་བཤེས་གཉེན་ཆེན་པོ་ཚོགས་གསོག་པ་སོགས་དོན་གཉེར་མང་པོ་ལ་དགྱེས་པ་རྡོ་རྗེའི་དབང་། བསྲེ་འཕོ་གནད་ཀྱི་མཚམས་སྦྱོར་སོགས་གསུང་གི་གསང་བ་ཅི་ཡང་ཞིག་སྩལ། དེ་ནས་རྩེ་ཆེན་གྱི་སྤྱན་འདྲེན་པ་རྣམས་འབྱོར། སྡེ་པ་ཀུན་བཟང་རབ་བརྟན་པ་དཔོན་བློན་གྱིས་ཟླ་བ་ལྔའི་བར་དུ་ཞབས་ཏོག་བགྱིས་ཏེ་རྩེ་ཆེན་དུ་བཞུགས། 
4-87
ཞལ་ངོ་རྣམས་ལ་ཚེ་རྟ་སོགས་འདོད་ཆོས་དང་། བྱིང་ལ་ཁྲོམ་ཆོས་སུ། ཆོས་རྒྱལ་སྲོང་བཙན་སྒམ་པོའི་བཀའ་འབུམ། མདོ་སྐོར། སྒྲུབ་སྐོར། ཞལ་གདམས་སྐོར་སོགས་ཉིན་ལྟར་གྱིས་གནང་། རྒྱལ་བྱེད་ཚལ་མདོ་གྲྭའི་སློབ་དཔོན་པ། ཟུར་ཆེན་ཤཱཀྱ་གྲགས་པ་དཔོན་སློབ་ལ། ཉིད་ཀྱིས་མཛད་པའི་ཚད་མའི་སྤྱི་དོན་རིགས་པའི་སྙིང་པོ་དང་། འགྲེལ་པ་འཇམ་དབྱངས་དགོང་རྒྱན། དབུ་མའི་གཞུང་ལུགས་གསུམ་གསལ་བར་བྱེད་པ་ངེས་དོན་གྲུབ་པའི་ཤིང་རྟ། ཕར་ཕྱིན་གྱི་སྤྱི་དོན་བྱམས་པའི་ཞལ་ལུང་། ཤེར་ཕྱིན་གྱི་ལུང་ལ་འཇུག་པའི་སྒོ་རྣམས་ཀྱི་བཤད་པ་གནང་། དེ་དུས་ཁྱེད་མཚན་ཉིད་པ་རང་བཀྲེན་པར་འདུག་ཅེས་རྣམ་སྲས་བུ་ལུགས་ཀྱི་དབང་རྒྱས་པ་དེ་སྩལ། གཞན་རྣམས་ཀྱིས་ཀྱང་བཀའ་དབང་ཐོབ་ལ་རེ་ནས། མཚན་ཉིད་པ་ཡིན་ཟེར་འཚངས་པས། དོ་ནུབ་གྱི་མཚན་ཉིད་པ་འདི་ལ་རྫོགས་རྒྱུ་མི་འདུག་གསུང་། དེ་དུས་དགེ་རྒན་བློ་གྲོས་རབ་རྒྱས་ཀྱིས་འབུལ་ཆེན་བྱས་ཁོང་ལ། ཁྱོད་ཀྱི་འབྱོར་བས་མཚན་ཉིད་པ་རྣམས་ལ་ཕན་ཆེན་པོ་ཐོགས་པར་འདུག་གསུང་ངོ་། །ཞ་ལུ་རི་ཕུག་ནས་སྐུ་ཞང་རིན་པོ་ཆེ་དང་། རིན་སྡིངས་པའི་ཁྲོད་ནས་བསྙེན་རྫོགས་སྒྲུབ་མི་མང་དུ་བྱོན། །དེ་སྐབས་མཚན་ཉིད་པའི་ཁྲོད་ནས། བྱམས་ཆོས་པ་བཀྲ་ཤིས་ཆོས་འཕེལ་སོགས་རྒྱུགས་འབུལ་བ་འགའ་ཤས་བྱུང་བ་ལ་གནང་སྦྱིན་བཟང་པོ་སྩལ། 
4-88
འབྲས་ཡུལ་སྐྱེད་ཚལ་བ་དཔོན་སློབ་རགས་རིམ་མཇལ་དུ་བྱོན། རིགས་ལུང་སྨར་ལ་གནང་སྦྱིན་རྒྱས་པར་མཛད། སྡེ་པ་ཞལ་ངོ་དང་། རྩེ་ཆེན་དབོན་པོ་བ་སོགས་ལ་བདེ་མཆོག་གི་དབང་གནང་། ཞབས་འབྲིང་གི་དབུ་ཆེ་རགས་རིམ་དང་། ལོ་ཙ་བ་སངས་རྒྱས་དཔལ་བཟང་སོགས་རྒྱལ་བྱེད་ཚལ་ནས་དགེ་བཤེས་འགའ་ཤས་ལ། མཁའ་འགྲོ་སྙན་རྒྱུད་དབང་ཁྲིད་བཤད་པ་རྒྱས་པ་ཞིག་སྩལ། མཁན་ཆེན་ལུང་རིགས་པ་ཕེབས། འབུལ་བ་ཚད་མེད་པ་འདུག །སྔར་མཁྱུད་ལྟར་ཕྱག་ལན་དང་གནང་སྐྱེས་བཟང་པོ་མཛད། རྩེ་ཆེན་ཆོས་སྡེའི་དབུ་མཛད་ཆེན་མོས་གཙོས་པའི་དགེ་འདུན་རྣམས་ཉིན་ལྟར་གྱིས་མཇལ་དུ་བྱོན། ཆོས་འབྲེལ་དང་འབེལ་གཏམ་གྱིས་དུས་འདས། དུས་འཁོར་ཤར་ཆེན་པ་དཔོན་སློབ་ཀྱི་བརྒྱ་འབུལ་བྱུང་། བཀའ་འབྲེལ་སོགས་སྩལ། རིན་སྤུངས་ནས་ཞབས་དྲུང་མ་ཆེན་ངག་དབང་འཇིག་གྲགས་ཕྱག་འབུལ་ལ་ཕེབས། སྒྲོལ་དཀར་དང་སྟོབས་པོ་ཆེའི་རྗེས་གནང་སྩལ། བཅོམ་ལྡན་འདས་གདུགས་དཀར་མོ་ཅན་གྱི་སྒྲུབ་ཐབས་ལས་ཚོགས་དང་བཅས་པ་མཛད། འཇིགས་བྱེད་དང་། རྡོ་རྗེ་རྣམ་པར་འཇོམས་པ་སོགས་ཀྱི་བཀའ་དབང་མི་དམངས་སྐྱ་སེར་འདུས་པ་ཀུན་ལ་གནང་། སླར་རྒྱལ་རྩེ་གཟིམས་བཤག་ཏུ་སྡེ་པ་དཔལ་ལེགས་པས་ཟླ་བ་གཅིག་གི་ཞབས་ཏོག་དང་། རས་སྤེན་འདབ་སོགས་ཀྱི་དོས་མི་རྒྱབ་བཅུ་ཕུལ། དེ་དུས་རིན་སྤུངས་ནས་ཞབས་དྲུང་རྒྱལ་བུ་ཟླ་བ་བཟང་པོ་འཁོར་བ་ལ་ཡིད་འབྱུང་སྟེ་གསང་སྟབས་ཀྱིས་ཆོས་ལ་ཕེབས། 
4-89
རྟེན་ལི་མ། ཤལ་དམར་པོ། གསེར་ཆས་སོགས་ཀྱི་འབུལ་བ་དང་བཅས་དབུ་སྐྲ་བཅད། མཚན་མི་ཕམ་ཟླ་བ་གྲགས་པར་གསོལ། རབ་ཏུ་བྱུང་བ་བསྒྲུབས། འཁོར་ལོ་སྡོམ་པའི་དཀྱིལ་འཁོར་དུ་བཅུག །དེ་ནས་གཟུང་སྟེ་ཟབ་ཁྲིད་ཐམས་ཅད་སྩལ་སྤོང་བ་བསམ་གཏན་ལ་གཞོལ་བ་ཞིག་གོ། །སླར་ལྷུན་པོ་རྩེའི་གདན་འདྲེན་པ་འབྱོར། གནས་རྙིང་དུ་ཕེབས། ཞི་བ་དང་ངེས་པའི་གསུང་འགའ་ཙམ་གྱིས་སྐུ་མཆེད་ནང་གི་ཟློས་སེལ་ལྷུན་གྱིས་གྲུབ། དབང་ལྡན་དུ་ཞག་འགའ་བཞུགས། ཞབས་ཏོག་འཁོས་སུ་ཕེབས་པ་ནས། རིན་ཆེན་རྩེར་ཞག་བཞུགས་འཕོག །བཀྲ་ཤིས་ཁུད་དུ་ས་སྐྱོང་ངག་དབང་དོན་གྲུབ་རྡོ་རྗེ་སྐུ་མཆེད་རྟ་པའི་ཚོགས་དང་བཅས་ཏེ་གདན་འདྲེན་ལ་ཕེབས། གངས་ཅན་ཆོས་འཕེལ། གནས་ཆོས་སྡེ། ལྷུན་རྩེ་ཆོས་སྡེ་སོགས་ཏེ། ཀློག་པ་ཐོས་བསམ་ལྷུར་ལེན་གྱི་དགེ་འདུན་ཁྲི་ཕྲག་ལ་ཉེ་བ་ཙམ་གྱིས་སེར་སྦྲེང་རྒྱས་པར་འདུག །ལྷུན་པོ་རྩེར་ཟླ་བ་བཞི་བཞུགས། དེ་དུས་ཞབས་འབྲིང་དུ་དགེ་འདུན་ལྔ་བརྒྱ་ལྷག་ཙམ་ཡོད། ཐོག་མར་ཞལ་ངོ་རྣམས་ལ་གྲུབ་རྒྱལ་ལུགས་ཀྱི་ཚེ་དབང་བརྒྱ་རྩ་གནང་། དེ་ནས་འཁོར་ལོ་སྡོམ་པ་དྲུག་ཅུ་རྩ་གཉིས་ཀྱི་དབང་བཞི་རྫོགས། དགྱེས་པ་རྡོ་རྗེའི་དབང་། རྡོ་རྗེ་རྣམ་པར་འཇོམས་པའི་དབང་། བསྲེ་འཕོ་གནད་ཀྱི་མཚམས་སྦྱོར་ཞེས་པ་ཇོ་བོ་ནཱ་རོ་པའི་ཁྱད་ཆོས་ཆེན་མོ། 
4-90
ཚེ་ཁྲིད་བཀའ་རྒྱ་ཅན་སོགས་ཟབ་པ་དང་རྒྱ་ཆེ་བའི་གསུང་གི་བདུད་རྩིས་དང་བའི་བུམ་བཟང་གང་བར་གྱུར། མདོ་སྡེ་གསེར་འོད་དམ་པ་ནས་གསུངས་པའི་བཤགས་པ་དང་། སྨོན་ལམ་ཚིགས་སུ་བཅད་པ་མཛད། མགོན་ཁང་གསར་བཞེངས་སུ་ཕྱི་ནང་གསང་གསུམ་གྱི་རྟེན་གོས་མདོས། མཆོད་གཏོར་སྤྱན་གཟིགས་ལྷུན་ཆགས་པ་མ་ཚང་བ་མེད་པ་བཙུགས། རྒྱལ་པོ་ཆེན་པོ་རྣམ་མང་ཐོས་ཀྱི་སྲས་ལ། ཕོ་བྲང་ཁང་བརྩེགས་བཟོ་དབྱིབས་བལྟ་བས་མི་ངོམས་པ་འཛུགས་པ་མཛད། རྒྱལ་བྱེད་ཚལ་སྔགས་གྲྭ་དཔོན་སློབ་གཙོ་བོར་གྱུར་པ་ལ་རྡོ་རྗེ་གདན་བཞིའི་རྩ་རྒྱུད་དང་། བཤད་རྒྱུད་མནྜ་ཨཾ་ས་གསུངས། མགོན་པོ་ལྷ་མངས་ཀྱི་དབང་དད་འདུས་ཀུན་ལ་སྩལ། དཔལ་ལྡན་ལྷ་མོ་གསང་སྒྲུབ་ཀྱི་དབང་དཔོན་གཡོག་རགས་རིམ་ལ་གནང་། དེ་སྐབས་སྔགས་གྲྭ་ནས་བསྲེ་འཕོ་འགྲེལ་ཆེན་དང་དུས་འཁོར་བསྡུས་རྒྱུད་སོགས་ཀྱི་རྒྱུགས་འབུལ་བར། ཆོས་མཛད་སངས་རྒྱས་རྡོ་རྗེས་མགོ་བྱས་མང་དུ་བྱུང་། གངས་རོ་ལོ་ཙ་བ་སོགས་ཀ་ཙན་གྱི་རྒྱུགས་འབུལ་མི་དང་། རབ་འབྱམས་པ་ཆོས་གྲགས་སོགས་འབུམ་གྱི་རྒྱུགས་འབུལ་བ་རྣམས་ལ་གནང་སྦྱིན་བཟང་པོ་སྩལ། ཞ་ལུ་རི་ཕུག་གི་བུ་སྟོན་རིན་པོ་ཆེའི་དུས་མཆོད་ཐེས་ལ་ཇ་སྤོབ་རྩེ་དང་སྤོས་ཤེལ་ཤལ་པ་སོགས་གནང་། རྣམ་འགྱུར་ཏེ་ལྕགས་པོ་སྟག་ལོ་གསར་དུ་ཤར་བའི་དགའ་སྟོན་ལ་ཉིན་མང་པོའི་བར་དགྱེས་པ་བསྐྱེད། 
4-91
ས་སྐྱོང་བ་ཉིད་ཀྱི་ལྷག་པའི་བསམ་པ་ཕུན་སུམ་ཚོགས་པས་ཡང་དག་པར་བསམས་པ། བདག་སྔོན་བསོད་ནམས་ཀྱི་ཚོགས་ཆེན་པོ་བསགས་པའི་མཐུས། འབྱོར་པ་དང་ལྡན་ཞིང་ཡོན་གནས་དམ་པ་ས་ཆེན་པོ་ལ་རབ་ཏུ་བཞུགས་པ་བྱང་ཆུབ་སེམས་དཔའ་སེམས་དཔའ་ཆེན་པོ། ཟབ་མོ་གསང་སྔགས་ཀྱི་རྡོ་རྗེའི་སློབ་དཔོན་ཆེན་པོ་ཚོགས་ཀྱི་ཞིང་ཁྱད་པར་ཅན་སྟོན་པའི་གསུང་བ་ནས་མཆོག་ཏུ་བསྔགས་པ་འདི་ལྟ་བུ་དང་མཇལ་བ་ནི་བདག་གིས་རྙེད་པ་ལེགས་པར་རྙེད་པ་ཡིན་གྱི། ད་ནི་ལོངས་སྤྱོད་ཀྱི་འབྱོར་པ། དོན་ཡོད་པར་བྱ་བར་རིགས་སོ་སྙམ། ལྷུན་རྩེའི་མདུན་གྱི་ལྗོངས་ཆེན་པོ་ཞིག་ཏུ་བཞུགས་ཁྲི་ཀ་བ་བཞིའི་ཁྱོན་དང་ལྡན་པ་བཤམས། དུས་སྦྱོར་གཟའ་ཚེས་དགེ་པ་དང་བསྟུན། སྐྱེས་བུ་ཆེན་པོ་འཁོར་ཡོངས་ཀྱི་དགེ་བའི་བཤེས་གཉེན་དུ་མས་བསྐོར་བ་སྟན་བཤམས་པ་ལ་འཁོད་པའི་སྤྱན་སྔར། ཁྱད་ནོར་མང་པོས་གཙོས་ཏེ་བསྔགས་པར་འོས་པའི་ནོར་རྫས་དགུ་ཚན་བཅུ་གསུམ། རྗེས་འབྲང་དུ་ནང་སོ་བརྒྱ་རྒན་པ་དང་། ནང་པ་མགོན་ཚེ་བ་སོགས་མངའ་ཞབས་ཀྱི་དཔོན་རིགས་ཆེ་ཕྲན་རྣམས་དང་། ཆོས་སྡེ་སོ་སོའི་སྤྱི་འབུལ་སྒེར་འབུལ་སོགས་ཀྱིས་ཁྲི་ཐོག་གཅིག་ཏུ་བཞེས་པ་ལ་ཆེ་བར་གྲགས་པ་ཕུལ། དེའི་ཚེ་སྐྱེས་བུ་ཆེན་པོ་ཉིད་ཀྱིས་ཁྲོམ་དབང་དང་། སྦྱིན་པའི་ཕན་ཡོན་བཤད་དེ་བླ་ན་མེད་པའི་བྱང་ཆུབ་ཀྱི་བར་དུ་གཞན་གྱི་ཟིལ་གྱིས་མི་ནོན་ཅིང་གོང་ནས་གོང་དུ་འཕེལ་བའི་ཕྱིར་ཡོངས་སུ་བསྔོ་བ་དང་བཀྲ་ཤིས་པའི་ཚིག་གིས་རྒྱས་བཏབ་བོ། །
4-92
དེ་ཡང་འདི་སྐད་ཐོས་ཏེ། རྒྱལ་དབང་དུས་གསུམ་མཁྱེན་པ་ཉིད་རྒྱལ་བྱེད་ཚལ་གྱི་གཙུག་ལག་ཁང་ཆེན་པོར་བཞུགས་པའི་སྐབས། ས་སྐྱོང་བ་འདི་ཉིད་གཞོན་ནུ་བློ་གྲོས་ཀྱི་པདྨོ་ཁ་བྱེ་བ་ཞིག་ཞབས་དྲུང་དུ་འབྱོར་པ། ཡེ་ཤེས་ཀྱི་སྤྱན་གྱི་གཟིགས་པས་འདི་ནི་བསོད་ནམས་ཆེན་པོའི་སྟོབས་དང་ལྡན་པས། མངའ་འབངས་ལོངས་སྤྱོད་ཀྱི་འབྱོར་པ་ལྷུན་གྱིས་གྲུབ་པ། སྦྱིན་པ་ལ་དགའ་བ། ཐེག་པ་ཆེན་པོའི་རིགས་ཅན། ཡོན་གནས་དམ་པ་རྣམ་ལ་སྲི་ཞུ་ལེགས་པར་འགྲུབ་པ་ཞིག་འབྱུང་བར་མཁྱེན་ཏེ། ཆོས་ཀྱི་རྗེ་གཙང་པ་རྒྱ་རས་ཀྱི་སྐུ་འབག་ཡིད་བཞིན་གྱི་ནོར་བུ་བཞུགས་པའི་ལྷ་ཁང་ནས་གཟུང་སྟེ་སྟེང་ཤོད་ཀྱི་ལྷ་ཁང་མགོན་ཁང་རྣམས་སུ་ཕྱག་ཕྱིར་ཁྲིད་ནས་ཁྱེད་རང་གང་འདོད་པའི་སྨོན་ལམ་ཐོབ་ཅིག་གསུང་། བདག་སྐྱེ་བ་འདི་རང་ནས་མངའ་འབངས་དང་ལོངས་སྤྱོད་ཀྱི་འབྱོར་བ་རྣམ་ཐོས་ཀྱི་བུ་བཞིན་དུ་གྱུར་ནས། སྐྱེས་བུ་ཆེན་པོ་ཡོན་གནས་དམ་པ་རྣམས་རྙེད་པ་དང་། བཀུར་སྟི་དང་། མཁོ་བའི་ཡོ་བྱད་ཀུན་གྱིས་བསྙེན་པར་གྱུ་ཅིག །ཐེག་པ་ཆེན་པོའི་ཆོས་ལ་ཡང་དག་པར་དགའ་བས་དམ་པའི་བདེ་བ་བླ་ན་མེད་པ་ཐོབ་པར་གྱུར་ཅིག །ཅེས་བརྗོད། རྗེ་དུས་གསུམ་གཟིགས་པས་དེ་བཞིན་དུ་འགྲུབ་བར་གྱུར་ཅིག་གསུང་པའི་མཐུ། རྟེན་ཅིང་འབྲེལ་བར་འབྱུང་བ་བསླུ་བ་མེད་པའི་འདེན་པའི་བྱིན་རླབས་ཀྱིས་ཤབ་སྒོ་ལྔ་རྩེ་གསུམ་གྱི་ཐོག་ནས་འབངས་མི་ཁྱིམ་ཁྲི་ཕྲག་ཏུ་ཉེ་བ་ལ་དབང་སྒྱུར་བ། 
4-93
མི་ནོར་ལོངས་སྤྱོད་ལྷུན་གྱིས་གྲུབ་པ་འདི་བྱུང་བ་ཡིན་ཞེས་དང་། ཐམས་ཅད་མཁྱེན་པ་ཆེན་པོ་ཡུལ་ཕྱོགས་འདིར་ཕེབས་བའི་ལོ་གཉིས་པ་ནས་ཀྱང་། ནོར་དང་འབྲུའི་བང་མཛོད་ཐམས་ཅད་འཕྱུར་པོར་གྱུར་ཏོ་ཞེས་ཐོས་སོ། །དེ་ནས་ཤེལ་དཀར་དུ་སྤྱན་དྲངས། སྐྱེས་བུ་ཆེན་པོའི་སྐུ་འཁོར་དབུ་ཆེ་དགེ་འདུན་དང་བཅས་པའི་ཟླ་བ་གཅིག་གི་འཚོ་བའི་ཡོ་བྱད་མ་ཚང་བ་མེད་པ་སྦྱར། བསོད་ནམས་ཀྱི་འབྱོར་པ་སྤེལ་བའི་སླད་དུ་དངོས་སྤྱད་སྤུས་གཙང་གི་བརྒྱ་འབུལ་ཆེན་པོའང་མཛད། ལོ་ཆེན་སྤྲུལ་སྐུ་རིན་པོ་ཆེ་འཕྲིན་ལས་དབང་ཕྱུག་ཕེབས། ཨུ་རྒྱན་བསྙེན་བསྒྲུབ་དང་། བྱང་ནས་རྗེ་བཙུན་སྐུ་བགྲེས་པ་ཡེ་ཤེས་ཆོས་སྒྲོན་དཔོན་གཡོག་ལ་རྟེན་འབྲེལ་ངེས་པ་ཅན་གྱི་ཁྲིད་སྩལ། གཞན་སྦྱིན་བདག་མི་དམངས་དང་བཅས་པར་བདེ་མཆོག་གི་བཀའ་དབང་དང་། སྤྱི་ཆོས་རྒྱས་པ་ལྟར་ཆགས་སུ་མཛད། རྔོག་ནས་ཆོས་རྗེ་མངོན་མཁྱེན་པ་དང་། མཚོ་སྒོ་ནས་དགེ་སློང་དོན་ཡོད་གྲགས་པ་སོགས་སྒར་པའི་གྲྭ་བགྲེས་རྣམས་ལ། སྒེར་ཆོས་མཁའ་འགྲོ་སྙན་རྒྱུད་དང་། ངམ་རྫོང་སྙན་རྒྱུད་ཚུགས། དེ་པའི་ཁྲོད་ནས་དྲུང་རམ་པ་གྲགས་པ་ཆོས་འཕེལ་པར་གངས་ཏི་སེའི་རྡོར་འཛིན་གྱི་བསྐོ་འཇྭ། བེར་ཐུལ་ཇ་གོས་དར་རྟ་དྲེའུ་སོགས་རྒྱས་པ་སྩལ། འགྲོ་མགོན་རི་པ་དང་བཅས་རྫོང་དར་གནང་། རི་ཐེབས་རྗེས་མ་དེ་གདན་ས་ནས་ཞུས་ཤིག་གསུང་ངོ་། །
4-94
ནེ་རིང་གྲུབ་ཆེན་ཕེབས། འབུལ་བ་ནི་མཁོ་མི་མཁོ་ཐམས་ཅད་འདུག །འབངས་ལ་སྦྱིན་བདག་དད་པ་ཅན་མང་པོ་ཡོད་དེ་པ་ལ་སྟེར་རྒྱུའི་བྱིན་རླབས་རྟེན་དགོས་ཞུ་བར། བྱང་དབེན་པའི་རི་བོའི་སྒོམ་ཆེན་པ། །ཚེ་བློས་བཏང་གི་སྒྲུབ་ཚུགས་མི་ལ་དང་། །ནོར་ཟང་ཟིང་གི་འབུལ་སྐྱེལ་རྒོད་ཚང་པ། །ཆོས་ཕྱག་ཆེན་ལས་མི་གཡོ་དྭགས་པོ་བཞིན། །མི་ཁོ་བོའི་གློ་ཁ་རྫོགས་པར་མཆིས། །བླ་མ་དང་རང་སེམས་མི་ཕྱེད་པས། །བྱིན་རླབས་ཀྱི་རྟེན་རྫས་གསོག་མི་འཚལ། །འཕྲལ་གདུལ་བྱའི་ངོ་འཛིན་ལ་དགོས་པ། །ཉིད་རང་གི་གོས་སེར་གཤོགས་ལ་སྤྲོད། །ཁོང་དད་པ་ཅན་གྱི་སྐྱེ་བོ་འགའ། །མོས་གུས་ཀྱི་གསོལ་འདེབས་རེམས་པ་ལ། །འདྲ་འདྲ་མིན་པའི་བྱིན་རླབས་འཇུག །དེ་ཨེ་བདེན་ཉམས་སུ་བླངས་པས་ཤེས། །འཕྲལ་བསླད་སློང་གི་སུན་ཁ་མ་བྱེད་གསུངས། །བྱ་རྒོད་གཤོངས་པ་དཔོན་སློབ་དང་། གྲྭ་ཚང་ཆེན་མོ་པ་བྱིན་མཇལ་དུ་བྱུང་། དགེ་འདུན་སོ་སོར་མང་འགྱེད་དང་། ཆོས་འབྲེལ་སྩལ། འབེལ་གཏམ་ཤིན་ཏུ་སྨར། རྒྱལ་བའི་དབང་པོ་ཉིད་ཀྱི་གསུང་རབ་ལ་ངེས་པ་དོན་གྱི་གྲུབ་མཐའི་གནད་ཆེ་བ་མང་པོ་བཞུགས་པ་དགེ་བའི་བཤེས་གཉེན་འགའ་ཞིག་གི་ཐུགས་ལ་མི་ཤོང་བའང་འདུག་ཅེས་རོག་ཚོ་ནས་ཀྱིས་ཞུས་པར་འདི་གསུངས། རྒྱལ་བ་རྣམས་ལ་མ་དག་མི་སྣང་ལ། །མ་དག་སྤངས་པའི་གནསསྐབས་མི་སྲིད་པའི། །
4-95
འགལ་བའི་ཁུར་ཆེན་མཁས་རློམ་རྣམས་ཀྱིས་ཁུར།།འདི་ལས་སྙིང་རྗེའི་ཡུལ་གཞན་ག་ལ་ཡོད། །གཤིས་ལ་གྲུབ་ན་སྤངས་པས་མི་འཕོངས་ལ། །གློ་བུར་ཡིན་ན་ཕྱི་ལོགས་དུས་མེད་པས། །ཀུན་རྫོབ་ཡོད་སྨྲའི་ང་རྒྱལ་ཅན་རྣམས་ལ། །འཁྲུལ་པའི་གཞི་གཅིག་གང་ནས་བློ་ལ་སྐྱེས། །ཞེས་གསུངས་སོ། །ཁྲོ་ཕུར་ཕེབས། ལོ་ཙ་བ་ཆེན་པོ་བྱམས་པ་དཔལ་གྱི་ཕྱག་རྗེས་ལ་བསྔགས་པ་ཆེན་པོ་མཛད། དེ་ནུབ་མཚན་ལྟས་འོད་གསལ་གྱི་མདངས་ལས་སྔགས་བཙུན་བནྡྷེ་ཆེན་པོ་ཞིག་གིས་ཕྱེ་སྒྲོ་བ་གང་ཁུར་ནས་སྒར་པ་རྣམས་ལ་བསྙེན་བཀུར་བྱེད་པ་ཡིན་ཞུ་བས། སྒར་པ་མང་བས་འདིས་ཅང་ཁྱེད་དམ་དགོངས་པ་ན། སྒར་པ་བྱིན་གྲལ་ལ་འཁོད་པ་ལ་དེས་ཕྱེ་ཐུར་མགོ་རེ་བཀྱེ་སོང་། གནས་བདག་དེའི་གཞི་ལེན་དུ་འདུག །དེའི་རྟེན་འབྲེལ་གྱིས་སྒར་པའི་ཕོགས་འབད་མེད་དུ་བྱུང་། བྱམས་ཆེན་གྱི་ཕྱག་མཛུབ་ལ་སྐྱོན་ཅུང་ཟད་འདུག་པ་གསོ་བ་གནང་། ཞལ་གསེར་བཏུལ་མ་མགུར་ཞོ་སུམ་ཅུ་རྩ་དྲུག་དང་། དབུ་མཐིང་བཏུལ་མ་གྲེ་དགུ་གསོལ། རྟེན་བཞེངས་ཟེར་ན་བློ་ཁ་རྫོགས་པ་འདི་ལྟ་བུ་ཞིག་འདོད་དེ། ད་རེས་ལ་མི་འགྲུབ་པ་འདུག་གསུང་། རྒྱ་ཆེན་སྤྱོད་པ་བའི་ལུགས་ཀྱི་སེམས་བསྐྱེད་གསུངས། ལྷ་མོ་བཅོ་ལྔའི་བརྡ་དབང་གནང་། སྔགས་གྲྭའི་ཁྲོད་ནས་དགེ་བའི་བཤེས་གཉེན་ཚུལ་ཁྲིམས་རྒྱ་མཚོ། བླ་མའི་འོས་སུ་གཟིགས་ཏེ་ལ་སྟོད་ལྷོོ་ཤྲཱི་རི་བསམ་གླིང་གི་མཁན་པོར་བཀོད་པ་གནང་། 
4-96
འབོགས་དང་གནང་སྦྱིན་བཟང་པོ་སྩལ། འདི་ཉིད་ཀྱིས་ཤྲཱིར་རི་སྔགས་གྲྭ་ཞིག་ཀྱང་བཙུགས། བསྟན་པ་ལ་ལྷག་པར་ཕན་པ་བྱུང་ངོ་། །སྡེ་པ་དམག་དཔོན་པའི་སྲས་ཀྱིས་འབུལ་བ་བཟང་པོ་དང་བཅས་མཇལ་དུ་བྱོན། བཀྲ་ཤིས་ཁྱུང་རྩེ་བ་མཇལ་དུ་བྱུང་འབུལ་བ་གཏོས་ཆེ་བ་འདུག །དེ་གཉིས་ལ་ཚེ་དབང་གནང་། སླར་ལྷུན་རྩེར་ཕེབས། ཉེ་འཁོར་གྱི་དགེ་འདུན་གྱི་སྡེ་བཅུ་ཙམ་གྱི་མཁན་སློབ་དང་། ཁྱད་པར་པཎ་ཆེན་རིན་པོ་ཆེ་བསོད་ནམས་རྒྱལ་མཚན། གངས་ཅན་མཁན་པོ་དགེ་བའི་བཤེས་གཉེན་ཆེན་པོ་བསོད་ནམས་རྩེ་མོ་སོགས་ཕེབས། ཕྱག་ཆེན་ཆོས་དྲུག །ཇོ་བོའི་ཆོས་ཆུང་བརྒྱ་རྩ། རྒྱ་གར་གསང་སྤྱོད་ལ་སོགས་པ་སོ་སོའི་ཐུགས་ལ་འཕྲོད་པ་དམ་པའི་ཆོས་ཀྱི་དགའ་སྟོན་ཆེན་པོ་རྩལ་པས་དུས་འདས་སོ། །དགེ་འདུན་བྱིན་ལ་མང་འགྱེད་ཆོས་འབྲེལ་གནང་། ངམ་རིང་མཁན་ཆེན་རིན་པོ་ཆེ་འབུམ་རབ་འབྱམས་པ་ཀུན་དགའ་རྒྱལ་མཚན་གྱིས་འབུལ་བ་ཇ་ཞུས། ཞུ་འཕྲིན་རྒྱས་པ་དང་བཅས་འདུག །ས་སྐྱ་ནས་བདག་ཆེན་རིན་པོ་ཆེ་རྒྱན་དྲུང་གིས་ཇ་ཞུས་རྒྱས་པ་དང་བཅས་པའི་བཞེད་དོན་འདུག་པ། དགོངས་པ་ཇི་ལྟ་བ་དང་། སླར་ཞུ་ལན་ཇ་ཞུས། དགེ་འདུན་སྤྱི་སར་མང་འགྱེད་དང་བཅས་རྡོ་རྗེ་འཛིན་པ་ཆེན་པོ་དཔོན་སློབ་རྫོང་གདར་གནང་། སྡེ་པ་ཞལ་ངོ་། དྲུང་སྐོར་དང་བཅས་པར་སྒྲོལ་དཀར་དང་། 
4-97
མི་གཡོ་བ་དཀར་པོ། རྣམ་རྒྱལ་རྣམས་ཀྱི་རྗེས་གནང་སྩལ། བཀྲ་ཤིས་ཁུད་ཚུན་ཐགས་སྐྱེལ་ལ་དཔོན་གཡོག་མང་པོས་ཕེབས། དེར་ཞལ་དཀར་གསོལ་ཇས་གང་བ་སོགས་གནང་སྦྱིན་རྒྱས་པར་མཛད། ལོ་གསུམ་ན་སླེབ་འོང་གསུང་བའི་བཀའ་བཞེས་གནང་སྲད་རྒྱུད་པའི་དགོན་པ་དགའ་ལྡན་ཕོ་བྲང་དུ་ཕེབས། མང་འགྱེད་རྒྱས་པ་སྩལ། ལྷ་ཆེན་པོ་ཟངས་རའི་ཞོལ་ཤར་རི་སྒྲུབ་སྡེ་པ་དཔོན་སློབ་ཀྱིས་སྤྱན་དྲངས། རྙེད་བཀུར་བསམ་གྱིས་མི་ཁྱབ་པ་དང་། བླ་མ་སྒྲུབ་ཆེན་པས་འབུལ་ཆེན་ལན་གསུམ་མཛད། གུར་མེ་འབྲོག་པ་རྣམས་ཀྱིས། རྟ་ཁྲོ་ཟངས་འབྲི་གནག་གི་བརྒྱ་འབུལ་ཡང་དེར་བྱུང་། དེ་ནས་འབྲི་མཚམས་པ་རི་སྤྱིལ་དཀར་བའི་དབོན་བརྒྱུད་རྣམས་ཀྱིས་སྤྱན་འདྲེན་སླེབ། ཕེབས་ལམ་ཆིབས་ཐོག་ནས་གཟིགས་པའི་ལྷོ་ངོས་ཀྱི་གངས་རི་ཆེན་པོ་ཞིག་གི་རྩེ་ནས། སྤྲིན་ཁ་དོག་ལྔ་པ་འཇའ་ལྟ་བུ་རྩེ་མོ་དབུ་ཐོག་གི་ཐད་ཀྱི་བར་སྣང་དུ་སླེབ་པ་ངོ་མཚར་བ་ཞིག་བྱུང་། མཛོད་ལྔ་སྟག་རྩེ་ཟེར་འདི་ངེས་ལྷོ་འབྲས་མོ་ལྗོངས་ཡིན་ཞེས་ཉེ་འཁོར་གྱི་མི་འགའ་ཞིག་གིས་སྙན་དུ་གསོལ་བ་ན། དེ་མ་ཐག་ཕྱོགས་དེ་ནས་སྒྲ་ཆེན་པོ་ཞིག་ཀྱང་བསྒྲགས། བཀའ་ལས། རིག་འཛིན་དཔའ་བོ་མཁའ་འགྲོ་རྣམས་ཀྱིས་སློབ་དཔོན་པདྨའི་བུ་འདི་ངོ་ཤེས་པར་འདུག །སྔར་གནས་སྒོ་འབྱེད་པའི་དོ་གལ་ཆེན་པོ་མཛད་པ་རྣམས་ཀྱི་དཀའ་ལས་ལ་བསམས་ན། 
4-98
ཁོ་བོས་གནས་སྒོ་ཕྱི་ན་འོང་ཚོད་དུ་འདུག་ཅེས་སྐུ་རྩེད་ཀྱི་ཚུལ་དུ་གསུང་ངོ་། ། ལུང་རོལ་དུ་པ་རིའི་འབུལ་བ་ཞབས་འདེགས་རྒྱས་པ་འདུག །གད་རི་ལུང་ལྷ་ཁང་དུ་ཞག་བཞུགས། དེར་འདུས་དང་ཞལ་སྔ་ནས་ཀུན་སྤངས་པ་ལ་བཀའ་འབྲལ་རྒྱས་པ་སྩལ། བཞན་མཁེ་འཕྲང་དང་། ཐང་སྤེར་ཞགས་གནང་། ཀུན་གྱིས་འབུལ་བ་ཚད་མེད་པ་བྱས། གཙང་བྲག་དགོན་པར་མཇལ་བ་པོ་མང་དུ་བྱུང་། དེ་ནས་གནས་རྙིང་དུ་ཕེབས། རྗེ་བྲག་ཐོག་པའི་བརྒྱ་འབུལ་བཞེས། ཕར་ཡང་གནང་སྦྱིན་བཟང་པོ་མཛད། གནས་རྙིང་གཞུང་ནས་པཎ་ཆེན་ནི་པོ་ཆེས། རྟེན་ལི་མ་སོགས་སྣངས་ཆེན་མང་དུ་ཕུལ། རྒྱལ་རྩེ་ཀླུ་ཁང་དུ་ཕེབས། ཆོས་ཀྱི་རྒྱལ་པོ་རྒྱལ་མཁར་རྩེ་ནས་བདག་ཆེན་ཞལ་ངོ་སྤྱི་སྒེར་གྱིས་འབུལ་བ་ཚད་མེད་པ་འདུག །ཕར་ཡང་སྐྱེས་ལན་བཟང་པོ་མཛད། ཆོས་སྡེ་ཆེན་པོའི་མཁན་ཆེན་འཕགས་པ་རིན་པོ་ཆེ་མཇལ་དུ་ཕེབས་བྱུང་བར། ཕྱག་ལན་སོགས་སྔ་མ་བྱུང་ཀྱི་མཐོང་བཀུར་གནང་། རྒྱལ་བྱེད་ཚལ་དུ་ཕེབས་པར་ཕྱོགས། འབྲོང་རྩེ་བ་དཔོན་བློན་གྱི་གདན་འདྲེན་སྤེལ་སེར་དུ་འབྱོར། ཞག་ཉི་ཤུ་སྐོར་བཞུགས། དེ་བར་གྱི་ཞབས་ཏོག་དང་འབུལ་ཆེན་སྡེ་པ་དང་བློན་ཆེན་ཚེ་བཀྲས་གཉིས་ཀྱིས་མཛད། ཡོལ་མོ་སྤྲུལ་སྐུ་ནམཁའ་བརྒྱ་བྱིན་ཆེད་གཏད་ཀྱིས་མཇལ་བར་ཕེབས། གསུང་ཆོས་ལྷག་པར་སྨར། ཉིན་ལྟར་བཞིན། 
4-99
བསམ་འགྲུབ་རྩེ་དང་། པ་སྣམ། འབྲོང་རྩེ་མངའ་ཞབས་ཀྱི་མཇལ་མི་ཆེ་ཕྲན་གྱི་ཁྲོམ་ཆེན་པོ་འདུས། ཟང་ཟིང་གི་འབུལ་བ་གཏོས་ཆེ། བཀའ་ལས་ངེད་དང་པོ་གཙང་ཕྱོགས་ལ་སྡོད་དུས་ས་དགེ་ལྡན་གྱི་དགེ་བཤེས་རི་བཙུགས་པ་འདྲ་བ་མང་པོ་ཡོད་པ་ཡིན་ཏེ། ད་བར་ལ་སྲབ་ཆམ་སོང་འདུག་བསྟན་པ་ཉམས་དམའ་བའི་རྟགས་སུ་འདུག་གསུང་ངོ་། །ཁྱུང་རྩེ་ནས་སྡེ་པ་ཆོས་མཛད་པ་ལྕམ་སྲིང་གིས་སྒར་པར་ཕོགས་དང་། ནས་ཀྱི་བརྒྱ་འབུལ། གཞན་ཡང་ནས་འབུལ་བ་མང་དུ་བྱུང་བ་རྣམས་གྲྭ་ཚང་གཉིས་ལ་གནང་། མངའ་རིས་གུང་ཐང་གི་རྒྱལ་པོའི་ཞུ་འཕྲིན་གསོལ་བ་འདེབས་པའི་སྐུ་འདྲ་དར་བྱིན་རླབས་རྟེན་དགོས་གསུང་པ་བཞིན་སྩལ། དེ་དུས་སྡེ་པ་ཀུན་སྤངས་དྲུང་གིས་པ་སྣམ་ཤར་པའི་ཤུལ་ནས་ཁལ་ཉིས་སྟོང་གི་ས་མཆོད་གཞིས་སུ་ཕུལ། ཕར་སྐྱེས་བཟང་པོ་སྩལ། རྒྱལ་བྱེད་ཚལ་སྔགས་གྲྭ་ལ་སྦྱོར་བ་གནང་། ཐོབ་རྒྱལ་ནས་ཀྱིས་ནུབ་མདའ་ཨི་ནག་ལྷུན་པོའི་ས་ཁལ་བརྒྱ་དང་བཅུའི་མཆོད་གཞིས་ཕུལ། གནང་སྦྱིན་བཟང་དུ་མཛད། རྒྱལ་བྱེད་ཚལ་མདོ་གྲྭ་བ་རྣམས་ལ་སྦྱོར་བ་གནང་། ཤངས་རྒྱ་མཚོ་བས་ནས་ཁལ་བརྒྱ་དང་བརྒྱད་ཅུའི་ས་ཕུལ་བའང་གྲྭ་ཚང་གཉིས་ལ་གནང་། འབྲོང་རྩེར་ཞག་ཤས་བཞུགས། དེ་ནས་བློ་བདེ་དང་། གདན་ས་ཆེན་པོ་ར་ལུང་རྣམས་སུ་ཞག་བཅག་མལ་ཙམ་ནས། 
4-100
ཆོས་རྫོང་དུ་མཁན་པོ་དགེ་བའི་བཤེས་གཉེན་བསྟན་པ་རབ་འཕེལ་བས་སྤྱན་དྲངས། འབུལ་ཆེན་དང་ཞབས་ཏོག་རྒྱས་པ་བྱུང་། འབྲོག་ཆེན་པ་སོགས་མི་དམངས་ཐམས་ཅད་ཀྱིས་འབུལ་བ་བསམ་གྱིས་མི་ཁྱབ་པ་བྱས། སྟག་ལུང་གཞིས་ཀར། སྒར་སྟོན་རྒྱས་པ་འབུལ་བ་དང་བཅས་འདུག །ཁྲི་དཔོན་ཞལ་ངོ་ལ་བཀའ་དབང་སོགས་ཀྱིས་ཐུགས་བཞེད་བསྐང་། རྒྱལ་བྱེད་ཚལ་སྔགས་གྲྭ་དཔོན་སློབ་གཙོ་བོར་གྱུར་པ་ལ། བདེ་མཆོག་གི་རྒྱུད་བཤད་བུ་སྟོན་རིན་པོ་ཆེའི་ཊཱིཀ་ཆེན་གྱི་སྟེང་ནས་རྒྱས་པ་དང་། ཉིད་ཀྱི་སྤྱི་དོན་སོགས་ཀྱི་སྟེང་ནས་འཕྲུལ་འཁོར་གྱི་ཕྱག་ལེན། སྔགས་བཏུའི་བྱིན་རླབས་དང་བཅས་པ་སྩལ། རིའུ་བྲག་ཏུ་ཞག་ཤས་བཞུགས། བ་ཆོས་ཐང་དུ་བཞུགས་སྒར་བཅས། ཤིང་རྩ་བ་སོགས་འབྲོག་གི་དགོན་བཙུན་སྒྲུབ་པ་པོ་ཐམས་ཅད་འདུས། རྒྱལ་དབང་བཀའ་འབུམ་དང་། ཡང་དགོན་པའི་རི་ཆོས་སྐོར་གསུམ་སོགས་ཟབ་ཁྲིད་མང་པོ་གནང་། ཚོང་འདུས་འབྲོག་པས་བརྒྱ་འབུལ། ཁྲོ་ཟངས་རྟ་འབྲི་གནག་གཏོས་ཆེ་བ་ཕུལ། ཞགས་པ་དེའུར་ཞག་གཉིས་བཞུགས། དགོན་བཙན་གྱི་འབུལ་ཆེན་བཞེས། གསུང་གི་བདུད་རྩིས་ཚིམ་པར་མཛད། ལྷོ་བྲག་སྨན་ཐང་དུ་ཁྲོམ་དབང་གནང་། ཁོང་རྣམས་ཀྱིས་བརྒྱ་འབུལ་བྱས། སེང་གེ་རྫོང་དུ་ཞག་བདུན་བཞུགས། འབུལ་བ་གཏོས་ཆེ། ཁྲར་ཕེབས། ཞལ་ངོ་རྣམས་ལ་བཀའ་དབང་སྩལ། དེ་ནས་མཁར་ཆུར་སྐུ་མཚམས་ཞག་འགའ་གནང་བ་གྲོལ་ནས། 
4-101
ཅོག་གྲྭ་དཔོན་སློབ་དང་། ལྷ་ཁང་བའི་བརྒྱ་འབུལ་བཞེས། དཔལ་སྡིངས་རབ་འབྱམས་པ་ཤཱཀྱ་རྒྱལ་མཚན། རྒྱལ་བྱེད་ཚལ་མདོ་གྲྭའི་སློབ་དཔོན་དུ་བཀོད་པ་གནང་། ཁོང་དཔོན་སློབ་ལ་སྡོམ་གསུམ་འགྲེལ་ཆེན་གྱི་སོ་ཐར་ལ་བཤད་པ་རྒྱས་པ་གནང་། གཞན་གཉིས་ལུང་དུ་སྩལ། སྒོ་ཚུར་གཞིས་ཀར་མེ་རག་མདོ་པའི་འབུལ་ཆེན་གྲུབ་ནས། ཁྲར་སྡེ་པ་མགོན་པོའི་ལྡད་ཀྱི་གྲལ་དབུར་ཕེབས། དེ་ནས་སྡང་དུ་སྡེ་པ་ཆོས་རྗེས་ཞབས་ནས་བཏེག །དེ་ནས་རིམ་པས་གུང་རྒྱལ་དུ་ཞག་བཅུ་བཞུགས། ཞབས་ཏོག་མཁོས་སུ་ཕེབས། ཡུག་རྫོང་དུ་ཞག་ཤས་བཞུགས། དེ་ཐམས་ཅད་དུ་འབུལ་བ་གཏོས་ཆེ། བཀའ་དབང་རྗེས་གནང་སོགས་སོ་སོའི་འདོད་པ་ལྟར་སྩལ། བཀྲ་ཤིས་ཆོས་གླིང་པ་རྣམས་ཀྱི་འབུལ་བ་བཞེས་པ་དང་། ཆོས་འབྲེལ་སྩལ་བ་སོགས་ནས། ལྷུན་པོ་རྫོང་དུ་ཕེབས། དེར་འབྲོག་སྨད་ཀྱི་དགོན་ཆེ་ཕྲན་ཕལ་ཆེར་འདུས། ཆོས་སྦྱིན་སྩལ། དེ་སྐབས་སྐྱིད་ཤོད་ནས་གདན་འདྲེན་མི་སྣ་སླེབ། བྲག་མདའ་བཙན་ཡུལ་དང་། རྟ་ར་མདོར་ཞག་བཞུགས་འཕོག །ཁྱིམ་བདག་རྣམས་ཀྱི་བསོད་ནམས་གོང་དུ་སྤེལ། གཞིས་ཀར་ཞབས་དྲུང་སྐུ་གཞོན་པ་གནས་ཐེགས་ཀྱི་དགོངས་རྫོགས་གདུང་ཆོག་གི་གཙོ་བོར་ཞག་ཉི་ཤུ་རྩ་གཅིག་བཞུགས། གདུང་ལ་ཁྲུས་ཆོག་དབང་བསྐུར། ནང་རྟེན་གསེར་ཐང་རྣམས་ཀྱི་རབ་གནས་གནང་། མགོན་པོ་ཕྱག་བཞི་པའི་སྐུ་འདྲ་རྒྱ་ནག་མ་སོགས་འབུལ་འགྱེད་བཟང་པོ་འདུག །
4-102
ཡོངས་སུ་བསྔོ་བས་རྒྱས་འདེབས་པར་མཛད་དོ། །མངའ་རིས་རྫོང་དགའ་ནས་གསོལ་བ་འདེབས་པའི་རྟེན། ཉིད་ཀྱི་སྐུའི་སྣང་བརྙན་འདྲ་འབག་དང་དབུ་ལོ་ཕྱག་སེན་སོགས་དགོས་ཞེས་པའི་ཞུ་འཕྲིན་གསེར་གྱི་མེ་ཏོག་དང་བཅས་འབྱོར། ར་བ་སྨད་པ་བྱིན་ལ་མི་གཡོ་བ་དང་། འཇམ་དཀར་གྱི་རྗེས་གནང་སྩལ། སྤྱི་རྫས་ཚོགས་ཁྲོ་སོགས་གནང་ངོ་། །བོང་བུ་སྟེ་ལྕགས་མོ་ཡོས་ལོ་གསར་མཚམས། ལྷ་སར་ཕེབས་པ་ཤར། ཡར་ལམ་སྙེ་ཐང་བཀྲ་ཤིས་དཔལ་སྒང་དུ་ཤུན་ཞབས་དྲུང་རིན་པོ་ཆེ་དང་མཇལ། ཚེ་དབང་རྗེས་གནང་འགའ་ཞིག་འབུལ་བ་གནང་། ཤུན་གདོང་མཁར་དུ། ཞབས་དྲུང་གདུང་རྒྱུད་རིན་པོ་ཆེ་ལ། དབང་རྗེས་གནང་སོགས་བཀའ་འབྲེལ་སྩལ། འབྲས་སྤུངས་སྤྱི་གཟིམས་ཁང་ནས་དན་འབག་མདོར། གུར་ཕྱར་ཐེར་ཡོལ་བའི་བཀོད་པས་ཁྱད་པར་དུ་མཛེས་པ་དང་བཅས་ཆིབས་བཤོལ་ཇ་ཞུས་ལ། དགའ་ལྡན་ཕོ་བྲང་ནས་ནང་སོ་ཆོས་མཛད་པ་དང་། ཕྱག་མཛོད་སེང་གེ། བློ་གསལ་གླིང་ནས་སློབ་དཔོན་པ། སྤྱི་ཆོས་ཁྲིམས་རྣམས་བྱོན། སྒེར་གཞུང་སོ་སོ་ནས་འབུལ་བ་གཞི་ལེན་བསྔགས་པར་འོས་པ་འདུག །ལྷ་སར་ཇོ་བོ་རིན་པོ་ཆེ་རྣམ་གཉིས་ཀྱི་དྲུང་དུ། དཀར་མེ་མར་ཁལ་གསུམ་སྟོང་ཙམ་དང་། ཇོ་བོ་རིན་པོ་ཆེའི་སྐུ་ཡོངས་རྫོགས་ལ་གསེར་ཆབ། གཞན་ཀུན་ལ་ཞལ་གསེར། དཀོན་གཉེར་རྣམས་ལ་གསེར་སྟོན་རྒྱས་པ་མཛད། 
4-103
འབྲས་སྤུངས་སྤྱི་སོར་མང་ཇ་ཤལ་དམར་པོས་གཙོས་པའི་འགྱེད། དགའ་ལྡན་ཕོ་བྲང་གི་རྟེན་བཞེངས་ཐོག་ཏུ་ཟངས་ཁལ་བཞི་བཅུ། སེ་རར་མང་ཇ། བསྲུང་ཁྲས་གཙོས་པའི་སྤྱི་འབྱེད་གནང་། བཀའ་ལས། ངེད་ཐུགས་རྗེ་ཆེན་པོ་བཅུ་གཅིག་ཞལ་རྒྱལ་པོ་ལུགས་ཀྱི་སྐུ་གང་ན་བཞུགས་ཀྱང་ཆེད་གཏད་ཀྱིས་མཇལ། ལྷག་པར་མོས་པ་ཞིག་ཡིན་ཏེ། དེ་རེས་ལན་གཅིག་ཙམ་ལས་མཇལ་འདོད་པ་ཞིག་མ་བྱུང་། ཞལ་གསེར་ཞུ་བར་རྫོང་དགར་ནས་འགྲོ་མགོན་པ་བཏང་། ངེད་རང་གིས་ཇོ་བོ་རིན་པོ་ཆེའི་ཞལ་གསེར་སྤྱན་དབྱེ་སོགས་ལག་བདར་ཁོ་ན་བྱས་གསུང་ངོ་། །ཆོས་རྗེ་སྐུ་སྐྱེ་ཐུགས་རྗེ་དཔལ་འབྱོར་ལ་བླ་མ་ཞང་གི་ཆོས་སྐོར་འདི་རྒྱུན་ཕྲ་བར་འདུག་པས་ཁྱོད་ཀྱིས་དོ་གལ་ཆེན་པོ་གྱིས། ཕུགས་སུ་ཕན་པའང་སྲིད་ཅེས་གདམས། དེ་ནས་ཆལ་དུ་ཕེབས་སྐབས་ས་སྐྱོང་བའི་དབང་པོ་བྱང་རྒྱུད་རྒྱལ་པོ་གཡུལ་ལས་རྣམ་པར་རྒྱལ་བ་རྟ་པ་དང་རྐང་ཐང་གི་འཁོར་དུ་མ་དང་བཅས་པས་སྐུའི་མདུན་བསུས། དེ་ཉིད་དང་དགེ་བའི་བཤེས་གཉེན་ཆེན་པོ་ཞལ་སྔ་ནས་ཤར་རྩེ་བ་ཡོན་མཆོད་ལ་ཚེ་དབང་བརྒྱ་རྩ་དང་། རྗེས་གནང་ཉེར་གཉིས་པ་སོགས་སྩལ། ཚལ་དབུས་གླིང་དང་། ཡང་དགོན་སྤྱན་སྔ་ནས་ཀྱིས་སྤྱན་དྲངས། གུས་པས་ཞབས་ཀྱི་པདྨོ་ལ་གཏུགས་པ། གསུང་གི་བདུད་རྩིས་ཚིམ་པར་མཛད། གུང་ཐང་གི་གནས་མཇལ་ལ་ཕེབས། 
4-104
དེར་ས་གཡོ་བ་དང་མེ་ཏོག་གི་ཆར་བབས། ཆོས་རྗེ་རྒྱ་རས་བསྙེན་པར་རྫོགས་ས་ཡིན་པའི་རྟེན་འབྲེལ་དུ་འདུག་གསུང་། ཞང་རིན་པོ་ཆེ་ལ་བསྟོད་པ་སྙན་ངག་གིས་བརྒྱན་པ་ཞིག་མཛད་། གློ་བོ་ཁང་གསར་དུ་གསུང་གི་བདུད་རྩི་སྩལ། དེ་ནས་ཡེར་པ་ལྷ་རི་སྙིང་པོར། ས་སྐྱོང་བའི་དབང་མོ་དད་པ་དང་བསོད་ནམས་ཀྱི་བྱིན་མི་ཟད་པ་དང་ལྡན་པས་རྒྱལ་བའི་བསྟན་པ་ལ་མཆོག་ཏུ་གུས་པ་སྟག་ལུང་དབོན་མོས་སྤྱན་དྲངས། བླ་མ་ཞང་རིན་པོ་ཆེའི་གདམས་ངག་བཀའ་རྒྱས་རྣམས་གསུངས། དེ་དུས་འཕན་ཡུལ་གཞུག་སྣ་པར་ཞལ་གདམས་འདི་གསུངས་སོ། ། སྟོབས་ལྡན་ལྷ་དབང་གི་བརྒྱ་བྱིན། །འཆི་བདག་བདུད་པོ་ཡིས་གཙེས་ཚེ། །སྐྱབས་གནས་སངས་རྒྱས་ལ་ཞུས་ནས། །བསོད་ནམས་ཚོགས་བསགས་ཀྱིས་བཟློག་འདུག །ད་ལྟ་བདེ་སྐྱིད་དུ་འཛོམ་རུང་། །མི་རྟག་འཇིགས་པ་འདྲ་འོང་ངེས། །ལོང་ཡོད་ལྷ་ཆོས་ཀྱི་སྙིང་པོ། །ཚོགས་གཉིས་རྫོགས་ཐབས་ལ་འབོད་ཅིག །ཅེས་སོ། ། དེ་ནས་འབྲོག་རི་བོ་དགའ་ལྡན་རྣམ་པར་རྒྱལ་བར་ཕེབས། དགེ་འདུན་རྣམས་ལ་མང་ཇ་གསེར་འགྱེད་སྩལ། དགེ་འདུན་ཀུན་གྱིས་གུས་པ་གཞན་དང་མི་འདྲ་བ་མཛད་ཅིང་ཞབས་ལ་གཞུགས། དེ་དུས་ཁྲི་ཐོག་ན་ཞལ་སྔ་དམ་ཆོས་དཔལ་འབར་བ་བཞུགས། ཁྲི་ཐོག་ཟུར་བཞུགས་པ་རྒྱལ་ཁང་རྩེ་པས་གཞི་ལེན་པའི་གཙོ་བོ་རྟེན་བཤད་ཐམས་ཅད་མཛད་འཕྲོད་ལྷག་པར་མཐུན། 
4-105
འབེལ་གཏམ་ཤིན་ཏུ་སྨར། གཞི་ལེན་རྒྱས་པ་བྱུང་། ཞལ་སྔ་ཤར་རྩེ་ནས་ཀྱིས་བསྐུལ་ཏེ་རྗེ་བཙུན་ཙོང་ཀ་པ་ཆེན་པོར་བསྟོད་པ་སྙན་ངག་གི་རྒྱན་དང་འབྲེལ་པ་ཞིག་ཀྱང་མཛད། བརྒྱ་མ་ཁྲི་དཔོན་གྱིས་གདན་དྲངས། དེར་ཟླ་བ་ལྷག་ཙམ་བཞུགས། ཁྲི་དཔོན་འཇིགས་བྱེད་རྒྱལ་པོ་ལ་དབང་རྗེས་གནང་དང་། ལྷན་ཅིག་སྐྱེས་སྦྱོར་གྱི་ཁྲིད་བསྐྱངས། ཞབས་འབྲིང་པ་རགས་རིམ་ལ་གསུང་ངག་རོ་སྙོམས་ཆེན་མོ་ཚུགས། དེ་དུས་འབྲི་ཁུང་ནས་ཞབས་དྲུང་རིན་པོ་ཆེས་དཔོན་བཀྲ་ཤིས་དཔལ་ཇ་ཞུས་ལ་གནང་བ་འབྱོར། དད་འདུས་བྱིན་ལ་སྤྱི་ཆོས་ལྟར་ཆགས་སུ་མཛད་དེ། བྱི་རུ་སྟག་རྩེ་དང་། དགའ་མོ་གྲོང་པས་སྤྱན་དྲངས། དཀར་པོ་སྒུར་དུ་ཞག་འགའ་བཞུགས། ཁྲོམ་དབང་ཉིན་བཞིན་གནང་། ཡུ་ཐང་དུ་ཡོན་བདག་རྣམས་ཀྱིས་ཞབས་ནས་བཏེག །ཇ་གོས་དར་མང་དུ་ཕུལ། འདོད་ཆོས་ཀྱིས་ཚིམ་པ་མཛད། འཕན་ཡུལ་གླང་ཐང་གི་སྤྱན་སྔ་བ་དེ་གོང་ནས་ཞལ་སློབ་ཏུ་གྱུར་པ་དེ་བཞུགས་པས། ཞག་བཅོ་ལྔའི་སྒར་ཕོགས་ཕུལ། གླང་ཐང་འདུ་ཁང་དུ་དགེ་འདུན་གཙོ་བོར་གྱུར་པ་ལ་འཁོར་ལོ་སྡོམ་པའི་དབང་བཞི་རྫོགས་གནང་། དེ་དུས་རྡོ་རྗེའི་སློབ་དཔོན་ཆེན་པོ་ཉིད་འཁོར་ལོས་བསྒྱུར་བའི་ཆ་ལུགས་དང་ལྡན་པས་དེ་ཀུན་ལ་ཡེ་ཤེས་བབས། མཁར་རྩེར་སྐོར་ཅིག་ཕེབས། ལར་དེ་རེས་འཕན་ཡུལ་སྟོད་སྨད་ཐམས་ཅད་ཞབས་ཀྱིས་བཅགས། 
4-106
ཁྱིམ་བདག་འབྱོར་པ་དང་ལྡན་པ་རྣམས་ཀྱིས་སོ་སོའི་གནས་སུ་སྤྱན་དྲངས། ཟང་ཟིང་གི་འབུལ་བ་གཏོས་ཆེ། གསུང་གི་བདུད་རྩི་མྱང་བ་ལ་ཧབ་ཤ་བྱས་སོ། །གསུམ་འཕྲང་དུ་སྤྱན་དྲངས། ཞག་གསུམ་བཞུགས། དེ་དུས་སྟག་ལུང་དབོན་རིན་པོ་ཆེ་དང་། གྲ་ནང་གླིང་གསུམ་གྱིས་གདན་འདྲེན་བྱུང་། གླིང་པས་སེར་སྦྲེང་རྒྱས་པ་འདུག །སྒར་སྟོན་བཟབས་མ་དང་། སྤྱི་སྒེར་གྱིས་འབུལ་བ་ཚད་མེད་པ་བྱས། གླིང་པ་རྣམས་ལ་བདེ་མཆོག་གི་དབང་བཞི་རྫོགས་ཆོས་འབྱུང་བསྟན་པའི་པདྨོ་རྒྱས་པའི་ཉིན་བྱེད། བསྲེ་འཕོ་ནཱ་རོ་ཆོས་དྲུག་ཏུ་བསྒྲིལ་བ་སོགས་ཟབ་པ་དང་རྒྱ་ཆེ་བའི་གསུང་གིས་ཚིམ་པར་མཛད། གླིང་ལ་ཇ་འགྱེད་སོགས་སྩལ། དབོན་རིན་པོ་ཆེ་ཁྲི་ཐོག་པ་འབྲུམ་པའི་ཐུགས་འཛེམ་གྱིས་སེ་ལེར་སྐུ་མཚམས་དམ་པའི་སར་དཔོན་སློབ་ཉུང་བསྡུས་གདན་འདྲེན་བྱུང་བས་ཐེགས། མཇལ་ཕྲད་ལེགས་ཚོགས་ཆེ་བ་བྱུང་། ཚུར་འབུལ་བ་དགུ་ཚན་བཅུ་གསུམ་མཛད། ཕར་ཡང་སྐྱེས་བཟང་པོ་སྩལ། གནས་དེའི་བྲག་གི་ལོགས་ལ་ཆོས་འབྱུང་ཁ་དོག་དམར་སེར་གསལ་བ་ཞིག་སྔ་ནས་འདུག །ཐམས་ཅད་མཁྱེན་པ་ཆེན་པོས་དེའི་ནང་དུ་རྡོ་རྗེ་ཕག་མོའི་སྐུ་ལྷག་པར་གསལ་བར་གཟིགས། དེ་ཕྱིན་ནས་ཀུན་གྱི་དབང་པོའི་སྤྱོད་ཡུལ་དུ་གྱུར་ཏོ། ། དེ་སྐབས་འབྲོམ་སྟོན་རྒྱལ་བའི་འབྱུང་གནས་ཀྱི་སྒྲུབ་གནས་རྭ་སྦྲེང་གཟིགས་སུ་ཕེབས། ཇོ་བོ་འཇམ་པའི་རྡོ་རྗེ་ལ་སོགས་རྟེན་གསུམ་རྣམས་ལ་གསེར་ཆབ། 
4-107
ན་བཟའ། སྙན་དར། དགེ་འདུན་ལ་མང་ཇ་སྤྱི་འགྱེད་དང་བཅས་པ་གནང་། ཞག་གཉིས་བཞུགས། གནས་ཆེན་དེ་ལ་བསྔགས་པ་ཆེན་པོ་གནང་གི་འདུག་གོ །ཕོད་མདོར་བརྒྱ་འབུལ་གྱི་རྩིས་ཙམ་བྱུང་། ཕར་ཡང་སྐྱེས་བཟང་པོ་སྩལ། སྨད་ཧོར་དཔོན་གཡོག་འགའ་མཇལ་དུ་བྱུང་། འབུལ་བ་རྒྱས་པར་བྱས་པ་ལ་ཞལ་གདམས་འདི་གསུངས། སེམས་དཀར་པོ་དགེ་དང་མ་བྲལ་ན། །ལས་བྱས་ཚད་ཆོས་སུ་འགྲོ་ངེས་ཡིན། །ཚེ་ཕྱི་མ་མཐོ་རིས་རྟེན་བཟང་འཐོབ། །རྒྱུ་འབྲས་བསླུ་མེད་མཐོང་བ་ཡིས། །ཚོགས་ཅི་བསགས་བྱང་ཆུབ་ཆེན་པོར་བསྔོས། །རྣམ་མཁྱེན་གྱི་གོ་འཕང་བཅར་ངེས་ཡིན། །དེ་ཐམས་ཅད་དགེ་བའི་བཤེས་ལ་རག །སངས་རྒྱས་དངོས་སོམས་གསོལ་བ་ཐོབ། །ཅེས་གསུངས་སོ། །སོག་པོ་ཐོག་ཤས་ལ་སྐྱབས་འགྲོའི་སྡོམ་པ་གནང་། སོག་ཡུལ་ནས་རྒྱལ་པོ་སུ་མི་ཐལ་ཇིས། བོད་ཀྱི་བླ་མ་བཟང་བཟང་ཀུན་ལ་འབུལ་སྐྱེལ་དུ་བརྫངས་པ་སོག་པོ་བླ་མ་ཞེས་པས་མུ་ཏིག །དངུལ་ཇ་གོས་དར་རྔ་མོང་སོགས་ཕུལ། ཏྲག་ར་མོར་བླ་མ་གྲུབ་ཆེན་དང་། དབོན་པོ་དགེ་སློང་པས་ཞབས་ནས་བཏེག །རྙེད་བཀུར་བཟང་དུ་བྱས། ཉན་པོར་གྲྭ་ཚང་སོ་སོ་སྦྱིན་བདག་དང་བཅས་པས་བརྒྱ་འབུལ། གྲོང་མཁར་ནང་སོས་གདན་དྲངས། དེར་འདོད་ཆོས་དང་། དཔལ་གནས་སུ་བཀའ་དབང་། ལྷུན་གྲུབ་སྡིངས་དང་། བྲག་བར། སྡེ་པ་གྲུབ་རྒྱལ་བའི་ས་རྣམས་སུ་ཕེབས། 
4-108
དེ་དག་ཏུ་འབུལ་བ་ཞབས་འདེགས་གྱ་ནོམ་པ་ནས་ཆོས་སྦྱིན་སྩལ། མདུན་གྲོང་དུ་ན་ལེནྡའི་སྤྱན་སྔ་ནས་ཀྱི་ཇ་ཞུས། བཀའ་འབུམ་རིན་པོ་ཆེའི་དཔེ་འཐེབ་འཁྲོལ་གར་ཡོད་དགོས་ཞུ་བ་དང་། དོགས་གཅོད་གྱི་ཞུ་འཕྲིན་བྱུང་། ལན་འདེབས་ལེགས་པར་མཛད། སྐར་མ་གླིང་པ་གྲྭ་རིགས་ཀྱི་བརྒྱ་འབུལ་བཞེས། སླར་གླང་ཐང་དུ་ཕེབས་སྐབས། སྐྱིད་ཤོད་ནས་སྲས་ཡུམ་དང་། ལྷ་ས་དཀོན་གཉེར་དཔོན་པོའི་ཞུ་འཕྲིན་དུ། ཁ་སང་ཟླ་བ་སྔ་མའི་ཉེར་དགུའི་ནུབ། ཇོ་བོ་བཅུ་གཅིག་ཞལ་སྐུ་མདུན་དུ་གུག་པའི། ཉེ་འཁོར་གྱི་བརྟག་པ་མཁན་དང་། མོ་ཕྱྭ་བཞིན་བྱས་པར། དུས་ཀྱི་སྟོབས་ཁོ་ནའི་སྐྱོན་ཡིན། དཀར་ཕྱོགས་ཀྱི་རིམ་འགྲོ་ལ་འབད་པ་དང་གསོལ་བ་འདེབས་པ་ལས་གཞན་ཐབས་མ་མཆིས་ཟེར་བས། ཐམས་ཅད་མཁྱེན་པ་ཆེན་པོ་ཉིད་ཀྱིས་ཐུགས་དམ་བརྟག་པ་གནང་བའི་ཅི་འགབ་ཀྱི་བཀའ་གསལ་ཞུ་ཟེར་བ་བྱུང་། མི་སྣ་ལ་དྲི་རྩད་ཞིབ་ཏུ་གནང་བས། མངོན་ཚན་ཆེ་བ་དེ་ཁ་སང་པར་བྱུང་བར་འདུག། །གཞན་རིམ་པས་དགུར་དུ་སོང་ནས་ལོ་ཤས་སོང་། དེ་རིང་སང་ལྕགས་ཁྲའི་བར་ནས་བལྟ་བ་ཙམ་ལས་མཇལ་ཁ་བྱིན་རླབས་ཞུ་བར་འགྲོ་ས་ནི་མི་འདུག །ལ་ལ་ནི་ཞབས་གོམ་སྤོས་པ་འདྲ་ཟེར། ལ་ལ་སྐུ་སྟོད་འཚིགས་པ་འདྲ་ཡང་ཟེར། སྙན་ཤལ་དང་ཤངས་སོགས་ལ་རེག་ན་བྱེ་འདམ་ལ་རེག་པ་ལྟ་བུར་བོལ་འགྲོ་བ་ཞིག་འདུག་ཟེར་ཞུ་བས། 
4-109
དེ་འདྲ་འོང་དོན་མེད། དེ་ཡིན་ན་གསོ་བའང་དཀའ་པོ་ཡོང་། ཕལ་ཆེར་སྐུ་དང་རྒྱབ་ཡོལ་གྱི་བར་ལ་ཚོ་འཛིན་ཡོད་པ་ཆུད་ཟོས་པ་ཡིན། བརྟག་པ་བྱེད་མི་དགོས་ངེད་སླེབ་དང་བསྟུན་ནས་བརྟགས་གཞིགས་འཇུག་པས། དེ་བར་མཇལ་ཁ་མ་གནང་ཞུས་ཤིག་གསུང་ངོ་། །བྲག་པར་ཆོས་མཛད་ཀྱིས། འདི་ཕྱོགས་ལ་སྒྲ་སློབ་འདོད་འགའ་ཤས་འདུག་པ་ཞབས་ཕྱིར་འགྲོ་མ་ཐུབ། སློབ་དཔོན་ཞིག་གནང་དགོས་ཞུ་བས། ལོ་ཙ་བ་བསོད་ནམས་རྒྱ་མཚོ་འཇོག་པ་གནང་། དེ་ནས་སྒོ་ལ་བརྒྱུད། ལྷ་སར་ཕེབས། བཞུགས་ཡུལ་དགའ་ལྡན་ཁང་གསར་དུ་མཛད། ཞག་བཅུ་ཙམ་བཞུགས། ཞབས་ཏོག་དཔངས་བསྟོད་ཕུན་སུམ་ཚོགས་པ་འདུག །ལྷ་ས་དཀོན་གཉེར་དཔོན་དེ་དུས་བསྙེན་རྫོགས་པ་ཞིག་སྣང་བས། ཁོང་ལ་ཁྱེད་རང་བཅུ་གཅིག་ཞལ་གྱི་སྐུ་རྒྱན་གསར་ཕུལ་དང་། ན་བཟའ་སྙན་དར་ཐམས་ཅད་རེ་ཞིག་བསྡུས་མཛོད། ངེད་མཆོད་ཡོན་གཟིགས་རྟོགས་ལ་ཕེབས་ཡོང་གསུང་། དེ་ནས་མཆོད་ཡོན་ལྷན་དུ་གཙུག་ལག་ཁང་བཅུ་གཅིག་ཞལ་གྱི་ལྷ་ཁང་དུ་ཕེབས། སྔ་སོར་ཆུད་ཟོས་ཅི་འདྲ་བྱུང་འདུག་ཐུགས་རྟོག་ལེགས་པར་འཇུག་པ་ཞུ། ངེད་ཀྱིས་ཡོ་སྲོང་དུས་ཆུད་ཟོས་བྱུང་ཟེར་བའི་ཅལ་སྒྲོགས་བྱུང་ན་མི་རུང་། དཔོན་གཡོག་ཐམས་ཅད་ཀྱིས་གཟིགས་རྟོག་མཛོད་ཅེས་ཕེབས། དེ་ནས་དཔོན་ས་ཡུམ་སྲས་ཕྱག་གཡོག་བྱིན་དང་བཅས་པས་ལྕགས་ཁྲའི་ཕྱི་ནས་མཆོད་པ་འབུལ་བ་དང་། 
4-110
སྨོན་ལམ་འདེབས་པར་མཛད་ཀྱི་འདུག །ཞབས་ཕྱིར་ས་སྐྱོང་བའི་དབང་པོ་གཡུལ་ལས་རྣམ་པར་རྒྱལ་བ་དང་། དཀོན་གཉེར་དཔོན། སྨན་ཐང་ནས་སོགས་ཡོད། དེའི་ཚེ་སྐྱེས་བུ་ཆེན་པོ་ཉིད་ཀྱི་ཕྱག་དང་དབུ་དཔྲལ་འཕགས་པའི་ཐུགས་ཀར་འདུད་པར་མཛད་མ་ཐག་ས་གཡོ་བ་ལྟ་བུར་སྐུ་འདྲ་ཁྱོམ་ཁྱོམ་པའི་ངང་ནས་ཡོ་བ་འཕྲོངས། སྔར་དང་ཐོག་ཇི་ལྟ་བ་ལས་ཅུང་ཟད་མདུན་དུ་དགུར་ཙམ་མོ། །ད་འདི་ཙམ་འགབ་གསུང་། ཆོས་ཀྱི་རྒྱལ་པོ་སྲོང་བཙན་དུ་ངེས་ནས་ཐམས་ཅད་དད་ཅིང་གུས་པར་གྱུར། ཕྱིས་མི་དམངས་ཀྱིས་བྱིན་རླབས་ཞུ་མི་མཁས་ཀྱིས་ཡོན་མི་རུང་བས་ཟངས་ལྗང་གི་སྐུ་རགས་ཕུལ། སྐུ་མདུན་གྱི་ཁྲ་མ་འདི་མཐོ་བ་ཞིག་བཟོས་གསུང་བའི་ཞལ་བཀོད་གནང་། བཀའ་བཞིན་བགྱིས་སོ། །སྙན་ཤལ་ལ་རེག་ཏུ་མི་བཏུབ་པ་བྱེ་འདམ་འདྲ་བར་འདུག་ཞུ་བ། རིམ་པས་བྱང་བ་རྣམས་ལ། བར་ཞིག་སྤོས་འདག་གིས་གསོས་པར་འདུག །གཞན་སྲ་མཁྲེགས་རང་དུ་འདུག་གོ །དེ་ཉིན་སྟེང་གི་ནམཁའ་ལ་འཇའི་གུར་དང་། མེ་ཏོག་གི་ཆར་བབས་པ་ཕལ་ཆེར་གྱིས་མཐོང་། དཔོན་སློབ་རགས་རིམ་ཁྱིམ་བདག་ཞིག་གིས་རྒོངས་ཇལ་སྤྱན་དྲངས། དེར་དགེ་བའི་བཤེས་གཉེན་རིག་སྔགས་འཆང་ཆེན་པོ་དཀྱིལ་ཁང་རབ་འབྱམས་པས། ཉི་མི་དེ་རིང་བོད་གངས་ཅན་གྱི་བདེ་སྐྱིད་འབྱུང་བའི་ས་བོན་ཆུད་མ་ཟོས་ལྟད་མོ་འདི་འདྲའི་ཆེ་བ་ལ་ཨོགས་ཞེས་མཆི་མ་བཏང་བས་ཕལ་ཆེར་གྱིས་གཡས་རླུང་གི་མཐོང་བྱས་རྒོད་འདུག་སྟེ། 
4-111
བདེན་ནི་ཁོང་བདེན་པར་འདུག །དེ་ནུབ་མཚན་ལམ་ན་ལྷ་སའི་ཕྱོགས་བཞིར་མཐོ་ཆེན་པོ་རེ་བརྩིགས། རྒྱལ་ཆེན་བཞིར་མངར་གསོལ་ཏེ། རྒྱལ་ཆེན་མཐོ་འཛུགས་བྱས་པ་རྨིས་གསུང་ངོ་། །སེར་འབྲས་ཀྱི་གནས་བརྟན་བགྲེས་པོ་དག་སྣང་ཆེ་བ་འགའ་ཞིག་བྱོན། རང་རང་གི་འབུལ་བ་བརྡ་མཚོན་པར་འདུག །ངེད་ལྷ་སར་མི་ཚེ་བསྒྲིལ་ནས་བསྡད་པ་བས། ཐུགས་རྒྱུས་ཁྱེད་རང་ཆེ་བར་འདུག ། ཐམས་ཅད་མཁྱེན་པ་ཉིད་ཀྱིས་མ་མཛད་ན། གཞན་བྱེད་ནུས་པ་དང་། ཤེས་པ་ནི་མི་ཡོང་། དཀར་ཕྱོགས་ཀྱི་དགེ་བ་ལ་འབད་ནས་གསོལ་བ་བཏབ་ཀྱང་འཕྲལ་རང་དུ་སྐུ་འཕྲོངས་པའང་དཀའ། ད་ལམ་འདི་ཕྱོགས་ལ་ཕེབས་པ་བོད་སྤྱིའི་བསོད་ནམས་དང་། འཕགས་པའི་ཐུགས་རྗེར་འདུག་ཞུའོ། །དཀོན་གཉེར་དཔོན་པས་སྒེར་འབུལ་རྒྱས་པ་མཛད། རྗེ་ཐུགས་རྗེ་ཅན། སྐུ་དྲིན་ཅན། ད་མི་རྒན་ལ་ཞལ་གདམས་ཤིག་གནང་དགོས་ཞུ་བར། རྒྱལ་བ་རྣམས་ཀྱི་ཐུགས་རྗེའི་འཕྲུལ་ཆེན་པོ། །ངོ་མཚར་ཀུན་ཏུ་སྣང་བའི་གཞལ་མེད་ཁང་། །ཇོ་བོ་རྣམ་གཉིས་རྟག་པར་བསྙན་པ་འདི། །བསོད་ནམས་དམ་པའི་དམ་པ་ཡིན་སྙམ་མཛོད། །སྡིག་པ་ཆེ་ཡང་བཤགས་པས་མི་འདག་མེད། །དེས་ན་སྔར་བྱས་ཐམས་ཅད་སྟོབས་བཞིས་བཤོགས། །ཕྱིན་ཆད་སྲོག་ལ་བབ་ནའང་མི་འགྱིད་པ། །དྲན་པས་དབང་པོ་བསྡམས་ན་འགྲུབ་པ་ཡིན། དགེ་བ་ཆུ་ཡང་ཡོངས་སུ་བསྔོ་བས་འཕེལ། །བྱང་ཆུབ་བར་དུ་འབྲས་འབྱིན་སྟོབས་ཆེར་འགྲོ། །
4-112
དེས་ན་ཅི་བྱས་རང་དོན་མ་ཡིན་པར། །སེམས་ཅན་ཀུན་ལ་སྟེར་བ་ཐབས་མཁས་མཆོག །དགེ་སྡིག་བསམ་པའི་རྩ་བ་ལ་རག་པས། །བྱེད་པ་ཆོས་སུ་ཨེ་འགྲོ་འགྲོ་ན་བྱ། །མི་འགྲོ་དུག་ཅན་ཟས་བཞིན་འདོར་བའི་ཕྱིར། །ཤེས་བཞིན་བྱ་ར་རྟག་ཏུ་འཛུགས་བར་བྱ། །མདོར་ན་སྡིག་སྤོང་དགེ་བ་བསྒྲུབ་པ་དང་། །རང་སེམས་འདུལ་བར་སྡེ་སྣོད་གསུམ་འདུས་པས། །ཉམས་སུ་ལེན་པར་སྙིང་པོར་བསྒྲིལ་ཤེས་མཛོད། །ཐོས་དང་ཚིག་རྗེས་དཔྱད་པའི་བསམ་པ་དང་། །འཇིག་རྟེན་སྒོམ་པ་ཀུན་གྱི་སྙིང་པོའི་དོན། །རྟོགས་དཀའ་རྟོགས་བྱེད་དད་པ་ཁོ་ན་བར། །མདོ་རྒྱུད་ཀུན་ལས་གསུངས་ཕྱིར་བཤེས་གཉེན་སྟེན། །བླ་མས་སྨྲས་པ་གང་གི་སྙིང་ཞུགས་པ། །ལག་པའི་མཐིལ་ན་གནས་པའི་གཏེར་མཐོང་བཞིན། །འགྱུར་མེད་བསླུ་བ་མེད་པའི་ཚིགས་ལགས་པས། །ཡང་དག་དོན་ལ་མཉམ་པར་འཇོག་པ་གཅེས། ཞེས་གསུངས་སོ། །དེ་ཙ་ན་ཁམས་འགྲུལ་པ་གཏོས་ཆེ་བ་སྔ་ཕྱིར་སླེབ་པས། ཉིན་ལྟར་གྱིས་གོས་དར། ཁྱད་པར་བཀྲ་ཤིས་ཁ་བརྟགས་ཀྱི་འབུལ་བ་བསྡུས་པས་ཟིན་ཚད་བྱུང་། ག་ཛ་མུ་ཏིག་མང་པོ་ཕྱག་ཏུ་འབྱོར། ལྷ་སའི་ཆུ་རག་སྟོད་སྨད་ཐམས་ཅད་ལ་ཕྱག་ནས་འཐོར། ཞལ་ངོ་སྒེར་གཞུང་ནས་འབུལ་བ་བཟང་པོ་མཛད། སྟོད་ལུང་ཡངས་པ་ཅན་ནས་སྡེ་པ་ནམ་རིན་པས་ཇ་ཞུས་ལ་བཅོ་ལྔ་དཔོན་པོ་རྫོང་དར་མཛད་འདུག་པ་འབྱོར། 
4-113
སྙེ་ཐང་འོར་གྱི་གཙུག་ལག་ཁང་དུ་ཞག་བཞུགས་འཕོག །འགག་གྲོང་དུ་ཕེབས། འབྲུག་གི་བྱང་ཆུབ་ཆེན་པོར་ན་བཟའ་སྙན་དར་སོགས་འབུལ་མི་གནང་། ཆུ་ཤུལ་ལྷུན་པོ་རྩེར་ཞག་ལྔ་བཞུགས། སྡེ་པ་ཨ་བར་དྲུང་གིས་གཙོས་པའི་ཞལ་ངོ་རྣམས་ལ་ཚེ་དབང་བརྒྱ་རྩ། ཚེ་རིང་མཆེད་ལྔའི་རྗེས་གནང་སོགས་སྩལ། སྡེ་པ་དཔལ་བཟང་པའི་གདན་འདྲེན་བྱུང་། སྨྱུག་ལར་ཟླ་བ་གཅིག་ལྷག་པ་བཞུགས། དེར་འཁོར་ལོ་སྡོམ་པའི་དབང་དང་། འཇམ་དཔལ་ཚེ་བདག་གི་མགྱོགས་དབང་། ཕྱག་རྒྱ་ཆེན་པོ་ལྷན་ཅིག་སྐྱེས་སྦྱོར་སོགས་སྩལ། འབུལ་ཆེན་རྒྱས་པ་དང་། རྡོར་སྤུག་ནས་མཆོད་གཞིས་བོགས་ཁལ་བཞི་བརྒྱ་ཙམ་ཕུལ། གྲུབ་བའི་དབང་ཕྱུག་འཁྲུལ་ཞིག་ཀུན་དགའ་ལེགས་པའི་སྐུ་སྐྱེ་སྡེ་པ་གྲུབ་ཐོབ་རིན་པོ་ཆེ་ཞབས་ཕྱིར་བཅར་བཞུགས་མཛད། དབང་ཁྲིད་གདམས་པ་མཐའ་དག་གནང་། སྲིད་ཀྱི་བདག་རྐྱེན་ར་ལུང་གི་ཞལ་ངོ་སྐུ་གཞོན་པ་དང་མཉམ་མོ། །ཁྱམས་སྟོད་ཆོས་མཛད་ཅོག་གྲྭ་རྙིང་པའི་སློབ་དཔོན་དུ་བཀོད་པ་གནང་། གཞན་སྤྱི་ཆོས་དང་སྒེར་ཆོས་མང་དུ་གསུངས། དེ་དུས་སྡེ་པ་སྙེ་མོ་བ་མཇལ་དུ་བྱུང་། དབང་དང་གདམས་པ་སྩལ། ཞལ་གདམས་འདི་གསུངསོ། །ངོ་མཚར་མ་ལུས་འཁྲིལ་བའི་གོང་བུ་གང་། །སྣང་བར་བྱེད་པས་ཉི་མ་ལས་འགོངས་ཤིང་། །སྤྱད་ཀྱིན་རེ་བ་ཀུན་འགྲུབ་ནོར་བུས་ཀྱང་། །མི་མཚོན་ཕྱག་འོས་འཇམ་དཔལ་དེ་ལ་འདུད། །
4-114
མ་རིག་མ་རྟོགས་ཁོང་འཚངས་རྣམ་འགྱུར་ལས། །རིགས་ལྡན་རིགས་མི་འོང་རྣམས་འདུལ་བ་ལ། །ཐུབ་དབང་མ་ལུས་གཟིགས་ངེས་གསུང་རབ་ཀྱང་། །རྣམ་མང་གསུངས་ཕྱིར་ཐེག་ཀུན་དགོངས་པ་ཅན། །དེ་ཕྱིར་གང་ཡང་རྒྱ་མཚོའི་རྒྱ་ལྟ་བུར། །ཡངས་པའི་བློ་གྲོས་ཁོག་ཏུ་བཅུག་ནས་ཀྱང་། །སྲི་ཞུར་མཛད་ན་དད་པ་ཅན་ཞེས་བྱ། །མི་རྒྱལ་མཛད་སྤྱོད་ཆོས་སུ་དེས་འགྲོ་ངེས། །བོད་འདིའི་མཁས་པ་མང་ཡང་ཚིག་རེའི་རྗེས། །བསྙེགས་པས་སྙིང་པོའི་ཕྱོགས་ལ་མཇལ་མི་སྤྲོ། །བྱང་ཆུབ་སྙིང་པོའི་སྤོ་ལ་སྔར་བྱུང་བཞིན། །དཔའ་བོར་གྱུར་འདོད་དོན་གྱི་སྙིང་པོ་ལོན། །དལ་བ་རྙེད་དཀའ་རྙེད་ནས་མྱུར་འཇིག་དང་། །འདུས་བྱས་སྐད་ཅིག་མི་གནས་ཁར་ཆུབ་ཀྱང་། །ཟང་ཟིང་རྙེད་པའི་དྲུང་དུ་དེ་ཡར་ནས། །རྩེ་རུམ་རྩོད་པ་ལྷུར་ལེན་འདིས་སྐྱོ་ན། །ལས་བགྱིས་འབྲས་བུ་གང་འབྱིན་དེ་བསམས་ལ། །མི་འདོད་ངན་སོང་འགྲོ་བ་རྣམས་འགགས་ཏེ། །མཐོ་རིས་རྣམ་ཐར་རྒྱུར་གཟུང་རྟེན་དེ་ཡིས། །ཐར་པའི་ས་ལ་འཛིག་ཏུ་ཅིས་མི་འབྱོན། །རྣམ་གྲོལ་ཐོབ་པར་འདོད་ཙམ་མ་ལགས་པར། །སྨོན་འཇུག་བྱང་ཆུབ་སེམས་ལ་བློ་སྦྱངས་ལ། །རྡོ་རྗེ་ཐེག་ཐབས་གསེར་འགྱུར་རྩིས་བྲན་པས། །རྫོགས་པའི་བྱང་ཆུབ་མྱུར་དུ་ཐོབ་པར་ངེས། །ཞེས་སོ། །རྒྱལ་པོའི་ཁབ་ཕོ་བྲང་ཆེན་པོ་གོང་དཀར་དུ་ཕེབས། དེ་རེས་ཟླ་བ་གཉིས་ལྷག་ཙམ་བཞུགས། ཆོས་ཀྱི་རྒྱལ་པོ་ཁུ་དབོན། 
4-115
བདག་སོགས་སྒར་གཞུང་གི་དོན་གཉེར་བ་མང་པོ་དང་བཅས་པར། མཁའ་འགྲོ་སྙན་རྒྱུད་དབང་ཁྲིད་གདམས་པ་མཐའ་དག་རྫོགས་པར་སྩལ། མགོན་པོའི་རྗེས་གནང་མགོན་མངས་ཀྱི་འདིས་ཐུས། གཞན་ལྷག་མ་མེད་དོ་གསུང་། མགོན་པོ་དངོས་གྲུབ་འབྱུང་བའི་དཀྱིལ་འཁོར་ཆེན་པོ་ཞལ་ཕྱེ། ཞག་མང་པོའི་བར་དུ་བསྒྲུབ་ཅིང་མཆོད་དེ། ཐོག་མར་ཆོས་ཀྱི་རྒྱལ་པོ་སྡེ་སྲིད་རིན་པོ་ཆེ་ཁུ་དབོན། འཁོར་ནང་བློན་འདུན་བཅུ་དང་ལྷན་ཅིག་དཀྱིལ་འཁོར་ཆེན་པོར་བཅུག །དབང་བཞི་ཡོངས་སུ་རྫོགས་པ། མཐའ་བརྟེན་རྗེས་གནང་དྲེགས་པའི་སྲོག་དབང་དང་བཅས་པ་སྩལ། བཀྲ་ཤིས་པའི་དགེ་མཚན་དུ་མ་དང་བྱིན་མཚུངས་པ་མེད་པའི་དངོས་གྲུབ་ཐོབ། དེ་ནས་ཐུགས་རྩོམ་གྲྭ་ཚང་སོགས་དགེ་འདུན། དེ་ནས་སྦྱིན་བདག་མི་དམངས་འགའ་ཤས་རྣམས་ལ་སྩལ། དབང་བཀའ་ཡོངས་རྫོགས་ཚར་གསུམ་མཛད། དེ་དུས་ས་སྐྱ་ནས་བདག་ཆེན་རིན་པོ་ཆེ་ཁྲིའི་དྲུང་གིས་ཇ་ཞུས་རྒྱས་པ་གནང་བའི་ལན་འབུལ་བར་ཕྱག་མཛོད་པ་དཔོན་གཡོག་རྫོང་གདར་གནང་། ཕྱག་རྡོར་སྟོད་འགྲེལ། རྡོ་རྗེ་སྙིང་འགྲེལ། མགོན་པོ་དངོས་གྲུབ་འབྱུང་བའི་རྒྱུད་ཀྱི་རྣམ་བཤད་རྡོ་རྗེ་སྙིང་པོ་རྣམས་ལ་བཤད་པ། རྗེ་བཙུན་མར་པའི་ཤོག་དྲིལ་བཅོ་ལྔ་པ་དང་། གུ་རུ་དྲག་པོ་ཉང་ལུགས་ཀྱི་དབང་ལུང་ཡོངས་རྫོགས་སོགས་ཟབ་པ་དང་རྒྱ་ཆེ་བའི་གདམས་པ་བསམ་གྱིས་མི་ཁྱབ་པ་གསུངས། 
4-116
ཞབས་དྲུང་རྗེ་བཙུན་མ་དང་། ཞབས་དྲུང་བདག་མོ་ལ་ཚེ་དབང་བརྒྱ་རྩ། སྒྲོལ་དཀར་གྱི་རྗེས་གནང་སོགས་སྩལ། ཆོས་སྡེ་རྡོ་རྗེ་གདན། ཕྱག་ལེན་གར་འཆམས་ཀྱི་གྲགས་ཆེ་བས། སྒྲུབ་མཆོད་དུས་རིམ་གྱི་སྐབས་མ་ཡིན་ནའང་། ཆེད་གཏད་ཀྱིས་གར་འཆམས་ཀྱི་གཟིགས་རྟོག་ལ་ཐེགས། དགེ་འདུན་སྤྱི་བོར་མང་འགྱེད་ལྷ་ཁང་མགོན་ཁང་སོ་སོར་སྙན་དར་སྤྱན་གཟིགས་རྣམས་འབུལ་བ་མཛད། གཞིས་ཀར་བཅོམ་ལྡན་འདས་མི་འཁྲུགས་པའི་རྟེན་བཞེངས་ཚུགས་པའི་རྒྱུ་རབ་གནས་གྲུབ། ཞབས་དྲུང་སྒེར་གཞུང་ནས་འབུལ་བ་དཔངས་བསྟོད་འདུག །གོང་མ་མིའི་དབང་པོ་དཔོན་གཡོག་སྲིན་པོ་རི་ཚུན་ཐེགས་སྐྱེལ་ལ་ཕེབས། དེ་ནས་ལུམ་པར་ལྕེ་བདེ་ནས་ཞལ་ངོ་སྒེར་གཞུང་སོ་སོ་ནས་གསོལ་ཕོགས་ཕུལ། ཟླ་བ་གསུམ་དང་ཞག་བཅུ་གཉིས་བཞུགས། དེར་སྤྲུལ་སྐུ་སྦྱིན་པ་རྣམ་རྒྱལ་དཔོན་སློབ་བཅུས། དུས་འཁོར་བདེ་མཆོག་སོགས་སྔགས་སྐུ་བཅུ་གཅིག་བཞེད་པར་ཆུགས། ཆོས་སྡེ་དང་། འཕྱོང་རྒྱས་ཀྱི་བྲིས་དཔེ་བཟང་པོ་ཀུན་བསྡུས། རིག་བྱེད་པ་མཁས་པ་ཕུལ་དུ་ཕྱིན་པ་དང་། ཐམས་ཅད་མཁྱེན་པ་ཆེན་པོའི་ཞལ་བཀོད་ཀྱིས་ཁྱབ་པ་སོགས། བྲིས་སྐུ་དབུས་གཙང་ཁམས་གསུམ་ན་དོ་ཟླ་མེད་པའི་ལེགས་པ་ཞིག་གྲུབ། བཟོ་བོའི་འཕྲལ་ཆས། འཛུགས་སྟོན་བར་སྟོན་དང་བཅས་པ་དབངས་བསྟོད་ལུམ་པ་ནས་མཛད། སྡེ་པ་མ་ཆེན་ཚེ་རབ་པས་དིང་ཕོན་ཚོན་རྫོགས་ཀྱི་གོང་བཤམ་ཕུལ། 
4-117
སྤྲུལ་སྐུ་ཤུག་ར་བ་སོགས་བཟོ་བོ་ལྔས་བསྒྲུབས། དེ་དུས་ཆོས་ཞུ་བ་མང་པོ་འདུས་པར། ཕྱག་ཆེན། ཆོས་དྲུག །རོ་སྙོམས་སྒང་འདྲིལ། ལམ་ཟབ་སོགས་སྩལ། འཇམ་པའི་དབྱངས་ཆོས་ཀྱི་གྲགས་པའི་སྲོག་ཞུ་འདི་དང་མཚུངས་པའི་སྐུ་རྒྱན་ཞིག་དགོས་པར་འདུག་གསུང་ཕྱག་མཛོད་ནས་ག་ཛ་མུ་ཏིག་གི་རྒྱན་དྲུག་བཞེངས། དཔོན་མོ་དྲུང་པས་མུ་ཏིག་ཞེ་མཐུན་གྱི་ཆུན་པོ་རིན་བརྒྱ་སྟོང་ཁུགས་པ་ཕུལ། གཞན་ཡང་ཞལ་ངོ་སོ་སོའི་འབྱོར་པ་ཕངས་པ་མེད་པས་ཡོན་གནས་དམ་པ་མཉེས་པར་བྱས། དེ་སྐབས་འཕྲེང་པོ་སེང་གེ་སྒང་ནས་སྤྱན་འདྲེན་བྱུང་། ཞག་འགའ་བཞུགས། སྡེ་པ་ཞལ་ངོ་རྣམས་ལ་དབང་ཆོས་སྩལ། ཞབས་ཏོག་མཁོས་སུ་ཕེབས། སྣ་ཕུ་ཆོས་ལུང་དུ་སྐོར་ཅིག་ཐེགས། གདན་ས་པ་ཆོས་རྗེ་ངག་དབང་ཕྱོགས་ལས་རྣམ་རྒྱལ་བར་ཞིག་གསོས་ཀྱི་ཐེས་དང་། བེར་ཐུལ་སོགས་སྩལ། སླར་ལུམ་པར་རྣམ་སྲས་ཀྱི་ཕོ་བྲང་རྟེན་འཛུགས་གནང་། དེ་སྐབས་ངེད་ཀྱིས་ཉིན་གཅིག་ལ། འཇིམ་པའི་སྐུ་འདྲ་ལྔ་གྲུབ་གསུང་། ཕྱག་མཛོད་པས་དིང་སང་གི་ཉིན་ལ་ལྔ་བས་གསུམ་གྲུབ་ཀྱང་སྐུ་དྲིན་བསྐྱངས་ཞུ་བས། སྐུ་རྩེད་ལ་བསྙད་པ་ཞིག་དང་བཅས་བཞི་བཞེང་པ་གནང་། ལུམ་པ་རྫོང་གི་རབ་གནས་དང་བསྟུན་བདེ་མཆོག་གི་དབང་མོ་ཆེ་མཛད། དེ་སྐབས་གསང་སྔགས་ཆོས་གླིང་དུ་བཀའ་ཤོག་སྩལ་ཏེ། ངེད་ལྷོ་རྒྱུད་དུ་སླེབ་འཕྲལ། 
4-118
མཚམས་ཤིག་བྱེད་པས་བྱ་བརྗེས་པའི་ཕུ་ནགས་ཁྲོད་དེར་གཟིམས་སྤྱིལ་འབྱོས་བདེ་བ་ཆེ་ཆུང་རན་པ་ཞིག་རྒྱོབ་གསུང་བ་གནང་། དགའ་བ་སྟེ་ཆུ་ཕོ་འབྲུག་ལོའི་ལོ་གསར་ལ་ཚོགས་འཁོར་དཔའ་བོའི་དགའ་སྟོན་བསམ་གྱིས་མི་ཁྱབ་པ་བཤམས་ཏེ་དགྱེས་པར་བྱས། ཆོས་བྲོ་མགུར་དབྱངས་མང་པོ་ཕུལ་བས། སྤྲུལ་པའི་མེ་ཏོག་བོད་ཡུལ་དབུས་ཕྱོགས་སུ་འཁྲུངས་རང་འཁྲུངས་པ། ས་དེ་ལ་རྒྱལ་པོའི་ཕོ་བྲང་བྱ་བ་ཡིན་ཞེས་པའི་ཆོས་བྲོ་གྱིས་ཤིག་གསུང་། གཞན་ཡང་དེར་བཞུགས་སྐབས། བཀའ་ལས་ངོས་དང་པོ་འཕྱོང་རྒྱས་ཚོར་རྒྱུན་རིང་པོ་བསྡད། ཕྱིས་རྟིང་དབུས་ཕྱོགས་ཀྱི་ས་གཅིག་ཏུ་བསྡད་པ་གཞིས་ཀ་དང་། འདི་གཉིས་རིང་། སླར་མགྱོགས་པར་ཡོང་བའི་རྟེན་འབྲེལ་ཡོད་ཅེས་རྣམ་རབ་ཏུ་བཀའ་བཞེས་དུས་ཚེས་གྲུབ་ནས་ཀྱང་ཞག་གཉིས་བཞུགས་སོ། །རྣམ་རབ་ནས་གདན་འདྲེན་བྱུང་། ཞག་མང་དུ་བཞུགས། སྡེ་པ་ཞལ་ངོ་རྣམས་ལ་དབང་ཆོས་སོགས་སྩལ། ཞལ་གདམས་འདི་གསུངས་སོ། །སྦྱིན་ཚུལ་བཟོད་བརྩོན་བསམ་གཏན་ལ་གནས་པ། །ཤེས་རབ་མཆོག་གིས་སྦྱངས་པ་འདི་ཁོ་ན། །ཐེག་ཆེན་ལམ་གྱི་གཞུང་ཤིང་ཡིན་པས་ན། །སྒོ་གསུམ་འདི་ལ་སྦྱར་བའི་ཉམས་ལེན་འཚལ། །ལུས་ལྷ་ངག་སྔགས་སེམས་ཀྱིས་ཏིང་འཛིན་དང་། །རྩ་སྦྱངས་རླུང་འགག་ཐིག་ལེ་གྱེན་བཟློག་པ། །རྡོ་རྗེ་ཐེག་པའི་གསང་ཚིག་ངོ་མ་ཡིན། །བགས་གྱིས་ཉམས་སུ་བཞེས་དང་འདོད་དོན་འགྲུབ། །
4-119
མཚན་ལྡན་བླ་མ་དམ་པར་གསོལ་བ་བཏབ། །མ་བཅོས་སེམས་ཀྱི་ངང་དུ་གློད་ནས་འཇོག །གང་ཤར་སོ་སོ་རང་རིག་རྒྱུ་ཆར་ལེན། །ཚེ་གཅིག་སངས་རྒྱས་བཞེད་ན་དགོས་པ་ལགས། །ཕུ་མདའི་ཁྲོམ་ཆེན་པོ་ལ་ཉིན་སྟར་བཞིན་ཆོས་སྦྱིན་མཛད། སྤྲེལ་ཞིང་དུ་རྗེ་མར་པའི་གདུང་ཁང་རིན་པོ་ཆེར་ན་བཟའ་དང་། ལྷ་མོ་ལ་གོས་མདོས་སོགས་འབུལ་བར་ཐེགས། བཀའ་ལས་དཔལ་ལྡན་ལྷ་མོ་འདི་སྔར་དང་མི་འདྲ་མི་དགྱེས་པའི་ཚུལ་ཞིག་འདུག་གསུང་། སླར་རྣམ་རབ་ཏུ་རྔོག་ནས་ཆོས་རྗེ་རབ་འབྱམས་པ་སོགས་ལ་དཔལ་ལྡན་ལྷ་མོའི་སྒྲུབ་སྐོར་ཡོངས་རྫོགས་གནང་རྩིས། གཏོར་མའི་ཐད་དུ་སྒྲ་ཞིག་བྱུང་བས་འཆད་དུ་མི་བཏུབ་པར་འདུག་གསུང་འཕྲོ་བཞག །སྐྱིད་མོ་གཤོངས་སུ་ཕེབས། སྡེ་པ་ཞལ་ངོ་ལ་ཚེ་དབང་རྗེས་གནང་རྩལ། ཞག་ལྔ་བཞུགས། མི་དམངས་ཀྱི་འདུ་ཚོགས་ཆེ། དོལ་མདར་ས་སྐྱོང་ཆོས་ཀྱི་རྒྱལ་པོ་ཡར་རྒྱབ་ཞབས་དྲུང་ཁུ་དབོན་གྱིས་གདན་དྲངས། སྣ་བོ་ལ་མཚམས། ཁུ་དབོན་རྟ་པའི་ཚོགས་དང་བཅས་བསུ་བ་ལ་ཕེབས་འདུག །དོལ་མདར་ཞག་བརྒྱད་ཙམ་བཞུགས། ཁུ་དབོན་དྲུང་ལ་འཁོར་ལོ་སྡོམ་པའི་དབང་བཞི་རྫོགས། ཚེ་དབང་རྗེས་གནང་སོགས་བཞེད་པ་ལྟར་སྩལ། ཁྲོམ་ཆེན་པོ་རྟག་པར་འདུས། ཕྱག་དབང་དང་བཀའ་འབྲེལ་གནང་། དོལ་ཆོས་རྫོང་འཕགས་སྡེའི་དགེ་འདུན་བྱིན་ལ་སྦྱོར་དྲུག་ཁྲིད་དུ་སྩལ། མཚལ་མིན་དང་། 
4-120
དུམ་བུ་གྲྭ་ཚང་སོགས་ལ་མང་འགྱེད། བླ་མ་སློབ་དཔོན་རྣམས་མཇལ་བར་བྱོན། སོ་སོར་གནང་སྦྱིན་དང་ཆོས་འབྲེལ་གནང་སྟེ། རྒྱལ་ཆེན་གླིང་དུ་ཞག་འགའི་བར་བཞུགས། ཞབས་དྲུང་ཞལ་ངོར་དབང་ཆོས། དགེ་འདུན་སྒང་གི་མཁན་པོ་དགེ་བའི་བཤེས་གཉེན་ཆེན་པོ་ཤཱཀྱ་རི་དབང་མཇལ་དུ་ཕེབས། སྔ་གོང་ནས་གསུང་ཆོས་ཀྱིས་འབྲེལ་བས་ལྷག་པར་གུས། ཕྱག་ཆེན་ཁྲིད་དམིགས་ཆོས་ཐུན་གཅིག་ལ་རྫོགས་པ་སོགས་གནང་། མི་ཆོས་ནི་མཁན་པོ་གོང་མ་རྣམས་བཞིན་ནོ། །དཔལ་རབ་ནས་དཔོན་སའི་དྲུང་ལ་ཚེ་དབང་། ཞང་བློན་གྱི་རྗེས་གནང་སོགས་སྩལ། སྒྲུབ་སྡེར་བཞུགས་རིང་སྒར་བྱིན་གྱི་གསོལ་ཕོགས་དཔལ་རབ་ནས་འབུལ་བ་གནང་ངོ་། །སྒྲུབ་སྡེ་དོན་གྲུབ་མཐོང་སྨོན་དུ་ཞག་ཉེར་གསུམ་ཙམ་བཞུགས། དེ་དུས་གཙུག་ལག་ཁང་དང་ཕྱག་གི་སྔགས་ཐང་རྣམས་ལ་རབ་གནས་རྒྱས་པར་མཛད། གཉེན་པོ་གནས་པ་སོགས་བཀའ་བློན་དང་གྲྭ་ཕྱི་ནང་གི་དཔོན་རིགས་མང་པོས་ཞབས་ནས་བཏེག །སྐྱ་སེར་མང་པོ་ལ་ཁྲོམ་ཆོས་རྒྱུན་ཆགས་སུ་གནང་། ཅོག་གྲྭ་དཔོན་སློབ་དང་། འབྲོག་དགོན་ཕལ་གྱི་བརྒྱ་འབུལ་བཞེས། འཕྱོང་རྒྱས་ཀྱི་གདན་འདྲེན་མི་སྣ་སླེབ། སྡིངས་པོ་ཆེར་ཞག་གཅིག་བཞུགས། ཁྲོམ་དབང་གནང་། སྤྱི་གཟིམས་ཁང་གིས་གོས་སྣམ་ལ་བརྟེན་པའི་འབུལ་བ་དང་། བྲག་རྩ་དང་། རྫ་ཆུ་བ་སོགས་ཀྱི་འབུལ་བའང་དེར་སླེབ། རྫོང་དུ་ཆིབས་བཤོལ་སར། ཁྲོམ་ཆེན་པོ་ཚོགས་ཐམས་ཅད་ཕྱག་དབང་ཞུ་བར་ཐོང་། 
4-121
ད་ལམ་འབྲེལ་པ་གང་ཐོགས་བྱེད་གསུང་ངོ་། །སྤྱན་གཡས་མཁན་པོ་བ། སྤྱི་སའི་འབུལ་ཆས་དང་བཅས་མཇལ་མི་མང་ངོ་། །དེར་ཟ་ཧོར་གྱི་རྒྱལ་པོ་གཙུག་ལག་འཛིན་གྱི་རིགས་ཉམས་པ་མེད་པ། མིའི་དབང་པོ་སྟོབས་ཀྱི་རྒྱལ་པོ་སྐུ་མཆེད་འཁོར་དང་བཅས་པས་སྐུའི་མདུན་བསུས་ཏེ། བདེ་སྐྱིད་གླིང་དུ་ཕེབས། བཀའ་ལས་ངོས་ན་སོ་རྒས། སྐས་མང་པོ་འཛིག་པར་མི་ནུས། སྡོད་ས་ཀླུ་ཁང་དུ་བྱེད་ཕེབས་པ་ལྟར་ཞུས། དགོངས་པར་བདེ་བ་བྱུང་། ཞག་འགའ་ནས། ཕོ་བྲང་འཕྱིར་བར་སྟག་རྩེར་ཕེབས། ཟླ་བ་ལྷག་ཙམ་བཞུགས། ཞབས་དྲུང་ཞལ་ངོ་སོ་སོར་ཚེ་དབང་ཕྱག་རྡོར་གྱི་རྗེས་གནང་། དཔོན་ས་ཞལ་ངོ་ལ་དགེ་སྦྱོར་བདུན་པ་སོགས་སྩལ། རྔོག་ནས་ཆོས་རྗེ་རབ་འབྱམས་པ་སོགས་ཞབས་འབྲིང་པ་རྣམས་ལ་བརྟག་གཉིས་ཀྱི་འགྲེལ་པ་རིན་ཆེན་རྒྱན་འདྲའི་བཤད་ལུང་དང་། གདན་བཞིའི་རྒྱུད་འགྲེལ་གསུངས། ཨེ་ཝཾ་དང་། ཟངས་མཚོ་སོགས་ཀྱི་གྲྭ་རིགས་ཆོས་དོན་གཉེར་རྣམས་ལ་ལམ་ཟབ་ཐུན་མོང་བ་གནང་། རིན་པོ་ཆེ་དཔལ་སྡིངས་པའི་དགོངས་རྫོགས་ཀྱི་འབུལ་སྐྱེལ་དབོན་པོས་གཙོས་པ་རྣམས་འབྱོར་གསེར་ཟངས་སོགས་སྟོད་ཟོག་གི་འབུལ་བ་གཏོས་ཆེ་བ་སླེབ། དེ་སྐབས་སྲོང་བཙན་གྱི་རྩིག་རྨང་ལ་ཕྱག་ནས་འཐོར་དུ་ཕེབས། ཁྲོམ་ཆེན་པོའི་དབུས་སུ་འདིར་ངེད་ཀྱི་བཞུགས་ས་གཟིམས་ཆུང་བཀོད་པ་བདེ་བ་ཞིག་བརྒྱག་པ་ཞུ། 
4-122
ད་ཡང་དབུས་པ་ཞིག་བྱེད་པས་མགྱོགས་པ་སླེབ་འོང་གསུང་། ཚེས་བཅུ་ཆེན་མོའི་གཟིགས་མོ་ལ་ཞོལ་ཁྲོད་ལྡུམ་རར་ཕེབས་དགོས་ཞུ་བས། ངོས་ཀྱིས་འཕྱོང་རྒྱས་སུ་ད་ལམ་གྱིས་ལན་བཅུ་གཉིས་ཡོངས། ཨ་མ་དྲུང་པས་བླ་དཔོན་ཆེན་པོ་གྲོང་གསེབ་ལ་འགྲོ་བར་མི་རིགས་གསུང་། སྔར་ཞོལ་ཁྲོད་ལ་འགྲོ་མ་མྱོང་ད་ལམ་ལྟད་མོར་མ་ཟད་ཐམས་ཅད་ལ་འབྲེལ་པ་འཇོག་པས་ཤོག་ཟེར་ཚད་ལ་འགྲོ་གསུང་། ཞར་ལ་ཞོལ་གོང་དུའང་ཕེབས། རྩེར་བཞུགས་རིང་ནམ་ལངས་ས་སྲོས་མཇལ་མི་བྱུང་ཚད་བཏང་། ཕྱག་དབང་ཞབས་དབང་གསུང་གི་འབྲེལ་པ་ཐམས་ཅད་ལ་གནང་། དེ་དུས་བཀའ་ལས་ངེད་འཕྱོང་རྒྱས་པ་འདི་མཁན་པོ་ཞི་བ་འཚོ་དང་། ཇོ་བོ་རྗེའི་དཔོན་བརྒྱུད་མ་ཉམས་པ་ཡིན་ཞེས་རང་བཞིན་གྱིས་གདུང་རབས་ལ་བསྔགས་པ་ཆེ་ཆེ་སྐད་མཛད་ཀྱི་འདུག །དཔལ་རི་སྒྲུབ་སྡེ་པ་དཔོན་སློབ་ལ། བླ་མ་དྲག་པོ་ཀཱི་ལ་ཡའི་དབང་དང་། དབུ་མ་ལུགས་ཀྱི་སེམས་བསྐྱེད་གསུངས། ཞལ་ངོ་སྤྱི་སྒེར་གྱི་འབུལ་བ་རྒྱས་པར་འདུག །དེ་ནས་ས་སྐྱོང་བའི་དབང་པོ་ཚེ་དབང་བསྟན་འཛིན་རྡོ་རྗེའི་སྒེར་གཞིས་ཐོབ་རྒྱལ་ལྷ་རྩེར་གདན་དྲངས། ཞབས་ཏོག་མཁོས་སུ་ཕེབས་ཤིང་ཞག་འགའ་བཞུགས། ཐང་པོ་ཆེའི་ཁྱམས་སུ་ཇོ་བོའི་གདུང་བང་མཇལ་བ་དང་ཞར་ལ་ཁྱམས་སྟོད་དུའང་ཕེབས། ཇོ་བོའི་བཞུགས་ཁྲིའི་ཐོག་ནས་ཁྲོམ་ཆེན་པོ་ལ་སྐྱེས་བུ་གསུམ་གྱི་ལམ་རིམ་ཆོས་ཐུན་གཅིག་གི་ཁོངས་སུ་འདུས་པ་ཞིག་སྩལ། 
4-123
ཐོབ་རྒྱལ་གྱི་འབུལ་ཆེན་དང་། ཐང་པོ་ཆེ་པ་སྤྱི་བླ་བྲང་གི་འབུལ་བའང་དེར་བཞེས། ས་སྐྱོང་བ་ཉིད་ལ་ཚེ་སྒྲུབ་རྒྱུན་ཁྱེར་ཟབ་པ་ཞིག་གནང་། བཀྲ་ཤིས་རྩེ་ནས་སྤྱན་འདྲེན་པ་འབྱོར། དེར་ཟླ་བ་གཉིས་སུ་ཉེ་བ་བཞུགས། འདུས་པ་བྱིན་ལ། ཕྱག་ཆེན། ཆོས་དྲུག །རྟེན་འབྲེལ། རོ་སྙོམས་སྒང་འདྲིལ། དགེ་སྦྱོར་བདུན་པ། སྦྱོར་བ་ཡན་ལག་དྲུག་པ་སོགས་དང་། སྡེ་པ་ཞལ་ངོ་རྣམས་ལ་རྗེས་གནང་ཉེར་གཉིས་པ་སྩལ། དེ་དུས་བཀའ་ལས། བོད་འདིར་ཁྲིད་ལྕེ་ཐོག་ནས་འཆད་པ་ངོས་ལས་མང་བ་སུ་ཡང་སྔར་མ་བྱུང་། ད་ལྕོགས་པོ་མི་འདུག་དེ་ཙམ་ཡིན་པ་འདྲ་གསུང་། ཁྲ་འབྲུག་ཏུ་རྟེན་མཇལ་ལ་ཕེབས་པའི་དགོངས་པ་ཤར་བས། ཆོས་སྐྱོང་གིས་དཔལ་ནཱ་རོ་པའི་ཞལ་བལྟ་བ་དང་། གསུང་ཉན་པར་ལྷ་འདྲེ་མི་གསུམ་ཐམས་ཅད་འདུས་ཤོག་ཅིག་གསུངས་པས། ལྷོ་བྱང་ཡར་ཤར་ནུབ་རྩེ་ཐང་ཐམས་ཅད་ནས་མི་མང་དུ་འདུས། ཁྲ་འབྲུག་ན་ཁར་དབང་མོ་ཆེ་གནང་། ཁྲི་ཐོག་གཅིག་ནས་གཟིགས་པའི་མི་ཚོགས་ཆེ་བར་གྲགས། གདུགས་འཇམ། ཆོས་སྐྱོང་རང་གིས་ཁྲིམས་པ་མཛད་པས་མུ་སྣུམ་པར་བྱུང་། དེ་ནས་ལྷ་ཁང་དུ་ཕེབས་དུས། ཆོས་སྐྱོང་སྤྱན་ཆབ་རང་གཏོང་གི་འདུག་པས་ཅི་ཡིན་དྲིས་པ་ན། དཔལ་ནཱ་རོ་པ་ལ་མཁའ་འགྲོ་སེང་གེའི་གདོང་ཅན་གྱིས་གཙོས་ཏེ་དཔའ་བོ་མཁའ་འགྲོ་མང་པོའི་གདན་འདྲེན་འདུག །
4-124
གཙོ་བོ་བྱ་པ་ནང་སོས་བརྟན་བཞུགས་ཕུལ། ཉེ་མཐུན་དུ་ཐུགས་རྗེ་གླིང་པས་བརྟན་བཞུགས་ཕུལ་གསུང་བས་བཀྲ་ཤིས་རྩེ་ནས་ཐུགས་ཁུར་བཞེས། སྔགས་རྙིང་མ་བ་སྨན་ལུང་པ་དཔོན་སློབ་ཀྱིས་མཁའ་འགྲོ་བསུན་བཟློག་བཙུགས། ཧོར་ཟླ་ལྔ་པའི་ཚེས་གཅིག་གི་སྔ་དྲོ་སྒར་གྲྭ་ཚང་གི་དབུ་ཆེ་འདུས་པ་རྒྱ་མཚོའི་ཚོགས་སྦྱིན་བདག་དང་བཅས་པས་མྱ་ངན་ལས་མི་འདའ་བར་གསོལ་བ་བཏབ་པས། དཀོན་མཆོག་གསུམ་དངོས་ཆོས་ཀྱི་རྗེ་བླ་མ། །ཕྱོགས་བྲལ་བསྟན་པའི་རྩ་ལག་ཆེན་པོར་ནི། །སྒྲོན་མེ་སྟོང་སྤར་བཙལ་ཀྱང་རྙེད་པར་དཀའ། ། ཞེས་དགེ་བའི་བཤེས་གཉེན་ནི་ཨུ་དུམ་ཝ་རའི་མེ་ཏོག་ལྟ་བུར་མཇལ་བ་དང་། རྙེད་པར་དཀའ་ཞིང་དཀོན་པ་ཡིན་ནོ་ཞེས་པའི་གསུང་བྱོན། ཞུ་བ་པོ་རྣམས་ཀྱི་ངོར་འཚོ་བའི་འདུ་བྱེད་བྱིན་གྱིས་བརླབས་ཏེ། ཟླ་བ་ཕྱེད་དང་གསུམ་གྱི་རིང་འཚོ་ཞིང་གཞེས་ལ་སྐུ་ཁམས་བདེ་བའི་ལུགས་སུ་མཛད་དེ། སང་ཉིན་དེ་སྤྱན་སྔར་བྱུང་བ་རྣམས་ལ་མདང་བརྟག་པའང་ཅུང་ཟད་ལེགས་སྐུ་ཁམས་ཀྱང་བདེའོ་གསུང་། དེ་ནས་སྣེ་གདོང་རྩེར་སྤྱན་དྲངས། ཚེས་བཅུ་ཆེན་མོ་གཟིགས་ལམ་ལ་ཕབ། དེ་དུས་ཞབས་དྲུང་རིན་པོ་ཆེར། ཕྱག་ཆེན། ཆོས་དྲུག །རྒྱལ་དབང་རྗེའི་བཀའ་འབུམ། འཁོར་ལོ་སྡོམ་པའི་དབང་བཞི་རྫོགས། མགོན་པོ་ཕྱག་བཞི་པའི་སྒྲུབ་སྐོར་ཐེལ་ལུགས་སུ་གྲགས་པ་རྣམས་གནང་། དགེ་འདུན་ཚོགས་པ་དཔོན་སློབ་ཀྱིས་འབུལ་བ་ཞབས་འདེགས་ཚད་མེད་པ་དང་དོད་འདུག །
4-125
ཕར་ཡང་མང་ཇ་གསེར་འགྱེད་དང་མཁན་ཆེན་རིན་པོ་ཆེ་ཀུན་སྤངས་པ་གཞོན་ནུ་བློ་གྲོས་དང་ཁྲི་ཐོག་པ་གཙོ་བོར་གྱུར་པ་ལ་ཆོས་སྦྱིན་ཆེན་པོ་སྩལ་ནས་མཁར་ཐོག་ཏུ་ཕེབས། ཞབས་དྲུང་དཔོན་ས་དཔོན་གཡོག་ལ་དབང་ཆོས་སོགས་སྩལ། དགེ་བའི་བཤེས་གཉེན་ཆེན་པོ་ཞལ་སྔ་ནས་སྒོམ་སྡེ་དཔོན་སློབ་ཀྱང་དེར་བཞུགས་འདུག་པས་སྙན་ངག་གི་བཤད་པ་དང་། དོགས་གཅོད་དྲི་ལན་རྣམས་གསུངས། དེ་ཙ་ན་གཞིས་ཀ་གོང་དཀར་དུ་རྟེན་བཞེངས་གནང་གྲུབ་པའི་རབ་གནས་ལ་སྤྱན་འདྲེན་གྱི་མི་སྣ་སྐྱ་སེར་འབྱོར། ནན་ཞུས་འབུལ་གྱིས་འདུག་པས། གཞན་བཀའ་གཅོག་བསམ་པ་མེད་ཀྱང་། ད་ལམ་མི་འགྲོ་ཐག་ཆོད་ཡིན། དགེ་སློང་རྒན་པོ་སྡེ་པའི་ནང་དུ་འཆི་ས་མི་བྱེད་གསུང་། གདན་འདྲེན་གྱི་མི་སྣ་ཕྱིར་རྫོང་དར་གནང་། སླར་བཀྲ་ཤིས་རྩེར་གཙུག་ལག་ཁང་གི་རབ་གནས་དང་བསྟུན་བདེ་མཆོག་གི་དབང་མོ་ཆེ་མཛད། དེ་དུས་སྐུ་རྒྱན་གསར་བཟོས་ཀྱི་སེ་རལ་ཁ་དང་། སྐེད་རྒྱན་འཁྱིད་གང་ཙམ་གྱིས་རིངས་འདུག་པས། བསྟུང་དགོས་པ་འདྲ་ཞུ་བས། མི་དགོས་ད་ལམ་སྡོད་ཙམ་ཞིག་གིས་ཆོག །རྣམ་པ་ཀུན་ཏུ་བླ་མ་སྐེམ་པོ་འདི་ཀ་མི་ཡོང་གསུང་། དབང་བཀའ་གྲོལ་ནས་ཀྱང་ལོ་ཆེན་སྤྲུལ་སྐུ་རིན་པོ་ཆེ་ཕེབས་དགུགས་དང་བཅས་ཞག་འགའ་བཞུགས། ཁྲོ་བོ་མཁར། གྲུབ་རྒྱལ་གླིང་། འཕྱོང་རྒྱས། གསེར་པ་གཞུང་སོགས་ཀྱི་མཇལ་མི་ཉིན་ལྟར་བཞིན་ཚོགས། 
4-126
ཅོག་གྲྭ་རིན་པོ་ཆེ་སྒྲུབ་སྡེར་ཐེགས་རྩིས་ཀྱི་ཕྱག་དབང་ཞུ་བ་གནང་བས། ཐུགས་དམ་འཕེལ་པོ་མཛོད། མགྱོགས་པོ་མཇལ་ཡོང་གསུང་། དེ་སྐབས་བཀར་ལས། རྨི་ལམ་མི་ཡོང་བའང་མི་འདུག ། ངོས་རང་གི་སྤྱི་གཙུག་ནས་འཐེན་པས། སྦྲུལ་ལྤགས་པ་བརྗེས་པ་བཞིན་ལུས་བྱིན་གྱི་པགས་པ་ཟུལ་བུད་པའི་ནང་ནས། ཁོ་བོ་རང་ཡིན་པ་ལ་ན་སོ་བཞོན་ནུ་ཞིག་དོན་པ་རྨིས་གསུང་ངོ་། །ལོ་ཆེན་རིན་པོ་ཆེ་ཕེབས་ནས་ལྷན་དུ་ཁྲ་འབྲུག་ཏུ་སྨོན་ལམ་ཞིག་མཛད། ཆོས་སྐྱོང་གི་གསུང་ནས། དེ་དུས་དཔལ་ནཱ་རོ་པས། ངེད་འཕྱོང་རྒྱས་ཕྱོགས་སུ་སྐྱེ་བ་ལེན་པས་བར་ཆད་མི་འབྱུང་བའི་འཕྲིན་ལས་སྒྲུབས་ཤིག་གསུང་བ་བྱུང་ཞེས། ཕྱིས་སྡེ་པ་ཕྱག་མཛོད་པ་དཔོན་གཡོག་ལ་གསུང་ངོ་། ། ནོར་བུ་གླིང་དུ་ཆིབས་བཤོལ་གནང་། ཞབས་དྲུང་རིན་པོ་ཆེའི་དགོངས་པ་ལ་སྐྱེས་བུ་ཆེན་པོ་འདི་ཉིད་ལྷོ་རྒྱུད་ལ་ཐེགས་པ་ས་ཁད་འགྱངས་བ་དང་། སྐུ་ན་ཕེབས་པས་ཡུན་རིང་པོ་མི་མཇལ་ལམ་དགོངས་པ་ཐུགས་ཀྱིས་མཁྱེན་ནས། མགྱོགས་པར་མཇལ་ཡོང་གསུང་། རྩེ་ཐང་དུ་སྡེ་པ་འབངས་བརྩིཊ་ནས་ཀྱིས་འབུལ་བ་ཞབས་ཏོག་རྒྱས་པ་འདུག །ཐུབ་པ་གསེར་གླིང་མར་སྨོན་ལམ་དང་། གོས་སྐུ་གཟིགས་རྟོག་མཛད་མི་ཚོགས་ཆེ་བ་ལ་ཁྲོམ་ཆོས་གནང་། བྲག་ཁ་ནས་གདན་འདྲེན་བྱུང་བས་ཞག་མང་ནི་མི་སྡོད་འབྲེལ་བ་འཇོག་ཕྱིར་སྐོར་ཅིག་འོངས་ཆོག་ཅེས་ཞག་གཉིས་བཞུགས། 
4-127
ཞབས་ཏོག་མཁོས་སུ་ཕེབས། འོན་ཕུ་མདའི་དཔོན་རིགས་སོགས་མཇལ་བ་པོ་ལྷག་པར་མང་། དཔོན་ས་དཔོན་གཡོག་གིས། ད་ལམ་གདན་ས་ཐེལ་གྱི་གནས་མཇལ་གནང་ན་འགབ་ཞུ་བས། འཇགས་སྤྱིལ་རིན་པོ་ཆེར་སྨོན་ལམ་འདེབས་པ་དང་། མགོན་ཁང་རྣམས་སུ་འཕྲིན་ལས་བཅོལ་དམ་བྱེད་པར་འགྲོ་བསམ་པ་ནི་འདུག །ཇི་ལྟར་བྱེད་ཅེས་སྐུ་འཁོར་བ་རྣམས་ལ་གསུང་བས། ད་རེས་ཕེབས་པ་མི་འཐད་རྒྱུ་མཚན་ཁ་སང་སོས་ཀྱི་དུས་ནས་ད་ལྟའི་བར། ཤིང་སྟག་མའི་མེ་ཏོག་ཁ་མ་བྱེ་བར་འདུག །འབྲུག་པ་བྱོན་པས་ལན་ཟེར་ཡོང་ཞུ་བས། མེ་ཏོག་ཁ་མ་བྱེ་བ་དེ་འབྲུག་པའི་རྟགས་ཡིན་ཉེན་ཆེ། ད་རེས་ལ་གཙང་པོ་ལྷོ་ཁ་རང་ནས་གསོལ་བ་འདེབས་པ་ཡིན་ཞེས་མ་ཐེགས། ལྕང་རྩིས་སུ་བཞུགས་ཞག་ཕོག །དེར་བླ་མ་དུང་ལ་བ་དཔོན་སློབ་མཇལ་དུ་བྱུང་། ཆོས་དང་ཟང་ཟིང་གི་སྦྱིན་པ་རྒྱས་པར་སྩལ། འཆད་དཀར་དུ་ཕེབས། སྡེ་པ་དམག་དཔོན་པ་ཁུ་དབོན་གྱིས་ཞབས་ཏོག་འབུལ་བ། དཔོན་ས་དཔོན་གཡོག་གིས་ཞབས་ཏོག་སོགས་འདུག །དེ་གཉིས་ཀར་དབང་རྗེས་གནང་སྩལ། དེ་དུས་རོང་གི་ཆུ་རྒྱས་པས་ཐེགས་ལམ་ལ་ངོས་ལ་གནང་བ་ཤར། ཕྱག་མཛོད་ཀྱི་སྐུ་ཆས་རགས་རིམ་དང་བླངས་ཀྱིས་སྐྱེལ་བར་ཞག་མང་འཐོགས། དེ་བར་བླ་མ་སྨྱུང་གནས་རས་པ་འཁོར་གྱི་ཚོགས་དང་བཅས་པར་ནཱ་རོ་ཆོས་དྲུག་གསུངས། 
4-128
ཁོང་ལ་ན་བཟའ་བེའུ་ཕྲུག་བཞེས་འཕྲོ་དད་རྟེན་ལ་གནབ། མ་ཎིའི་འགྲོ་དོན་རྒྱས་པར་གྱུར་ཅིག་གསུང་། དེ་ནས་རི་སྒོར་ཕེབས། གསོལ་ཕོགས་ཀྱི་མཐིལ་སྡེ་པ་གཞུང་ནས་ཕུལ། གཞན་སྡེ་པ་བྱང་མཁར་བ་སོགས་སྒེར་གྱི་འབུལ་བ་ཞབས་འདེགས་རྒྱས་པར་བྱུང་། བླ་མ་ཀླད་སྡིངས་པ་དཔོན་སློབ་དང་། དུང་དཀར་རས་ཆེན་གྱི་སྐུ་སྐྱེ་སོགས་མང་པོ་ཞིག་ལ་བདེ་མཆོག་གི་དབང་དང་། ཆོས་དྲུག་བསྡུས་པ་སྩལ། དེ་དུས་མི་དམངས་ཀྱི་ཁྲོད་ནས་གསེར་འབུལ་བ་མང་དུ་བྱུང་། དྲུང་ནས་ནམ་དབང་པར་ཁྱེད་ཀྱིས་གསེར་གཉེར་གྱིས་མི་ལ་རས་པས། གསེར་དང་མི་རྒན་བློ་མི་མཐུན། གསུངས་འདུག་སྟེ་དགོས་པའི་དུས་ཤིག་ཡོང་གསུང་། ཁོང་གིས་དེ་ནས་གཟུང་སྟེ་ཕྱིས་རྟེན་བཞེངས་མཐར་མ་ཕྱིན་པར་གསེར་གཉེར་དང་རྩོལ་བསྒྲུབ་དགོས་པ་རྣམས་མཛད། རྒྱ་རིའི་ཆབ་ཚན་ཁར་ཞག་གསུམ་བཞུགས། མར་ཁུ་གཤོངས་སུ་ཞག་བཞུགས་གནང་། དེར་མགོན་ག་རི་པ་དང་ཆུ་མདོ་ལུང་གསུམ་གྱི་མཇལ་མི་རྣམས་སླེབ། མི་མོ་ཆུང་བའི་ནང་དུ་ཞག་བཞུགས་ཀྱི་སར་རྫ་དམར་དགོན་པ་བ་དཔོན་སློབ་བྱོན། དེར་རྒྱལ་བ་ལོ་རས་ཀྱི་ཐུབ་ལྔ་ཚང་བར་གསུངས། བྱ་རབས་གསེར་ཁར་སྐྱེས་སྐྱེས་དགོན་པ་བ་རྣམས་དང་། དགས་པོ་ཟེལ་དཀར་བ་མང་པོ་མཇལ་དུ་བྱུང་། ས་སྐྱོང་བའི་དབང་པོ་སྡེ་པ་དམག་དཔོན་པ་དཔོན་གཡོག་རེ་དགའ་ནས་དང་བཅས་པ་གདན་འདྲེན་ལ་ཕེབས། 
4-129
རེ་དགའ་ནས་ཀྱིས་ཞུས་ངོར་འདི་གསུངས་སོ། །དགུང་བསངས་མཐོན་པོ་ཡི་ཕྱོགས་སུ། །ཉི་ཟླ་ཟུང་གཅིག་གི་འཁོར་ལུགས། །ཡ་མཚན་དཔེ་ཟླ་དང་བྲལ་བ། །ལྷོ་ཕྱོགས་དགའ་སྟོན་དུ་ཆས་བྱུང་། །མེ་ཏོག་པདྨོ་ཚོ་སྐྱིད་དོ། །རྒྱལ་ཁམས་ཕྱོགས་མེད་ཀྱི་ཕྱོགས་སུ། །མཚན་ལྡན་བླ་མ་ཡི་འགྲོ་དོན། །ཡ་མཚན་དཔེ་ཟླ་དང་བྲལ་བ། །ཡངས་པའི་རྒྱལ་ཁམས་འདིའི་ཕེབས་བཞུད། །མཆོད་ཡོན་ཞལ་མཇལ་ལ་སྐྱིད་དོ། །དེ་ནས་གཡག་མགོ་དགོན་པར་ཞག་བཞུགས་གནང་། དེ་ན་འཕགས་པ་བཅུ་གཅིག་ཞལ་ཕྱག་སྟོང་སྤྱན་སྟོང་རང་བྱོན་བཞུགས་པ། སྐུ་འཁོར་པ་རྣམས་བསྐོར་བ་མཛད་ཀྱི་འདུག །ཞལ་རས་ལས་ཆུ་ཁྲམ་བྱུང་བས། ཚེ་ཆུ་འབབ་བསམ་སྙན་དུ་གསོལ་བ་ན། སྤྱན་ཆབ་མིན་པ་འདུག་གམ། འདི་ལ་དཀར་ཆག་གནས་ཡིག་ཨེ་ཡོད་ཕེབས་པ་ལྟར། དཀར་ཆག་སྤྱན་ལམ་ལ་ཕབ་པས། འོ་འདི་ཁུངས་བཙུན་ཡིན་པར་འདུག །འདིའི་སྡེབས་རིགས་གསུམ་མགོན་པོའི་ཕྱག་རྡོར་དེ་ངེད་ཕྲུ་གུའི་དུས་མཇལ། ཨ་བོ་མ་ཎི་བ་ཐོགས་ས་དེ་ཡིན། ལ་བར་ན་བཞུགས། འཇམ་དབྱངས་དེ་གར་བཞུགས་མ་ངེས། མཆོད་པ་རྒྱས་པར་ཤོམས། བསྐོར་བ་བྱེད་ཅེས་ཞབས་བསྐོར་གཉིས་གནང་གཅིག་རྟིང་མ་བྱེད་དོ་གསུང་བ་གནང་གི་འདུག །དེ་ནས་གསུང་སྙན་དགོན་པར་ཕེབས། ཞག་གཉིས་བཞུགས། གསོལ་ཇའི་བཞུགས་གྲལ་ལ་རྗེ་དཔོན་རང་ངེད་ལ་བགྲོས་གླེང་ཕུལ་གསུང་། ཁོང་གིས་སངས་རྒྱས་མྱ་ངན་ལས་འདས་པར་ཐལ་ཟེར་བས། 
4-130
ལོ་ཆེན་སྤྲུལ་པའི་སྐུས་རྗེ་དཔོན་དེ་འདྲ་ཚིག་བཀྲ་མི་ལེགས་གསུང་། ཐམས་ཅད་མཁྱེན་པ་ཆེན་པོས་ཨའུ་རྩི། ད་ཚིག་བཀྲ་ལ་མ་བལྟོས་པར་འདུག་གང་གཏོང་སྙིང་འདོད་པ་ཐོང་གསུང་། དེ་ནས་སྟན་ལས་བཞེངས་ཏེ་དབུ་པཎ་ཕྱག་ཏུ་བསྣམས་ནས། རྗེ་ཉིད་རང་གི་སྟོན་བཟང་ལ་བདག་རྐྱེན་མཐོ་མཐོ་སྐད་མཛད། འདི་འདྲ་ཅིག་ཤེས་པ་ཡིན་ཏེ་ད་ནི་རྒས་འདུག་གོ་གསུང་། དེ་ཉིན་ཐམས་ཅད་ལ་མཉེས་མཉེས་ཀྱི་ཚུལ་ནས་བསླབ་བྱ་ལེགས་པར་གནང་། ཅོག་གྲྭ་སློབ་དཔོན་བསྟན་པ་རྒྱ་མཚོ་ལ། ངེད་རང་འབྲུག་པའི་ཕ་ཆོས་ཕྱག་ཆེན་ཆོས་དྲུག །བླ་སྒྲུབ། རྟེན་འབྲེལ། རོ་སྙོམས་ཡིན་པས་ནན་ཏན་གྱིས། གཞན་མ་བྱུང་ཡང་ཨའུ་རྩི་གསུང་ངོ་། །སྲོད་ཇའི་སྐབས་ངག་དབང་ཆོས་ཀྱི་རྒྱལ་པོའི་གདུང་རིལ་པོར་བཞུགས་པ་ལས་འཕྲོས་ནས། དུས་སྙིགས་མར་བླ་མའི་གདུང་རིལ་པོར་བཞུགས་པ་མི་ལེགས་པས་འཕྲལ་དུ་ཞུགས་ལ་སྦྱངས་པ་འགབ། གྲུབ་ཆེན་ཨུ་རྒྱན་པའི་མན་ངག་ལྟར་བྱས་ན་གདུང་ཇི་སྲིད་བར་མ་རྙིངས་པ་འདོད་ནའང་ཡོང་བ་ཡིན་ཏེ་དགོས་པ་མེད། ངོས་ཀྱི་སྔོ་འོད་ལྡན་གྱི་བཅུད་ལན་བྱས་ནས་ད་ཕན་ལོ་སུམ་ཅུ་སོང་། འཕྲལ་མི་ཟས་རགས་པ་ལ་བརྟེན་མ་དགོས་པས་གཡེང་བ་ཆུང་བ་ཙམ་ལས། བཤད་ཚོད་དང་མཐུན་པའི་ཡོན་ཏན་མ་བྱུང་། དུག་རོ་མང་བ་དང་། མི་ཆེན་གྱི་ཚུལ་གཟུང་བའི་རྣམ་གཡེང་དང་གྲིབ་ཀྱིས་ལན་པར་འདུག །
4-131
དེ་མ་ཡིན་ན། འཇའ་ལུས་རྗེས་མཐུན་པ་ཞིག་འགྲུབ་ཚོད་ཡིན་ཞེས་གསུང་ངོ་། །བྱར་སྟག་རྩེར་དཔོན་ས་སྐུ་མཆེད་ཀྱིས་གདན་དྲངས། ཞག་ལྔ་ཙམ་བཞུགས། སྐུ་མཆེད་དྲུང་ལ་དབང་རྗེས་གནང་དང་སེམས་ལ་ཕན་པའི་གདམས་པ་དགོས་ཞུ་བ་བཞིན་སྩལ། སྟག་རྩེ་སྒྲུབ་སྡེར་ཆོས་རྗེ་སློབ་དཔོན་པའི་སྐུ་སྐྱེ་འདི་ཀ་བླ་མའི་འོས་སུ་འདུག་པས་སྒྲུབ་སྡེ་སྤྱི་སོ་དང་ཡོན་མཆོད་མཐུན་གྲུབ་ཀྱི་གདན་འདྲེན་མཛོད་ཅེས་གདམས། དེ་ནས་བྱར་ནས་མོར་གོང་མ་རིན་པོ་ཆེ་ཕེབས་འདུག །དེར་ཞག་གསུམ་བཞུགས། ཕྱག་མཛོད་པ་ལ་ངེད་རང་རྣམས་དབུས་གཙང་ནས་ཡོངས་པས། ད་ལམ་གོང་མ་སྐུ་མཆེད་ལ་སྐྱེས་བཟབས་ནས་འཕུལ་གསུང་། སྐུ་བེར་གྱིས་གཙོས་པའི་སྐྱེས་གནང་བཟང་པོ་སྩལ། སྒྲོལ་དཀར་གྱི་རྗེས་གནང་མཛད། དེར་གཙང་རོང་ནས་སྔགས་པ་ཞིག་གི་བུ་ཆོས་བྲོས་ལ་བྱུང་བ་སྐྲ་ཕུད་བཞེས། སྐྲ་བཅད་ཀྱི་ཐ་མ་གྱིས། མིང་རྗེ་དཔོན་པས་ཐོགས་གསུང་། བདུད་རྩི་རྒྱ་མཚོ་ཞེས་བཏགས་པས་བཞད་ཀྱི་འདུག །སྐུ་དངོས་ཀྱི་གདུལ་བྱའི་ཐ་མ་དེའང་རྟོགས་ལྡན་བཟང་པོ་རང་ཞིག་བྱུང་ངོ་། །དེ་ལྟར་འགྲོ་བ་མང་པོ་ལ་ཕན་པ་དང་བདེ་བའི་སླད་དུ། དབུས་གཙང་ལྷོ་རྒྱུད་གཡེ་དྭགས་ཀོང་གསུམ། འཕན་ཡུལ་བྱང་རྭ་སྦྲེང་ཚུན་གྱི་ལྗོངས་དང་། གཙུག་ལག་ཁང་དང་། རྒྱལ་པོའི་ཁབ་དང་། དགེ་འདུན་གྱི་ཀུན་དགའ་ར་བ་ཐམས་ཅད་དུ་ཞབས་ཀྱི་པདྨོ་བཀོད། 
4-132
དེ་དག་གི་སྐྱེ་འགྲོ་མ་ལུས་པ་རྗེས་སུ་གཟུང་ཞིང་ཡང་དག་པའི་ལམ་ལ་འཁོད་ནས། ཧོར་ཟླ་བདུན་པ་སྟེ་གྲོ་བཞིན་ཟླ་བའི་ཚེས་བདུན་གྱི་སྔ་དྲོ་གསང་སྔགས་ཆོས་གླིང་དུ་ཕེབས། དེར་དབོན་ཆེན་རིན་པོ་ཆེས་ནན་ཞུས་ཕུལ་བས། ཞག་གསུམ་བཞུགས། དེ་བར་ཕྱག་དཔེ་ཐམས་ཅད་ལ་གཟིགས་རྟོག་གནང་། བཀའ་ལས། ངེད་ཕྲུ་གུ་ནས་དཔེ་ཆ་རང་ལ་དགའ་ནོར་ལ་དགའ་ཚོར་ཆེན་པོ་མེད། བར་དུ་གཙུག་ལག་ཁང་དང་རྟེན་བཞེངས། དགེ་འདུན་འདུ་བའི་རྐྱེན་ལ་ནོར་དགོས་པའང་བྱུང་། དཔེ་ཆ་དཀོན་པོ་འདི་རྣམས་ལྷོ་རྒྱུད་དབུས་གཙང་ཐམས་ཅད་ནས་རྩོལ་བ་བྱས། དག་པ་འབྱོར་པའི་དུས་སྔར་བྲིས་བྲིས་པ་འཇོག་ནུས་པར་བྱས། དཔེ་དཀོན་པ་སྟེར་མཁན་བྱུང་དུས་རྟ་རེ་ཙམ་བྱིན། སྣར་ཐང་འཇམ་སྒག་ཏུ་བྱས་པའི་མངོན་པ་མཛོད་ཀྱི་འགྲེལ་པ་འདིའང་དཀོན་པོ་ཡིན་ཏེ་ཚིགས་མེད་བྱས་འདུག །ཨཱརྱ་དེ་ཝའི་དབུ་མའི་ཡིག་ཆ་རབ་ཏུ་བྱེད་པ་ལག་པའི་ཚད་འདི། རྗེ་དབོན་རང་ཚགས་གྱིས། ཁྱེད་དང་ལོ་ཙ་བ་རྡོར་ཆོས་པ་གཉིས་ཀྱིས་སྒྲ་པ་ཐུགས་རྗེ་དཔལ་གྱི་ཙནྡྲ་པའི་འགྲེལ་ཆེན་འདི་ལ་ཞུ་དག་རུ་ང་པོ་རང་ཞིག་གྱིས། རྫོང་ཁ་ནས་བགྲེས་པ་དང་། སྔགས་གྲྭ་བ་རྣམས་ཀྱིས་མགོན་མངས་ཀྱིས་མདོས་གཏོང་བའི་སྣལ་ཐག་དང་ཤིང་བྱང་རྣམས་རྩོལ་བ་གང་ཆེ་གྱིས་ལེ་ལོར་མ་བཞག་ཅེས་གདམས་སོ། །
4-133
ཤིང་བྱང་གི་འདོད་གསོལ་ཇི་ལྟ་བུ་ཞུས་པས། སྔར་བཅོལ་ལེགས་པའི་གཏང་རག་ཡིན་ནོ། །ད་ནི་ས་ལམ་གྱི་བར་ཆད་སོལ་ཞེས་པ་ཁོ་ན་བྲིས་གསུང་། བདེ་མཆོག་གི་སྦྱིན་སྲེག་མ་གཏོགས། གཞན་ཕྱག་དཔེ་ཐམས་ཅད་བཀའ་ཐམ་གྱིས་མནན། མདོ་ཁྱམས་ན་དགེ་འདུན་གྱི་ཚོགས་གྲལ་འདུག་པས་ཡུན་རིང་དུ་གཟིགས། འཁོར་སློབ་ཐམས་ཅད་ཀྱི་རྒྱུད་བྱིན་གྱིས་བརླབས། ངེད་མཚམས་ཞག་བདུན་བྱེད་དེ་ཐོག་ནས་དབྱེ་བ་ཕྱེད་ཡོང་གསུང་ངོ་། །ད་ལམ་རྟེན་འབྲེལ་དབང་གིས་ཁམས་མི་འཚོ། སྐྱེ་བ་མྱུར་དུ་འོང་། སྲུང་མའི་ལུང་བསྟན་བཞིན་གཟུང་། དཔེ་དབང་རྫས་མ་འཁྱར་བ། བཤད་སྒྲུབ་ཀྱི་སྡེ་ལ་འཛིན་སྐྱོང་གྱིས། གསུང་བའི་བཀའ་ཆེམས་ཤིག་ཕྱིས་ཕྱག་དཔེའི་ཁྲོད་ནས་རྙེད། ཏིང་ཏིང་ནས་སྡེ་པ་སྐུ་སྐྱེ་ཕྱག་འབུལ་ལ་བྱོན། ཐུགས་རབ་ཆེ་བ་དང་བཅས་པ་དམ་པས་ལྷག་དང་མཉེས། སྒྲའི་གསན་པ་མཛད་པ་ཤར་ན་ལོ་ཙ་བ་ངག་དབང་གྲགས་པ། སྒྲུབ་སྡེ་པ་རང་གི་གྲྭ་པའང་ཡིན། འདིས་སློབ་དཔོན་ཡོང་བར་ཡོད། ད་ནས་སྟག་རྩེ་སྒྲུབ་སྟེའི་ཁུར་ཁྱེད་ཀྱིས་ལོང་། བསྐོ་འཇྭ་རྒྱས་པ་རྗེས་སོར་བྱེད་གསུང་། ཚེས་བཅུའི་ཞོགས་ཐུགས་དམ་སྔ་བར་གྲོལ་འདུག །གསོལ་དཔོན་རྫོང་ཁ་ནས་སྐུ་གཞོན་པ་ཀུན་དགའ་ལྷུན་གྲུབ་ཀྱིས། གསོལ་ཇ་འདི་ལོ་ཆེན་རིན་པོ་ཆེའི་ཕྱག་གི་ཡིན། བདའ་པོས་ཡོད་པས་ཞལ་དཀར་ཟིན་པ་ཞུས་གསུང་བ་བྱུང་ཞུ་བར། 
4-134
དེ་ཙམ་གྱིས་རོ་ཆུ་སེར་མང་བ་ལས་མེད་ད་ཡར་འགྲོ་གསུངས་ནས་བཀྲ་ཤིས་ལྷ་སྟེངས་སུ་ཕེབས། དེར་ཞབས་འབྲིང་བ་འགའ་ཞིག་གིས་ཁང་བཀོད་འདི་བཞིན་བྱུང་ན་ལེགས་ཚུལ་ཞུ་བས། ད་ཁ་རོག་པར་བཞུགས་ཤིག་ལེགས་པོ་བྱུང་འདུག །འདི་ངོས་སུ་སྐུ་འདྲ་རྣམ་གསུམ་གྱི་སྤྱན་སྔར་མཆོད་པ་བཤོམས། འདི་ཕྱོགས་ལ་བསྐང་གཏོར་རྒྱས་པར་བསྒྲིགས་རྡ་ཞིག་ཀྱང་ལོང་། དད་ཅན་རྣམས་ཚོགས་རྫོགས་པའི་ཕྱིར་ལྡིང་བ་ཕུལ་བྱུང་ཚད་བརྩེགས། གཞན་འབོལ་ལ་སོགས་པ་མ་ལྡིངས། ངེད་རྣམས་ཀྱིས་དེ་བར་ཙཱ་རིའི་གངས་མཐོངས་ཡ་གི་ཕྱིན་གྱིས་ཞེས་ཡར་ཚད་ཐེགས། ཇོ་བོ་ལའི་གངས་གཟིགས་ལམ་ལ་བབ་པ་དང་ཕྱག་ཐལ་མོ་སྦྱར། འདི་སློབ་དཔོན་པདྨས་འཕགས་པ་བཅུ་གཅིག་ཞལ་དུ་གཟིགས་པ་ཡིན། ད་ལམ་གྱི་གནས་སྐོར་འདིས་གོང་གཅོད་པ་ཡིན་གསུང་། དེ་ནས་ཤིང་སྡོང་ཆེན་པོ་ཞིག་གི་རྩར། མགྲོན་གཉེར་ལ་དཔལ་ཆེན་མོ་རང་འདིར་སྟན་དམར་ཐིང་ཞིག་ཅེས་སྐུ་དྲང་པོར་བསྲངས་ཏེ། རྒྱུན་རིང་པོར་ཏིང་ངེ་འཛིན་ལ་བཞུགས། ཤིང་སྡོང་རྒད་པོ་ཞིག་གི་རྩར་མི་རྒན་པོ་ཞིག་གིས་བསྒོམས་ཡོད་དོ། །ང་འགྲོ་ཡི་གསུངས་ཏེ་གཟིམས་སྤྱིལ་དུ་ཕེབས། དེར་ཚོགས་འཁོར་རྒྱས་པ་བྱུང་གྲོལ་ནས་བྱིན་གསང་སྔགས་ཆོས་གླིང་དུ་བྱོན། ཞབས་ཕྱིར་གཟིམས་དཔོན་འཇམ་དབྱངས་པད་དཀར། གཏོར་བཤོམས་པ་ས་ལ་ཆོས་མཛད། ཇ་མ། མཛོ་རྫི་རྣམས་ལས་གཞན་མེད། 
4-135
བཀའ་ལས། མདངས་སྐྱེས་པ་དང་བུད་མེད་ཀྱི་རྟ་པ་མང་པོ་མར་ཁུ་གཤོངས་ཀྱི་ལ་དེ་ནས་ཕར་གདན་འདྲོངས་པས་བློ་བདེ་ཟེར་ཞིང་ལོག་སོང་། བུད་མེད་གཉིས་འདིར་བསྡད་ཡོད་གསུང་། དེ་ནུབ་ནས་འཕྲལ་གྱི་གསུང་ངག་བཅད། འཕགས་པ་མི་སྨྲ་བའི་བརྟུལ་ཞུགས་ཀྱི་ངང་ནས། སྲོད་ལ་ཆོས་སྐྱོང་གི་བསྐང་བ་རྒྱས་པ། རྒྱུན་དུ་བདེ་མཆོག་གི་སྙིང་པོ་ཉེ་སྙིང་རྩ་སྔགས་ཁོ་ན་དང་། བདག་འཇུག་ཚར་མང་པོ་བཞེས་ཀྱི་འདུག་ཟེར། ཚེས་བཅུ་བཞིའི་དགོངས་ཞལ་སྐྱུགས་ཚན་ཆེ་ཙམ་བྱུང་བས། སྐུ་ངལ་བ་ཙམ་ལས་གཞན་བསྙེལ་བའི་ཚུལ་མི་མངའ་ཡང་། སྐུ་མཁྲིས་པས་མ་བཟོད་ནས་དབོན་ཆེན་རིན་པོ་ཆེ་གདན་དྲངས། མཇལ་ཁ་ནི་མ་གནང་། ཕྱི་དེར་ཅོག་པུ་མཛད་ནས་བཞུགས། དེ་སྐབས་རྒྱལ་རྩེ་གཟིམས་བཤག་ནས། སྡེ་པ་དཔལ་ལེགས་པ་སྐུ་ཁམས་མ་འཚོ་བའི་བསྔོ་ཞུས། གསེར་ཁ་ཕྲ་མངས་འབུལ་བར་ཉིད་ཀྱི་ཞལ་སློབ་དྲུང་རམ་པ་སངས་རྡོར་པ་བྱོན། ཁོང་ལ་མཇལ་ཁ་མ་བྱུ་ཡང་བསྔོ་རྟེན་གཟིགས་ལམ་ལ་ཕབ་བསྔོ་བ་སྨོན་ལམ་གནང་། བཅོ་ལྔའི་གང་བ་རྫོགས་པའི་མཐར་ཟིལ་ཆེན་པོ་ཞིག་འོང་སྟེ་མ་འཇིགས་ཤིག །ཅེས་གཟིམས་དཔོན་ལ་གསུངས་པའི་མོད་ལ། དགོངས་པ་ཆོས་ཀྱི་དབྱིངས་སུ་ཐིམ་མོ། །དབོན་ཆེན་རིན་པོ་ཆེས་ལེགས་པར་གཟིགས་ཏེ་ད་བཟློག་ཐབས་མ་མཆིས་ཞེས་མྱ་ངན་གྱིས་ནོན། 
4-136
དེར་ཕྱོགས་ཐམས་ཅད་དྲི་བཟང་གིས་ཁྱབ། དེ་ན་མཆིས་པ་རྣམས་ཀྱིས་སྨྲེང་སྔགས་ཀྱི་ཤུགས་ཆེན་པོས། བསྟན་པའི་ཉི་མ་དགུང་དུ་ནུབ་བོ། །ཐུབ་པའི་རྒྱལ་ཚབ་ཆེན་པོ་དེ་འདས་སོ། །ཐར་པའི་གྲུ་བོ་ཆེ་དེ་རྒྱ་མཚོའི་དབུས་སུ་བྱིང་ངོ་། །བདག་ཅག་དུག་ལྔའི་གཅོང་ནད་ཀྱིས་ཟིན་པ་རྣམས་ནི་སྨན་པ་ཆེན་པོ་དེས་བོར་རོ། །ཀྱེ་ཧུད་ཅེས་མཆི་མ་ཁྲག་ལྟར་དུ་གཞམ་མོ། །དེ་ནས་རྡོ་རྗེ་འཛིན་པ་ཆེན་པོ་དང་། ཕྱག་མཛོད་པ་བྱོན། ཙནྡན་དཀར་པོ་དང་། གུར་ཀུམ་དང་། ག་བུར་གྱི་ཆུས་སྦགས་བའི་ཁ་བཏགས་རྙིང་མ་དང་། ཡུལ་ཀ་ཤི་ཀའི་རས་ཡུག་ཟུང་གིས་གདུང་ཡིད་བཞིན་གྱི་ནོར་བུ་གྲིལ། འཁོར་ལོས་སྒྱུར་བའི་རྒྱན་དང་ན་བཟས་ཀླུབས་ཏེ་ཁྲིའུའི་སྟེང་དུ་བཞུགས་སུ་གསོལ། ཕྱོགས་ཐམས་ཅད་ནས་མཆོད་པའི་བྱེ་བྲག་བསམ་གྱིས་མི་ཁྱབ་པས་མཆོད་པར་བྱས་སོ། །དེ་དུས་ནང་འཁོར་གསང་སྔགས་ཆོས་གླིང་ན་ཡོད་པ་ཐམས་ཅད་ཡིད་མི་དགའ་ཞིང་། ས་གཞི་ཐམས་ཅད་བཀྲག་མདངས་ཉམས། རི་དྭགས་དང་སྒོ་ཕྱུགས་རྣམས་ཀྱི་ཕྲུ་གུ་ནུ་མ་མི་ལེན། བྱ་འཇོལ་མོ་སོགས་སྐད་མི་བསྒྲག་ཟེར། གཅིག་གིས་གཅིག་སྤྲན་ཏེ་གདོང་སྨད་ནས། ད་ནི་བློའང་མ་བདེ་རྨི་ལམ་ཡང་འཁྲུགས་ཐབས་ཅི་མཆིས་ཞེས་གླེང་། དེར་ངེད་རང་རྣམས་བརྟག་པར་བྱ་ཡི། རྗེ་དབོན་དྲུང་རང་གཟིམས་སྤྱིལ་དུ་བྱོན་ལ་རབ་དངོས་མཇལ་ལམ་གསུང་མཇལ་དགོས། 
4-137
དེ་མིན་ཡང་སྔར་སོར་ཕྱོགས་ནས་ཞུ་དོན་ཡོད་པ་རྣམས་ལ་ལན་ཕེབས་ཇི་ལྟར་ཞུ་བ་འཐད་ཅེས་བགྲོས། ཁོང་གིས་དེ་ལྟར་བགྱིས་ཏེ་གཟིམས་སྤྱིལ་མཐོང་བའི་མོད་ལ་སེམས་ཆ་ཆོར་གྱུར། འོན་ཀྱང་ཡར་བརྡ་ཞིག་སྦྱར་བས་གཟིགས་སྤྱིལ་གྱི་ཕྱི་ཁྱམས་ཚུན་སྐོར་ཙམ་བཏང་། དེ་ནས་སྐུ་འཁོར་བ་རྣམས་ཀྱིས་ཇ་ཆང་ཐོགས་ཏེ། འོག་གི་ནགས་ཁྲོད་ཅིག་ཏུ་ཁྲིད་ནས་བཞུགས་ཡོད་ཚུལ་དང་། ཉེ་བར་སྐུ་མཚམས་གྲོལ་རྒྱུ་སོགས་བག་ཕེབས་པའི་གཏམ་བཅོས་ཤིང་གླེང་ངོ་། །དེར་རྗེ་རྒྱལ་བའི་དབང་པོ་དེ་ཉིད་དྲན་པའི་མོད་ལ། ཆོས་རྗེ་འབྲུག་པ་བདག་ཅག་ལོང་བ་བྱང་ཐང་ལ་འཁྱམས་སོ། །བྱ་རོག་བུ་སྐྱེལ་འདི་འདྲ་མཛད་པ། བདག་ཅག་རྣམས་སུ་ལ་རེ་ཞེས་འོ་དོད་ཆེན་པོས་བོས་ནས་བརྒྱལ་བར་གྱུར་ཏོ། ། དེར་གྲོགས་རྣམས་ཀྱིས་ཆུ་གྲང་མོས་གདོང་སྦྲན་ཏེ། ཀྱེ་གྲོགས་པོ་དེ་སྐད་མ་ཟེར་ཅིག །ད་ནི་གསང་བར་བྱ་བའི་དུས་ལ་བབ་ཀྱི། ཅིའི་ཕྱིར་ན། འཁོར་ཡུལ་ཕྱོགས་གཞན་དུ་གནས་པ་རྣམས་ཀྱིས་གཏམ་འདི་གློ་བུར་དུ་ཐོས་ན་སྙིང་གས་ཏེ་ཚེའི་དུས་བྱེད་པར་འགྱུར་རོ་ཞེས་ཟླ་བ་དྲུག་གསང་བར་དམ་བཅས་སོ། །དེ་ནས་གཟུང་སྟེ་དགོངས་རྫོགས་མ་གྲུབ་ཀྱི་བར་ལ་ས་རྣམ་པ་དྲུག་ཏུ་གཡོ་བ་ལན་བཅུ་གཉིས་བྱུང་། ནམ་མཁའ་འཇའ་འོད་ཀྱིས་ཁྱབ་པ་དང་། མེ་ཏོག་གི་ཆར་བབས། 
4-138
ཉེ་འཁོར་གྱི་ཕྱུགས་རྫི་རྣམས་ཀྱིས་ཐོས་པར་ནགས་ཁྲོད་གཟིམས་སྤྱིལ་གྱིས་ཁད་དང་ཉེ་བར་ཉིན་ལྟར་བཞིན། དུང་དང་འཁར་རྔ་དང་། པི་ཝང་དང་གླིང་བུ་དང་། ཏིང་ཏིང་བཤགས་དང་སིལ་སྙན་དང་། དྲིལ་བུ་དང་ཌ་མ་རུའི་སྒྲ་རྟག་པར་ཐོས་ཏེ་ཉན་པར་ཕྱིན་ན་ཐག་ཇེ་རིང་འགྲོ་བར་འདུག་ཟེར། སྤྲིན་ཁ་དོག་སྣ་ཚོགས་པ་དབྱིབས་རྒྱལ་སྲིད་རིན་པོ་ཆེ་སྣ་བདུན་གྱི་རྣམ་པ་དང་། བཀྲ་ཤིས་རྟགས་བརྒྱད་ཀྱི་རྣམ་པ་དང་། མཆོད་ལྷའི་གཟུགས་ལྟ་བུར་སྣང་བ། ཕྱོགས་ཐག་རིང་དུ་བཞུགས་པ་མང་པོས་གཟིགས་ལམ་དུ་བབས་པ་ན་ཀུན་འདི་ལྟ་བུའི་ངོ་མཚར་འོང་དོན་གཞན་མ་མཆིས་སྙམ་ཡིད་ཁོང་དུ་ཆུད་ཅིང་མོག་མོག་པོར་གྱུར་ཏེ་ཤུགས་རིངས་ནར་བྱེད་དོ། །བདེ་མཆོག་གི་སྦྱིན་སྲེག་གི་ཕྱག་དཔེ་བཞུགས་གདན་འཁྲིས་ན་འཇོག་པ་གནང་འདུག །ཟླ་བ་ཕྱི་མའི་ཚེས་བརྒྱད་ལ་ལོ་ཆེན་སྤྲུལ་སྐུ་རིན་པོ་ཆེ་དང་། རྡོ་རྗེ་འཛིན་པ་ཀུན་དགའ་སྙིང་པོས། གསང་སྟབས་ཀྱིས་གདུང་ཞུགས་ལ་སྦྱངས། གདུང་འདམ་ལས་སྐུ་རྟེན་སྐུ་ཚད་དང་མཉམ་པ། གསུང་རྟེན་དུ་འཕགས་པ་བརྒྱད་སྟོང་པ་དང་། ཤེས་རབ་སྣ་ཚོགས་པའི་པོ་ཏི་གསེར་ལས་གྲུབ་པ། ཐུགས་རྟེན་དུ་ས་འབུམ་སྒོ་མངས་ཐོག་ཚད་སོགས་བཞེངས་གསེར་དངུལ་གསོལ་ཏེ་རབ་ཏུ་གནས་པ་མཛད། ལོ་ཆེན་རིན་པོ་ཆེ་ཀོང་ཕྱོགས་ལ་ཐེགས། 
4-139
གྲུབ་ཐོབ་རིན་པོ་ཆེ་དང་། ཆོས་རྗེ་དཔོན་ཆེན་དྲུང་གིས། ལོ་རོ་དོལ་དམག་སྡེའི་མེ་ཏོག་ནས་ཕུད་བཞེས། དེའི་དགུན་ཧོར་ཟླ་བཅུ་གཅིག་པའི་ནང་དུ། ཡུལ་དེར་ཤིང་སྟག་མའི་མེ་ཏོག་དང་། ཕྱོགས་གཞན་ཀུན་ཏུ་ཤིང་བབྲས་བུ་ཅན་ལ་མེ་ཏོག་ཤར། ཡུལ་ལྗོངས་ཕལ་ཆེ་བར་མེ་ཏོག་རྒྱ་མེན་ཁ་བྱེ། རྩྭ་དང་སྔོ་གསེར་པའི་མྱུ་གུས་ས་གཞི་ཐམས་ཅད་མརྒཏ་ཀྱི་མདངས་ལྟ་བུར་གྱུར་པ་དབུས་གཙང་ཀུན་ཏུ་བྱུང་བས། ལྟས་དང་ཆོ་འཕྲུལ་འདི་ལྟ་བུ་འོང་ལུགས་ཀྱིས། འབྲུག་པ་ཐམས་ཅད་མཁྱེན་པ་དེ་མྱ་ངན་ལས་འདས་པར་ཐག་ཆོད་ཟེར་ཤེས་ལྡན་ཕལ་ཆེར་གྱིས་གླེང་བས། དེའི་ཚེ་གདུང་དབྱངས་འདི་བྱས་སོ། །ན་མོ་གུ་རུ་ལོ་ཀི་ཤྭ་ར་ཡེ། གནས་གྱད་ཡུལ་རྩྭ་མཆོག་ཇི་ལྟ་བ། །བྱར་བརྗེས་ཕུ་སཱ་ལའི་ནགས་ཁྲོད་དུ། །དུས་ངན་པ་ཆུ་འབྲུག་དབྱར་གྱི་ཐ། །དགུང་བཅོ་ལྔའི་གང་བ་རྫོགས་པའི་མཚམས། །ནམ་སྐྱ་རེངས་ཐོར་མགོ་ཟིན་ཙམ་ལ། །རྗེ་སྤྲུལ་པའི་སྣང་བརྙན་དབྱིངས་སུ་ཐིམ། ། གཏམ་དེ་སྐད་འཁུམས་པས་བཟོད་གླགས་མེད། །འདི་བདེན་ནམ་རྫུན་ཏེ་སུ་ལ་དྲི། །ཉམས་རྨི་ལམ་ཡིན་ཡང་རྨི་དོན་ཆུང་། །ལུས་རང་ཚུགས་མ་ཐུབ་བ་སྤུ་ལྡང་། །གདོང་མཆི་མས་གང་ཞིང་སྨེ་སྔགས་ཤོར། །དབུགས་བྱང་ཁོག་བརྒྱངས་པ་ཁར་མ་ཤོང་། །དུས་ད་རེས་རང་སྲོག་འདེར་རམ་སྙམ། །ལར་ཀུན་རྫོབ་སྣང་ཚུལ་འདི་ལྟ་ཡང་། །
4-140
རྗེ་གཟུགས་སྐུ་སྡུད་པ་ཧ་ཅང་ཐལ། །ལར་སྒྱུ་མའི་གྲོང་ཁྱེར་འཇིག་ཅེས་ཀྱང་། །རྗེ་སྒྱུ་འཕྲུལ་སྡུད་པ་ཧ་ཅང་ཐལ། །འཁོར་རྟག་འཛིན་གཞིག་ཕྱིར་བསྟན་ན་ཡང་། །ཕ་རྡོ་རྗེའི་སྐུ་དེ་ཧ་ཅང་ཐལ། །རྗེ་ཐུགས་རྗེའི་སྤྱན་ལྡན་མི་བཞུགས་ན། །དམུས་ལོང་གི་ལམ་སྣ་སུ་ལ་རེ། །རྗེ་ཡིད་བཞིན་ནོར་བུ་མི་བཞུགས་ན། །དབུལ་འཕོངས་ཀྱི་རེ་བ་སུ་ཡིས་སྐོང་། །རྗེ་སྨན་པའི་རྒྱལ་པོ་མི་བཞུགས་ན། །ཉོན་མོངས་ཀྱི་གཅོང་ནད་སུ་ཡིས་སེལ། །རྗེ་འཇམ་མགོན་གྲུབ་པ་མི་བཞུགས་ན། །བཤེས་གཉེན་གྱི་ཐེ་ཚོམ་སུ་ལ་དྲི། །རྗེ་སྟོན་པའི་རྒྱལ་ཚབ་མི་བཞུགས་ན། །བན་རབ་བྱུང་གི་བརྟེན་ས་སུ་ཡིས་བྱེད། །རྗེ་སེམས་དཔའ་ཆེན་པོ་མི་བཞུགས་ན། །ལམ་ཐེག་ཆེན་སེམས་བསྐྱེད་སུ་ལ་ལེན། །རྗེ་འཁོར་ལོས་སྒྱུར་བ་མི་བཞུགས་ན། །རྒྱུད་རྡོ་རྗེ་ཐེག་པ་སུ་ལ་ཉན། །རྗེ་དཀར་རྒྱུད་སྲོག་ཤིང་མི་བཞུགས་ན། །དཔལ་ནཱ་རོའི་རིང་ལུགས་སུ་ཡིས་འཛིན། །རྗེ་སྤངས་རྟོགས་མཐར་ཕྱིན་མི་བཞུགས་ན། །རྟོགས་ལྡན་གྱི་ཉམས་མྱོང་སུ་ལ་འབུལ། །རྗེ་རྣལ་འབྱོར་དབང་ཕྱུག་མི་བཞུགས་ན། །སྒོམ་ཆེན་གྱི་གེགས་སེལ་སུ་ལ་རེ། །རྗེ་མཆོག་གསུམ་འདུས་པ་མི་བཞུགས་ན། །མ་འགྲོ་དྲུག་གི་སྐྱབས་མགོན་སུ་ལ་ཞུ། །ལར་འདི་འདྲ་ཐུགས་ཀྱི་ཕོད་ལགས་སམ། །གཏམ་འདི་ཐོས་ཀྱིན་མིག་འབྲས་ཐང་ལ་ལྷུང་། །མི་བསམ་ཤེས་ཀྱི་བྱང་ཁོག་སྟོང་པར་སོང་། །
4-141
བོད་གངས་ཅན་གྱི་བསྟན་པ་ལན་ཅིག་ནུབ། །འཁོར་བུ་སློབ་རྣམས་ཅི་བྱ་བརྟོལ་མེད་གྱུར། །དུས་ད་ལམ་མཇལ་སྐབས་མ་མཆིས་ཀྱང་། །ཡིད་དུངས་པས་གསོལ་བ་འདེབས་ལགས་ཀྱི། །དབྱིངས་ཆོས་ཀྱི་སྐུ་ལས་མ་གཡོས་བཞིན། །མཆོག་སྤྲུལ་པའི་སྐུ་ཞིག་མྱུར་དུ་སྩོལ། །སྤྲང་བདག་གི་གདུང་དབྱངས་དེ་ལྟར་ཐལ། །ཞེས་ཤུགས་འབྱུང་དུ་སྨྲས་སོ། །དེ་ནས་སྦྲུལ་ལོ་ཧོར་ཟླ་གཉིས་པའི་ནང་དུ། གདུང་ཡིད་བཞིན་གྱི་ནོར་བུའི་ཟ་མ་ཏོག །གསང་སྔགས་ཆོས་གླིང་གི་གཟིམས་ཆུང་སྒོ་མངས་སུ་གདན་དྲངས། ཡོལ་བ་བླ་བྲེས་སོགས་ཀྱིས་བརྒྱན། སྔགས་ཐང་ཀུན་ཞལ་ཕྱེ་བའི་དབུས་སུ་ཁྲིའུའི་སྟེང་དུ་ལྷ་ཡི་ན་བཟའ་ཁྱད་གོས་དུ་མས་ཀླུབས་ཏེ་བཞུགས་སུ་གསོལ་བའི་མཐར་མར་མེ་དྲི་བསུང་ཅན་བརྒྱ་ཕྲག་གི་འཕྲེང་བ་དང་། ཙན་དན་དང་། ཨ་ཀ་རུ་ནག་པོ་དང་། སཧླའི་བདུག་སྤོས་དང་། གུར་ཀུམ་གྱི་དྲི་ཆབ་ལ་སོགས་ཏེ་ཀུན་ཏུ་བཟང་པོའི་རྣམ་པར་ཐར་པ་ལས་བྱུང་བ་བཞིན་གྱི་མཆོད་པ་མ་ཚང་བ་མེད་པ་བཤམས་སོ། །དེར་དཔལ་འཁོར་ལོ་སྡོམ་པ་ནཱ་རོ་པའི་ལུགས་བཞིན་གྱི་དཀྱིལ་འཁོར་ཞལ་ཕྱེ་སྟེ་སྒར་གཞུང་གི་བླ་མ་དབུ་ཆེ་རྣམས་ཀྱིས་མཆོད་པ་ཕུལ། དེའི་གཙོ་བོ་ནི་གྲུབ་ཐོབ་རིན་པོ་ཆེ་ཡིན། འདུ་ཁང་དུ་རྗེ་བཙུན་མཻ་ཏྲི་པའི་ལུགས་འཁོར་ལོ་བདེ་མཆོག་བཅུ་གསུམ་མ་རྡུལ་ཚོན་གྱི་དཀྱིལ་འཁོར་ཞལ་ཕྱེ་སྟེ། 
4-142
སྔགས་གྲྭ་པ་དང་། རྒྱ་མཚོ་གྲྭ་ཚང་། བཀྲ་ཤིས་མཐོང་སྨོན། ཡང་རྩེ། དཔལ་རི། སྟག་རྩེ་སྒྲུབ་སྡེ་སོགས་ལྷོ་རྒྱུད་ཀྱི་འབྲུག་དགོན་བདེ་མཆོག་པ་ཐམས་ཅད་ཚོགས། ཆེན་པོ་དང་སློབ་དཔོན་སོ་སོའང་ཕེབས། གཙོ་བོ་རྡོ་རྗེ་འཛིན་པ་ཀུན་དགའ་སྙིང་པོས་མཛད། མདོ་ཁྱམས་སུ་ཚོགས་གུར་ཆེན་མོ་ཕུབ། ཅོག་གྲྭ་རིན་པོ་ཆེ་རིན་ཆེན་དཔལ་བཟང་དང་། བྱམས་ཆེན་པའི་སློབ་དཔོན། ཅོག་གྲྭ་གསར་པའི་སློབ་དཔོན། ཅོག་གྲྭ་གདན་ས་པ་རྣམས་ཀྱིས་གཙོས། དགེ་འདུན་གྲྭ་ཚང་གཉིས་ཀྱིས་བླ་མ་མཆོད་པ་བཙུགས། གཟིམས་སྤྱིལ་དུ་ལྕང་གླིང་པ་རོལ་པའི་རྡོ་རྗེས་གཙོ་མཛད། དགེ་འདུན་སུམ་ཅུ་ཙམ་གྱིས་བླ་མ་མཆོད་པ་དང་། བྱར་ཆོས་སྡེ་པ་དཔོན་སློབ་རྣམས་ཀྱིས་དུས་འཁོར་གྱི་ཆོ་ག་མཛད། དེ་དུས་གོང་མ་ཆོས་ཀྱི་རྒྱལ་པོ་དཔལ་ཕག་མོ་གྲུ་པ་ཁུ་དབོན་གྱིས་གཙོས། དབུས་གཙང་། གཡེ་དྭགས། ལྷོ་རྒྱུད། ཀོང་ཕྱོགས་ཀྱི་སྦྱིན་པའི་བདག་པོ་དད་པ་དང་བསོད་ནམས་ཀྱི་འབྱོར་པས་ཕྱུག་པ་ཆེ་ཕྲན་ཐམས་ཅད་ཀྱིས་གདུང་འབུལ་རྔོ་ཐོགས་ཤིང་དཔངས་བསྟོད་པ་འདུག །གཞན་རྒྱལ་བའི་དབང་པོ་ཀརྨ་པས་རྟེན་བཞེངས་ལ་ཕན་པའི་དངུལ་སྲང་ལྔ་བཅུ་སོགས་གནང་། དྭགས་ལྷ་སྒམ་པོ། ར་ལུང་། སྟག་ལུང་སོགས་ཀྱིས་གདུང་འབུལ། ཆོས་སྡེ་གྲྭ་ཚང་སོ་སོའི་མཁན་སློབ་ཆེན་པོ། འཆད་ཉན། སྤྱི་བླ་གོང་འོག །དགོན་ཆེ་ཕྲན་གྱི་བླ་མ། 
4-143
གྲྭ་རིགས་སྤྱི་སྒེར་མ་ལུས་པས་རང་རང་གི་འབྱོར་པ་ཐམས་ཅད་ཕངས་སེམས་མེད་པར་ཕུལ་བ་ནི་དེབ་ཆེན་མོར་གསལ་ལོ། །གཞི་བྱེས་ཀྱི་ཕྱག་མཛོད་ནས་གདུང་ཆོག་མཆོད་འབུལ་ཞག་བཅོ་ལྔའི་རིང་བཙུགས། ཟུར་འགྱོགས་ཀྱང་མང་དུ་བྱུང་། དེ་བར་ཉིན་རེ་བཞིན་མང་ཇ་བཞི་མ་དང་། བླ་མ་རྒྱ་སྟོན་པས་མང་ཇ་རེ་ལྟར་ཆགས་སུ་མཛད། གདན་དགུང་ཚིགས་ཚོགས་འཁོར་དང་བཅས་བཟབས་པར་བཤམས། གྲོལ་ཉིན་མཁན་སློབ། ཆེན་པོ། འཆད་ཉན་རྣམས་ལ་སོ་སོའི་གོ་བབས་དང་བསྟུན་པའི་འབུལ་བ་རྣམ་བཞག །དགེ་འདུན་བྱིན་ལ་གོས་དར་འབའ་ཞིག་གིས་ཆོག་ཡོན་རྣམས་བསྒྲུབས། དགོངས་རྫོགས་དངོས་གཞིའི་དུས། གདན་ས་ཆེན་པོ་དཔལ་ར་ལུང་ཐེལ་ནས། རྗེ་བཙུན་མི་ཕམ་ཆོས་ཀྱི་རྒྱལ་པོ་དཔོན་སློབ་བཞི་བརྒྱ་ལྷག་ཙམ་སྤྱན་དྲངས། རྙེད་པ་དང་བཀུར་སྟི་རྒྱ་ཆེ་ཞིང་སྡིག་དང་མ་འདྲེས་པ་བསྔགས་པར་འོས་པ་གྱ་ནོམ་པ་དང་བཅས། དགེ་འདུན་འདུས་པ་རྒྱ་མཚོ་ཉིས་སྟོང་བརྒྱད་བརྒྱ་དང་། གཞི་བྱེས་ཀྱི་བླ་མ་དབུ་ཆེ་བརྒྱ་ཕྲག་ཙམ་གྱི་དབུས་སུ་འབུལ་བ་དགུ་ཚན་བཅུ་གཉིས། བྱ་ཆོས་ཀྱི་རྒྱལ་པོར་དགུ་ཚན་བཞི། གྲུབ་ཐོབ་རིན་པོ་ཆེར་དགུ་ཚན་གསུམ། རྡོ་རྗེ་འཛིན་པ་ཆེན་པོར་བཅུ་གཅིག་ཚན། བྱེས་ཀྱི་དབུ་ཆེ་དྲག་པ་རྣམས་ལ་དགུ་ཚན། གཞན་དབུ་ཆེ་བྱིན་ལ་གོ་རིམ་དང་བསྟུན་པའི་དགུ་ཚན་ནས་ལྔ་ཚན་གྱི་བར། 
4-144
ཕལ་ཆེར་ལ་རྟེན་ལི་མ་རེས་གཙོས་པའི་རྣམ་གཞག །སྔགས་ཅོག་བྱམས་ཆེན་པ་སོགས་གྲྭ་ཚང་ཆེ་བ་རྣམས་ཀྱི་དགེ་འདུན་རེ་ལ་ཁལ་ལྔ་མའི་རྩིས། བྱིན་ལ་ཁལ་གསུམ་མའི་རྩིས་ཀྱི་ཇ། གོས་དར། རྟ་དྲེའུ། ཁྲོ་བཟངས། གུར་ཆས་སོགས་ཕུལ། རྒྱལ་བའི་དབང་པོ་ཀརྨ་པ་ཡབ་སྲས། དྭགས་ལྷ་སྒམ་པོ། སྟག་ལུང་། འགག་གྲོང་དུ་ཁྲི་རིན་པོ་ཆེ། རྒྱལ་རྩེར་སྐུ་སྐྱེ་རིན་པོ་ཆེ། རྩེ་ཆེན་དུ་མཁན་རིན་པོ་ཆེ་རྣམས་ལ་དགོངས་རྫོགས་སྐུ་སྐལ་འབུལ་མི་བརྫངས། གཉལ་སྡེ་དྲུག །པད་མོ་བཀོད་སོགས་ལ་མང་ཇ་སྤྱི་འགྱེད་ཁལ་རེ་བྲེ་ལྔ་མའི་རྩིས། མཁན་སློབ་རྣམས་ལ་རྣམ་གཞག་དང་བཅས་པས་དགེ་འདུན་མཉེས་པར་བྱས། བྱང་ངམ་རིང་ཆོས་སྡེ། ཡ་ག་ཆོས་སྡིངས། དཔལ་འཁོར་ཆོས་སྡེ་རྣམས་སུ་མང་ཇ། རིན་སྡིངས་གྲྭ་ཚང་དུ་མང་ཇ་སྐུ་མཆོད་ཐེས་དང་བཅས་པ། རྩེ་ཆེན་ཆོས་སྡེ། འབྲོང་རྩེ་ཆོས་སྡེ་རྣམས་སུ་མང་ཇ། མཁན་སློབ་ལ་རྣམ་གཞག་དང་བཅས་པ་ཕུལ། སྟག་ལུང་གླིང་ལ་ཇ་འགྱེད། གསང་ནེའུ་ཐོག་ཏུ་མང་ཇ། གོང་དཀར་ཆོས་སྡེར་མང་ཇ་སྤྱི་རྫས་རྡོ་རྗེ་གུར་གྱི་འཕྱར་དར་སྤུས་གཙང་བ། གཞན་ཡང་དབུས་གཙང་གི་ཆོས་སྡེ་གྲགས་ཅན་ཕལ་ཆེ་བ་ལ་མང་ཇ་འགྱེད་དང་བཅས་པ་རིམ་པས་བརྫངས། ལྷོ་རྒྱུད་ཀྱི་མ་དགོན་རྣམས་ལ་འགྱེད་ཁལ་རེ་མའི་རྩིས། གནས་ཆེན་ཙ་རི་ཏྲའི་ལས་ཚན་བཅུ་གསུམ། 
4-145
སྒྲུབ་སྡེ་མེ་རག་མདོ་ཕན་ཚུན། མཚོ་མཇུག །རྟ་སྡིངས་སོགས་ལ་མང་འགྱེད། བླ་མ་རྣམས་ལ་རྣམ་གཞག་དང་བཅས་པ། ལྷོ་རྒྱུད་ཀྱི་སྐྱེ་བོའི་ཚོགས། གཉལ་ལོར་བྱར་གསུམ་གྱི་བྱ་ཆུང་སྲིད་ཀྱི་མི་སྡེ་ལྡིང་དུད་ཐེམ་གྲངས་སོ་སོ་ལ་སྒོ་འགྱེད་གོང་བརྒྱབ་ཁལ་རེ་བྲེ་ལྔ་མའི་རྩིས་ཀྱི་དངོས་པོ་གཡུ། སྤོས་ཤེལ། ཁྲོ་ཟངས། གོས་སྣམ། གོ་ཁྲབ། མཛོ་གཡག་དང་བཅས་པ་སོང་ཚུལ་རྒྱས་པ་དགོངས་རྫོགས་བསྒྲུབས་པའི་དེབ་ཆེན་མོར་གསལ་པས་འདིར་མ་བཀོད་དོ། །དེ་ལྟར་རྣམ་ཐོས་བུའི་འབྱོར་པ་ལྟ་བུ་ཕངས་པ་མེད་པར་བཏང་། གདུང་ཡིད་བཞིན་གྱི་ནོར་བུ་སོ་སོར་བགོས་ཏེ་ཕྱོགས་ཐམས་ཅད་དུ་གདན་དྲངས་ནས་མཆོད་དོ། །དེ་ནས་གསང་སྔགས་ཆོས་གླིང་དུ་ནང་རྟེན་སྐུ་འདྲ་རིན་པོ་ཆེ་སྐུ་ཚད་དང་མཉམ་པ། ཟངས་ཁལ་བཅུ། གསེར་ཞོ་ལྔ་བཅུ་ལས་གྲུབ་པ། བལ་པོ་བི་ཛ་རཱ་ཛས་མགོ་བྱས་ཀྱིས་བསྒྲུབས། དུས་མཉམ་དུ་བླ་མ་སྙེ་ལྟག་པ་སོགས་རིག་བྱེད་པ་འགས། འཕགས་པ་འཇིག་རྟེན་དབང་ཕྱུག་ནས། འཇམ་པའི་དབྱངས་ཆོས་ཀྱི་གྲགས་པ་ཡན་གྱི་སྐུ་སྐྱེ་ན་རིམ་སྨན་འདམ་ལས་གྲུབ་པ། ན་བཟའ་གོས་དར་གསེར་གཤོག་གིས་བརྒྱན་པ། སྐུ་ཤ་ཞལ་གསེར་སོགས་ལ་གྲང་གསེཪ་བཏུལ་མ་ཞོ་ཉི་ཤུ་དང་། དངུལ་ཞོ་བཞི་བཅུ། བལ་པོའི་ཡོན་གསེར་རྐྱང་ཞོ་བཞི་བཅུ། ལྷག་མ་གོས་དར་གོང་བརྒྱབ། 
4-146
འཛུགས་སྟོན། བར་སྟོན། གསེར་སྟོན་སོགས་ཀྱིས་བཟོ་རིས་པ་ཀུན་མགུ་བར་མཛད། ནང་བཞུགས་ཀྱི་གཙོ་བོར་རྗེ་ཐམས་ཅད་མཁྱེན་པ་ཆེན་པོ་དེ་ཉིད་ཀྱི་ཐུགས་ལྗགས་སྤྱན་གསུམ་མ་ཚིག་པ་མ་ཉམས་པ། རིང་བསྲེལ་ཁ་དོག་ལྔ་པ། གདུང་རུས། ན་བཟའ། དེ་བཞིན་གཤེགས་པའི་འཕེལ་གདུང་། ས་དཀར་གྱི་བྱིན་རླབས་རྟེན། སྐུ་འདྲ་རྣམ་གསུམ། རྒྱུད་སྡེ་རིན་པོ་ཆེ་ནས་གསུངས་པའི་གཟུངས་མ་ཚང་བ་མེད་པ་གནོད་སྦྱིན་འཁོར་ལོའི་བར་བཞུགས། ཁྲི་ཅོག་མཆོད་རྫས་དང་བཅས་པ་གྲུབ། རབ་ཏུ་གནས་པ་རྒྱས་པར་མཛད། སྐུ་མཆོད་ཆེན་མོའི་དུས་སྔགས་གྲྭ་དང་རྒྱ་མཚོ་གྲྭ་ཚང་པ་རྣམས་ཀྱིས་སྒྲུབ་མཆོད་ཞག་འགའ་བཙུགས། ལྷོ་རྒྱུད་ཀྱི་ཆོས་སྡེ་ཕལ་ཆེར་ལ་མང་འགྱེད་དང་། བྱར་ཕག་མགོ་རྡོ་ཟམ་མན་གྱི་མི་སྡེ་ལ་ཐེམ་འགྱེད་ཁལ་རེ་མ་བཏང་། རྟེན་བཞེངས་ཆེན་མོ་ས་གང་དུ་མཛད་ཀྱི་བཀའ་གྲོས་བཅད་གཞིའི་སྐབས། ལྷུན་པོ་རྩེ་ནས་མི་སྣ་འབྱོར། དབུས་གཙང་ཐམས་ཅད་ཀྱི་ཅོད་པན་ཡིན་ཞིང་འདི་ཕྱོགས་ནས་དགོས་ཆ་རྫོང་བའང་ཐག་ཉེ་བས། གདན་ས་ར་ལུང་རང་དུ་མཛད་པ་འགབ་ཚུལ་གནང་བྱུང་བས་དེ་ཀར་ཐུགས་ཐག་བཅད། བྱེས་དང་རྟེན་བཞེངས་ཀྱི་ཁུར་སྡེ་པ་ཕྱག་མཛོད་པས་མཛད། གཞུང་གི་ལས་ཚན་རྙིང་པ་རྣམས་དང་ལྷན་ཅིག་པར་ར་ལུང་དུ་བྱོན། སྒར་གཞུང་གི་གཞིའི་ཐུགས་ཁུར་དཔོན་ཆེན་རིན་པོ་ཆེ་རང་གིས་བཞེས། 
4-147
ཆོས་རྗེ་ལྷ་ལྔ་བ་སོགས་ཁམས་འགྲུལ་པ་རྣམས་ཀྱི་རྫོང་དར་མཛད། ཕྱག་མཛོད་ནས་ཟངས་བསྒྲུབ་བཏང་བ་རྣམས་ཀྱང་འབྱོར། ལྷུན་རྩེ་ནས་ས་སྐྱོང་དོན་གྲུབ་རྡོ་རྗེས་སྐུ་རྒྱུ་ཟངས་ཁལ་དྲུག་ཅུ། ས་སྐྱ་ནས་བདག་ཆེན་རིན་པོ་ཆེ་ཁྲིའི་དྲུང་ནས་གསེར་མགུར་ཞོ་བཅུ་གཉིས། རྗེ་གོང་མ་རྣམས་ཀྱི་བྱིན་རླབས་རྟེན་ཁྱད་པར་དུ་འཕགས་པ། ཤྲཱི་རི་བསམ་གླིང་གདན་ས་བ་སོགས་སྟོད་ཕྱོགས་ཀྱི་དབུ་ཆེ་གྲྭ་རིགས་རྣམས་ཀྱིས་ཟངས་གཏོས་ཆེ་བ་བྱུང་། རྟོགས་ལྡན་གྲོ་མོ་བ་བློ་གྲོས་རྣམ་རྒྱལ་གྱིས་གསེར་ལ་སོགས་པའི་རྒྱུ་དངོས་མང་པོ་དང་བཅས་འབྱོར། འདིས་སྟོད་དུ་གློ་བོ་རྒྱལ་བློན་གྱི་མཆོད་གནས་མཛད། བརྟུལ་ཞུགས་ཀྱི་སྤྱོད་པས་རོ་ལངས་བཏུལ་བ་སོགས་རྟོགས་ལྡན་གྱི་གྲགས་ཆེའོ། །ཉང་སྟོད་སྨད་ཀྱི་སྦྱིན་བདག་ཆེ་ཕྲན། དབུ་ཆེ་གྲྭ་རིགས་ཐམས་ཅད་ཀྱིས་ཀྱང་གསེར། ཟངས། གཡུ་ཕྲ། གྲི་གུ་ནས་དཔོན་ས་སྐུ་མཆེད་ཀྱིས་གསེར་ཞོ་དྲུག་ཅུ། མཚོ་སྒོ་ནས་ལྕམ་སྲིང་གིས་གསེར་ཞོ་བཅུ་གཉིས་སོགས་ཕུལ། འབྲོག་དགོན་རྣམས་ཀྱིས་སོལ་བའི་ཁུར་བླངས། རྒྱལ་བ་སྟེ་ཤིང་ཕོ་རྟ་ལོ་ཧོར་ཟླ་བཞི་པའི་ཚེས་བཅོ་ལྔ་ནས་བཟོ་གྲྭ་བཙུགས། སྐུ་རྒྱུ་ཟངས་རྩེ་སྲང་གི་ཁལ་བཞི་བརྒྱ། སྐུ་གསེར་ཞོ་ཕྱེད་དང་བརྒྱད་བརྒྱ་ལས་གྲུབ་པ། རྗེ་བཙུན་བྱམས་པ་བཟང་པོའི་འདུག་སྟངས། ལོངས་སྤྱོད་རྫོགས་སྐུའི་ཆ་ལུགས་འཛིན་པ། 
4-148
སྐུ་ཚད་ཁྲུ་བཞི་བཅུ་པ། བལ་པོའི་བཟོ་བོ་དཔོན་མོ་ཆེ་པ་ལུང་ཀུ་ཤིང་དང་། ཛ་གར་ཕ་ལས་གཙོས་པ་དྲུག་དང་ཐོབ་རྒྱག་སྒར་པ་རགས་ཤིང་གོམས་པས་ཟླ་བ་བཅུ་གསུམ་ལ་གྲུབ། གསེར་འཕྲུལ་གསེར་གསོལ་ཐམས་ཅད་གཟིམས་དཔོན་ཚངས་པས་བྱས། སྲོག་ཞུ་ལ་གཡུ་སྤུས་གཙང་དང་ཤེལ་རིགས་ཁྱད་དུ་འཐོན་པའི་ཕྲ་བཀོད། ཁྲི་གདོང་གསུམ་པ། གླང་པོ་ནས་ཁྱུང་གི་བར་དྲུག་འགྱོགས་རྒྱས་པ། དབུ་འོད་ལ་པ་ཏྲ་དང་བཅས་པ་རིག་བྱེད་པ་སྤྲུལ་སྐུ་བློ་གྲོས་ཉི་མས་བགྱིས། ནང་བཞུགས་ལ་རྒྱལ་བའི་དབང་པོ་ཐམས་ཅད་མཁྱེན་པ་ཆེན་པོ་དེ་ཉིད་ཀྱི་དབུ་ཐོད་རིལ་པོ་རིང་བསྲེལ་གྱིས་བརྒྱན་པ། འཕར་བའི་གདུང་ལ་འཁོར་ལོ་སྡོམ་པ་ཞལ་བཞི་ཕྱག་བཅུ་གཉིས་པ་གསལ་བ་དང་བཅས་པ། དབུ་ལོ། ན་བཟའ། དེ་བཞིན་གཤེགས་པའི་འཕེལ་གདུང་། དཀར་རྒྱུད་ན་རིམ་གྱི་གདུང་རིང་བསྲེལ། སྐུ་བལ། ན་བཟའ། བཀའ་གདམས། ས་དཀར་རྙིང་གསུམ་གྱི་བྱིན་རླབས་རྟེན་ཁྱད་པར་དུ་གྱུར་པ། གཟུངས་དྲེའུའི་རྒྱབ་བཞི། དུས་འཁོར་བདེ་དགྱེས་མཱ་ཡ་སོགས་ཀྱི་རྒྱུད། བརྒྱད་སྟོང་པ་གསེར་མ་པོ་ཏི་ཉི་ཤུ་རྩ་གསུམ། གསུང་རབ་སྐྱ་བོ་ཏ་གསུམ་བརྒྱ་བརྡལ་བ། དེ་བཞིན་གཤེགས་པ་དང་། བྱམས་འཇམ་དབྱས་ཀྱི་གསེར་སྐུ་བརྒྱ་ལྷག །དཀར་རྒྱུད་གོང་མའི་སྐུ་འདྲ་ཕྱག་ནས་མ་མང་བ། རྒྱུད་འགྲེལ་དང་དཀར་རྒྱུད་བཀའ་འབུམ་པོ་ཏི་ཉིས་བརྒྱ།
4-149
གདུང་ཚ་གྲངས་ལས་འདས་པ། གནོད་སྦྱིན་འཁོར་ལོ། འབྲུ། རིན་པོ་ཆེ། དར་ཟབ་ཀྱིས་ཕྱུག་པ་དང་བཅས་པའི་གཟུངས་འབུལ། ཞབས་དྲུང་རིན་པོ་ཆེའི་ཕྱག་ཕྱི། རྡོ་རྗེ་འཛིན་པ་ཆེན་པོ་དང་། ཅོག་གྲྭ་རིན་པོ་ཆེ། སྔགས་གྲྭ་སློབ་དཔོན་པ་ལྷ་དབང་བློ་གྲོས་རྣམས་ཀྱིས་མཛད་དོ། །གང་ལ་བྱ་བ་བྱས་པས་རྒྱལ་བ་མ་ལུས་པ་མཉེས་པའི་མཆོད་སྤྲིན་རླབས་པོ་ཆེས་ཚོགས་རྣམ་པ་གཉིས་འཕེལ་བར་གོ་ནས། དེ་སྐབས་ཀྱི་བཟོ་བོ་དང་སྒར་པའི་འཕྲལ་གྱི་དགོས་ཆ་མ་ལུས་པའི་མཐིལ་ལྷུན་རྩེ་ནས་སྩལ། གཞན་གཙང་ཉང་ལྷོ་འབྲོག་དབུས་སོགས་ཀྱི་གྲྭ་རིགས་ཐམས་ཅད་ཀྱིས། ནས་ཤ་མར་ཇ་སོགས་ཏེ་དགོས་དགུ་འབད་མེད་དུ་བྱུང་། ལོ་ཆེན་སྤྲུལ་པའི་སྐུས། ཇ་སྤོབས་རྩེ་བཞི། གོང་དཀར། སྐྱིད་ཤོང་། འཕྱོང་རྒྱས། ལྷོ་འབྲེག་ནས་ཀྱང་རྟེན་འབུལ་རྒྱས་པ་འདུག །རབ་སྟོན་གྱི་སྦྱིན་བདག་མ་མོ་འབྲོང་རྩེ་དཔོན་བློན་གྱིས་མཛད། ཟུར་འགྱོགས་ཤིན་ཏུ་མང་། བུར་སྟོན་རྗེ་བཙུན་ཀུན་དགའ་དཔལ་སྒྲོན་གྱིས་སྩལ། རྩེ་ཆེན་ནས་རྗེ་བཙུན་སྐུ་གཞོན་པས་དཀར་མེ་ཁོར་ཡུག་ཇི་སྲིད་ཀྱི་བར་བཙུགས། གདན་ས་རིན་པོ་ཆེ་དང་། དབུ་ཆེ་སྦྱིན་བདག་ཐམས་ཅད་ཀྱིས་སྙན་དར་བཟང་པོ་ཕུལ་བ་སོགས་རྒྱས་པར་འབུལ་དེབ་ཏུ་གསལ་ལོ། །མྱོས་བྱེད་དེ་ཤིང་མོ་ལུག་ལོ་ཧོར་ཟླ་དྲུག་པའི་ཚེས་གསུམ་ནས་རྟེན་སྟ་གོན་ཚུགས། 
4-150
འབྲུག་པ་རིན་པོ་ཆེ་མི་ཕམ་ཆོས་ཀྱི་རྒྱལ་པོ་དགེ་འདུན་ལྔ་བརྒྱ་དང་ལྷན་ཅིག་པས་དཔལ་འཁོར་ལོ་སྡོམ་པའི་དཀྱིལ་འཁོར་ལ་བརྟེན་ནས་རབ་ཏུ་གནས་པ་ཞག་བདུན་གྱི་བར་དུ་ཞི་རྒྱས་ཀྱི་སྦྱིན་སྲེག་དང་བཅས་པ་གནང་། དངོས་གཞིའི་ཉིན་ཞབས་དྲུང་དུ་འབུལ་བ། སྐུ་བེར། བླ་བྲེས། ཆིབས་སོགས་ཀྱིས་གཙོས་པའི་དགུ་ཚན་གསུམ། ཡུམ་དྲུང་ལ་དགུ་ཚན་གཉིས། གཞན་རྡོ་རྗེ་འཛིན་པ་ཆེན་པོ། སྔགས་ཅོག་གི་སློབ་དཔོན། ཤྭ་རགས་འགྲོ་མགོན། སྤོས་སྐྱའི་བླ་མ་སོགས་དབུ་ཆེ་བརྒྱ་ལྷག་ཙམ་ལ་དགུ་ཚན་ནས་གསུམ་ཚན་གྱི་བར་ཅི་རིགས་པའི་རྣམ་གཞག །ཆོ་ག་པ་རྣམས་ལ་ཡོན། ཉེ་འཁོར་གྱི་དགོན་ཕྲན་རྣམས་ལ་འགྱེད། བཟོ་བོ་ལ་ཡོན་གསེར་དངུལ་ཞོ་ལྔ་བརྒྱའི་རྩིས། དེ་ལྷག་ཇ་གོས་དར་གསེར་ཆས་སོགས་ཡོན་གྱིས་མགུ་བ། སྟོན་མོ་སྟོན་རྒྱབ། གཞན་བཟོ་རིས་པ་རྣམས་ལ་ཡོན་གནང་སྦྱིན་རྒྱས་པར་བསྒྲུབས། དེ་སྐབས་མི་འགྱང་བར་ར་ལུང་བསྐོར་ཆེན་ཡང་ཚུགས། མི་ཚོགས་ལྷག་པར་ཆེ། སྐུ་གདུང་ལས་དཔལ་འཁོར་ལོ་སྡོམ་པ་ལྷན་སྐྱེས་འབུར་དུ་དོད་ལ་ཤིན་ཏུ་གསལ་བར་བྱོན་སྣང་བ། ཀུན་ལ་མཇལ་ཁ་བཏང་། གཞན་ཕྱོགས་སུ་གདན་དྲངས་པའི་གདུང་རྣམས་ལ་རིང་བསྲེལ་མང་དུ་བྱོན་ནོ། ། དེ་ནས་ལྷོ་བྲག་མཁར་ཆུར་མི་འཁྲུགས་པའི་སྐུ་ཞིག་བཞེངས་ན། གདུལ་བྱར་གྱུར་པ་མཐའ་དག་གི་ལས་ཀྱི་སྒྲིབ་པ་སྦྱོང་བ་དང་། 
4-151
ཞིང་དེར་སྐྱེ་བའི་རྟེན་འབྲེལ་ཡོད་ཅེས་སྔ་གོང་དུ་ཕེབས་པ། གསུང་ཇི་བཞིན་བསྒྲུབ་པའི་ཕྱིར། ཅོག་གྲྭ་རིན་པོ་ཆེ་ཤེས་རབ་ཆོས་འཕགས་ཀྱིས་ཁུར་བཞེས། སྐུ་གསེར་ཞོ་ཉིས་བརྒྱ། བཟོ་རིག་པ་དང་སྒར་པའི་འཕྲལ་ཆས། ཡོན་རྫོངས་ཕྱེད་དང་བཅས་པ་གནང་། འདི་ཉིད་ཐོག་མར་འབྲས་ཡུལ་སྐྱེད་ཚལ་དུ་མདོ་ཕྱོགས་ཀྱི་གསན་པ་མཛད། རྒྱལ་བའི་དབང་པོ་ཉིད་ལ་མི་ཕྱེད་པའི་དད་པ་ཐོབ། གནས་ལུགས་ཀྱི་རང་ཞལ་གཟིགས། ལོངས་སྤྱོད་ཆར་བཞིན་དུ་བབས་ཀྱང་དངོས་པོའི་འཛིན་པ་དང་བྲལ། གྲྭ་ཚང་ལོ་མང་པོའི་བར་བསྐྱངས་ཏེ་འཕྲིན་ལས་བསམ་གྱིས་མི་ཁྱབ་པ་ཞིག་གོ །གཞན་ཅི་དགོས་གཞུང་གི་ཕྱག་མཛོད་ནས་མཛད། བཅོམ་ལྡན་འདས་མི་འཁྲུགས་པ་སྤྲུལ་པ་སྐུའི་ཆ་བྱད་ཁྲུ་བཅོ་ལྔ་པ། སྐུ་རྒྱུ་ཟངས་ཁལ་དྲུག་ཅུ་ལས་གྲུབ་པ། བལ་པོ་དེ་ཝ་རཱ་ཛ་དང་། ཀཱིརྟི་ཕ་ལས་མགོ་བྱས་བདུན་གྱིས་ཟླ་བ་ལྔ་ལ་ཚར། གླང་པོས་བཏེག་པའི་ཁྲི་གདོང་གསུམ་པ། ཁྲི་རྒྱབ་དྲུག་འདེགས་རྒྱས་པ། ལྡེབས་ཀ་འབྲུག་མཁྱུད་མ་བཟོ་ཁྱད་ཀྱིས་འཐོན་པ། རིག་བྱེད་པ་ཡར་ཀླུངས་པ་སྤྲུལ་སྐུ་བློ་གྲོས་ཉི་མ་གྲོགས་མཆེད་ཀྱིས་བྱས་པ། ཚ་གསེར་གྲང་གསེར་འདུལ་སྦྱོངས་བཟོ་བོའི་དོ་དམ་ཐམས་ཅད་ཨ་བོ་ཚངས་པས་བྱས་ཤིང་ཞབས་ཏོག་ཏུ་འགྱུར་བ་བྱུང་། ནང་བཞུགས་ཆོས་སྐུའི་རིང་བསྲེལ་གཏོས་ཆེ་བ། 
4-152
སྐུ་གདུང་ཡུངས་འབྲུ་ལྟ་བུའི་རིང་བསྲེལ། སྐུ་བལ་རིང་བསྲེལ། ཁྱད་པར་ཐམས་ཅད་མཁྱེན་པ་ཆེན་པོའི་གདུང་རིང་བསྲེལ་མང་དུ་བཞུགས། གསུང་རབ་གཏོས་ཆེ་བ། གནོད་སྦྱིན་འཁོར་ལོ་འབྱོར་པ་རྒྱས་པའི་རྫས་དང་ལྷན་ཅིག་པ་རྣམས་འཁྲུལ་པ་མེད་པ། རྒྱལ་བའི་དབང་པོ་ཉིད་ཀྱི་ཕྱག་ལེན་ཇི་ལྟ་བ་དང་། རབ་ཏུ་གནས་པ་ཅོག་གྲྭ་དཔོན་སློབ་དགེ་འདུན་བརྒྱ་ཕྲག་ཕྱེད་དང་གཉིས་ཀྱིས་མཛད། བཟོ་བོ་རྣམས་ལ་སྟོན་མོ་སྟོན་རྒྱབ། བལ་པོའི་ཡོན་ཕལ་ཆེར་གསེར་རྐྱང་། དེ་ལྷག་གོང་བརྒྱབ་དང་བཅས་གསེར་ཞོ་ཉིས་བརྒྱའི་རྩིས། བཟོ་རིས་པ་གཞན་རྣམས་ལ་ཡོན་གནང་སྦྱིན། ཆོག་ཡོན་སོགས་ཕྱག་མཛོད་རང་ནས་མཛད་པ་ཡིན་ནོ། །འདིར་འབད་རྣམ་དཀར་དགེ་བའི་མཚོ། །སྲིད་པའི་མཐའ་མཉམ་འཕེལ་གྱུར་ནས། །རྣམ་མཁྱེན་ཤུལ་རིངས་མགྲོན་རྣམས་ལ། །གདུང་བ་སེལ་བའི་བདུད་རྩིར་ཤོག །དེ་ལྟར་རྒྱལ་དབང་ཐམས་ཅད་མཁྱེན་པ་ཆེན་པོའི་རྣམ་པར་ཐར་པ་རྒྱ་མཚོ་ལྟ་བུའི་འཕྲོས་ཅུང་ཟད་བརྗོད་པ་དད་པའི་རྦ་རླབས་ཞེས་བྱ་བ། བླ་མ་དམ་པ་རྡོ་རྗེ་འཛིན་པ་ཀུན་དགའ་སྙིང་པོ་དང་། སེམས་དཔའ་ཆེན་པོ་རིན་ཆེན་དཔལ་བཟང་གི་གསུང་ཐོད་དུ་བཅིངས་ཤིང་། རང་དང་གཞན་གྱི་དད་པ་གསོ་བའི་ཕྱིར་དུ། རྗེ་བཙུན་དེ་ཉིད་ཀྱི་ཞབས་རྡུལ་ལ་རེག་ཅིང་། གསུང་གི་གསང་བ་ཆ་ཤས་ཙམ་འཛིན་པ་བསོད་སྙོམས་པ་ངག་དབང་བཟང་པོས་སྦྱར་བའི་ཡི་གེ་པ་ནི། ཉང་སྟོད་འཆད་མངས་པ་ཤཱཀྱའི་བཙུན་པ་བློ་གྲོས་རིན་ཆེན་གྱིས་བགྱིས་པའོ།། །།མངྒལྃ།།


目录
དཔལ་འབྲུག་པ་ཐམས་ཅད་མཁྱེན་པ་ཆེན་པོའི་རྣམ་པར་ཐར་པ་རྒྱ་མཚོ་ལྟ་བུའི་འཕྲོས་ཆ་ཤས་ཙམ་བརྗོད་པ་དད་བའི་རྦ་རླབས་ཞེས་བྱ་བ།